Ol saveman bilong skelim sik bilong tingting i tok ol man i mas mekim sampela samting moa bilong ol i ken stap amamas. Yumi luksave long dispela long ol man i gat laik long mekim ol samting i gat as tru bilong en, olsem winim ol mak samting. Bilong inapim dispela laik bilong ol, sampela i lusim bikpela haptaim long skelim ol diwai na animal, peintim piksa, na wokim musik samting. Maski i olsem, planti bilong ol i no painim amamas tru.

Ol man bilong ritim Baibel i no kirap nogut olsem laik bilong pas gut wantaim God i stap pinis long skin bilong ol man. Ol fes sapta bilong Buk Stat i stori olsem bihain long God i wokim namba 1 man na meri, em i toktok wantaim ol long olgeta taim, na dispela i opim rot long ol inap pas gut wantaim em. (Stat 3:8-10) God i no wokim ol man bilong stap longwe long em, nogat, em i wokim ol na putim laik long ol bilong toktok wantaim Em. Baibel i stori planti taim long laik bilong ol man long pas gut wantaim God.

Olsem, Jisas i tok: “Ol man i hangre long kisim save long God, ol i ken amamas.” (Matyu 5:3) Long dispela tok bilong Jisas, yumi luksave olsem wanpela bikpela samting bilong mekim yumi i stap amamas na belgut em long inapim laik bilong yumi long kisim save long God. Olsem wanem yumi inap mekim olsem? Jisas i bekim dispela askim taim em i tok: “Man i no inap stap laip long bret tasol, nogat. Em i mas bihainim tu olgeta tok i kamap long maus bilong Jehova.” (Matyu 4:4) Olsem wanem ol tingting na tok bilong God i stap long Baibel inap helpim yumi long stap amamas na laip bilong yumi i gat as bilong en? Yumi ken skelim 3-pela bikpela samting we inap helpim yumi.

Long nau i gat planti ol saveman na ol dokta em ol i redi long givim edvais long pasin bilong pas gut wantaim ol narapela, pasin laikim, famili laip, rot bilong stretim ol hevi, stap amamas, na tu, as tru bilong laip. Tasol God Jehova, em Man Bilong Wokim yumi, em tasol inap tru long givim ol gutpela stiatok bilong stiaim wokabaut bilong yumi long olgeta dispela samting.

Yumi ken tok piksa olsem: Taim yu baim wanpela nupela masin, olsem kamera o kompiuta, yu save kisim tu wanpela liklik buk, olsem instraksen menuel, bilong soim yu long hau yu ken yusim gut dispela masin. Baibel i kain olsem dispela buk. God em Man i bin wokim yumi na em i givim dispela buk long yumi bilong helpim laip bilong yumi. Dispela buk i stori long man i  mas mekim wanem, na sapos em i mekim olsem, orait wanem gutpela samting bai kamap.

Wankain olsem instraksen menuel em ol i raitim gut ol tok long en, Baibel i givim tok lukaut long yumi long ol pasin we inap bagarapim laip bilong yumi. Ating yumi amamas long harim edvais bilong ol man bikos ol i gat narapela narapela tingting, tasol yumi inap stap gut na abrusim ol hevi sapos yumi bihainim tok bilong Man Bilong Wokim yumi.

Maski God Jehova i givim yumi ol tok bilong stiaim yumi, em i no fosim yumi long bihainim ol dispela tok. Tasol em i laikim yumi na em i laik helpim yumi, olsem na em i mekim gutpela tok olsem: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.” (Aisaia 48:17, 18) Sapos yumi bihainim ol stiatok bilong God, bai yumi stap gut. O yumi ken tok, bilong yumi ken stap gut na amamas, yumi nidim God.

Sampela i pilim olsem ol i no nidim God bikos ol i lukim planti hevi i painim ol man na ol i hatwok long bilip olsem i gat wanpela God i gat pasin laikim. Olsem, ating ol bai askim: ‘Wai na ol man i no gat asua i save karim pen na hevi?’ ‘Wai na sampela bebi i save bon wantaim bagarap long bodi?’ ‘Wai na ol man i save mekim wansait pasin?’ Tru tumas, em ol bikpela askim, na sapos yumi kisim ol gutpela bekim bilong ol dispela askim, dispela inap mekim sampela bikpela samting long laip bilong yumi. Tasol i no stret long sutim tok olsem God i as bilong ol dispela hevi, i gutpela yumi skelim olsem wanem Baibel inap helpim yumi long kliagut long ol dispela samting.

Long Buk Stat sapta 3, yumi ritim stori long Satan i yusim wanpela snek bilong haitim em yet na i laik giamanim namba 1 man na meri long sakim lo bilong God Jehova long ol i no ken kaikai prut long diwai bilong givim gutpela save long wanem samting i gutpela na wanem samting i nogut. Satan i tokim Iv: “Yutupela i no inap i dai. Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God. God i save long dispela, olsem na em i tambuim yutupela long kaikai pikinini bilong dispela diwai.”—Stat 2:16, 17; 3:4, 5.

