Job 21:1-34
21 Nagsimbag si Job:
2 “Magdangog kamong marhay sa sasabihon ko;Iyan na sana an itao nindong pagranga sa sako.
3 Pagpasensiyahan na nguna nindo ako mantang nagtataram ako;Pagkatapos kong magtaram, puwede na nindo akong tuya-tuyaon.+
4 Sa tawo daw ako nagrereklamo?
Kun iyo, bakong naubos na kuta an pasensiya ko?*
5 Maghiling kamo sako asin mangangalas kamo;Takupan nindo an saindong nguso kan kamot nindo.
6 Pag iniisip-isip ko iyan, napupurisaw ako,Asin an bilog kong hawak nagkukubog-kubog.
7 Taano ta padagos na nabubuhay an maraot,+Naggugurang, asin nagyayaman?*+
8 Pirmi nindang kaibanan an saindang mga aki,Asin nahihiling pa ninda an saindang mga gikan.
9 Ligtas sa saindang mga harong, dai sinda nakakamati nin takot,+Asin dai sinda pinapadusahan nin Diyos gamit an saiyang pamakol.
10 An saindang mga toro matibay na mga paramanada;*An saindang mga baka nag-uugbon asin dai naghuhûlos.
11 An saindang mga aking lalaki nagdadaralagan sa luwas na garo sarong aripumpon,Asin an mga aki ninda nagrurulukso-lukso.
12 Nagkakaranta sinda na sinasabayan kan tugtog nin tamburin saka arpaAsin nag-uurugma sinda sa tugtog nin plawta.*+
13 Maugma sinda sa kada aldaw kan saindang buhay,Asin trangkilo* sindang minapasiring sa Lubungan.*
14 Alagad sinasabi ninda sa tunay na Diyos, ‘Pabayaan mo kami!
Habo ming aramon an saimong mga dalan.+
15 Siisay man an Makakamhan sa Gabos para paglingkudan mi siya?+
Ano an makukua ming pakinabang kun magigin kabisto mi siya?’+
16 Pero aram kong dai man ninda kontrolado an pagigin asensado ninda.+
Ibang marhay an kaisipan ko sa kaisipan* kan maraot.+
17 Gurano kaparating napapalsok an lampara kan mga maraot?+
Gurano sinda kaparating agihan nin kapahamakan?
Gurano sinda kaparating linalaglag nin Diyos dahil sa saiyang kaanggutan?
18 Nagin na lamang daw sindang siring sa dagami na ipinapalid-palid nin durosAsin siring sa apa na ipinapadpad nin bagyo?
19 An padusa para sa sarong tawo itatagama nin Diyos sa mga aki kaini.
Alagad baluson man lugod siya nin Diyos tanganing maaraman niya iyan.+
20 Mahiling man lugod kan sadiri niyang mga mata an saiyang kalaglagan,Asin siya man lugod an mag-inom kan kaanggutan kan Makakamhan sa Gabos.+
21 Huli ta maiisip niya pa daw kun anong mangyayari sa mga aki niyaPag an saiyang buhay pinahalipot na?*+
22 May makakapagtukdo daw nin kaaraman* sa Diyos,+Mantang Siya an naghuhusgar pati sa mga nakakalangkaw?+
23 May tawong nagagadan maski makusugon pa,+Mantang siya mayong pigpoproblema asin daing kinakahaditan,+
24 Mantang an saiyang mga paa pano nin tabaAsin masarig an saiyang mga tulang.*
25 Pero igwa man nin nagagadan na grabe an pagsakit,*Na dai lamang nakanamit nin marahay na mga bagay.
26 Magkaibanan sindang mahigda sa alpog,+Asin pareho sindang uubuson nin mga ulod.+
27 Aram ko nanggad an iniisip nindoAsin an mga plano nindo para pakarauton ako.*+
28 Huli ta sinasabi nindo, ‘Hain an harong kan prominenteng tawo,Asin hain an tolda na inistaran kan maraot?’+
29 Dai daw nindo hinapot an mga parabaklay?
Dai daw nindo pinag-aadalan na marhay an saindang mga obserbasyon,*
30 Na an maraot na tawo nakakaligtas sa aldaw nin kapahamakanAsin isinasalbar sa aldaw nin grabeng kaanggutan?
31 Siisay an prangkang masabi saiya na maraot an saiyang dalan,Asin siisay an mabalos sa saiya sa mga ginibo niya?
32 Pag dinara na siya sa lubungan,Igwa nin padagos na magbabantay sa saiyang lulubngan.
33 Makakapahingalo siya nin matuninong sa* daga kan kababan,*+Asin masurunod sa saiya an bilog na katawuhan*+Siring kan dai mabilang na nagkairinot sa saiya.
34 Kaya taano ta rarangahon pa nindo ako kan saindong daing saysay na mga tataramon?+
Puro sana pandadaya an saindong mga simbag!”
Mga Nota
^ Sa literal, “kan espiritu ko.”
^ O “nagigin makapangyarihan.”
^ O “paramaro.”
^ O “pipano.”
^ O “madali,” an buot sabihon, biglaan asin daing kulog na kagadanan.
^ O “sadol; pakana.”
^ O “Pag an bilang kan saiyang mga bulan binanga sa duwa?”
^ O “nin ano man.”
^ Sa literal, “basa an hutok kan saiyang mga tulang.”
^ O “na may mapait na kalag.”
^ O posibleng “an mga plano nindo na magin madahas sako.”
^ Sa literal, “tanda.”
^ Sa literal, “Magigin mahamis sa saiya an.”
^ O “sulugan na kababan.”
^ Sa literal, “Asin guguyudon niya an bilog na katawuhan.”
