Ol Witnes Bilong Jehova i save kisim trening long olgeta samting long i stap bilong ol olsem wanpela Kristen, dispela i makim tu wok autim tok. Dispela wok bilong autim tok em wok Jisas i tokim ol disaipel bilong em long mekim—wok bilong autim na skulim ol man long gutnius bilong Kingdom Bilong God. (Matyu 24:14; 28:19, 20) Mipela i kisim dispela trening long ol miting i save kamap long olgeta wik na ol kibung i save kamap long olgeta yia. Ol Witnes Bilong Jehova husat i mekim ol wok insait long kongrigesen o long oganaisesen i save kisim sampela moa trening long ol skul bilong Baibel.

Long dispela atikol

•  Ol Witnes Bilong Jehova i save kisim wanem ol trening?

•  Ol Baibel skul bilong ol Witnes Bilong Jehova

•  Wanem samting i as bilong ol trening em ol Witnes i kisim?

•  Ol Witnes Bilong Jehova i save baim ol trening ol i kisim?

•  Hau na ol dispela trening i helpim ol Witnes Bilong Jehova?

 Ol miting bilong kongrigesen. Long olgeta wik, mipela i save go long ples bilong mekim lotu em mipela i kolim Haus Kingdom. Wanpela miting i save kamap namel long wik; narapela i save kamap long ol wiken. Mipela i singautim olgeta manmeri long kam na mipela i no save kisim mani.

•   Miting i save kamap namel long wik. Mipela i kisim skul long rit, pasin bilong toktok, mekim tok long pablik ples, na autim tok na skulim man. Dispela trening i save kamap long rot bilong ol tok, soim, na ol vidio. Dispela trening i helpim mipela long mekim gut wok long taim mipela i stori wantaim ol narapela long tok bilong Baibel na mekim ol Baibel stadi wantaim lain husat i gat laik long harim tok. Olgeta husat i save go long ol dispela miting i save kisim helpim long dispela trening. Na moa yet, ol miting bilong mipela i strongim bilip bilong mipela long God na pasin laikim bilong mipela long em na ol wanbilip bilong mipela.

•   Miting i save kamap long ol wiken. Dispela miting i gat tupela hap i save kirap wantaim wanpela tok bilong Baibel we i stret long olgeta manmeri. Narapela hap bilong miting em askim na bekim bilong wanpela atikol we i stap long stadi edisen bilong Wastaua. a Dispela atikol i stori na kamapim gut ol topik na stiatok bilong Baibel we inap helpim i stap bilong yumi na wok autim tok.

 Ol kibung. Long olgeta yia mipela i gat 3-pela bikpela bung, planti long kongrigesen i save kam long ol dispela bung. Ol dispela bikpela bung i save stori long wanpela tim bilong Baibel na i gat ol tok, soim, intaviu, na ol vidio. Olsem ol miting bilong kongrigesen, ol kibung i save helpim mipela long kisim planti save bilong Baibel na long kamap gutpela wokman bilong autim gutnius. Tingim, olgeta mamneri i ken kam long dispela bung, na mipela i no kisim mani.

 Bilong kisim sampela trening moa, sampela Witnes Bilong Jehova i save kisim invatesen bilong go long ol narapela narapela Baibel skul. Wanem ol dispela skul? Wanem wok bilong ol dispela skul? Ol dispela skul bai kamap insait long hamas haptaim? Na husat i ken i go long ol dispela skul?

Painia Sevis Skul

•   Wok Bilong En: Bilong trenim lain husat i save autim tok fultaim, ol i kolim ol painia, b long ol i ken mekim gut wok autim tok na skulim man. Long dispela skul i gat ol hap we ol i save stori wantaim olsem wanpela klas, harim ol tok, lukim ol soim, na i gat ol woksop.

•   Longpela Bilong En: 6-pela de

•   Husat Inap Insait: Lain husat i mekim wok painia winim 1-pela yia i save kisim invatesen bilong go long dispela skul. Ol painia husat i mekim wok longpela taim pinis na i no bin go long dispela skul winim 5-pela yia, ol tu inap kisim invatesen bilong i go gen long dispela skul.

Skul Bilong Ol Kingdom Evanjelis

•   Wok Bilong En: Bilong trenim lain husat i save autim tok fultaim em ol i mekim wok inap sampela haptaim pinis. Ol sumatin i save kisim save long hau ol inap mekim gut wok autim tok na skulim ol man, na ol i kisim sampela save moa long ol topik bilong Baibel. Ol i save salim planti husat i grediuet long go long hap we i sot long ol man bilong autim tok.

