1. Mang boch e tow’ath ni ke pi’ Jesus ngodad?

 DARIY be’ nib pag feni gol nge migid Jesus. Nap’an ni immoy u fayleng ma i ngongliy e maang’ang ni nge ayuweg e girdi’. (Luke 9:​12-17) I pi’ e bin th’abi fel’ e tow’ath ngodad ni aram e pi’ e yafos rok ni fan ngodad. (John 15:13) Ka nap’an nni faseg ko yam’ ma ka be ulul ni nge gol ngodad. Ke yog ngak Jehovah ni nge pi’ gelngin nib thothup ni nge skulnagdad me fal’eg lanin’dad ni bod rogon ni micheg. (John 14:​16, 17; 16:13) Ku be ulul ni nge skulnagdad u daken e pi muulung rodad ya nge yag ni bung rogodad ni ngad ayuweged e girdi’ u ga’ngin yang e fayleng ni ngar manged boch i gachalpen.​—Matt. 28:​18-20.

2. Mini’ e ba muun ko fapi “pumoon ni tow’ath” ni kan weliy murung’agrad ko Efesus 4:​7, 8?

² Kum lemnag reb e tow’ath ni ke pi’ Jesus ngodad. I yoloy apostal Paul nu tomuren ni sul Jesus nga tharmiy, me “pi’ boch e pumoon ni tow’ath.” (Mu beeg e Efesus 4:​7, 8. a) I tamilangnag Paul ni ke pi’ Jesus e pi pumoon ni tow’ath ney ya nge yag ni ngar ayuweged e ulung u boor e kanawo’. (Efe. 1:​22, 23; 4:​11-13) Ngiyal’ ney e pi “pumoon ni tow’ath” ney e ba muun ngay e pi ministerial servant, nge piin piilal u lan e ulung, nge pi walag ni pumoon ni yad ma lekag e ulung. b Riyul’ ni pi pumoon ney e dawor ra flontgad, ere ka yad ma oloboch. (Jas. 3:2) Machane ma fanayrad Jesus Kristus ni Somol rodad ni ngar ayuweged gadad. Yad boch e tow’ath ni ke pi’ ngodad.

3. Mu susunnag rogon nrayog ni ngad ayuweged e maruwel ni ma rin’ e pi “pumoon ni tow’ath.”

³ Ke tay Jesus e pi “pumoon ni tow’ath” ney ni ngar pied gelngin e ulung. (Efe. 4:12) Machane gad gubin nrayog ni ngad ayuweged yad  ni ngar rin’ed e re maruwel ney nib ga’ fan. Baaray rogon nrayog ni ngan susunnag: Bay boch i gadad ni ma pi’ e ayuw ni ngan toy reb e Tagil’ e Liyor. Ma boch i gadad e ma ayuweg e piin yad be maruwel ni aram e yad ma pi’ e ggan, nge boch ban’en nib t’uf rorad, ara ra ayuweged yad u yugu boch e kanawo’. Ere ku arrogon ni gad gubin nrayog ni ngad ayuweged e pi ministerial servant, nge piin piilal u lan e ulung, nge pi walag ni yad ma lekag e ulung ko maruwel rorad u daken e thin nge ngongol rodad. Chiney e ngad weliyed rogon ni ma yib angin ngodad e maruwel nib gel ni yad ma tay, nge rogon nrayog ni ngad daged ngorad nge Jesus, ni ir e ke pi’ e pi “pumoon” ney nib ga’ fan u wan’dad e n’en yad ma rin’.

