Ang pangalan ng huling aklat ng Bibliya ay mula sa salitang Griego na A·po·kaʹly·psis, na nangangahulugang “Paglalantad” o “Pagbubunyag.” Angkop ang pangalang ito dahil ang aklat ng Apocalipsis ay naglalantad ng mga bagay na nakatago at nagbubunyag ng mga pangyayaring magaganap matagal pa matapos itong isulat. Marami sa mga hula nito ang matutupad pa lang.

Sumaryo ng aklat ng Apocalipsis

•   Introduksyon.​—Apocalipsis 1:1-9.

•   Mga mensahe ni Jesus sa pitong kongregasyon.​—Apocalipsis 1:10–3:22.

•   Isang pangitain tungkol sa Diyos na nasa kaniyang trono sa langit.​—Apocalipsis 4:1-11.

•   Serye ng mga pangitain, na sunod-sunod na mangyayari:

  •   Pitong tatak.​—Apocalipsis 5:1–8:6.

  •   Pitong trumpeta, na ang huling tatlo ay naghahayag ng tatlong kaabahan.​—Apocalipsis 8:7–14:20.

  •   Pitong mangkok, na ang bawat isa ay naglalaman ng salot na kumakatawan sa galit ng Diyos na ibubuhos sa lupa.​—Apocalipsis 15:1–16:21.

  •   Mga pangitain tungkol sa pagpuksa sa mga kaaway ng Diyos.​—Apocalipsis 17:1–20:10.

  •   Mga pangitain tungkol sa pagpapala ng Diyos para sa langit at sa lupa.​—Apocalipsis 20:11–22:5.

•   Konklusyon.​—Apocalipsis 22:6-21.

Susi para maintindihan ang aklat ng Apocalipsis

1.   Ang mensahe nito ay positibo, hindi nakatatakot o nakasisindak para sa mga naglilingkod sa Diyos. Iniuugnay ng marami ang salitang “apocalipsis” sa malaking kasakunaan, pero ang aklat ng Apocalipsis ay nagsisimula at nagtatapos sa pagsasabi na ang mga nagbabasa, umuunawa, at tumutupad sa mensahe nito ay magiging maligaya.​—Apocalipsis 1:3; 22:7.

2.   Gumagamit ang Apocalipsis ng maraming “tanda,” o sagisag, na hindi dapat unawain nang literal.​—Apocalipsis 1:1.

3.   Maraming pangunahing tauhan at sagisag sa aklat ng Apocalipsis ang nabanggit na sa naunang mga aklat ng Bibliya:

   •   Jehova​—ang “tunay na Diyos sa langit” at Maylalang ng lahat ng bagay.​—Deuteronomio 4:39; Awit 103:19; Apocalipsis 4:11; 15:3.

   •   Jesu-Kristo​—ang “Kordero ng Diyos.”​—Juan 1:29; Apocalipsis 5:6; 14:1.

   •   Satanas na Diyablo​—ang kaaway ng Diyos.​—Genesis 3:14, 15; Juan 8:44; Apocalipsis 12:9.

   •   Babilonyang Dakila​—tulad ng sinaunang Babilonya (Babel), isang kaaway ng Diyos na Jehova at ng kaniyang bayan, at pinagmulan ng relihiyosong mga kasinungalingan.​—Genesis 11:2-9; Isaias 13:1, 11; Apocalipsis 17:4-6; 18:4, 20.

   •   Ang “dagat”​—napakasamang sangkatauhan na lumalaban sa Diyos.​—Isaias 57:20; Apocalipsis 13:1; 21:1.

   •   Mga bagay na nauugnay sa sinaunang tabernakulo na ginamit para sa pagsamba sa Diyos​—kasama na ang kaban ng tipan, ang malasalaming dagat (hugasan), mga lampara, mga paghahandog ng insenso, at isang altar na pinaghahainan.​—Exodo 25:10, 17, 18; 40:24-32; Apocalipsis 4:5, 6; 5:8; 8:3; 11:19.

   •   Mababangis na hayop​—sumasagisag sa mga pamahalaan ng tao.​—Daniel 7:1-8, 17-26; Apocalipsis 13:2, 11; 17:3.

   •   Mga bilang na may makasagisag na kahulugan.​—Apocalipsis 1:20; 8:13; 13:18; 21:16.

4.   Ang mga pangitain ay magaganap sa “araw ng Panginoon.” Ito ay nagsimula noong 1914 nang itatag ang Kaharian ng Diyos at maghari si Jesus. (Apocalipsis 1:10) Kaya ang Apocalipsis ay pangunahin nang matutupad sa ating panahon.

5.   Para maintindihan ang aklat ng Apocalipsis, kailangan din natin ang mga bagay na tumutulong sa atin na maunawaan ang iba pang bahagi ng Bibliya. Kasama rito ang karunungan mula sa Diyos at tulong mula sa mga nakaintindi na rito.​—Gawa 8:26-39; Santiago 1:5.