Planti man i no laik toktok long indai. Tasol taim bai kamap we indai bai painim wanpela yumi laikim tru. Na pen em dai i save kamapim i bikpela tru.

I no gat wanpela samting inap redim yumi long karim pen yumi save pilim taim papa o mama, poroman marit, o pikinini i dai. Dai inap painim ol wantu tasol o isi isi ol i sik na dai. Maski ol i dai olsem wanem, yumi no inap abrusim pen em dai i save kamapim; dai inap bagarapim tru bel bilong yumi.

Papa bilong Antonio i dai long kar eksiden, em i tok: “Em olsem wanpela i pasim strong ol dua bilong haus bilong yu na kisim ol ki. Yu no inap go bek long haus, nogat tru. Yu gat ol memori tasol. Laip i senis olgeta. Yu no laik bilip long dispela—bikos yu pilim olsem em i no fea—tasol yu no inap senisim dispela samting.”

Wankain hevi i painim Dorothy, taim em i gat 47 krismas man bilong em i dai, na em i laik painim bekim bilong sampela askim em i gat. Em i wanpela Sande-skul tisa, na em i pilim olsem ol man i dai pinis ol bai stap laip gen. Tasol em i no save wanem samting i painim man bihain long em i dai. Em i askim wanpela pris bilong Angliken olsem: “Wanem samting i painim yumi taim yumi dai?” Pris i tok: “I no gat wanpela man i save tru long dispela, yumi mas wet tasol na lukim.”

Yu ting yumi mas “wet tasol na lukim”? I gat rot bilong kisim save olsem ol man i dai pinis ol bai stap laip gen o nogat?