1. Anong pribilehiyo an igwa kita?

 SARONG pribilehiyo nanggad na magin kabtang kan kongregasyon ni Jehova! Yaon kita sa sarong espirituwal na paraiso na pano nin mapagpatuninong asin maugmang mga tawo. Ano an lugar mo sa laog kan kongregasyon?

2. Anong ilustrasyon an ginamit ni apostol Pablo sa nagkapirang ipinasabong na surat niya?

² Dakul kitang manunudan manungod sa temang ini sa sarong ilustrasyon na ginamit ni apostol Pablo sa nagkapirang ipinasabong na surat niya. Sa kada saro sa mga surat na ini, ikinumparar ni Pablo sa hawak nin tawo an kongregasyon. Ikinumparar niya man sa mga parte kan hawak an mga miyembro kan kongregasyon.—Roma 12:4-8; 1 Cor. 12:12-27; Efe. 4:16.

3. Anong tulong leksiyon an pag-uulayan ta sa artikulong ini?

³ Sa artikulong ini, pag-uulayan ta an tulong mahalagang leksiyon na manunudan ta sa ilustrasyon ni Pablo. Inot, manunudan niyato na an lambang saro sa sato igwang lugar b sa kongregasyon ni Jehova. Ikaduwa, pag-uulayan ta kun ano an puwede tang gibuhon kun nasasakitan kitang mahiling an satong lugar sa kongregasyon. Asin ikatulo, pag-uulayan ta kun taano ta kaipuhan tang magdanay na sibot sa pag-utob kan satong papel sa kongregasyon nin Diyos.

4. Ano an itinutukdo sa sato kan Roma 12:4, 5?

⁴ An inot na leksiyon na manunudan ta sa ilustrasyon ni Pablo iyo na an lambang saro sa sato igwang mahalagang lugar sa pamilya ni Jehova. Pinunan ni Pablo an saiyang ilustrasyon sa pagsabing: “Kun paanong an sarong hawak igwa nin dakul na kabtang, alagad an mga kabtang na iyan bakong parareho an gamit, kita man, maski dakul, sarong hawak na kasaro ni Cristo, alagad bilang mga indibidwal, kita mga kabtang na magkakoronektar sa lambang saro.” (Roma 12:4, 5) Ano an punto ni Pablo? An lambang saro sa sato magkakalain an papel sa kongregasyon, pero an lambang saro sa sato mahalaga.

5. Anong “mga balaog” an itinao ni Jehova sa kongregasyon?

⁵ Pag pinag-uulayan an manungod sa mga igwa nin lugar sa laog kan kongregasyon, tibaad an inot na maisip mo iyo an mga nanginginot diyan. (1 Tes. 5:12; Heb. 13:17) Totoo na paagi ki Cristo, nagtao si Jehova nin “mga balaog na tawo” sa Saiyang kongregasyon. (Efe. 4:8) Kaiba sa ‘mga balaog na tawong’ ini an mga miyembro kan Namamahalang Grupo, an mga ninombrahan bilang paratabang sa Namamahalang Grupo, an mga miyembro kan Komite kan Sangay, mga paraataman nin sirkito, mga field instructor, mga elder sa kongregasyon, asin mga ministeryal na lingkod. An gabos na brother na ini ninombrahan kan banal na espiritu tanganing mangataman sa mahalagang marhay na mga karnero ni Jehova asin para pakusugon an kongregasyon.—1 Ped. 5:2, 3.

6. Sigun sa 1 Tesalonica 2:6-8, ano an hinihinguwang gibuhon kan mga brother na ninombrahan kan banal na espiritu?

⁶ An mga brother ninombrahan kan banal na espiritu tanganing isagibo an manlain-lain na responsabilidad. Kun paanong an manlain-lain na parte kan hawak, arog kan mga kamot saka bitis, nagpupunsiyonar para sa kapakinabangan kan bilog na hawak, an mga brother na ninombrahan kan banal na espiritu maigot na nagtatrabaho para makinabang an bilog na kongregasyon. Dai ninda minamawot na pamurawayon sinda kan iba. Imbes, hinihinguwa nindang parigunon asin pakusugon an saindang mga tugang. (Basahon an 1 Tesalonica 2:6-8.) Nagpapasalamat nanggad kita ki Jehova sa pagtao sato kan bakong makasadiri asin kuwalipikadong mga brother na ini!