PI MINISTERIAL SERVANT E YAD MA RIN’ BOCH BAN’EN NI NGAR “AYUWEGED BOCH E GIRDI’”

4. Mang boch ban’en ni i rin’ e pi ministerial servant ko bin som’on e chibog ni ngar “ayuweged boch e girdi’”?

⁴ Bay boch e walag ni pumoon ko bin som’on e chibog nni dugliyrad ni ngar manged boch e ministerial servant. (1 Tim. 3:8) Bod ni ireray e piin ni yoloy Paul murung’agrad ni ur rin’ed boch ban’en ni ngar “ayuweged boch e girdi’.” (1 Kor. 12:28) Ere pi ministerial servant e ur rin’ed boch e maruwel nib ga’ fan ya nge yag ni tiyan’ e piin piilal ngar skulnaged e pi walag mar fal’eged lanin’rad. Pi ministerial servant ney e sana rayog ni ur pied e ayuw ni ngan abweg e thin u lan fare Babyor nib Thothup nga lan boch e babyor ara ra chuw’iyed boch ban’en nib t’uf ni fan ko pi babyor ney ni yibe abweg e thin riy.

5. Mang boch ban’en ni ma pi’ e pi ministerial servant e ayuw riy e ngiyal’ ney?

⁵ Am lemnag boch e maruwel ni ma rin’ e pi ministerial servant u lan e ulung rom. (1 Pet. 4:10) Sana rayog ni ngan dugliyrad ni ngar ayuweged e salpiy ko ulung, ara ngar yarmiyed rogon e yungi n’en yima machib riy, ara ngar chumongnaged e babyor ni fan ko ulung, ara ngar pied e ayuw ko audio nge video u nap’an e muulung, ara ngar ayuweged e girdi’ ni kar bad ko muulung ni ngar pirieged bang ni ngar pared ngay, ara ngar pied e ayuw i ngongliy e yungin ke kireb ko Tagil’ e Liyor rodad. Urngin e pi maruwel ney nib t’uf ni ngan rin’ ya nge yag ni yan e muulung rodad nib fel’ rogon, ma kub yaram rogon e machib ni gad be tay. (1 Kor. 14:40) Maku reb e, bay boch i yad ni ma pi’ boch e welthin u nap’an fare muulung ni Tin Gad Ma Rin’ nge Machib Rodad, maku yad ma pi’ e welthin ni fan ko yoor. Ku rayog ni ngan dugliy bagayad ni nge ayuweg reb e piilal u rogon ni ngar yarmiyew reb e ulung ni fan ko machib. Ku bay yu ngiyal’ ni yad ma un ngak e piin piilal u nap’an ni nga ranod ra guyed be’ ni ngan pi’ e athamgil nga laniyan’.

6. Mang boch i fan nib ga’ fan u wan’dad e pi ministerial servant nib gel e maruwel ni yad ma tay?

⁶ Uw rogon ni ma yib angin e maruwel ni ma rin’ e pi ministerial servant ko ulung? I yog Beberly c nreb e walag nib pin u Bolivia ni gaar: “Ke magar e pi ministerial servant, ya rug ma felfelan’ u nap’an e pi muulung rodad. Bochan e maruwel ni yad ma rin’, ma aram fan nrayog ni nggu un ko tang, ma gu be pi’ e fulweg, ma gu be motoyil ko pi welthin ni yibe pi’, ma gu be fil boch ban’en ko pi video nge sasing ni yibe dag yaan. Yad ma matanagiy e ulung u nap’an e muulung ya nge dabi buch ban’en rorad, maku yad ma ayuweg e piin yad be un ko muulung u online. Ma tomuren e muulung, ma yad ma pi’ e ayuw ko klin, ma yad ma ayuweg e salpiy ko ulung, maku yad ma guy rogon ni nga i par ni bay e pi babyor nib t’uf rodad. Rug be pining e magar ni bochrad!” Leslie ni ma par u Colombia ni figirngin e ir reb e piilal e yog ni gaar: “Ma taga’ figirngig ko pi ministerial servant ni ngar ayuweged u boch e maruwel. Faan gomanga dar moyed ma ri boor pa’ nga puluwon, ere rug be pining e magar ngorad ni bochan e yad ba pasig ma kub m’agan’rad ngay ni ngar pied e ayuw.” Dariy e maruwar riy ni ku aray rogon e pi ministerial servant u wan’um.​—1 Tim. 3:13.

