Job 36:1-33
-
Ipinahayag ni Elihu an dai marurop na kadakulaan nin Diyos (1-33)
36 Nagpadagos si Elihu:
2 “Pagpasensiyahan mo ako nin dikit pang panahon mantang nagpapaliwanag ako,Huli ta may sasabihon pa ako alang-alang sa Diyos.
3 Sasabihon ko nin detalyado an naaaraman ko,Asin ihahayag ko an katanusan kan sakuyang Kaggibo.+
4 Bako nanggad kaputikan an mga sasabihon ko;An Saro na perpekto sa kaaraman+ nasa atubangan mo.
5 Iyo, makapangyarihan an Diyos+ asin mayo siyang isinisikwal;Hararumon an saiyang pakasabot.*
6 Dai niya iingatan an buhay kan mga maraot,+Pero tinatawan niya nin hustisya an mga nagsasakit.+
7 Dai niya hinahali an saiyang paghiling sa mga matanos;+Pinapatukaw niya sinda sa trono bilang mga hadi,*+ asin ilinalangkaw sinda sagkod lamang.
8 Alagad kun nakakadenahan sindaAsin nadakop sinda kan mga lubid nin kasakitan,
9 Ipinapaaram niya sainda kun ano an nagibo ninda,An saindang mga paglapas na resulta kan saindang kapalangkawan.
10 Binubukasan niya an saindang mga talinga para sa pagtatanosAsin sinasabihan sinda na rumayo sa paggibo nin maraot.+
11 Kun magsunod sinda asin maglingkod sa saiya,Magigin mauswag sinda sagkod na sinda nabubuhay,Asin magigin maugma sinda sa mga taon kan saindang buhay.+
12 Pero kun dai sinda magsunod, magagadan sinda sa espada*+Asin mapapara na mayo nin kaaraman.
13 Matanom nin raot nin buot an mga mayong Diyos.*
Dai sinda naghahagad nin tabang maski pa gapuson niya sinda.
14 Amay sindang nagagadan,*+Na ginagamit* an saindang buhay kaiba-iba kan mga lalaking patutot* sa templo.+
15 Pero an mga nagsasakit iliniligtas nin Diyos* sa panahon kan saindang kasakitan;Binubukasan niya an saindang mga talinga pag sinda inaapi.
16 Irinarayo ka niya sa kasakitan+Saka dinadara sa sarong mahiwas na lugar, kun sain magigin talingkas ka,+Na igwa nin pinakamarahay na mga kakanon sa lamesa mo para ika rangahon.+
17 Dangan makokontento ka sa paghukom na sasaparon kan maraot,+Pag naitao na an sentensiya asin nangibabaw na an hustisya.
18 Pero mag-ingat ka tanganing dai ka makakulog* dahil sa grabeng kaanggutan,+Asin dai mo pagtugutan na mailagalag ka nin dakulang suhol.
19 An saimo daw na paghagad nin tabangO an sobra mong pagmamaigot makakaparayo saimo sa kasakitan?+
20 Dai mo pagmawuton an banggi,Kun nuarin nawawara an mga tawo sa saindang kinamumugtakan.
21 Dai mo pagpilion an paggibo nin maraotTangani sanang makalikay sa pagsakit.+
22 Uya! Pinapamuraway an Diyos dahil sa saiyang kapangyarihan;Siisay an paratukdo na kapareho niya?
23 Siisay an naggigiya sa saiyang dalan*+O nagsasabi saiya, ‘Sala an ginibo mo’?+
24 Dai mo paglingawan na ibantog an saiyang mga gibo,+Na kinakanta kan mga tawo.+
25 Nahiling iyan kan bilog na katawuhan;Hali sa harayo, namamasdan iyan kan tawong mortal.
26 Iyo, nakakalabing marhay an Diyos kisa sa kaya tang maaraman;+An bilang kan saiyang mga taon dai ta kayang sabuton.*+
27 Binabaton niya an mga tagdo nin tubig;+Natitipon an mga alupuop asin nagigin uranon;
28 Dangan ibinabagsak iyan kan mga panganuron;+Iinuuran iyan sa katawuhan.
29 May makakasabot daw kan paglakop kan mga panganuronAsin kan pagdaguldol hali sa saiyang tolda?*+
30 Hilinga kun paano siya nagpapakikilat*+ sa ibabaw kaiyanAsin kun paano niya tinatahuban an kairaruman* kan dagat.
31 Paagi kaiyan, sinususteniran niya an* mga banwaan;Tinatawan niya sinda nin abundang kakanon.+
32 Linalaom niya an kikilat sa saiyang mga kamot,Asin pinapatama niya iyan sa puntirya kaiyan.+
33 Ipinapaisi kan saiyang daguldol an pag-abot niya,Sinasabi maski kan mga hayop kun siisay* an maabot.
Mga Nota
^ O “Grabe an kakayahan kan saiyang puso.”
^ O posibleng “Pinapatukaw niya sa trono an mga hadi.”
^ O “armas (armas na pinapalayog).”
^ O “mga apostata; mga maraot.”
^ O “Amay na nagagadan an saindang mga kalag.”
^ O posibleng “Na tinatapos.”
^ Sa literal, “Niya.”
^ O “makapalakpak na may pagtuya.”
^ O posibleng “Siisay an nagtutuyaw sa saiyang dalan?; Siisay an nagpapanimbag sa saiya dahil sa saiyang dalan?”
^ O “dai marurop; dai kayang siyasaton.”
^ Sa literal, “payag-payag.”
^ Sa literal, “niya iwinawarak an saiyang liwanag.”
^ Sa literal, “an mga gamot.”
^ O posibleng “idinedepensa niya an ikakarahay kan.”
^ O posibleng “ano.”
