ՄԱԿ-ի գլխավոր քարտուղար Անտոնիո Գուտերեշը Իսրայելի վրա Իրանի հարձակման առնչությամբ, որը տեղի ունեցավ շաբաթ օրը՝ 2024 թ. ապրիլի 13-ին, հետևյալն է ասել. «Հիմա՛ է լարվածությունը թուլացնելու և անվտանգ միջավայր ստեղծելու ժամանակը։ Հիմա՛ է ծայրաստիճան զսպվածություն դրսևորելու ժամանակը»։

 Մերձավոր Արևելքում տեղի ունեցող հակամարտությունները համաշխարհային հիմնախնդրի ընդամենը մեկ դրսևորումն են։

 «Երկրորդ համաշխարհային պատերազմից հետո աշխարհում հակամարտությունների թիվը այժմ ամենաբարձրն է։ Դրանցից տուժում է երկու միլիարդ մարդ՝ մարդկության մեկ քառորդը» (ՄԱԿ-ի Անվտանգության խորհուրդ, հունվարի 26, 2023)։

 Այժմ զինված հակամարտություններ են ընթանում Իսրայելում, Գազայում, Սիրիայում, Ուկրաինայում, Սուդանում, Եթովպիայում, Նիգերում, Մյանմայում, Հայիթիում և այլ տարածաշրջաններում։ a

 Ե՞րբ են պատերազմները դադարելու։ Կարո՞ղ են արդյոք աշխարհի առաջնորդները խաղաղություն հաստատել։ Ի՞նչ է ասում Աստվածաշունչը։

 Համաշխարհային հակամարտությունները փաստում են, որ շուտով բոլոր պատերազմներին վերջ է դրվելու։ Այս հակամարտություններով կատարվում են մեր օրերի վերաբերյալ աստվածաշնչյան մարգարեությունները։ Աստվածաշունչը այս օրերը կոչում է «աշխարհի վախճան» (Մատթեոս 24։3)։

•   «Պատերազմների ձայներ և պատերազմների լուրեր կլսեք.... Ազգ ազգի դեմ դուրս կգա, և թագավորություն՝ թագավորության դեմ» (Մատթեոս 24։6, 7)։

 Կարդացեք «Ո՞րն է «վերջին օրերի», կամ՝ «վերջի ժամանակի» նշանը» հոդվածը, որպեսզի իմանաք, թե ինչպես են մերօրյա պատերազմները փաստում, որ աստվածաշնչյան մարգարեությունները կատարվում են։

 Աստվածաշնչում կանխագուշակված է, որ բախումներին վերջ է դրվելու։ Ինչպե՞ս է դա տեղի ունենալու։ Ոչ թե մարդկային ջանքերով, այլ Արմագեդոնի միջոցով, որը «Ամենակարող Աստծու մեծ օրվա պատերազմն է» (Հայտնություն 16։14, 16)։ Այս պատերազմից հետո Աստված կկատարի իր խոստումը և մարդկությանը հարատև խաղաղություն կպարգևի (Սաղմոս 37։10, 11, 29)։

 Իմանալու համար, թե ինչպես է Աստծու պատերազմը վերջ դնելու բոլոր պատերազմներին, կարդացեք «Ի՞նչ է Արմագեդոն պատերազմը» հոդվածը։