1. Mang e be micheg Jehovah ngak e pi tadenen ni kar kalgadngan’rad?

 YUGU aram rogon ni Jehovah e Ir e Ke Sunmiydad, ma ir e En Ma Pi’ e Motochiyel ngodad, nge Tapuf Oloboch rodad, machane ku ir e Chitamangidad ni bay u tharmiy ni gad ba t’uf rok. (Ps. 100:3; Jas. 4:12) Nap’an ni gad ra denen nib togopuluw ngak mar da kalgadngan’dad, ma gathi kemus nrayog rok ni nge n’ag fan rodad ya kub m’agan’ ngay ni nge rin’. (Ps. 86:5) Ke micheg ngodad u daken Isaiah ni profet ni gaar: “Denen ni kam lukgad ngay e rib gagiyel nib ramaen row, machane bay gu maluknagmed ngam beechgad ni bod feni beech e ayis ni ma mul u lang nga but’.”​—Isa. 1:18.

2. Mang e thingar da rin’ed ni faanra gad baadag ni nge fel’ e tha’ u thildad yugu boch e girdi’?

² Bochan ndawor da flontgad, ma gad gubin ni gad ma yog ara gad ma rin’ boch ban’en ni ma kirebnag laniyan’ yugu boch e girdi’. (Jas. 3:2) Machane re n’ey e der yip’ fan ndabiyog ni nge fel’ e tha’ u thildad e pi girdi’ ney. Rayog ni nge fel’ e tha’ u thildad ni faanra ud filed rogon ni ngaud n’aged fan e kireb rorad. (Prov. 17:9; 19:11; Matt. 18:21, 22) Faanra ke yog ara ke rin’ be’ ban’en nib achig ni ke kirebnag lanin’dad, ma baadag Jehovah ni ngad n’aged fan rok. (Kol. 3:13) Bay fan ni ngad rin’ed e re n’ey, ya Jehovah e ri ma “n’ag fan” u wan’ urngin e kireb rodad.​—Isa. 55:7.

3. Mang e gad ra weliy ko re article ney?

³ Re article ney e gad ra weliy riy rogon nrayog ni nge folwok e girdi’ ndawor ra flontgad u rogon ni ma n’ag Jehovah fan e kireb. Tin ngan e denen e thingar dogned ko piin piilal? Mang fan ni baadag Jehovah ni ngad n’aged fan e kireb rok yugu boch e girdi’? Ma mang e rayog ni ngad filed rok yugu boch e walag nrib gel e gafgow ni kar ted ni bochan e denen rok yugu boch e girdi’?

4. (a) Mang e thingari rin’ reb e tapigpig rok Jehovah u nap’an nra rin’ reb e denen nib ubchiya’? (b) Mang e ba milfan ko piin piilal u nap’an ni yad ra mada’ be’ ni ke rin’ reb e denen?

⁴ Nap’an nra rin’ be’ reb e denen nib ubchiya’ ma susun e nga dogned ko piin piilal. Kan weliy murung’agen boch e pi denen ney ko 1 Korinth 6:9, 10. Ra rin’ be’ reb e denen nib ubchiya’ ma rib kireb e n’en ke rin’ ya ke th’ab e motochiyel rok Got. Faanra rin’ reb e Kristiano reb e denen ni aray rogon, ma thingari meybil ngak Jehovah Got me wenig ni ngan n’ag fan rok maku thingari yan i non ko piin piilal u lan e ulung. (Ps. 32:5; Jas. 5:14) Mang e ba milfan ko piin piilal? Kemus ni yigoo Jehovah e bay mat’awun ni ngari n’ag fan e denen, ma ma rin’ e re n’ey u daken fare biyul ni maligach. * Machane ke tay Jehovah ni piin piilal e ba milfan ngorad ni ngar fanayed e Thin nu Bible ni ngar dugliyed ko ka rayog ni nge par reb e tadenen u lan e ulung fa danga’. (1 Kor. 5:12) Ra nge yag ni ngar rin’ed e re n’ey, ma reb e ban’en ni yad ma rin’ e aram e yad ma guy rogon ni ngar nanged e fulweg ko pi deer ni baaray ni be gaar: Lem rok facha’ ni nge rin’ fare denen, fa? Gur, ke guy rogon ni nge mithag e denen rok ndabi nang yugu boch e girdi’, fa? Ke n’uw nap’an ni be rin’ e re denen ney, fa? Bin th’abi ga’ fan riy e bay e mich riy nriyul’ ni ke kalngan’, fa? Ma bay e mich riy ni ke n’ag Jehovah fan e kireb rok, fa?​—Acts 3:19.

