Taim Jisas i stap long graun, em i soim bikpela pasin laikim long ol manmeri. Em i gat bikpela pasin laikim tru, olsem na em i givim laip bilong em olsem pe bilong baim bek planti manmeri. (Matyu 20:28; Jon 15:13) Klostu nau, em bai kamapim klia gen dispela pasin laikim bilong em long ol manmeri long rot bilong yusim namba em i gat olsem King bilong Kingdom Bilong God long “mekim i dai ol pait i kamap long olgeta hap bilong graun.”​—Buk Song 46:9.

 Tingim tok Baibel i mekim long samting Jisas bai mekim:

•   “Em bai kisim bek ol rabisman i singaut long kisim helpim, na em bai helpim tu ol man i no gat nem na ol man i no gat wanpela bilong helpim ol. Em bai sori long ol man i no gat nem na ol rabisman, na em bai kisim bek ol man i stap rabis. . . . Olsem na em bai kisim bek ol long han bilong ol man i mekim nogut long ol na long ol man i pait na bagarapim ol.”​—Buk Song 72:12-14.

 Olsem wanem yumi ken soim tenkyu bilong yumi long olgeta samting Jisas i mekim pinis na long ol samting em bai mekim bihain bilong helpim yumi? Long Luk 22:19, Jisas i tokim ol disaipel bilong em long tingim dai bilong em. Dispela em risen na long olgeta yia, long de Jisas i dai long en, ol Witnes Bilong Jehova i save bung wantaim. Mipela i invaitim yu long kam long Memorial bilong tingim dai bilong Jisas long Sande, Mas 24, 2024.

Painim Wanpela Memorial