Imahinara an eksenang ini: Nakikikawat si Tim sa mga amigo niya, tapos naiapon niya an bola sa salming kan awto kan kataid ninda, kaya nagkaparasa ini.

Kun ika si Tim, ano an gigibuhon mo?

MAY TULO KANG OPSIYON:

1. Dumulag.

2. Basulon an iba.

3. Sabihon sa kataid nindo an nangyari, asin mangako na babayadan mo na sana an napasang salming.

Tibaad maisip mo na an Opsiyon A an pinakamadaling gibuhon. Pero mas marahay kun pirmi tang aakuon an mga nagibo tang salá—nakapasa man kita nin salming o nakagibo nin iba pang sála.

1. Iyan kaya an tamang gibuhon.

   An Bibliya nagsasabi: “Mawot niyamo na sa gabos na bagay gumawi kami nin sadiyosan.”—Hebreo 13:18.

2. Mas pinapatawad an mga nag-aako kan saindang mga sála.

   An Bibliya nagsasabi: “An nagtatahob sa saiyang mga paglapas dai magigin mapanggana, pero an siisay man na nagtutuga kaiyan asin binabayaan iyan papahilingan nin pagkahirak.”—Talinhaga 28:13.

3. Urog sa gabos, nagpapaugma iyan sa Diyos.

   An Bibliya nagsasabi: “Ikinakauyam na marhay ni Jehova an tawong madaya, alagad dayupot na katuod Niya an mga matanos.”—Talinhaga 3:32.

Natiketan an 20 anyos na si Karina huli sa pagigin kaskasero. Isinekreto niya iyan ki Papa niya pero dai niya iyan maitatago nin haloy. “Pakalihis nin mga sarong taon,” an sabi ni Karina, “naaraman ni Papa an tiket na iyan. Angguton lugod si Papa sako!”

Ano an leksiyon? Si Karina nagsabi: “Mas magrabe pa lugod an sitwasyon pag pigtatago mo an mga sála mo. Dai ka man talaga diyan makakalibre!”

An Bibliya nagsasabi: “Gabos kaya kita napapasala nin dakul na beses.” (Santiago 3:2) Asin arog kan naaraman niyato, pag inaako mo an nagibo mong mga salá, tanda iyan na ika mapakumbaba asin nakakapag-isip na nin siring sa sarong adulto—lalo na kun gigibuhon mo iyan tulos.

An sunod na dapat mong gibuhon iyo na makanuod sa nagibo mong mga salá. An daragitang si Vera nagsabi: “Pag may sála ako, iniisip ko kun ano an dapat kong manudan diyan para magin mas maray na tawo, saka kun ano an dapat kong gibuhon kun mangyari giraray an arog kaiyan na sitwasyon.” Hilingon ta kun paano mo magigibo iyan.

Sinubli mo an bisikleta ni Papa mo, tapos may naraot diyan. Ano an sunod mong gigibuhon?

• Dai ka masabi ki Papa mo tapos maasa ka na dai man lugod niya iyan mariparo.

• Sasabihon mo ki Papa mo kun ano talaga an nangyari.

• Sasabihon mo ki Papa mo an nangyari pero babasulon mo an iba.

Buminagsak ka sa test dahil dai ka nag-adal. Ano an sunod mong gigibuhon?

• Basulon an test.

• Akuon mo na ika an may sála kaya buminagsak ka sa test.

• Marason ka na may kaanggutan saimo an maestra mo.

 Ngunyan, balikan an nakaaging mga eksena asin isipon mo na ika ngaya (1) si Papa mo asin (2) an maestra mo. Ano daw an magigin paghiling ninda sa saimo pag inako mo tulos an saimong mga salá? Ano daw an magigin paghiling ninda sa saimo pag itinago mo iyan?

Ngunyan naman, girumdumon an sarong sála na nagibo mo kan nakaaging taon asin simbagon an minasunod na mga hapot.

Anong sála idto? Ano an ginibo mo diyan?

• Itinago ko iyan.

• Binasol ko an iba.

• Inako ko tulos iyan.

Kun dai mo inako su nagibo mong sála, anong namatian mo pagkatapos?

• Maugmahon—nalusutan ko kaya iyan!

• Nakonsiyensiya—dapat sinabi ko an totoo.

Ano kutana an mas marahay mong ginibo?

Ano an nanudan mo sa nagibo mong salá?

Taano ta nag-aalangan an iba na akuon an nagibo nindang mga salá?

Ano an magigin paghiling sa saimo nin mga tawo pag pirmi mong itinatago an nagibo mong mga sála, pero ano an magigin paghiling ninda sa saimo kun inaako mo an nagibo mong mga salá?—Lucas 16:10.