5. Mang angin e maruwel ni ma rin’ e piin piilal?

⁵ Nap’an nra mada’ e piin piilal nge faen ke denen, ma ngar nameged ni nge taareb rogon e n’en ngan dugliy u roy u fayleng ko n’en kan dugliy u tharmiy. (Matt. 18:18) Uw rogon ni ma yib angin e re yaram ney ko ulung? Ma ayuweg e ulung ni nge dabi par e pi tadenen riy ndarur kalgadngan’rad, mar magawonnaged e tin ka bay e tapigpig rok Jehovah nib ga’ farad u wan’. (1 Kor. 5:6, 7, 11-13; Titus 3:10, 11) Re n’ey e ku ra ayuweg reb e tadenen ni nge kalngan’ me n’ag Jehovah fan e kireb rok. (Luke 5:32) Ma yibilay e piin piilal be’ ni ke kalngan’ ma rogned ngak Jehovah ni nge ayuweg ni ngki fel’ bayay e tha’ u thilrow.​—Jas. 5:15.

6. Faanra kan tharbog be’ ko ulung, ma ka rayog ni nge n’ag Jehovah fan e kireb rok, fa? Mu tamilangnag.

⁶ Susun e ke mada’ e piin piilal nge be’ ni ke denen, machane de kalngan’. Faanra aray rogon, ma aram e yira tharbog ko ulung. Faanra ke th’ab facha’ reb e motochiyel ko am, ma dabi ayuweg e piin piilal ni nge dabi yib wenegan ngak e kireb ni ke rin’. Ma pag Jehovah e piin yad ma yog e thin ko am ni ngar pufthinnaged mar gechignaged be’ ni ke th’ab e motochiyel ndemtrug ko ke kalngan’ fa danga’. (Rom. 13:4) Machane faanra yan i nang facha’ boch nga tomuren nib kireb e n’en ke rin’ me thilyeg e lem nge ngongol rok, ma aram e ra m’agan’ Jehovah ngay ni nge n’ag fan rok. (Luke 15:17-24) Re n’ey e ba muun ngay e denen nrib gel e ubchiya’ riy.​—2 Kron. 33:9, 12, 13; 1 Tim. 1:15.

7. Uw rogon nrayog ni ngad n’aged fan e kireb rok be’ ni ke denen nib togopuluw ngodad?

⁷ Gad ba felfelan’ ngay ni kad nanged nde milfan ngodad ni ngad dugliyed ko ra n’ag Jehovah fan e kireb rok reb e tadenen fa danga’! Yugu aram rogon ma ka bay ban’en nib t’uf ni ngad dugliyed. Mang e re n’em? Yu ngiyal’ e rayog ni nge denen be’ nib togopuluw ngodad, machane me wenig ngodad me yog ni ngad n’aged fan rok. Machane yu ngiyal’ e rayog ndabi rin’ e re n’ey. Demtrug rogon ma rayog ni ngad dugliyed ni ngad n’aged fan rok ma gad guy rogon ndab da damumuwgad ngak. Riyul’ nrayog nib t’uf e tayim nge athamgil ya nge yag ni  rin’ be’ e re n’ey nib ga’ ni faanra karin kirebnag laniyan’. Be gaar e The Watchtower ko September 15, 1994: “Nap’an ni ga ra n’ag fan e kireb rok reb e tadenen, ma gathi be yip’ fan nib fel’ u wan’um e denen ni ke rin’. Reb e Kristiano ni ma n’ag fan e denen e ba pagan’ ngay nib fel’ rogon nra pithig Jehovah fare magawon. Ir fare Tapuf Oloboch u ga’ngin e palpalth’ib nib mat’aw, ma ra yal’uweg gubin ban’en ko ngiyal’ nib puluw ni nge rin’ riy.” Ere mang fan ni baadag Jehovah ni ngad n’aged fan e kireb me pagan’dad ngay nib fel’ rogon nra pithig e magawon rodad?

