Baibel i tok profet olsem haptaim bilong yumi bai gat ol woa, ol bikpela guria, ol bikpela sik, na “ol manmeri bai lukim ol samting i mekim ol i pret.” (Luk 21:10, 11) Ol dispela tok profet i wok long kamap tru long sevis yia bilong 2022. a Olsem, pait long Yukren i wok long i go strong yet, na i bagarapim tru laip bilong planti milion manmeri. Na long planti hap bilong graun, planti man i wok long kamap orait yet long COVID-19 pendemik. Na tu, planti manmeri tru i karim hevi long ol netrol disasta, olsem bikpela guria long Haiti na bikpela win na ren long Sentral Amerika, Filipins, na saut is Afrika. Olsem wanem Ol Witnes Bilong Jehova i bin givim helpim long ol dispela ples i kisim bagarap?

 Long sevis yia bilong 2022, oganaisesen bilong mipela i bin givim ol rilif saplai long ol manmeri i karim hevi long winim 200 disasta! Mipela i spendim klostu 12 milion dola long givim ol rilif saplai. b Skelim hau mipela i yusim mani ol man i givim olsem donesen long helpim ol manmeri i karim hevi long tupela disasta.

 Long Ogas 14, 2021, wanpela bikpela guria em strong bilong en inap 7.2 magnitiud i bin kamap long Haiti. Sori tru, tripela Witnes i dai—tupela sista na wanpela brata. Ol manmeri i abrusim dispela hevi i kisim sampela bagarap long skin na bel na tingting bilong ol i bin bagarap tru, em samting dispela guria i bin kamapim. Wanpela brata nem bilong em Stephane, em i tok: “Planti manmeri tru i dai long biktaun, olsem na i gat ol fiuneral sevis i bin kamap long olgeta wik inap tupela mun.” Narapela brata nem bilong em Éliézer, em i tok: “Planti Witnes i no gat ples bilong slip, ol i no gat klos, su, na ol narapela samting ol i nidim. Inap planti mun, ol i pret tru bikos long ol liklik guria i wok long kamap hariap hariap.”

 Oganaisesen bilong yumi i hariap long givim helpim. Haiti brens i givim winim 53 ton kaikai, na ol i givim tu ol tent, ol kenves, ol matres, na ol sola saja bilong sajim ol mobail fon. Na tu, insait long 2022 sevis yia, mipela i stretim o wokim gen winim 100 haus i bin kisim bagarap. Mipela i spendim winim 1 milion dola long mekim dispela wok.

 Ol bratasista bilong mipela i amamas tru. Lorette i tok: “Bikpela guria i kamap i bagarapim haus na bisnis bilong mipela. Mipela i no gat wanpela samting bilong kaikai. Tasol oganaisesen bilong Jehova i stap wantaim mipela, na givim mipela olgeta samting mipela i nidim.” Micheline i tok: “Guria i bagarapim haus em mi wantaim tupela pikinini man bilong mi i save stap long en. Mi no save long wanem samting mi bai mekim na mi beten tasol long Jehova long helpim mi, na Jehova i bekim beten bilong mi long rot bilong oganaisesen bilong em. Mipela i gat strongpela haus nau bilong stap long en. Mi tingting long wok strong long soim tenkyu bilong mi long Jehova.”

 Ol bikman bilong taun i luksave long ol rilif wok mipela i mekim. Dairekta bilong taun kaunsel long L’Asile i tok: “Mi tok amamas long yupela i hariap tru long kam givim helpim. Mi preisim yupela bikos yupela i rispektim tru ol bikman bilong gavman. Mi amamas long lukim olsem yupela i no gat tingting long kisim mani. Tasol yupela i gat laik long givim helpim. Pasin laikim i kirapim yupela long mekim olsem.”

 Long Janueri 24, 2022, Tropikal Stom Ana i kamap long Mosambik na bihain em i ron i go olsem long hap is i go long Malawi. Dispela saiklon i bringim bikpela ren na strongpela win we i ron spit tru inap 100 kilomita long wanpela aua. Em i pundaunim ol pawa lain, kamautim ol bris, na kamapim bikpela taitwara tru.

