Oganaisesen bilong ol Witnes Bilong Jehova long nau i bin kirap long 1870 samting. Long dispela taim, liklik lain sumatin bilong Baibel husat i stap klostu long Pittsburgh, Pennsylvania, long Amerika, ol i kirap long stadi gut long ol tok bilong Baibel. Ol i skelim ol tok ol lotu i lainim ol man long en wantaim tok bilong Baibel. Ol samting ol i kisim save long en ol i kirap prinim long ol buk, ol niuspepa, na long magasin em nau mipela i kolim olsem Wastaua—i Tokaut Long Kingdom Bilong Jehova.

 Wanpela bilong ol dispela gutpela sumatin bilong Baibel, em Charles Taze Russell. Long dispela taim, Russell i go pas long wok bilong skulim ol man long Baibel na em i fes edita bilong nius Wastaua, tasol em i no man i kamapim nupela lotu. Laik bilong Russell na ol narapela Sumatin Bilong Baibel—em nem bilong dispela grup long dispela taim bipo—em long kamapim klia ol tok Jisas Krais i skulim ol man long en na long bihainim pasin bilong kongrigesen Kristen bilong bipo. Jisas em Man i bin kamapim lotu Kristen, olsem na mipela i tingim em olsem man i bin kamapim oganaisesen bilong mipela.—Kolosi 1:18-20.