8. Ra ud n’aged fan e kireb, ma uw rogon ni gad be dag nib ga’ fan u wan’dad e runguy rok Jehovah?

⁸ Ra ud n’aged fan e kireb, ma aram e gad be dag nib ga’ fan u wan’dad e runguy rok Jehovah. U lan reb e fanathin rok Jesus e taarebrogonnag Jehovah riy ngak ba masta ni n’ag fan u wan’ e salpiy ni malfith rok reb e sib rok ndabiyog ni nge sulweg. Machane re sib nem e de dag e runguy ngak yugu reb e sib ni bay e malfith rorow nib achig ko malfith rok. (Matt. 18:23-35) Mang e be fil Jesus ngodad ko re n’ey? Faanra riyul’ nib ga’ fan u wan’dad rogon ni ma dag Jehovah e runguy ngodad, ma aram e ra k’aringdad e re n’ey ni ngad n’aged fan e kireb ni ke rin’ yugu boch e girdi’ ngodad. (Ps. 103:9) Baaray e n’en ni yog e The Watchtower boch e duw ni ke yan ni gaar: “Demtrug urngin yay ni gad ra n’ag fan e kireb rok yugu boch e girdi’, ma dabi chugur ni nge taareb rogon nga rogon ni ke n’ag Got fan e kireb rodad ma ke dag e runguy ngodad u daken Kristus.”

9. Mini’ e piin ma runguyrad Jehovah? (Matthew 6:14, 15)

⁹ Piin yad ma n’ag fan e kireb e yira n’ag fan e kireb rorad. Ma runguy Jehovah e piin yad ma runguy e girdi’. (Matt. 5:7; Jas. 2:13) I tamilangnag Jesus e re n’ey u nap’an ni fil ngak pi gachalpen rogon ni ngar meybilgad. (Mu beeg e Matthew 6:14, 15.) U m’on riy miki yog Jehovah e re n’ey ni bay rogon ngak Job ni tapigpig rok. Thin nib gel ni yog Elifaz, nge Bildad, nge Zofar e ri kirebnag laniyan’ e re moon ney nib yul’yul’. Ere yog Jehovah ngak ni nge yibilayrad, ma tomuren ni rin’ e re n’ey me tow’athnag.​—Job 42:8-10.

10. Faan gad ra par ni gad ba damumuw ngak be’, ma uw rogon ni gad be gafgownagdad? (Efesus 4:31, 32)

¹⁰ Gad ra par ni gad ba damumuw ma gadad e gad ra gafgow. Damumuw e bod ban’en nib tomal ni gad be fek, ma baadag Jehovah ni ngad thamiyed e gapas ni ma yib ngak e piin yad ma tal ndab kur damumuwgad. (Mu beeg e Efesus 4:31, 32.) Be yog ngodad ‘ndab da damumuwgad; ma dabi yib e puwan’ ngodad!’ (Ps. 37:8) Faan gad ra fol ko re fonow ney, ma ra ayuwegdad. Gad ra par ni gad ba damumuw ngak be’ ni ke kirebnag lanin’dad, ma rayog ni ngad k’aringed e m’ar ngodad miki magawonnag lanin’dad. (Prov. 14:30) Maku reb e, gad ra par ni gad ba damumuw ngak be’ ma dabi gafgow facha’ ni taareb rogon ni faan gad ra unum ban’en ni bay e yub riy, maku dariy ban’en nra buch rok. Machane, nap’an ni gad ra n’ag fan e kireb rok yugu boch e girdi’, ma gadad e ra yib angin ngodad. (Prov. 11:17) Ra gapas lanin’dad nge gum’ircha’dad me yag ni ngad ululgad ko pigpig rodad ngak Jehovah.

11. Mang e be yog e Bible u murung’agen e kireb ni ngan sulweg taban? (Roma 12:19-21)

¹¹ Jehovah e ba milfan ngak ni nge sulweg taban e kireb. Dawori pi’ mat’awdad ni ngad sulweged taban e kireb ni ke rin’ be’ ngodad. (Mu beeg e Roma 12:19-21.) Bochan dad nanged urngin ban’en u rarogon e tin ke buch nge ku bochan ni yu ngiyal’ e de puluw rogon e lem rodad ya dawor da flontgad, ma aram fan ndabiyog ni ngad turguyed rarogon boch ban’en  nib fel’ rogon ni bod nrayog rok Got. (Heb. 4:13) Ma yu ngiyal’ e gad ma pag lanin’dad ni nge magawonnag rogon ni ngad turguyed e n’en nib fel’ ni ngad rin’ed. I thagthagnag Jehovah nga laniyan’ James ni nge yoloy ni gaar: “Damumuw rok e girdi’ e dar ma ayuweg e girdi’ nge yog nra ngongliyed e tin nib mat’aw ni ir e be finey Got.” (Jas. 1:20) Ere rayog ni nge pagan’dad ngay nra rin’ Jehovah e n’en nib fel’ ni nge rin’, me guy rogon ni nge munmun me yan i yal’uw gubin ban’en.

