Այո՛։ Աստվածաշունչը, որը իմաստություն պարունակող հնագույն մի գիրք է, տալիս է կյանքին վերաբերող կարևորագույն հարցերի պատասխանները և կարող է օգնել քեզ բավարարվածության զգացում ունենալ և իմաստավորել կյանքդ։ Նկատի առնենք այդ հարցերից մի քանիսը։

1.   Կա՞ արդյոք Ստեղծիչ։ Աստվածաշունչն ասում է, որ Աստված է «ստեղծել բոլոր բաները» (Հայտնություն 4:11)։ Լինելով մեր Ստեղծիչը՝ Աստված գիտի, որ մենք ուզում ենք կյանքում բավարարվածության զգացում ունենալ և ուրախ լինել։

2.   Աստված մտածո՞ւմ է իմ մասին։ Թեև ոմանք Աստծուն պատկերացնում են մարդկանցից շատ հեռու և օտար, սակայն Աստվածաշունչը ասում է. «[Աստված] մեզանից յուրաքանչյուրիցս հեռու չէ» (Գործեր 17:27)։ Նրան հետաքրքրում է այն ամենը, ինչ տեղի է ունենում քեզ հետ, և նա ուզում է օգնել, որ հաջողության հասնես կյանքում (Եսայիա 48:17, 18; 1 Պետրոս 5:7)։

3.   Ինչպե՞ս կարող է Աստծուն ճանաչելը օգնել ինձ։ Աստված ստեղծել է մեզ «հոգևոր կարիքներով»՝ կյանքի իմաստը և նպատակը հասկանալու բնածին կարիքով (Մատթեոս 5:3)։ Մեր հոգևոր կարիքների մեջ է մտնում նաև մեր Ստեղծչին ճանաչելու և նրա հետ մտերիմ փոխհարաբերություններ ունենալու ցանկությունը։ Անկասկած Աստված կգնահատի իրեն ճանաչելու համար արած քո քայլերը, քանի որ Աստվածաշունչ ասում է. «Մոտեցեք Աստծուն, և նա կմոտենա ձեզ» (Հակոբոս 4:8)։

 Միլիոնավոր մարդիկ համոզվել են, որ Աստծու հետ մտերմանալը բարելավել է իրենց կյանքի որակը և նպաստել է բավարարվածության զգացում ունենալուն։ Թեև Աստծուն ճանաչելը չի ազատում բոլոր խնդիրներից, սակայն նրա իմաստությունը, որն ակնհայտ է Աստվածաշնչի էջերում, կարող է օգնել քեզ...

•   երջանիկ ընտանիք ունենալ.

•   խաղաղություն ունենալ ուրիշների հետ.

•   հաղթահարել կամ առնվազն համբերությամբ դիմանալ տարբեր խնդիրներին, ինչպիսիք են օրինակ՝ դեպրեսիան, ֆինանսական խնդիրները, քրոնիկական հիվանդությունները։

 Շատ կրոններ, որոնց Սուրբ Գիրքը Աստվածաշունչն է, իրականում չեն հետևում նրա ուսմունքներին։ Սակայն ճշմարիտ կրոնը, որը ամեն հարցում հետևում է Աստվածաշնչի խոսքերին, կարող է օգնել քեզ ճանաչել Աստծուն։