Ol Witnes Bilong Jehova i tilim Nupela Taim Trenslesen Bilong Ol Skripsa Holi long ol manmeri husat i laik ritim Baibel.

Maski planti narapela Baibel sosaiti i trensletim na prinim planti milion kopi bilong Baibel, hevi bilong stap rabis na wansait pasin bilong ol man i pasim planti manmeri long kisim kopi bilong Baibel long tokples bilong ol yet. Olsem na ol Witnes Bilong Jehova i tilim Nupela Taim Trenslesen long winim 115 tokples.

Skelim sampela eksampel:

• Ruanda: Silvestre na Venantie husat i gat 4-pela pikinini i tok: “Mipela i stap rabis tru, olsem na mipela i no gat inap mani long baim Baibel bilong olgeta wan wan insait long famili. Nau, wan wan bilong mipela i gat Nupela Taim Trenslesen long tokples Kinyarwanda, na mipela i save ritim Baibel long olgeta de.”

  Wanpela pasto bilong lotu Angliken long Ruanda i tok: “Mi kliagut long tok bilong dispela Baibel. Em i winim ol narapela Baibel mi bin ritim. Ol Witnes Bilong Jehova i laik tru long helpim ol manmeri!”

• Demokratik Ripablik Bilong Kongo: Sampela lotu i no laik salim Baibel bilong tokples Lingala long ol Witnes Bilong Jehova. Lingala em wanpela bilong ol bikpela tokples long kantri.

  Olsem na bihain long ol i rilisim Nupela Taim Trenslesen long tokples Lingala, ol Witnes long Kongo i givim bel long yusim na tilim dispela Baibel long ol manmeri. Olgeta manmeri i amamas tru bikos taim ol i rilisim Nupela Taim Trenslesen long kibung bilong ol Witnes Bilong Jehova, ol polis i stap long stediam i sanap long lain na kisim kopi bilong ol.

• Fiji: Baibel bilong tokples Fiji i gat bikpela pe tru, olsem na long pastaim ol Witnes Bilong Jehova i save yusim Inglis New World Translation. Tasol long 2009, ol i kisim Nupela Taim Baibel (Nupela Testamen) long tokples bilong ol yet.

  Wanpela man i amamas tru long olsem tok bilongNupela Taim Baibel long tokples Fiji em klia tru, so em askim long kisim wanpela kopi. Tasol ol Witnes i tokim em olsem em i mas wet wanpela mun na bai ol nupela Baibel i kam long taun bilong em. Tasol em i no laik wet long kisim Baibel, so em i orait long bungim wanpela Witnes husat i stap longwe inap 22 mail na bai em i kisim Nupela Taim Baibel long em. Dispela man i tok: “Dispela trenslesen i gutpela moa winim narapela yumi save yusim. Ol tok bilong em i klia na isi long save gut.”

• Malawi: Bihain long Davide i kirap stadi long Baibel wantaim ol Witnes bilong Jehova, sampela man long lotu Baptis long hap bilong em i go long haus bilong em kisim bek Baibel em ol i bin givim long em. Olsem na Davide i amamas tru taim ol i rilisim Nupela Taim Trenslesen bilong tokples Chichewa.

  Pe bilong Baibel long Malawi em antap tru, olsem na Davide i bin tingting planti long hau em inap kisim kopi bilong wanpela Baibel. Tasol taim em i kisim kopi bilong Nupela Taim Trenslesen, em i tok: “Nau mi gat gutpela Baibel stret winim Baibel mi gat long pastaim!”

Winim 69 yia i go pinis, taim ol i rilisim fes hap bilong Nupela Taim Trenslesen long tok Inglis long kibung i bin kamap long New York City, ol i tokim ol odiens olsem: Ritim gut. Stadi long en . . . Givim long ol arapela.” Bilong mekim olsem, ol Witnes Bilong Jehova i bin prinim winim 175 milion kopi bilong Nupela Taim Trenslesen. Na tu, nau yu ken go long Intenet na ritim Baibel long 50 tokples samting.