12. Uw rogon ni ngad daged nib pagan’dad nib mat’aw e tin ma rin’ Jehovah?

¹² Gad ra n’ag fan e kireb, ma aram e gad be dag nib pagan’dad nib mat’aw e tin ma rin’ Jehovah. Gad ra pag fan e magawon rodad ngak, ma aram e gad be dag nib pagan’dad nra yal’uweg wenegan e denen ni kan rin’. Gad ra yan nga lan e bin nib beech e fayleng rok ma gad ra “pag talin” urngin ban’en ni bay u lanin’dad e chiney ni ma k’aring e kireban’ ngodad ma dabki sul nga lanin’dad. (Isa. 65:17) Machane faanra kari kirebnag be’ lanin’dad, ma gur, rayog ni ngad talgad ndab kud damumuwgad ngak, fa? Am lemnag rogon ni ke yag ni nge rin’ boch e girdi’ e re n’ey.

13-14. Mang e kam fil u murung’agen e kireb ni yima n’ag fan ko n’en ni buch rok Tony nge José?

¹³ Boor e pi walag ni kar dugliyed ni ngar n’aged fan e kireb ni ke rin’ yugu boch e girdi’ ngorad ni yugu aram rogon ni kari kirebnag lanin’rad. Mang angin ni ke yib ngorad ni bochan e kar rin’ed e re n’ey?

¹⁴ Boor e duw u m’on ni nge nang Tony * ni ma par u Manile’ e tin riyul’, me yan i nang ni bay be’ ni pumoon ni ka nog José ngak ni ke thang e fan rok reb e pumoon ni walagen nib ilal ngak. Ngiyal’ nem e ir be’ nib ta cham, ma baadag ni nge sulweg taban e kireb ni ke rin’ José. Machane me kol e polis José nga non’ nga kalbus ko re kireb nem ni rin’, me yan i boch nga tomuren min pag. Ere dugliy Tony u wan’ ni nge gay ko gin bay riy nge thang e fan rok. I yan i chuw’iy bboyoch ni nge li’ ngay. Machane me tabab Tony ni ngar filed e Pi Mich Rok Jehovah e Bible. I gaar, “Nap’an nug be fil e Bible, mug nang nib t’uf ni nggu thilyeg e ngongol rog nib muun ngay ni nggu digey e damumuw rog.” Boch nga tomuren me un Tony  ko taufe me munmun min dugliy ni nge mang reb e piilal u lan e ulung. Ri gin u nap’an ni nang ni kki mang José reb e tapigpig rok Jehovah ni kan taufenag! Nap’an ni mada’ Tony nge José, mar gumuchmuchgow me yog Tony ngak José ni ke n’ag fan e kireb rok. I yog Tony ni kari felfelan’ ko n’en ke rin’ nrib mo’maw’ rogon ni nge weliy ko thin. Arrogon, i tow’athnag Jehovah Tony ni bochan e m’agan’ ngay ni nge n’ag fan e kireb.

15-16. Mang e kam fil u murung’agen e kireb ni yima n’ag fan ko n’en ni buch rok Peter nge Sue?

¹⁵ Nap’an e duw ni 1985, ma be un Peter nge Sue ko muulung ni yibe tay u reb e Tagil’ e Liyor, ma aram me chub ba donmach ni ke yan i mithag be’ nib pumoon e ngaram! Ba gel e maad’ad ni tay Sue me kireb owchen nge tel ndaki fel’, maku dabkiyog ni nge farabon ban’en nib fel’ rogon. * Ba ga’ ni ma gaar Peter nge Sue u wan’row, ‘Ba miti mang girdi’ e ra rin’ e biney e pa’ ni er feni gel e kireb riy?’ Boor e duw nga tomuren me kol e polis fare pumoon ni gathi ir reb e tapigpig rok Jehovah min dugliy ni nge par u kalbus u n’umngin nap’an e yafos rok. Nap’an nni fithrow ko kar n’agew fan e kireb ko re pumoon nem, me lungurow: “Be fil Jehovah ngodad ni faan gad ra par ni gad ba damumuw ni bochan e kireb ni kan rin’ ngodad, ma rayog ni nge k’aring e m’ar ngodad miki magawonnag lanin’dad. Ere de n’uw nap’an nga tomuren ni buch e re n’ey, ma gamow meybil ngak Jehovah ni nge ayuwegmow ni nge dab kug damumuwgow ma gamow ulul i rin’ e tin gamow ma rin’ u lan e yafos romow.”