7. Uw rogon nrayog ni ngad daged nib ga’ fan u wan’dad e n’en ma rin’ e pi ministerial servant? (Kum guy e sasing.)

⁷ Yugu aram rogon nrayog ni gad be pining e magar ko pi ministerial servant u lanin’dad, machane be pi’ e Bible e athamgil ngodad ni ngad daged ko ngongol rodad. (Kol. 3:15) Baaray rogon ni ma rin’  reb e piilal u Finland ni ka nog Krzysztof ngak e re n’ey. I gaar, “Gu ma textnag reb e ministerial servant ara gu pi’ bang e card ngak ni bay reb e thin nu Bible riy, ara gog ngak ban’en ni ke rin’ ni ke pi’ athamgil nga lanin’ug, ara fan nib ga’ fan u wan’ug e pigpig ni be tay.” Pascal nge Jael ni yow ma par u New Caledonia e ba ga’ ni yow ma yibilay e pi ministerial servant. I weliy Pascal ni gaar, “Ba ga’ ni chiney e boor yay ni gamow ma yibilay e pi ministerial servant ko ulung romow, ma gamow be pining e magar ngak Jehovah ni bochrad, maku gamow be wenig ngak ni nge ayuwegrad.” Ma rung’ag Jehovah e meybil ni aray rogon, ma gubin e girdi’ u lan e ulung ni ma yib angin ngorad.​—2 Kor. 1:11.

BA GEL E “MARUWEL” NI MA TAY E PIIN PIILAL U FITHIK’MED

8. Mang fan nrayog ni nge yoloy Paul nib gel e “maruwel” ni i tay e piin piilal ko bin som’on e chibog? (1 Thessalonika 5:​12, 13)

⁸ Ba gel e maruwel ni i tay e piin piilal ko bin som’on e chibog ni fan ko ulung. (Mu beeg e 1 Thessalonika 5:​12, 13; 1 Tim. 5:17) Ur “pow’iyed” e ulung ni aram e ur yarmiyed e muulung ni yima tay, ma yad be dugliy boch ban’en u taabang ni fan ko ulung. Ur ‘fonownaged’ e pi walagrad ni aram e ur pied boch e fonow nib tamilang ngorad u fithik’ e t’ufeg ya nge yag nra ayuweged e ulung. (1 Thess. 2:​11, 12; 2 Tim. 4:2) Bin riyul’ riy e pi pumoon ney e kub gel e maruwel ni yad ma tay ni ngar pied e tin nib t’uf ko tabinaw rorad mu kur ayuweged yad ni ngar pared ni yad ba gel ko tirok Got ban’en.​—1 Tim. 3:​2, 4; Titus 1:​6-9.

9. Mang boch e maruwel ni ma rin’ e piin piilal e ngiyal’ ney?

⁹ Piin piilal e ngiyal’ ney e boor pa’ u puluwrad. Yad boch e tamachib. (2 Tim. 4:5) Yad ba pasig ko machib, ma yad ma yarmiy rogon ni ngan rin’ fare maruwel ni machib ko gin yima machib riy, maku yad ma skulnagdad u rogon ni ngad machibgad ma gad fil ban’en ko girdi’ nib fel’ rogon. Ku yad boch e tapuf oloboch ndarur laniyan’gad ma yad ma dag e runguy. Nap’an nra rin’ reb e Kristiano reb e denen nib ubchiya’, ma yad ma guy rogon ni ngar ayuweged facha’ ni nge fel’ bayay e tha’ u thilrow Jehovah. Machane ku yad ma guy rogon ni nge par e ulung nib beech. (1 Kor. 5:​12, 13; Gal. 6:1) Bin th’abi ga’ fan riy e, piin piilal e yad ma gafaliy e saf rok Got. (1 Pet. 5:​1-3) Yad ma pi’ boch e welthin ni kar ngongliyed nib fel’ rogon nib puluw e thin riy ko Bible, ma yad ma guy rogon ni ngar nanged urngin e girdi’ u lan e ulung, maku yad ma yan ra guyed e pi walag ni ngar pied e athamgil nga lanin’rad. Ku bay boch e piilal ni yad ma pi’ e ayuw ni ngan toy boch e Tagil’ e Liyor, ma yad be ngongliy e yungin ke kireb riy, ma boch i yad e ma yarmiy rogon e pi convention ni yima tay, ma boch e yad bang ko fare Hospital Liaison Committee nge Patient Visitation Group, nge ku boch e maruwel ni yima rin’. Ere ba gel e maruwel ni ma tay e piin piilal ni fan ngodad!

