Gavening Bodi i laik tru long yusim ol donesen bilong wokim ol bilding we i helpim yumi long inapim wok bilong autim tok bilong Kingdom. Olsem, long 2023 sevis yia, ol oganaisesen o kampani em ol brens ofis bilong Ol Witnes Bilong Jehova i save yusim i tromoi winim 500 milion dola bilong baim, sanapim, stretim, na mekim meintenens long ol Haus Kingdom na ol Haus Kibung long olgeta hap bilong graun. a Dispela mani ol i tromoi, em i insait tu long mani em ol kongrigesen long graun olgeta i bin tromoi bilong lukautim ol Haus Kingdom bilong ol.

 Na tu, ol i yusim ol donesen bilong sanapim na lukautim ol bilding bilong brens, em ol i helpim long oganaisim na sapotim wok autim tok long olgeta hap bilong graun. Yumi bin daunim namba bilong ol wok yumi mekim long ol brens bambai yumi ken yusim ol donesen long sapotim wok bilong sanapim na stretim ol Haus Kingdom na ol Haus Kibung. Maski i olsem, yumi mas tromoi bikpela mani long stretim, senisim, o muvim ol bilding bilong brens i go long ol narapela ples. Bilong wanem ol dispela projek ol i bikpela samting? Olsem wanem ol brens i save sapotim bikpela wok bilong autim tok? Yumi ken painimaut long dispela samting.

 Ol i bin sanapim planti brens ofis winim 30 o 40 yia i go pinis! Nicholas i save wok long Wolwaid Disain/Konstraksen Dipatmen, em i tok: “Maski yumi mekim wok meintenens na lukautim gut ol bilding, ol bai go olpela na bagarap. Wok bilong stretim ol bilding i helpim bilding long stap strong longpela taim bambai yumi ken yusim yet.”

 Senis i mas kamap long ol bilding bilong Betel tu na bai ol i ken sapotim gut wok bilong oganaisesen. Long graun olgeta, namba bilong ol pablisa i go bikpela tru winim long taim ol i kirap long wokim planti brens ofis. Bilong sapotim wok bilong lukautim planti pablisa, i mas i gat planti moa volantia long wok long ol brens ofis. Em risen na ol Betel em pastaim ol i bikpela inap long planti i ken stap long en, nau ol i go liklik!

 Narapela samting em seifti. Yumi wok long i go klostu moa long pinis bilong taim bilong las de, olsem na yumi inap kisim bagarap o lusim laip bilong yumi long taim bilong ol netrol disasta. (Luk 21:11) Ol nupela rot yumi yusim long wok konstraksen na bilong stretim ol bilding i mekim na bilding bai seif long ol lain i wok insait long en. Na tu, dispela i opim rot long ol brata i ken yusim ol dispela bilding long oganaisim rilif wok na long sapotim yet wok autim tok bihain long netrol disasta i kamap.

 Aninit long daireksen bilong Gavening Bodi, long 2023 sevis yia ol brata i mekim wok konstraksen long 43 bilding bilong ol brens. Dispela i makim olsem ol i mekim wok konstraksen long klostu 50 pesen bilong olgeta Betel long graun olgeta. Plis lukim sampela eksampel i soim gutpela samting i kamap long dispela bikpela wok.

 Angola. Matt em i insait long Angola Brens Komiti, em i tok: “Mipela i kisim blesing long lukim tok profet bilong Hagai 2:7 i kamap tru long wanpela spesel wei. Insait long 10-pela yia tasol, mipela i lukim olsem namba bilong ol pablisa i go antap olsem 60 pesen moa! Bilong sapotim ol dispela pablisa, i gat nid long planti lain moa i kam wok long Betel, inap olsem 3-pela taim moa winim namba bilong ol lain i wok long Betel nau. Tasol ol Betel bilong mipela i no bikpela inap long mipela i ken invaitim planti moa long kam wok long hia. Dispela i mekim na planti Betelait i mas mekim planti wok moa na ol i mas wok ovataim tu.”

 Ol i makim ol brata long painimaut wanem samting ol inap mekim bilong mekim brens i go bikpela moa. Pastaim ol i ting gutpela rot bilong mekim olsem na bilong mekim hariap em long stretim bilding bilong brens ofis i stap pinis. Tasol bihain long ol i mekim planti wok painimaut, ol i luksave olsem sapos ol i stretim brens ofis, ol i no inap yusim gut ol donesen. Olsem na ol i kamapim tingting olsem i gutpela moa long baim na stretim wanpela bilding i stap klostu long brens. Matt i tok: “Taim ol i kamapim dispela tingting long Brens Komiti long baim na stretim bilding i stap klostu, mipela i tingting planti olsem dispela bilding i no stret long mipela na em i no wankain long ol bilding em yumi yet i save sanapim. Tasol nau mipela i luksave olsem dispela bilding i gutpela tru long sapotim ol wok mipela bai mekim. Jehova i blesim dispela disisen.”

 Bihain ating bai i gat wok long mekim Angola brens i go bikpela moa. Tasol dispela nupela bilding wantaim ol bilding em ol i ken mekim senis long en em ol i stap long hap bilong Betel, na tu, ol apatmen haus i stap ausait long Betel em ol i rentim, ol i opim rot long brens ofis i ken singautim planti moa long i kam wok bilong sapotim namba bilong ol pablisa i go bikpela tru.

