1-2. Ano an pag-uulayan ta sa artikulong ini?

 ANO an mamamatian mo pag an sarong package na kaipuhan mong marhay dai mag-abot sa petsang inaasahan mo? Madidisganar ka daw? Tama sana an sinasabi kan Talinhaga 13:12: “An inaantisipar na naaatraso nagpapasakit sa puso.” (NWT) Pero paano kun maaraman mo na may marahayon na mga dahilan palan kaya dai nag-abot an package sa petsang inaasahan mo? Kun arog kaiyan, posibleng marhay na magigin mapasensiya ka asin andam na mahalat.

² Sa artikulong ini, sisiyasaton ta an nagkapirang prinsipyo sa Bibliya na makakatabang sato na ‘mapasensiyang maghalat’ asin padagos na gibuhon iyan. (Miq. 7:7, NWT) Dangan, pag-uulayan ta an duwang sitwasyon na diyan kaipuhan tang halaton si Jehova na humiro. Panghuri, pag-uulayan ta an mga bendisyon na nakatagama para sa mga andam na maghalat ki Jehova.

3. Anong prinsipyo an itinutukdo kan Talinhaga 13:11?

³ Iinilustrar sa Talinhaga 13:11 kun taano ta kaipuhan an pagigin mapasensiya. Sinasabi kaiyan: “An kayamanan na madaling nakua, madiit, pero an kayamanan kan saro na nagtitipon kaiyan nin padiit-diit madakul.” (NWT) An prinsipyo? Sarong kadunungan na maingat asin mapasensiyang gibuhon an mga bagay-bagay.

4. Anong prinsipyo an itinutukdo kan Talinhaga 4:18?

⁴ Sinasabi sato kan Talinhaga 4:18 na “an dalan kan mga matanos siring sa maliwanag na liwanag kun aga, na nagliliwanag nin nagliliwanag sagkod na magin lubos an liwanag nin aldaw.” (NWT) An mga tataramon na ini angay sanang iaplikar sa kun paano ihinahayag ni Jehova sa saiyang banwaan an saiyang katuyuhan —luway-luway. Alagad, puwede man iaplikar an bersikulong ini sa kun paano nag-uuswag sa espirituwal an sarong Kristiyano. An pag-uswag sa espirituwal dai puwedeng hidalion. Nangangaipo iyan nin panahon. Kun maigot tang pag-aadalan asin iaaplikar an mga sadol na inaako ta paagi sa Tataramon nin Diyos asin sa saiyang organisasyon, luway-luway kitang magkakaigwa nin arog-Cristong personalidad. Madakul man an satong kaaraman manungod sa Diyos. Pag-isipan kun paano iinilustrar ni Jesus an puntong iyan.

5. Paano iinilustrar ni Jesus an luway-luway na pagtalubo?

⁵ Naggamit si Jesus nin ilustrasyon para ipaliwanag kun paano an mensahe kan Kahadian na ihinuhulit ta nakakaagid sa sarong sadit na banhi na luway-luway na nagtatalubo sa mga tawong sadiyosan an puso. Sinabi niya: “An banhi minatubo saka minalangkaw—kun paano, dai niya [an parasabwag] aram. An daga mismo luway-luway na nagtatao nin bunga, inot nguna an pagtambo, minasunod an pagluwas kan uhoy, ultimo iyo an pagkaigwa kan birilog na tipasi sa uhoy.” (Mar. 4:27, 28) Anong buot sabihon ni Jesus? Ipinapaliwanag niya na kun paanong an sarong tinanom luway-luway na nagtatalubo, an sarong tawo man na nag-ako kan mensahe kan Kahadian luway-luway na nagtatalubo sa espirituwal. Halimbawa, mantang mas nagigin harani ki Jehova an satong mga tinutukduan sa Bibliya, nagpupuon man na mahiling niyato sainda an dakul na marahay na pagbabago. (Efe. 4:22-24) Pero dapat niyatong tandaan na si Jehova an nagpapatalubo kan sadit na banhi na iyan.—1 Cor. 3:7.

6-7. Ano an manunudan ta sa paagi kan paglalang ni Jehova kan daga?

⁶ Sa gabos na ginigibo ni Jehova, mapasensiya siyang nagtatao nin ano man na kinakaipuhan na panahon tanganing matapos an saiyang trabaho. Ginigibo niya iyan para sa kamurawayan kan saiyang pangaran asin para sa kapakinabangan kan iba. Halimbawa, pag-isipan kun paano luway-luway na inandam ni Jehova an daga para sa katawuhan.