 Dispela stom i bagarapim tru ol samting bilong winim 30,000 Witnes long Malawi na Mosambik. Wanpela brata i helpim rilif wok, nem bilong em Charles, em i tok: “Taim mi lukim bagarap ol bratasista i kisim na planti samting bilong ol i go pinis, mi bel hevi tru na mi pilim olsem i no gat rot bilong helpim.” Samting i nogut moa em olsem, taitwara i rausim olgeta kaikai bilong ol na ol kaikai long gaden tu. Planti bratasista em haus bilong ol i bagarap na pinis olgeta. Sori tru, meri na tupela pikinini gel bilong wanpela brata, ol i dai taim reskiu bot bilong ol i kapsait.

 Dispela stom i nogut tru. Long 1:00 a.m. long bikmoning long Nchalo, Malawi, Sengeredo famili i harim nois bilong bikpela taitwara. Tupela wara wantaim i tait! Brata Sengeredo i tok long famili i mas lusim haus. Em gutpela disisen bikos i no longtaim taitwara i mekim na haus bilong ol i bruk i go daun. Ol kago bilong ol i bagarap o wara i karim i go. Famili i laik go stap long Haus Kingdom—ol i save wokabaut inap 30 minit bilong go kamap. Tasol nau ol i wokabaut inap 2-pela aua long go kamap. Ren i wasim ol nogut tru na ol i taiet tru, tasol ol i kamap seif.

 Brens long Malawi na Mosambik i hariap long stretim ol samting bilong rilif wok. Ol i tokim ol wasman sekit na ol elda long lukim gut nid bilong ol brata i kisim bagarap na givim ol tok bilong mekim gut bel na strongim ol. Ol i makim sampela Disasta Rilif Komiti (DRC) long lukautim rilif wok na ol dispela komiti i hariap long helpim ol bratasista long kisim kaikai na ol narapela samting ol i nidim. Mipela i spendim winim 33,000 dola long helpim ol manmeri na winim 300,000 dola long stretim na wokim gen ol haus i bagarap.

 Ol Disasta Rilif Komiti i yusim gut ol mani, na em bikpela samting long mekim olsem bikos pe bilong ol samting i go antap tru. Olsem, insait long 7-pela mun bilong rilif wok, prais bilong flaua i go antap inap 70 pesen—flaua em nambawan kaikai long Malawi. Pe bilong fiul tu i go antap tru. Bilong seivim mani, ol brata i baim ol kaikai na ol bilding material long bakstua long Malawi yet. Long dispela rot, ol i kisim ol diskaun na ol i no gat wok long spendim bikpela mani tu long baim trenspot.

 Lain manmeri bilong Jehova i pilim helpim ol i kisim long rilif wok. Wanpela brata long Mosambik, nem bilong em Felisberto, em i tok: “Mi no bin lukim wanpela oganaisesen i bin givim planti samting tru olsem ol bilding material, trenspot, ol konstraksen wokman, kaikai, na ol gutpela stiatok. Dispela rilif wok em gutpela eksampel tru bilong pasin laikim em Jisas i tok long en long Jon 13:34, 35.” Ester em wanpela wido long Malawi em stom i bin bagarapim haus bilong em, em i tok: “Mi bel hevi tru bikos mi no gat mani long wokim nupela haus. So taim ol brata i kam na wokim wanpela haus bilong mi, mi pilim olsem mi stap pinis long Paradais.”

 Taim yumi go klostu long nupela taim God i promis long kamapim, yumi ken save olsem planti moa disasta bai kamap. (Matyu 24:7, 8) Maski i olsem, mipela i laik tok tenkyu tru long ol donesen yupela i givim, mipela i bilip tru olsem lain bilong Jehova bai kisim ol rilif saplai ol i nidim. Bilong painimaut long wanem ol rot bilong givim donesen, lukim donate.jw.org. Tenkyu tru long pasin bilong yupela long givim donesen.