An aton kalibotan padayon nga naatubang ha kadelikadohan ha pagkaada nuklear nga girra tungod kay an gamhanan nga mga gobyerno padayon nga naghihimo hin mga nuklear nga armas. Natural la nga mabaraka an mga tawo nga kon mas damu an nuklear nga mga armas, daku liwat an posibilidad nga magtikang an nuklear nga girra. Nahahadlok liwat an iba nga kon an usa nga nasud gumamit hin bisan usa la nga mahinay nga nuklear nga bomba, makakagtikang ito hin nuklear nga girra nga makakadaot ha bug-os nga kalibotan. Sugad han siring han Bulletin of the Atomic Scientists, “nagkikinabuhi kita ha panahon nga pirme may kadelikadohan ha pagkaada nuklear nga girra.”

 Posible gud ba magkaada nuklear nga girra? Kon oo, masasalbar ba an aton planeta? Paonan-o naton makakaya an kabaraka ha posibilidad nga magkaada nuklear nga girra? Ano an ginsisiring han Biblia?

Hini nga artikulo

•  Igintagna ba han Biblia an nuklear nga girra?

•  Tutugotan ba han Dios nga magkaada nuklear nga girra?

•  Masasalbar ba an aton planeta?

•  Paonan-o mo makakaya an kabaraka ha pagkaada nuklear nga girra?

•  Igintagna ba han Biblia an usa nga nuklear nga Armagedon?

•  Ano an solusyon han Biblia ha girra?

•  An libro ba nga Pahayag ha Biblia nagtutudlok ha nuklear nga girra?

 Igintagna ba han Biblia an nuklear nga girra?

 An Biblia waray espisipiko nga mag-unabi parte ha nuklear nga girra. Pero an kadelikadohan han nuklear nga girra, resulta han mga kinaiya ngan panhitabo nga igintagna han Biblia.

 Ikompara an masunod nga mga teksto ha Biblia ha nahitatabo ha kalibotan yana:

 Teksto ha Biblia: An mga disipulo ni Jesus nagpakiana: “Ano an magigin tigaman han imo presensya ngan han ikatarapos han sistema han mga butang?” Binaton hi Jesus: “An usa nga nasud makikig-away ha lain nga nasud ngan an usa nga ginhadian makikig-away ha lain nga ginhadian.”—Mateo 24:3, 7.

 Panhitabo ha kalibotan: An mga nasud, labi na adton nakakahimo hin nuklear nga mga armas, mas agsob makig-girra.

 “An kalibotan mas nagtitikabayolente hinin naglabay nga mga tuig: mas nagtitikadamu la an araway.”—The Armed Conflict Location & Event Data Project.

 Teksto ha Biblia: ‘Ha panahon han kataposan an hadi han sur makikigdusoay ha hadi han norte.’—Daniel 11:40.

 Panhitabo ha kalibotan: An magkaaway nga mga nasud pati an ira mga kaalyado nagdudusoay, o nakikigkompetensya, basi magin an pinakagamhanan, sugad han igintagna han Biblia. Bisan kon ginlilikyan yana an direkta nga pakig-away han mga nasud nga may-ada magkusog nga nuklear nga mga armas, padayon la gihap hira nga naghihimo hin mas magkurukusog nga nuklear nga mga armas.

 “Ha naglabay nga napulo ka tuig nagkaada mas damu nga araway butnga han mga nasud, upod na an mga girra nga ginsuportaran han mga nasud nga may magkusog nga armas.”—The Uppsala Conflict Data Program.

 Teksto ha Biblia: “Ha kataposan nga mga adlaw maabot an peligroso nga mga panahon nga makuri pakiangayan. Kay an mga tawo magigin . . . diri naruruyag ha bisan ano nga pakigsabot, mga parapakaraot, waray pagpugong ha kalugaringon, mapintas.”—2 Timoteo 3:1-3.

 Panhitabo ha kalibotan: Pariho ha damu nga tawo yana, an mga lider ha kalibotan agsob nga diri nagkakauruyon. Ngan imbes makigtuhay ha mamurayawon nga paagi, danay nangangalimbasog hira nga sulbaron an ira diri pagkauruyon pinaagi hin pwersa o pagtarhog. Ito nga mga buhat nakakadugang hin posibilidad nga magkaada nuklear nga girra.

 “Tungod kay waray hira nabibilngan nga paagi nga magkauruyon, mas magtitikagrabe an araway.”—S. Saran Ngan J. Harman, World Economic Forum.

 Tutugotan ba han Dios nga magkaada nuklear nga girra?

 Waray ginsiring an Biblia. Pero nasiring ito nga an “makaharadlok nga mga kiritaon,” o makangingirhat nga mga panhitabo, an maieksperyensyahan ha aton panahon. (Lucas 21:11) Pananglitan, an paggamit han mga atomic bomb ha Girra Kalibotan II. Iginsasaysay han Biblia kon kay ano nga gintutugotan han Dios an mga girra. Basi mahibaro hin dugang, kitaa an video nga Kay Ano nga Gintutugotan han Dios an Pag-antos?

 Masasalbar ba an aton planeta?