10. Mang boch i fan nib ga’ fan u wan’dad e piin piilal nib gel e maruwel ni yad ma tay?

¹⁰ I yiiynag Jehovah u m’on riy nib fel’ rogon nra i ayuwegdad e piin piilal ma ‘dab kud tamdaggad ara ud rusgad.’ (Jer. 23:4) Bay reb e walag nib pin u Finland ni ka nog Johanna ngak ni nang nib riyul’ e pi thin ney u nap’an ni m’ar e chitiningin nib ubchiya’. I yog ni gaar: “Yugu aram rogon nib mo’maw’ ngog ni nggu weliy lanin’ug ngak yugu boch e girdi’, machane bay reb e piilal ni gathi ri gu manang nib fel’ rogon ni gum’an’nag ir nge motoyil ngog u nap’an ni yag ni nggu weliy e n’en be magafan’ug ngay, ma gamow meybil u taabang, miki micheg ngog ni gub t’uf rok Jehovah. Dakir yib ngan’ug e n’en nri i yog ngog, machane dawor gu pagtalin rogon ndaki magafan’ug. Ba mich u wan’ug ni Jehovah e pi’ e re piilal ney ni nge ayuwegeg ko ngiyal’ ni kari t’uf e ayuw rog.” Uw rogon ni ke ayuwegem e piin piilal ko ulung rom?

11. Uw rogon nrayog ni ngad daged nib ga’ fan e piin piilal u wan’dad? (Kum guy e sasing.)

¹¹ Baadag Jehovah ni ngad daged nib ga’ fan u wan’dad e piin piilal ni “bochan e maruwel ni yad be rin’.” (1 Thess. 5:​12, 13) Henrietta ni ku ma par u Finland e yog ni gaar: “Ba m’agan’ e piin piilal ngay ni ngar ayuweged yugu boch e girdi’, machane gathi be yip’ fan ni ka boor e tayim rorad ara gelngirad ko tin ka bay e girdi’ ara darur mada’naged e magawon u lan e yafos rorad. Yu ngiyal’ e kemus  ni ma lungug ngorad, ‘Ga manang, gur reb e piilal nri gab manigil. Gu baadag ni ngam nang e re n’ey.’” Bay reb e walag nib pin u Türkiye d ni ka nog Sera ngak ni gaar: “Ba t’uf ni ngan pi’ e athamgil nga laniyan’ e piin piilal ya nge yag nra ululgad i rin’ e maruwel rorad. Ere rayog ni ngad pied bang e card ngorad, ara da pininged yad ni ngad abichgad u taabang, ara da uned ngorad ko machib.” Bay reb e piilal nrib ga’ fan u wan’um e maruwel nib gel ni ma tay, fa? Faanra bay, mag gay boch e kanawo’ nrayog ni ngam dag ngak nib ga’ fan u wan’um e n’en ma rin’.​—1 Kor. 16:18.

PI WALAG NI PUMOON NI YAD MA LEKAG E ULUNG E YAD MA PI’ GELNGIN E ULUNG

12. Mang yaram e ni ngongliy ko bin som’on e chibog ya nge yag nni pi’ gelngin e pi ulung? (1 Thessalonika 2:​7, 8)

¹² I pi’ Kristus Jesus e pi “pumoon ni tow’ath” ni ngar ayuweged e ulung u yugu reb e kanawo’. I pow’iy e piin piilal u Jerusalem ni ngar l’oged Paul, nge Barnabas, nge yugu boch e pumoon ni ngar lekaged e ulung. (Acts 11:22) Mang fan? Bochan e ngar pied gelngin e ulung ni ku bod fan nni dugliy boch e walag ni pumoon ni ngar manged boch e ministerial servant nge piin piilal. (Acts 15:​40, 41) Pi pumoon ney e boor ban’en ni ur paged farad riy ya nge yag nrin’ed e re maruwel ney, mu kur ted e yafos rorad nga thatharen e riya’ ni bochan e ngar skulnaged yugu boch e girdi’ mar pied e athamgil nga lanin’rad.​—Mu beeg e 1 Thessalonika 2:​7, 8.

