Long bikmoning long Februeri 24, 2022, ami bilong Rasia i go insait long Yukren na pait, maski ol bikman bilong graun olgeta i mekim ol samting bilong pasim dispela woa. Dispela pait bai mekim wanem long i stap bilong ol man? Sampela de i go pinis, seketeri-jeneral bilong Yunaitet Nesen, António Guterres, i tok: “Dispela pait bai kamapim bikpela hevi long ol manmeri, na ol manmeri long ol kantri long Yurop na olgeta hap bilong graun bai i no pilim seif moa.”

•   Jisas Krais i tok profet long wanpela taim bai kamap na “wanpela kantri bai pait long narapela kantri na wanpela kingdom bai pait long narapela kingdom.” (Matyu 24:7) Ritim atikol “What Is the Sign of ‘the Last Days,’ o ‘End Times’?” na bai yu luksave olsem ol woa i kamap long nau i truim tok profet bilong Jisas.

•   Long Baibel, buk Revelesen i stori long woa olsem wanpela man i sindaun antap long “wanpela retpela hos” na em i ron i kam bilong “tekewe bel isi long graun.” (Revelesen 6:4) Ritim atikol “Fopela Man Long Hos—Ol i Husat?” na bai yu luksave long hau dispela tok profet i stret long ol woa i kamap long nau.

•   Buk Daniel i tok profet long pasin birua namel long “king bilong not” na “king bilong saut.” (Daniel 11:25-45) Watsim vidio Tok Profet i Kamap Tru—Daniel Sapta 11 bilong kisim save long wai na i stret long tok Rasia na ol lain i sapotim em i stap olsem king bilong not. a

•   Revelesen i stori tu long “pait long dispela bikpela de bilong God i Gat Olgeta Strong.” (Revelesen 16:14, 16) Tasol dispela i no pait namel long ol kantri olsem nau yumi lukim. Ritim atikol “What Is the Battle of Armageddon?” bilong kisim sampela save moa long dispela samting we bai kamap bihain.

•   Baibel i tok God bai “mekim i dai ol pait i kamap long olgeta hap bilong graun.” (Buk Song 46:9) Ritim atikol “A Real Hope for a Better Tomorrow” bilong kisim sampela save moa long ol samting God i tok promis long kamapim long bihain.

•   Jisas i skulim ol disaipel bilong em long beten long Kingdom Bilong God i mas i kam. (Matyu 6:9, 10) Dispela Kingdom em wanpela gavman i stap long heven na em bai mekim ol samting God i tingting pinis long kamapim long dispela graun, na em laik bilong God tu long kamapim bel isi long olgeta hap. Bilong kisim save long hau bai dispela Kingdom inap helpim yu, watsim vidio Kingdom Bilong God Em i Wanem Samting?

 I gat winim 129,000 Witnes Bilong Jehova long Yukren. Olsem ol Witnes long ol narapela kantri, ol i bihainim tok bilong Jisas long i no insait long wok politik na ol i no save insait long woa. (Jon 18:36) Long graun olgeta, ol Witnes Bilong Jehova i wok yet long tokaut long “gutnius bilong Kingdom” olsem em rot bilong pinisim olgeta hevi bilong ol man, dispela i makim tu woa. (Matyu 24:14) Mipela i laik kirapim yu long askim long wanpela i ken kam lukim yu na bai yu ken kisim sampela save moa long ol gutpela samting Baibel i tok bai kamap long bihain.