7. Anong mga bendisyon an nakakamtan kan mga nasa bilog na panahon na paglilingkod?

⁷ May mga tugang sa kongregasyon na tibaad nombrahan na maglingkod bilang mga misyonero, espesyal payunir, o regular payunir. Sa katunayan, dakul na tugang sa bilog na kinaban an ginibong bilog na panahon na karera an gibuhon na paghuhulit asin paggibo nin mga disipulo. Sa paggibo kaiyan, natabangan ninda an dakul na magin disipulo ni Cristo Jesus. Sa parati, dikit sana an materyal na pagsadiri kan bilog na panahon na mga ebanghelisador na ini, pero binalusan sinda ni Jehova nin buhay na pano nin bendisyon. (Mar. 10:29, 30) Namumutan nanggad niyato an mga tugang na ini, asin nagpapasalamat kita na kabtang sinda kan kongregasyon!

8. Taano ta mahalagang marhay ki Jehova an lambang parahayag kan maugmang bareta?

⁸ An ninombrahan na mga brother asin an mga nasa bilog na panahon na ministeryo sana daw an may lugar sa kongregasyon? Dai nanggad! An lambang parahayag kan maugmang bareta mahalaga sa Diyos asin sa kongregasyon. (Roma 10:15; 1 Cor. 3:6-9) Sa katunayan, an saro sa pinakamahalagang pasuhan kan kongregasyon iyo na gumibo nin mga disipulo kan satong Kagurangnan na Jesu-Cristo. (Mat. 28:19, 20; 1 Tim. 2:4) An gabos na nakaasosyar sa kongregasyon, bawtisado man o dai pa bawtisadong parahayag, naghihinguwang magin priyoridad an gibuhon na ini.—Mat. 24:14.

9. Taano ta pinapahalagahan niyatong marhay an satong mga sister?

 ⁹ Tinatawan ni Jehova an mga sister nin may dignidad na lugar sa kongregasyon. Pinapahalagahan niya an mga agom na babayi, ina, babaying balo, asin daing agom na mga sister na maimbod na naglilingkod sa saiya. Parating sinasambit sa Kasuratan an marahayon na mga babaying nakapaugma sa Diyos. Inumaw sinda huli sa saindang marahayon na halimbawa sa pagpahiling nin kadunungan, pagtubod, kaigutan, kusog nin buot, pagkabukas-palad, asin marahay na mga gibo. (Luc. 8:2, 3; Gibo 16:14, 15; Roma 16:3, 6; Fil. 4:3; Heb. 11:11, 31, 35) Nagpapasalamat nanggad kita ki Jehova huling igwa kita nin mga sister sa satong kongregasyon na nagpapahiling man kan siring na magagayon na kuwalidad!

10. Taano ta pinapahalagahan niyato an satong may edad nang mga tugang?

¹⁰ Bendisyon man para sa sato an dakul na may edad na. May mga may edad nang brother asin sister sa kongregasyon na maimbod na idinusay an bilog nindang buhay sa paglilingkod ki Jehova. An ibang may edad na tibaad kasuarin pa sana nanudan an katotoohan. Arin man diyan, an satong may edad nang mga tugang tibaad nadidipisilan huli sa manlain-lain na problema sa salud na dara nin paggurang. Huli sa mga problemang ini, tibaad malimitaran na an mga kaya nindang gibuhon sa kongregasyon asin sa paghuhulit. Dawa arog kaiyan, ginigibo nanggad ninda an makakaya ninda sa ministeryo, asin ginagamit ninda an gabos nindang kusog para parigunon asin sanayon an iba! Asin nakikinabang kita sa mga eksperyensiya ninda. Magayon nanggad sinda para ki Jehova asin para sa sato.—Tal. 16:31.

11-12. Paano ka napapakusog kan mga aki asin mga hoben sa saindong kongregasyon?

¹¹ Isipa man an mga aki asin mga hoben sa laog kan kongregasyon. Napapaatubang sinda sa mga kadipisilan mantang nagdadakula sa kinaban na ini na kontrolado ni Satanas na Diyablo asin impluwensiyado kan saiyang maraot na mga pilosopiya. (1 Juan 5:19) Alagad, napapakusog kita pag nahihiling ta sinda na nagkokomento sa mga pagtiripon, nakikikabtang sa ministeryo, asin kusog-buot na idinedepensa an saindang mga tinutubod. Iyo, mga aki asin mga hoben,  igwa nanggad kamong mahalagang lugar sa kongregasyon ni Jehova!—Sal. 8:2.

¹² Pero, may mga tugang na nasasakitan na maniwala na mahalagang kabtang sinda kan kongregasyon. Ano an makakatabang sa sato na mamatian na igwa kita bilang mga indibidwal nin lugar sa laog kan kongregasyon? Aramon niyato.