 Oo. Bisan kon gumamit utro an mga tawo hin nuklear nga mga armas, diri tutugotan han Dios nga umabot ha punto nga mabungkag an bug-os nga kalibotan. An Biblia nagsiring nga diri la matatalwas an aton planeta kondi uukyan liwat ito han mga tawo ha waray kataposan.

 Naiimadyin han iba nga tawo nga ha tiarabot, an aton planeta uukyan la hin pipira nga tawo nga naniniguro nga makatalwas ha ruba nga tuna nga duro an polusyon nga resulta han nuklear nga girra. Pero mababasa ha Biblia nga an bisan ano nga kadaot ha aton planeta tungod han mga girra bug-os nga maibabalik.

 Gindisenyo han aton Maglalarang an aton planeta nga may urusahon nga abilidad ha paglugaring nga makarekober ha bisan ano nga kadaot. Labaw ha ngatanan, gagamiton han Dios an iya gahum nga maibalik ha maopay nga kahimtang an aton planeta; magpapabilin ito ha waray kataposan sugad nga makaruruyag gud nga urukyan han mga tawo.—Salmo 37:11, 29; Pahayag 21:5.

 Paonan-o mo makakaya an kabaraka ha pagkaada nuklear nga girra?

 An iba nag-aantos tikang ha kahadlok ha pagkaada nuklear nga girra ngan han mga resulta hito. An mga saad ngan sagdon ha Biblia makakabulig ha ira nga makaya ngan maibanan an ira kahadlok. Paonan-o?

 Mababasa ha Biblia an makalilipay nga kabubuwason para ha tuna ngan ha mga umurukoy hito. Magigin “sugad hin angkla” para ha aton kinabuhi an paghibaro hini nga paglaom ngan makakaiban han aton kabaraka. (Hebreo 6:19, footnote) Maiibanan ta liwat an aton kabaraka pinaagi ha pagpokus ha kon ano la an nahitatabo ha tagsa nga adlaw, diri ha sobra nga paghinunahuna ha kon ano an posible mahitabo ha tiarabot. Sugad han ginsiring ni Jesus: “An tagsa nga adlaw may kalugaringon nga mga problema.”—Mateo 6:34.

 Ngani importante gud nga atamanon ta an aton mental ngan emosyonal nga kahimsog. Mahihimo naton ito pinaagi ha paglikay ha diri ginkikinahanglan nga impormasyon nga nakakadugang ha aton mga kabaraka sugad han mga diskusyon, espekulasyon, ngan mga opinyon parte ha pinakabag-o nga balita ha nuklear. Diri ito nagpapasabot nga ginbabalewaray la naton ini nga mga panhitabo. Lugod, naghihimo kita hin mga paagi nga malikyan an paghinunahuna hini nga mga butang nga waray kita kontrol ngan bangin ngani diri mahitabo.

 Tagi hin panahon an imo kalugaringon nga makapahuway tikang ha magraot nga mga balita pinaagi ha pagpokus ha positibo nga mga butang ha imo kinabuhi.

 An paghibaro hin dugang parte ha mga saad han Dios makakahatag ha imo hin paglaom, kalipay, ngan kamurayawan ha hunahuna.

 Igintagna ba han Biblia an usa nga nuklear nga Armagedon?

 An iba naghuhunahuna nga an Armagedon konektado ha nuklear nga girra ha bug-os nga kalibotan. Diri urusahon nga naiimadyin nira an makangingirhat nga mga resulta han sugad nga panhitabo.

 Pero ginagamit ha Biblia an pulong nga “Armagedon” ha pag-unabi ha girra butnga ha “mga hadi ha bug-os nga inuukyan nga tuna,” o mga gobyerno han tawo, ngan han Dios. a (Pahayag 16:14, 16) An Armagedon diri nag-uupod han bisan ano la nga pagbungkag sugad han nahihimo han nuklear nga mga bomba. Lugod, ha Armagedon, an mga magraot la an bubungkagon han Dios, ngan tungod hito magigin posible an pagkaada tinuod nga kamurayawan ngan seguridad.—Salmo 37:9, 10; Isaias 32:17, 18; Mateo 6:10.

 Ano an solusyon han Biblia ha girra?

 Ipapakita ni Jehova b nga Dios an iya awtoridad ha nag-aaraway nga mga nasud pinaagi ha pagpaundang han ira diri pagkasinabtanay ngan pagbungkag han ira mga armas nga panggirra. Bubuhaton niya ini pinaagi han iya Ginhadian, usa nga langitnon nga gobyerno nga masaliwan ha ngatanan nga pagmando ha tuna.—Daniel 2:44.

 Tututdoan han Ginhadian han Dios an mga tawo kon paonan-o magkikinabuhi nga mamurayawon ngan nagkakaurosa. Tungod kay usa na la nga gobyerno an magmamando ha bug-os nga tuna, mawawara na an diri pagkauruyon; diri na ngani mahibabaro an mga tawo ha pakig-away ha girra! (Micas 4:1-3) Ano an resulta? “Mag-uokoy ha kalinaw an tagsatagsa dida han iya kalugaringon nga mga urubasan ngan kaigosan, ngan waray na maghahadlok ha iya.”—Miqueas 4:4, An Maopay nga Sumat.