“Yupela i no ken wokabaut moa long wankain pasin olsem ol man bilong dispela taim i save bihainim. Nogat. Yupela i mas kisim nupela tingting na bai pasin bilong yupela i senis. Olsem bai yupela i ken save tru long laik bilong God, em dispela laik em i gutpela, na em i orait, na i gutpela olgeta.”​—Rom 12:2, Nupela Taim Trenslesen.

 “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.”​—Rom 12:2, Buk Baibel.

 Ol manmeri husat i laik amamasim God, ol i mas sakim ol samting i bagarapim pasin bilong ol long stap gut long God na senisim ol pasin bilong ol. God i no fosim ol long mekim senis; ol i mekim bikos ol i laikim em na ol i luksave olsem ol lo bilong em i gutpela na i stret na i bilong helpim ol.​—Aisaia 48:17.

 “No ken wokabaut moa long wankain pasin olsem ol man bilong dispela taim.” “Pasin bilong dispela graun” i makim lo, pasin, na tingting bilong ol manmeri long dispela haptaim we i no kamapim tingting na laik bilong God. (1 Jon 2:15-17) Olgeta taim dispela i putim presa long ol manmeri, na inap stiaim pasin na tingting bilong ol. Bilong lotuim God long wei em i laikim, man i mas sakim ol tingting na pasin bilong dispela graun, sapos nogat, em inap kisim ol pasin we inap bagarapim em yet na mekim God i bel hevi.​—Efesus 2:1-3; 4:17-19.

 “Yupela i mas kisim nupela tingting na bai pasin bilong yupela i senis.” Man i mas senisim tu tingting na pasin i stap long bel bilong em. Mak bilong dispela kain senis man i mas mekim i kamap klia long tok Grik ol i trensletim olsem “senis,” em dispela kain senis we katapila i save senis na kamap bataflai. Ol manmeri i lotuim God i mas “kisim nupela pasin.”​—Efesus 4:23, 24; Kolosi 3:9, 10.

 “Yupela i ken save tru long laik bilong God, em dispela laik em i gutpela, na em i orait, na i gutpela olgeta.” God i laik bai ol manmeri i lotuim em i mas bilipim tru samting ol i bilip long en. Ol manmeri i mekim olsem, ol i save stadi long Tok Bilong God, bihainim tok bilong en, na lukim hau pasin bilong bihainim lo bilong God i helpim ol. Taim ol i mekim olsem, ol yet i luksave olsem tingting bilong God i nambawan tru.​—Buk Song 34:8.

 Rom sapta 12 i stori long samting man inap mekim na bai God i orait long lotu bilong em. Dispela kain pasin bilong lotu i save stiaim samting man i mekim long laip, na em i save bihainim “gutpela tingting” na i no bilip nating tasol o bihainim nating tingting bilong em. (Rom 12:1, 3) Rom sapta 12 i stori long hau bai man i soim ol pasin God i orait long en, pasin man i mas mekim long narapela, na pasin man i mas mekim sapos ol narapela i mekim nogut long em.​—Rom 12:9-21.