⁷ Manungod sa kun paano linalang ni Jehova an daga, sinasabi kan Bibliya na itinalaga niya an  “mga sukol kaiyan,” itinalbong an “mga patungtungan kaiyan,” asin ibinugtak an “gapong panganto kaiyan.” (Job 38:5, 6, NWT) Nagtao pa ngani siya nin panahon para hurop-hurupon an saiyang mga ginibo. (Gen. 1:10, 12) Naiimahinar mo daw kun ano an namatian kan mga anghel mantang nahihiling ninda na luway-luway na nahahaman an mga piglalalang ni Jehova? Siguradong ugmahon sinda sa mga iyan! May pagkakataon ngani na nagpuon sindang ‘magkururahaw sa kaugmahan.’ (Job 38:7, NWT) Ano an manunudan ta diyan? Rinibong taon an nag-agi bago natapos an mga linalang ni Jehova, pero kan hilingon na ni Jehova an gabos na bagay na maingat niyang marhay na linalang, sinabi niya na “marahayon iyan.”—Gen. 1:31, NWT.

8. Ano an pag-uulayan ta ngunyan?

⁸ Arog kan nahiling niyato sa nasambit na mga halimbawa, makakahiling kita nin dakul na prinsipyo sa Tataramon nin Diyos na nagtutukdo sato na kaipuhan tang magin mapasensiya. Pag-uulayan ta ngunyan an duwang espesipikong sitwasyon na diyan kaipuhan tang magin andam na maghalat ki Jehova.

9. Ano an sarong sitwasyon na diyan kaipuhan tang halaton si Jehova?

⁹ Tibaad kaipuhan tang halaton an simbag sa mga pamibi ta. Pag namimibi kita para sa kusog na maatubang an sarong pagbalo o para sa tabang na mapangganahan an sarong kaluyahan, tibaad mamatian ta na garo baga haluyon simbagon an mga pamibi ta. Taano ta dai tulos sinisimbag ni Jehova an gabos na pamibi ta?

10. Taano ta kaipuhan tang magin mapasensiya kun manungod sa satong mga pamibi?

¹⁰ Dinadangog na marhay ni Jehova an satong mga pamibi. (Sal. 65:2) Para saiya, an satong sinserong mga pamibi patunay kan satong pagtubod. (Heb. 11:6) Interesado man si Jehova na mahiling kun gurano kita kadeterminado na mamuhay kauyon kan satong mga pamibi asin na gibuhon an saiyang kabutan. (1 Juan 3:22) Kaya tibaad kaipuhan niyato na magin mapasensiya asin humiro kauyon kan satong mga pamibi pag may hinihinguwa kitang mapangganahan na maraot na gibo o kaluyahan. Ipinarisa ni Jesus na may mga pamibi kita na tibaad dai tulos simbagon. Dinagka niya kita: “Padagos na maghagad, asin itatao iyan sa saindo; padagos na maghanap, asin makakakua kamo; padagos na magtuktok, asin bubuksan iyan sa saindo; huli ta an gabos na naghahagad nakakaresibi, asin an gabos na naghahanap nakakakua, asin an gabos na nagtutuktok binubuksan.” (Mat. 7:7, 8) Pag sinusunod ta an sadol na ini asin ‘magigin matiyaga sa pagpamibi,’ makakapagtiwala kita na dinadangog kita kan satong Ama sa langit asin na sisimbagon niya an satong mga pamibi.—Col. 4:2.

11. Paano nakakatabang sa sato an Hebreo 4:16 pag garo baga naaatraso an simbag sa pamibi ta?

¹¹ Minsan ngani garo baga naaatraso an simbag sa pamibi ta, nanunuga si Jehova na sisimbagon niya iyan sa tamang panahon. (Basahon an Hebreo 4:16.) Kaya dai ta nuarin man dapat pagbasulon si Jehova kun dai tulos mangyari an sarong bagay arog kan inaasahan ta. Halimbawa, dakul an haluyon nang namimibi na mahiling na tapuson na kan Kahadian nin Diyos an sistemang ini nin mga bagay. Sinabi pa ngani ni Jesus na dapat tang ipamibi iyan. (Mat. 6:10) Kaya kamangmangan nanggad kun tutugutan kan saro na lumuya an pagtubod niya sa Diyos huling dai nag-abot an katapusan sa panahon na inaasahan iyan kan mga tawo! (Hab. 2:3; Mat. 24:44) Kaya sarong kadunungan na padagos kitang maghalat ki Jehova asin padagos na mamibi na may pagtitiwala na sisimbagon niya kita. Maabot an katapusan nin eksakto asin sa tamang panahon dahil itinalaga na ni Jehova an “aldaw asin oras” na maabot iyan. Asin an aldaw na iyan magigin nanggad an pinakatamang  panahon para sa gabos.—Mat. 24:36; 2 Ped. 3:15.

