Ո՞վ է նեռը
Աստվածաշնչի պատասխանը
Նեռը պարզապես մեկ անձնավորություն կամ միավորում չէ, քանի որ Աստվածաշունչն ասում է, որ «շատ նեռեր» կան (1 Հովհաննես 2:18)։ «Նեռ» թարգմանված հունարեն բառը նշանակում է «Քրիստոսի հակառակ (կամ՝ փոխարեն)» և վերաբերում է նրանց, ովքեր...
ժխտում են, որ Հիսուսն է Քրիստոսը (Մեսիան) և որ նա Աստծու Որդին է (1 Հովհաննես 2:22)։
հակառակվում են Քրիստոսին՝ Աստծու Օծյալին (Սաղմոս 2:1, 2; Ղուկաս 11:23)։
ցույց են տալիս, թե Քրիստոսն են իրենք (Մատթեոս 24:24)։
հալածում են Քրիստոսի հետևորդներին, ինչով էլ գործում են Քրիստոսի դեմ՝ ըստ վերջինիս խոսքերի (Գործեր 9:5)։
պնդում են, թե քրիստոնյա են, բայց անում են անօրեն ու նենգ գործեր (Մատթեոս 7:22, 23; 2 Կորնթացիներ 11:13)։
Աստվածաշունչը «նեռ» բառը օգտագործում է ոչ միայն առանձին անհատների կապակցությամբ, այլև հավաքական իմաստով (2 Հովհաննես 7)։ Նեռը առաջին անգամ հայտնվեց առաքյալների ժամանակներում և մինչ օրս գործում է, ինչի մասին կանխագուշակված է Աստվածաշնչում (1 Հովհաննես 4:3)։
Ինչպե՞ս բնորոշել նեռերին
Նրանք Հիսուսի մասին սուտ ուսմունքներ ու գաղափարներ են տարածում (Մատթեոս 24:9, 11)։ Օրինակ՝ ովքեր սովորեցնում են, թե Աստված Երրորդություն է կամ թե Հիսուսը Ամենակարող Աստված է, իրականում հակառակվում են Հիսուսի սովորեցրածին, ով ասաց. «Հայրը մեծ է ինձանից» (Հովհաննես 14:28)։
Նրանք հերքում են Աստծու Թագավորության մասին Հիսուսի խոսքերը և այն, թե ինչպես է այդ Թագավորությունը գործում։ Օրինակ՝ որոշ կրոնական առաջնորդներ ասում են, որ Քրիստոսը ղեկավարում է մարդկային կառավարությունների միջոցով։ Սակայն այս գաղափարը հակասում է Հիսուսի ասածին. «Իմ թագավորությունը այս աշխարհի մի մասը չէ» (Հովհաննես 18:36)։
Նրանք ասում են, որ Հիսուսն իրենց Տերն է, սակայն չեն հնազանդվում նրա պատվերներին, այդ թվում Թագավորության բարի լուրը քարոզելու պատվերին (Մատթեոս 28:19, 20; Ղուկաս 6:46; Գործեր 10:42)։