¹⁶ Gur, kab kafram i yib nib mom ngorow ni ngar n’agew fan u wan’row e n’en ni rin’ e re pumoon nem? Danga’. Ra ululgow ngay ni lungurow: “Yu ngiyal’ e nap’an nra gafgow Sue ni bochan e maad’ad ni tay, mu kug damumuwgow bayay. Machane da gur parew ni gamow be lemnag e re n’em, ere ba papey ni ma chuw e damumuw romow. Bin riyul’ riy e, rayog ni nggognew ni faanra mang e re pumoon nem reb i walagmow borran ma gamow ra felfelan’ ngay. Kug filew ko n’en ni buch romow nnap’an  ni ga ra fol ko pi kenggin e motochiyel u Bible, ma ra yag e puf rogon ngom. Bin riyul’ riy e, boor e kanawo’ nrayog ni nge pi’ e pi kenggin e motochiyel u Bible e puf rogon riy ngodad! Ku be fel’ lanin’mow ni bochan e gamow manang ndab ki n’uw nap’an me chuweg Jehovah wenegan e kireb ni ke buch romow.”

17. Mang e kam fil u murung’agen e kireb ni yima n’ag fan ko n’en ni buch rok Myra?

¹⁷ Myra e nang e tin riyul’ u tomuren ni ke mabgol ma ke fakay l’agruw e bitir. Machane pumoon rok e dabun e tin riyul’. Munmun me un ngak be’ ni gathi mabgol rok me n’ag e tabinaw rok. I gaar Myra: “Nap’an ni n’agmad e pumoon rog, ma rug gin ko n’en ke rin’, ma kub mo’maw’ ni nge mich u wan’ug, miki kireban’ug, mu kug kalngan’ug, mu kug lemnag ni gag e kireb rog, mu kug damumuw. Ireray e pi n’en ma thamiy be’ ni ke chel be’ nib t’uf rok ke kirebnag laniyan’.” Yugu aram rogon ni ke mus e mabgol rorow, machane ka ma amith laniyan’ ni bochan e n’en ke rin’ e pumoon rok ngak. Ki ulul ngay ni gaar: “Boor e pul nug par nug be mochuch ma gu be damumuw, mug nang nre n’ey e be magawonnag e tha’ u thilmow Jehovah nge yugu boch e girdi’.” Chiney e ma yog Myra ndakir damumuw ma dakir finey ni nge buch ban’en nib kireb ko re pumoon nem ni ur mabgolgow. Be athapeg ni nge ba ngiyal’ me fel’ e tha’ u thilrow Jehovah. Ke yag ni nge tiyan’ Myra ko n’en ka bay nga m’on. Yigoo ir ni chuguliy gal fak ni ngar mangew l’agruw e tapigpig rok Jehovah. Ere chiney e be pigpig Myra nge gal fak nge chon e tabinaw rorow ngak Jehovah u fithik’ e felfelan’.

18. Mang e rayog ni nge pagan’dad ngay nra rin’ Jehovah ni ir e Bin Th’abi Ga’ e Tapuf Oloboch?

¹⁸ Gad ba felfelan’ ngay ni kad nanged nde milfan ngodad ni ngad dugliyed rogon e pufthin ni yira tay ngak e girdi’! Ya Jehovah ni ir e Bin Th’abi Ga’ e Tapuf Oloboch e ir e ra rin’ e re n’ey. (Rom. 14:10-12) Rayog ni nge pagan’dad ngay ni gubin ngiyal’ nra dugliy ban’en nib puluw ko pi motochiyel rok u murung’agen e tin nib fel’ nge tin nib kireb. (Gen. 18:25; 1 Ki. 8:32) Dariy ba ngiyal’ nra rin’ ban’en nde mat’aw!

19. Mang e ra rin’ Jehovah ni ir e bin th’abi fel’ e tapuf oloboch?

¹⁹ Gad be athapeg ni nge taw ko ngiyal’ nra chuweg Jehovah gubin i wenegan e denen ni ke af ko girdi’. Ngiyal’ nem e yira golnag gubin e maad’ad u dowdad mu kun golnag lanin’dad. (Ps. 72:12-14; Rev. 21:3, 4) Dakuriy ba ngiyal’ ni ka ra yib e pi n’em nga lanin’dad. Machane chiney ni gad be sonnag e re ngiyal’ i n’em e gad be pining e magar ngak Jehovah ni bochan e rayog ni ngad folwokgad rok u rogon ni ma n’ag fan e kireb.