13. Mang boch e maruwel ni ma rin’ e pi walag ni pumoon ni yad ma lekag e ulung?

¹³ Pi walag ni pumoon ni yad ma lekag e ulung e gubin ngiyal’ ni yad be milekag u bang nga bang. Bay boch i yad nib n’uw yang e gin ma milekag riy ni nge yan i guy e pi ulung. Reb e walag ni ma lekag e ulung e gubin e wik ni bay in e welthin ni ma pi’, maku ma yan i guy e pi walag ni nge pi’ e athamgil nga lanin’rad, ma ma yarmiy e muulung ni fan ko pioneer, nge piin piilal, nge muulung ko machib. Ma ngongliy e welthin ni nge pi’ u nap’an e muulung, maku ma yarmiy e pi circuit assembly nge convention. Ku ma pi’ fare skul ni fan ko pioneer,  maku ma yarmiy e muulung ni fan ko piin pioneer ko pi ulung ni ma lekag, maku ma rin’ boch e maruwel. Bay yu ngiyal’ ni ku ma pi’ e branch ofis boch e maruwel ngak ni nge rin’ nib ga’ fan mab t’uf ni ngan gurnag.

14. Mang boch i fan nib ga’ fan u wan’dad e pi walag ni pumoon ni yad ma lekag e ulung nib gel e maruwel ni yad ma tay?

¹⁴ Uw rogon ni ma yib angin ko pi walag e maruwel ni ma rin’ e pi walag ni pumoon ni yad ma lekag e ulung? Bay reb e walag ni pumoon u Türkiye ni weliy murung’agen e ngiyal’ ni ma yib e pi walag ni yad ma lekag e ulung riy ni gaar: “Urngin yay ni yad ra yib ko ulung rog ma yad ma pi’ e athamgil nga lanin’ug ni nggu yoornag e tayim ni nggu ayuweg pi walageg riy. Boor e pi walag ni pumoon ney ni kug mada’nagrad, machane dariy bagayad ni ke k’aringeg ni nggu lemnag ni kaygi yoor pa’ nga puluwon ara dabiyog ni ngan non ngak.” Johanna ni faan kan weliy murung’agen e bay bayay nra machibgow reb e walag ni ma lekag e ulung u taabang, machane dariy be’ nra piriegew u tabinaw. I gaar: “Yugu aram rogon, ma da gur ma pagtalin e rofen nem. Ngiyal’ nem e bay l’agruw e ppin ni walageg ni ka fin ra chuwgow ka ranow ra parew nga yugu bang ma kar gu tawrengnagrow. I pi’ e re walag nem e athamgil nga lanin’ug miki ayuwegeg ni nggu nang ni chiney e sana dabiyog ni ngad pared u bang nib chugur ngak chon e tabinaw nge pi fager rodad, machane gad ra yan nga lan e bin nib beech e fayleng ma boor e tayim nrayog ni ngad rin’ed boch ban’en u taabang.” Boor i gadad e rib ga’ fan u wan’ e pi walag ni yad ma lekag e ulung nge rogon ni yad ma ayuwegdad.​—Acts 20:37–21:1.

15. (a) Uw rogon nrayog ni ngad daged nib ga’ fan u wan’dad e pi walag ni pumoon ni yad ma lekag e ulung nrogon nib puluw ko 3 John 5-8? (Kum guy e sasing.) (b) Mang fan nsusun e ngaud lemnaged leengin e pi pumoon ni kan dugliyrad ni ngaur rin’ed boch e maruwel u lan e ulung, ma uw rogon nrayog ni ngad rin’ed e re n’ey? (Mu guy fare kahol ni kenggin e “ Mu Lemnag Pi Leengirad.”)