Taim Satan i mekim dispela tok, i olsem em i tok God em i Man bilong giaman, na tu, i no stret long God i mekim wok bos. Satan i tok sapos olgeta man i harim tok bilong em, ol samting ol i mekim bai kamap gutpela. Olsem wanem Jehova inap stretim dispela tok? Jehova i larim ol samting i kamap na dispela bai helpim olgeta man long save sapos ol tok Satan i sutim long Em ol i tru o nogat. Olsem na God i givim rot long Satan na ol man i stap long sait bilong Satan long ol i mas soim olsem tru tru ol man inap stap gut na i no gat wok long God i bosim ol o nogat.

 Yu gat wanem tingting long ol tok Satan i sutim long God? Yu ting ol man inap bosim gut ol yet na i no gat wok long God i bosim ol? Ol pen na hevi, wansait pasin, ol bikpela sik, dai, na tu, pasin raskol, ol man i no moa bihainim stretpela pasin, ol woa, pasin bilong birua na kilim i dai wanpela lain olgeta, na ol narapela bikpela hevi i kamapim klia tru olsem wok ol man i mekim bilong bosim ol yet na ol i no larim God i bosim ol, dispela i no kamapim wanpela gutpela samting. God i no as bilong ol pen na hevi bilong ol man, Baibel i kamapim as tru bilong ol pen na hevi olsem: “Sampela bikman i wok long daunim ol arapela manmeri na mekim nogut long ol.”—Saveman 8:9.

Taim yumi skelim dispela samting, i klia tru olsem yumi nidim God bambai yumi ken save long as na ol hevi i wok long painim ol man, na rot bilong stretim ol dispela hevi! God bai mekim wanem?

Inap longtaim pinis, ol man i gat laik tru olsem ol i no ken sik, go lapun, na dai. Ol i bin lusim bikpela haptaim, strong, na mani samting bilong mekim olsem, tasol olgeta dispela samting i lus nating. Sampela man i bilip olsem ol i no inap sik, go lapun, na dai sapos ol i kisim ol marasin bilong ples, mekim eksasais, o mekim sampela wok bilong ol spirit nogut. Olgeta dispela samting ol i tingting long en i no kamapim wanpela gutpela samting.

God i laik ol man i stap helti na stap amamas. Em samting em i bin tingting pinis long en taim em i wokim ol manmeri, na em i no lusim tingting long dispela. (Stat 1:27, 28; Aisaia 45:18) Yumi ken save tru olsem God Jehova bai mekim olgeta samting em i tingting pinis long mekim na i no gat wanpela tok bilong em bai popaia. (Aisaia 55:10, 11) Baibel i tokim yumi long promis bilong God long kamapim bek Paradais em namba 1 man na meri i bin lusim. Long laspela buk bilong Baibel, yumi ritim tok olsem: “Em [God] bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.” (Revelesen 21:4) Olsem wanem God bai kamapim ol dispela gutpela samting? Na dispela promis bai helpim yumi olsem wanem?

Pikinini Bilong God em Jisas Krais, em i bin skulim ol disaipel bilong em long beten long laik bilong God i mas kamap. Planti man i save long dispela beten na planti taim ol i save mekim, na sampela i kolim olsem Beten Bilong Bikpela. Ol tok bilong dispela beten em: “Papa bilong mipela long heven, nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Matyu 6:9, 10) Tru tumas, Kingdom Bilong God em rot bilong God Jehova long pinisim ol samting nogut em wok bos bilong ol man i kamapim, na em i promis long kamapim nupela graun we i gat stretpela pasin long en. a (Daniel  2:44; 2 Pita 3:13) Yumi mas mekim wanem na bai tok promis bilong God i ken helpim yumi?

Jisas Krais i kamapim klia samting yumi mas mekim, em i tok: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.” (Jon 17:3) Tru tumas, God inap helpim yumi long kisim laip oltaim long nupela taim em klostu nau em bai kamapim. Dispela samting inap strongim yu na i kamapim klia as na yu inap tok yes long dispela askim, Yu ting yumi nidim God?

Inap 2,000 yia i go pinis, long maunten Areopagus long Atens, aposel Pol i toktok long ol man i save bihainim tingting bilong ol yet na em i tok long God olsem: “Em yet i givim laip na win na olgeta samting long olgeta manmeri. Long wanem, long rot bilong em yumi gat laip na yumi inap wokabaut na stap. I olsem sampela saveman bilong yupela i bin tok, ‘Yumi ol pikinini bilong em.’”—Aposel 17:25, 28.

Tok Pol i mekim long ol Atens long dispela taim i tru yet long nau. Man Bilong Wokim yumi i givim win yumi pulim, kaikai yumi kisim, na wara yumi dring. Yumi no inap stap laip sapos yumi no kisim ol gutpela samting God i givim bilong helpim yumi. Maski ol man i tingim God o nogat, God i wok yet long givim ol dispela samting long olgeta man, bilong wanem em i mekim olsem? Pol i tok em i mekim olsem “bai ol i ken painim God, yes, ol i ken wok strong tru long mekim olsem na painim em tru. Tasol tru tru em i no stap longwe long yumi olgeta wan wan.”—Aposel 17:27.

Yu laik kisim sampela save moa long God, olsem kisim save long samting em i tingting pinis long mekim, na ol tok em i givim bilong helpim yumi long nau na inap oltaim bihain? Sapos olsem, i gutpela yu toktok wantaim man o meri husat i givim dispela nius long yu o toktok wantaim lain i wokim dispela nius. Ol bai amamas long helpim yu.