13-14. Taano ta tibaad mamatian kan iba na bako sindang mahalaga sa laog kan kongregasyon?

¹³ Mangnuhon an ikaduwang leksiyon na manunudan ta sa ilustrasyon ni Pablo. Manungod iyan sa sarong problema na igwa an dakul ngunyan; nasasakitan sindang maniwala na mahalaga sinda sa kongregasyon. Isinurat ni Pablo: “Kun an bitis magsabi, ‘Dahil bako man akong kamot, bako akong parte kan hawak,’ dai iyan nangangahulugan na bako ining parte kan hawak. Asin kun an talinga magsabi, ‘Dahil bako man akong mata, bako akong parte kan hawak,’ dai iyan nangangahulugan na bako ining parte kan hawak.” (1 Cor. 12:15, 16) Ano an itinutukdo sa sato digdi ni Pablo?

¹⁴ Kun ikukumparar mo an sadiri mo sa iba sa laog kan kongregasyon, tibaad maisip mo na bako ka nang mahalaga. Tibaad an iba sa kongregasyon mahusay sa pagtukdo, matibay mag-organisar, o mahusay sa pagpastor. Tibaad namamatian mo na bako kang arog sainda kahusay. Ipinapahiling kaini na mapakumbaba ka. (Fil. 2:3) Pero mag-ingat. Kun pirmi mong ikinukumparar an sadiri mo sa mga tawong may pambihirang kakayahan, madidisganar ka sana sa sadiri mo. Tibaad mamatian mo pa ngani, arog kan sinambit ni Pablo, na mayo ka talagang lugar sa laog kan kongregasyon. Ano an makakatabang saimo na mahali an pagmating iyan?

15. Sigun sa 1 Corinto 12:4-11, ano an kaipuhan niyatong isaisip kun manungod sa ano man na balaog na igwa kita?

¹⁵ Pag-isipan ini: Tinawan ni Jehova an nagkapirang Kristiyano kan inot na siglo nin milagrosong mga balaog kan banal na espiritu, pero bakong gabos na Kristiyano nakaresibi nin pararehong balaog. (Basahon an 1 Corinto 12:4-11.) Tinawan sinda ni Jehova nin manlain-lain na balaog asin kakayahan, alagad an lambang Kristiyano mahalaga. Ngunyan, dai man kita tinatawan nin milagrosong mga balaog kan banal  na espiritu. Pero totoo pa man giraray sagkod ngunyan na kita gabos bakong parareho an mga kakayahan, alagad gabos kita mahalaga ki Jehova.

16. Anong sadol hali ki apostol Pablo an kaipuhan tang iaplikar?

¹⁶ Imbes na ikumparar an satong sadiri sa ibang mga Kristiyano, kaipuhan tang iaplikar an ipinasabong na sadol ni apostol Pablo: “Siyasaton kan lambang saro an sadiri niyang mga gibo, dangan magkakaigwa siya nin dahilan para mag-ugma sa mga nagibo niya, asin bako sa pagkumparar kan saiyang sadiri sa iba.”—Gal. 6:4.

17. Paano kita makikinabang sa pagsunod sa sadol ni Pablo?

¹⁷ Kun susunudon ta an ipinasabong na sadol ni Pablo asin sisiyasaton an sadiri tang gibo, tibaad mahiling na niyato na igwa kita nin mga balaog asin kakayahan na mayo an iba. Halimbawa, tibaad an sarong elder bakong mahusay na paratukdo pag nasa plataporma, pero tibaad matibayon siya pag-abot sa paggibo nin mga disipulo. O tibaad bako siya gayong organisado sa mga bagay-bagay kumpara sa ibang elder sa kongregasyon, pero tibaad midbid man siya bilang mamumuton na pastor asin an mga parahayag dai nag-aalangan na magdulok saiya para maghagad nin madunong na sadol hali sa Kasuratan. O tibaad midbid siya sa pagigin mapag-istimar. (Heb. 13:2, 16) Pag malinaw sa sato an satong mga kakayahan asin abilidad, magkakaigwa kita nin dahilan na ikaugma kun ano an magigibo ta para sa kongregasyon. Asin malilikayan tang mauri sa mga tugang na igwa nin mga kakayahan na iba kan sa sato.

18. Paano ta mapapauswag an mga kakayahan ta?

¹⁸ Ano man an satong lugar sa kongregasyon, dapat na mawuton niyato gabos na magin mas mahusay sa satong paglilingkod asin na pauswagon an mga kakayahan ta. Para matabangan kitang umuswag, nagtatao si Jehova nin marahayon na pagsasanay paagi sa saiyang organisasyon. Halimbawa, sa satong pagtiripon sa tahaw kan semana, tinatawan kita nin instruksiyon kun paano magigin mas epektibo sa satong ministeryo. Lubos mo daw na inaaprobetsaran an programang iyan nin pagsasanay?