 Japan. Klostu 40 yia i go pinis, ol i bin sanapim ol bilding bilong brens na ol i no bin mekim wok bilong stretim ol dispela bilding. Ol brata i wok hat long mekim wok meintenens long lukautim ol dispela bilding. Maski i olsem, yumi bin yusim ol dispela bilding longpela taim moa winim haptaim ol i makim bilong yusim ol bilding long taim ol i bin disainim ol. Em risen na nau yumi wok long mekim bikpela wok konstraksen bilong stretim ol dispela bilding.

 Insait long ol yia i go pinis, ol senis i kamap long ol samting yumi mekim long Betel. Long ol yia paslain long 2015, ol i save redim olgeta kaikai bilong Betel famili. Olsem na planti rum long Betel long Japan i gat liklik kitsen. Tasol nau ol Betelait i save redim ol kaikai bilong ol yet planti taim. Olsem na ol brata i disainim na wokim ol kitsen long ol Betel rum long rot we i isi moa long ol Betelait i ken kukim kaikai bilong ol. Kumiko em wanpela sista i wok long Japan brens, em i tok: “Mi amamas long kitsen ol i wokim, mi pilim olsem mi stap long haus bilong mi, na tu, dispela i helpim mi long sapotim gut ol nupela arensmen i kamap long Betel.”

 Wok ol i mekim long Japan brens em i bikpela samting long sapotim wok i kamap long olgeta hap bilong graun. (Matyu 28:19, 20) Japan na narapela brens, dispela tupela brens tasol i save prinim ol kopi bilong Baibel em ol i bin tanim olgeta. Olsem na wanpela samting i insait tu long konstraksen projek i kamap long nau em long instolim wanpela sistem bilong koletim das na ol hap pepa samting masin i bin katim, long dispela rot hap bilong Printery em i seif ples long olgeta i wok long en. Ol i tromoi klostu wan milion dola bilong baim na instolim dispela sistem, tasol em i helpim gut wok bilong brens long wok yet long prinim na sipim ol buk na nius samting—moa yet Baibel—bilong strongim bilip bilong yumi.

 Long taim ol i mekim wok konstraksen, ol brata i mekim olgeta samting bilong helpim yet wok bilong prinim ol Baibel, dispela em nambawan bikpela samting. Trey em i insait long Japan Brens Komiti, em i tok: “Long taim bilong wok konstraksen, oganaisesen bilong yumi i bin rilisim planti moa Baibel trenslesen, na planti manmeri moa long olgeta hap bilong graun i laik kisim kopi bilong Baibel bilong ol yet. Planti dipatmen na ol manmeri i mas wok bung wantaim bilong sediulim taim bilong instolim ol nupela masin na sistem samting na taim bilong prinim ol litresa.” Maski dispela i kamapim sampela hatwok, ol i prinim klostu 220,000 Baibel long olgeta wan wan mun namel long Mas na Ogas 2023—insait long dispela haptaim ol i mekim bikpela hap bilong wok konstraksen long Printery. Ol i mekim olgeta dispela wok na ol i no tromoi planti mani moa winim mani ol i bajetim bilong dispela wok.

 Narapela bikpela samting long dispela projek bilong stretim ol bilding bilong brens em wok bilong seivim eneji. Ol bai instolim ol nupela sola penol, na dispela bai helpim ol brata long seivim inap olsem 120,000 dola long baim pawa samting long olgeta yia. Mipela bai instolim ol windo i gat 3-pela layer bilong glas long en, dispela bai helpim bilding long seivim eneji, long dispela rot mipela bai seivim inap olsem 10,000 dola long olgeta wan wan yia long baim pawa samting. Em tru olsem mipela i mas tromoi bikpela mani long instolim ol dispela sola penol na ol windo, tasol mipela i luksave olsem mipela inap seivim winim 3.5 milion dola insait long haptaim mipela bai yusim ol dispela samting. Na tu, ol bai helpim ol bilding long ol i no ken kamapim bikpela bagarap long envairomen.

 Dispela tupela brens projek i soim bikpela wok yumi mas mekim na bai ol bilding bilong Betel i ken sapotim gut wok autim tok. Tasol wok i no pinis yet. Aaron em i wok wantaim Wolwaid Disain/Konstraksen Dipatmen, em i tok: “Ol brata i mekim bikpela wok pinis, tasol i gat planti wok moa i stap bilong mekim.” Long wanem rot yumi inap mekim ol dispela wok? Em i tok moa: “Mipela i tenkyu tru long ol gutpela donesen we i helpim mipela long mekim ol dispela bikpela projek, na tu, mipela i laik tok tenkyu long olgeta lain i bin redi long volantia na ol narapela em ol i wok long stretim ol samting long laip bilong ol long nau bambai ol i ken helpim wok long bihain. Sapot mipela i kisim long ol brata bilong mipela long rot bilong givim mani na taim na strong bilong ol i soim klia olsem Jehova i wok long blesim dispela wok.”​—Buk Song 110:3.

 Olgeta wok konstraksen na wok bilong stretim ol bilding i kamap bikos long ol donesen mipela i kisim, em planti i givim donesen long rot bilong donate.jw.org. Tenkyu tru long gutpela pasin bilong yupela long givim yet ol samting bilong helpim wok.