12. Sa anong sitwasyon tibaad lalo nang magin masakit sato na magin mapasensiya?

¹² Tibaad kaipuhan tang magin mapasensiya mantang hinahalat na makamtan ta an hustisya. Sa parati an mga tawo sa kinaban na ini tinatrato nin bakong makatanusan an mga bako nindang kasekso, karasa, katribo, kakultura, o kanasyon. An iba, tinatrato nin bakong marahay dahil sa saindang kabiyadian o problema sa isip. Dakul sa mga lingkod ni Jehova an nagtagal nin inhustisya dahil sa saindang mga paniniwalang basado sa Bibliya. Pag makaeksperyensiya kita nin mga arog kaiyan, dapat tang isaisip an sinabi ni Jesus: “An makatagal sagkod sa katapusan maliligtas.” (Mat. 24:13) Pero paano kun maaraman mo na may saro sa laog kan kongregasyon na nakagibo nin magabat na pagkakasala? Pakatapos na ipaaram iyan sa mga elder, ipapabaya mo na daw iyan sainda asin mapasensiyang mahalat sa sainda na asikasuhon iyan kauyon kan pamamaagi ni Jehova? Ano an tibaad kaipuhan na gibuhon kan mga elder?

13. Ano an dapat na gibuhon kan mga elder tanganing maasikaso ninda an mga bagay-bagay kauyon kan pamamaagi ni Jehova?

¹³ Pag naaraman kan mga elder na may saro sa laog kan kongregasyon na nakagibo nin magabat na pagkakasala, mamimibi sinda para maghagad nin “kadunungan na gikan sa itaas” tanganing maaraman ninda an pagmansay ni Jehova sa sitwasyon. (Sant. 3:17) An pasuhan ninda iyo na tabangan an saro na nagkasala na “talikdan an saiyang salang dalan” kun posible. (Sant. 5:19, 20) Gusto man nindang gibuhon an gabos na makakaya ninda tanganing protektaran an kongregasyon asin rangahon an mga nakulgan. (2 Cor. 1:3, 4) Pag nag-aasikaso nin mga kaso nin magabat na pagkakasala, dapat ngunang aramon kan mga elder an gabos na detalye, na tibaad mangaipo nin panahon. Dangan, mamimibi sinda asin maingat na matao nin sadol hali sa kasuratan tapos matao ‘nin tama sanang’ pagtatanos. (Jer. 30:11, NWT) An mga elder dai nagpapaliman-liman, pero dai man sinda naghihidali na gumibo nin desisyon. Pag an mga bagay-bagay inaasikaso sa tamang paagi, mahihiling kan kongregasyon na naitatao an pinakaikakarahay kan gabos. Sa ibong kaiyan, dawa pag inaasikaso an mga problema sa arog kaiyan na paagi, tibaad yaon pa man giraray an kulog na namamatian kan mga naapektaran. Kun totoo ini saimo, anong puwede mong gibuhon tanganing mabawasan an kulog?

14. Anong halimbawa sa Bibliya an makakaranga saimo kun nakulgan kang marhay kan sarong kapwa Kristiyano?

 ¹⁴ Nangyari na daw saimo na nakulgan kang marhay kan iba, na tibaad sarong kapagtubod pa ngani? Makakahiling ka nin marahayon na mga halimbawa sa Tataramon nin Diyos na nagtutukdo sato kun paano maghalat ki Jehova na itanos an mga bagay-bagay. Halimbawa, maski ngani si Jose nag-agi nin inhustisya sa kamot kan saiya mismong mga tugang, dai niya tinugutan na maanggot siya huli sa mga pagkakasala ninda sa saiya. Imbes, nagdanay siyang nakapokus sa paglilingkod ki Jehova, na abundang binendisyunan siya dahil sa mapasensiyang pagtagal niya. (Gen. 39:21) Sa paglihis nin panahon, nagibo ni Jose na patawadon an mga nakakulog sa saiya asin na mahiling kun paano siya binendisyunan ni Jehova. (Gen. 45:5) Arog ni Jose, nararanga kita pag nagrarani kita ki Jehova asin pinapabaya ta sa saiyang kamot an hustisya.—Sal. 7:17; 73:28.