19. Paano mo maaabot an pasuhan na makapag-adal sa School for Kingdom Evangelizers?

¹⁹ An saro pang marahayon na programa nin pagsasanay iyo an School for Kingdom Evangelizers. Puwedeng mag-aplay sa paadalan na ini an mga brother asin sister na nasa bilog na panahon na ministeryo na an edad 23 sagkod 65. Tibaad iniisip mo na dai mo lamang maaabot an pasuhan na ini. Imbes na isipon an mga dahilan kun taano ta dai ka diyan makakapag-adal, isipon mo an mga dahilan kun taano ta gusto mong mag-adal diyan. Dangan magplano kun paano mo maaabot an mga kuwalipikasyon diyan. Sa tabang ni Jehova asin paagi sa pagmamaigot mo, an iniisip mong garo baga imposible puwedeng magkatotoo.

20. Ano an manunudan niyato sa Roma 12:6-8?

²⁰ An ikatulong leksiyon na manunudan ta sa ilustrasyon ni Pablo mahihiling sa Roma 12:6-8. (Basahon.) Sa giraray, ipinapahiling ni Pablo na an mga nasa kongregasyon may magkakalain na balaog. Pero ngunyan, idinuduon niya na dapat niyatong gamiton an ano man na balaog na igwa kita para parigunon asin pakusugon an kongregasyon.

21-22. Anong leksiyon an manunudan niyato ki Robert asin Felice?

²¹ Pag-isipan an halimbawa kan sarong brother na aapudon tang Robert. Pagkatapos niyang maglingkod sa ibang nasyon, iinasignar siya na maglingkod sa Bethel sa sadiri niyang nasyon. Dawa inasigurar siya na bako man dahil sa pagkukulang kaya nagbago an asignasyon niya, sinabi niya: “An negatibo kong pagmansay sa sadiri—an pagmati na nagkulang ako—nagpadagos  sa laog nin dakul na bulan. May mga beses na gusto ko nang pumundo sa paglilingkod sa Bethel.” Paano niya naibalik an saiyang kaugmahan? Ipinagirumdom sa saiya nin sarong kapwa niya elder na sinanay kita ni Jehova sa lambang asignasyon ta kaidto para magin mas kapaki-pakinabang kita sa presenteng asignasyon niyato. Nasabutan ni Robert na dai niya na dapat pagparaisipon an nakaagi kundi magpokus sa kun ano an magigibo niya ngunyan.

²² Kaagid man kaiyan an nagin eksperyensiya ni Brother Felice Episcopo. Siya asin an saiyang agom naggradwar sa Gilead kan 1956 asin naglingkod sa pansirkitong gibuhon sa Bolivia. Kan 1964, nagkaaki sinda. Sinabi ni Felice: “Nasakitan kaming bayaan an asignasyon na napamahal na samo. Inaadmitir ko na disganado ako sa laog nin haros sarong taon. Pero sa tabang ni Jehova, nabago ko an sakong sabuot asin nagpokus sa bago kong responsabilidad bilang magurang.” Arog man daw ki Robert o Felice an namamatian mo? Pinangluluyahan ka daw nin buot dahil mayo na saimo ngunyan an pribilehiyo na igwa ka kaidto? Kun iyo, mas magigin maugma ka kun mapokus ka sa kun ano an magigibo mo ngunyan para paglingkudan si Jehova asin an saimong mga tugang. Magdanay na sibot, na ginagamit an saimong mga balaog asin kakayahan para tabangan an iba, asin makakamati ka nin kaugmahan mantang pinaparigon mo an kongregasyon.

23. Ano an dapat na tawan ta nin panahon, asin ano an pag-uulayan ta sa masunod na artikulo?

²³ Mahalaga ki Jehova an lambang saro sa sato. Gusto niyang magin kabtang kita kan saiyang pamilya. Kun tatawan ta nin panahon an paghurop-hurop sa kun paano niyato paparigunon an satong mga tugang asin magmamaigot na isagibo an papel na iyan, posibleng marhay na dai niyato mamatian na bako kitang kabtang kan kongregasyon! Pero kumusta man an pagmansay niyato sa iba sa laog kan satong kongregasyon? Paano niyato maipapahiling na pinapahalagahan ta sinda? Pag-uulayan ta sa masunod na artikulo an mahalagang temang iyan.