•   Longpela Bilong En: 2-pela mun

•   Husat Inap Insait : Ol painia i ken aplai long go long dispela skul sapos ol i winim ol mak na sindaun bilong ol i orait long go long hap we i sot long ol man bilong autim tok.

Skul Bilong Ol Elda Bilong Kongrigesen

•   Wok Bilong En: Bilong helpim ol elda c long mekim gut wok bilong ol long kongrigesen, olsem skulim na lukautim gut ol sipsip, na long helpim ol long strongim pasin bilong ol long laikim God na ol wanbilip.​—1 Pita 5:2, 3.

•   Longpela Bilong En: 5-pela de.

•   Husat Inap Insait: Ol nupela elda na ol elda husat i mekim wok longpela taim na i no bin go long dispela skul winim 5-pela yia bai kisim invatesen bilong i go long dispela skul.

Skul Bilong Ol Wasman Sekit na Meri Bilong Ol.

•   Wok Bilong En: Bilong trenim ol wasman raun, ol i kolim ol wasman sekit, d long mekim gut wok bilong ol. (1 Timoti 5:17) Dispela skul bai helpim tu ol dispela elda Kristen na meri bilong ol long kliagut long ol Skripsa.

•   Longpela Bilong En: 1-pela mun.

•   Husat Inap Insait: Ol nupela wasman sekit na meri bilong ol i save kisim invatesen bilong go long dispela skul bihain long ol i mekim wok insait long 1-pela yia. Ol i save singautim ol gen bihain long olgeta 5-pela yia.

Skul Bilong Wok Kingdom

•   Wok Bilong En: Bilong helpim ol elda na kongrigesen sevan e long luksave long ol samting i kamap, hau tingting na pasin bilong ol man i senis, na tingim ol samting kongrigesen i nidim long taim ol i mekim wok bilong ol insait long kongrigesen. (2 Timoti 3:1) Dispela skul i save kamap bihain long sampela yia.

•   Longpela Bilong En: I nogat taim stret, planti taim 1-pela de.

•   Husat Inap Insait: Ol wasman sekit, elda, na kongrigesen sevan.

Betel Sevis Skul

•   Wok Bilong En: Bilong helpim lain i wok long Betel f long mekim gut wok na strongim pasin bilong ol long laikim God na ol narapela.

•   Longpela Bilong En: 5 na hap de.

•   Husat Inap Insait: Lain i kam wok nupela long Betel i mas go long dispela skul. Lain husat i wok long Betel inap longpela taim na i no bin go long dispela skul winim 5-pela yia bai kisim invatesen bilong go gen long skul.

Wastaua Baibel Skul Bilong Gileat

•   Wok Bilong En: Bilong helpim ol sumatin long laikim Tok bilong God na bihainim skul ol i kisim. (1 Tesalonaika 2:13) Ol Kristen man na meri husat i strong long bilip na ol i bin go long Gileat i stap olsem bikpela helpim long oganaisesen bilong Jehova na wok bilong skulim ol man long Baibel long olgeta hap bilong graun. Lain i grediuet inap helpim wok bilong autim tok o go long brens ofis, long kantri bilong ol o long ol narapela kantri.

•   Longpela Bilong En: 5-pela mun.

•   Husat Inap Insait: Brens ofis yet i save makim ol fultaim sevan long aplai. Skul i save kamap long Amerika long Watchtower Educational Center long Patterson, New York.

Skul Bilong Ol Brens Komiti na Meri Bilong Ol

•   Wok Bilong En: Bilong trenim ol Brens Komiti g long lukautim ol wok long ol brens ofis na ol wok bilong ol Witnes Bilong Jehova long dispela kantri o long ol kantri em brens ofis bilong ol i lukautim.

•   Longpela Bilong En: 2-pela mun.

•   Husat Inap Insait: Wol Hetkota Bilong Ol Witnes Bilong Jehova i save singautim ol Brens komiti na meri bilong ol long i go long dispela skul, we i save kamap long Watchtower Educational Center long Patterson, New York.

 Oltaim Baibel i stap olsem nambawan buk we ol Witnes Bilong Jehova i kisim trening long en. Mipela i bilip olsem Baibel em tok bilong God na em i gat ol gutpela tok bilong helpim yumi long stap olsem wanpela Kristen.​—2 Timoti 3:16, 17.

 Nogat. Skul em fri. Ol wok bilong ol Witnes Bilong Jehova i save kamap long rot bilong donesen em ol man i givim long laik bilong ol yet.​—2 Korin 9:7.