15. Ano an nakatabang sa sarong sister na palampason na sana an sarong inhustisya?

¹⁵ Siyempre, bakong gabos na inhustisya arog kagrabe kan naeksperyensiyahan ni Jose. Pero ano man na maraot na pagtrato sato puwede pa man giraray na makakulog sato. Pag nakulgan kita kan iba, parasamba man siya ni Jehova o bako, makikinabang kita kun iaaplikar ta an mga prinsipyo sa Bibliya. (Fil. 2:3, 4) Pag-isipan an sarong eksperyensiya. Sarong sister an nakulgan na marhay kan maaraman niya na sarong katrabaho an nagpapalakop nin negatibo saka bakong totoong mga komento manungod saiya. Imbes na magin pabigla-bigla, nagtao nin panahon an sister para hurop-hurupon an halimbawa ni Jesus. Kan si Jesus ininsulto, dai siya nagbalos nin pang-iinsulto. (1 Ped. 2:21, 23) Huli kaiyan, nagdesisyon an sister na dai na gibuhon na isyu an nangyari. Kan huri, naaraman niya na may malalang hilang palan kaidto an katrabaho niya asin grabe an stress. Kaya inisip kan sister na posibleng marhay na mayo man talagang maraot na intensiyon an katrabaho niya. Kaya ugmahon an sister na mapasensiya niyang tinagalan an maraot na pagtrato sa saiya, asin nakamati siya nin katuninungan.

16. Ano an puwedeng makaranga saimo kun nagsasakit ka huli sa sarong inhustisya? (1 Pedro 3:12)

¹⁶ Kun nagsasakit ka huli sa sarong inhustisya o sa iba pang dahilan, tandaan na si Jehova nagrarani sa “mga nalugadan an puso.” (Sal. 34:18, NWT) Namumutan ka niya dahil sa pagigin mapasensiya mo asin sa pagpasa mo saiya kan saimong  pasan. (Sal. 55:22) Siya an hukom kan bilog na daga. Gabos nahihiling niya. (Basahon an 1 Pedro 3:12.) Pag napapaatubang ka sa mga problema na dai mo kayang resolberan, andam ka daw na maghalat sa saiya?

17. Arog kan sinasabi sa Isaias 30:18, ano an sinisigurado sa sato ni Jehova?

¹⁷ Dai na mahahaloy, abunda kitang bebendisyunan kan satong Ama sa langit paagi kan saiyang Kahadian. Sinasabi kan Isaias 30:18: “Si Jehova mapasensiyang naghahalat tanganing pahilingan kamo nin pabor, asin matindog siya tanganing pahilingan kamo nin pagkahirak. Huli ta si Jehova sarong Diyos nin hustisya. Maugma an gabos na padagos na naghahalat sa saiya.” (NWT) An mga padagos na naghahalat ki Jehova magkakamit nin dakul na mga bendisyon ngunyan asin sa maabot na bagong kinaban.

18. Anong mga bendisyon an naghahalat sa sato?

¹⁸ Pag nasa bagong kinaban na an mga lingkod nin Diyos, nungka na nindang maeeksperyensiyahan an mga kapurisawan asin an mga kadipisilan na napapaatubang sa sainda ngunyan. Dai na magkakaigwa nin inhustisya o nin kulog pa man. (Kap. 21:4) Dai na kita nuarin man mapupurisaw pa manungod sa mga pangangaipo ta dahil magigin abunda na iyan para sa gabos. (Sal. 72:16; Isa. 54:13) Marahayon na bendisyon nanggad iyan!

19. Sa ano kita luway-luway na inaandam ni Jehova sa ngunyan?

¹⁹ Mantang dai pa iyan nangyayari, sa lambang maraot na gibo na napapangganahan ta asin sa lambang diyosnon na kuwalidad na napapatalubo ta, inaandam kita ni Jehova para sa buhay sa irarom kan saiyang pamamahala. Dai pangluyahan nin buot asin dai sumuko. Sarong mas marahay nanggad na buhay an naghahalat sa sato! Iyo, may magayunon kitang puturo. Kaya padagos lugod kitang magin andam asin mapasensiyang maghalat ki Jehova mantang tinatapos niya an saiyang trabaho!