¹⁵ I pi’ apostal John e athamgil nga laniyan’ Gaius ni nge gol ko pi walag ni pumoon ni kar bad ni ngar pied gelngin e ulung, me “ayuwegrad nge yog nranod ko milekag rorad nrogon nib m’agan’ Got ngay.” (Mu beeg e 3 John 5-8.) Reb e kanawo’  nrayog ni ngad rin’ed e re n’ey riy e aram e ngad pininged e en ma lekag e ulung ni ngad abichgad u taabang. Ku reb e kanawo’ e aram e ngad uned ko machib u nap’an nra yib ni nge lekag e ulung rodad. Leslie ni faan kan weliy murung’agen e ku bay boch e kanawo’ ni ma dag riy ni be pining e magar ko pi walag ney. I yog ni gaar: “Gu ma meybil ngak Jehovah ni nge pi’ e tin nib t’uf rorad. Ku gamow ma yoloy figirngig boch e babyor nggu piew ngorad ni gamow be weliy gelngin e ayuw ni kar pied ngomow u nap’an ni yad ra yib ra lekaged e ulung romow.” Dab mu pagtalin ni pi walag ney ni yad ma lekag e ulung e ku bay e magawon rorad maku ma aw parowrad. Yu ngiyal’ e yad ma m’ar, maku ma magafan’rad, maku ma mulan’rad. Thin ni ga ra yog ngak bagayad u fithik’ e sumunguy ara bochi tow’ath ni ga ra pi’ ngak e sana aram e fulweg ko meybil rok ni be ning e ayuw!​—Prov. 12:25.

BA T’UF BOCH E “PUMOON NI TOW’ATH”

16. Mang boch e deer nrayog ni nge fith e pi walag ni pumoon yad riy nrogon nib puluw ko Proverbs 3:27?

¹⁶ Kab t’uf boch e walag ni pumoon u ga’ngin yang e fayleng ni ngar pigpiggad ni yad boch e “pumoon ni tow’ath.” Faanra gur reb e walag ni pumoon ni kam taufe, ma gur, rayog ni ngam “pi’ e ayuw ko piin ke t’uf e ayuw rorad”? (Mu beeg e Proverbs 3:​27, BT.) Ba m’agan’um ngay ni ngam nameg ni ngam mang reb e ministerial servant, fa? Ma faanra gur reb e ministerial servant, mab m’agan’um ngay ni ngam nameg ni ngam mang reb e piilal, fa? e Gur, rayog ni ngam thilyeg boch ban’en u rarogon e par rom ya nge yag nim un ko fare School for Kingdom Evangelizers, fa? Re skul ney e ra ayuwegem ni nge yag ni ngki fanayem Jesus u yugu boch e kanawo’. Faanra ga be lemnag ndabiyog ni ngam rin’ e pi n’ey, mag meybil ngak Jehovah. Mu wenig ngak ni nge pi’ gelngin nib thothup ni nge ayuwegem ya nge yag nim rin’ urngin e maruwel ni kan pi’ ngom.​—Luke 11:13; Acts 20:28.

17. Mang e be micheg e pi “pumoon ni tow’ath” u murung’agen Kristus Jesus ni Pilung rodad?

¹⁷ Pi walag ni pumoon ni ke dugliyrad Jesus ni ngar manged e pi “pumoon ni tow’ath” e aram e mich riy ni ir e be pow’iydad e ngiyal’ ney ko tin tomuren e rran. (Matt. 28:20) Ere gathi ga be pining e magar ni bochan e bay e Pilung rodad ni ma t’ufegey, mab gol, ma manang e tin nib t’uf rodad, ma kki pi’ boch e walag ni pumoon ni ke bung rogorad nrayog ni ngar pied e tin nib t’uf rodad? Faanra arrogon, me ere mu gay boch e kanawo’ nrayog ni ngam dag riy nib ga’ fan u wan’um e pi pumoon ney nib gel e maruwel ni yad ma tay. Maku dab mu pagtalin ni ngam pining e magar ngak Jehovah ni Ir e Ke Yib ‘urngin e tin nib fel’ nge urngin e tow’ath nrib manigil’ rok.​—Jas. 1:17.