Wanpela ripot a i no longtaim i go pinis i soim olsem, namel long olgeta 4-pela man 1-pela i pilim wanpis.

•   “Man inap stap em yet na em i no bung o toktok wantaim ol narapela, maski em i gat hamas krismas na em i stap long wanem hap.”​—Chido Mpemba, siaman bilong World Health Organization’s Commission on Social Connection.

 Maski ol man i gat narapela narapela tingting long husat bai pilim wanpis, dispela hevi i painim tu ol yangpela, lain i gat gutpela helt, gutpela sindaun, na lain i marit. Taim man i stap em yet na pilim wanpis, dispela inap putim bikpela hevi long helt na bel na tingting bilong em.

•   Dr. Vivek Murthy i tok: “Pilim wanpis em i no wanpela filings nogut tasol, nogat. Hevi bilong pilim wanpis i sotim laip bilong planti manmeri wankain olsem man i smokim 15 sigaret long wanpela de inap sotim laip bilong em.”

 Krieta bilong yumi i no laik bai yumi stap wanpis. God i wokim ol manmeri long ol i ken amamas na stap wantaim.

•   Stiatok bilong Baibel: “God i tok: ‘I no gutpela long man i stap wanpis olsem.’”​—Stat 2:18.

 God i laik yumi kamap pren bilong em. Em i promis long kam klostu long yumi taim yumi mekim ol samting bilong go klostu long em.​—Jems 4:8.

•   Stiatok bilong Baibel: “Ol man i hangre long kisim save long God, ol i ken amamas, long wanem, Kingdom bilong heven em i bilong ol.”​—Matyu 5:3.

 God i laik yumi bung wantaim ol narapela na lotuim em. Taim yumi mekim olsem, bel na tingting bilong yumi i stap isi.

•   Stiatok bilong Baibel: “Yumi wan wan i mas tingim narapela narapela, na kirapim ol long mekim pasin laikim na mekim ol gutpela wok. Yumi no ken lusim pasin bilong bung wantaim.”​—Hibru 10:24, 25.

 Bilong kisim sampela save moa long wai na em i bikpela samting long daunim pasin bilong pilim wanpis, ritim atikol “Loneliness in a World of Mass Connection.”