God i save harim beten bilong ol man bilong olgeta lain. (Song 145:18, 19) Baibel i laik kirapim yumi long kamapim olgeta tingting na wari bilong yumi long em. (Filipai 4:6, 7) Tasol i gat sampela beten God i no amamas long en. Olsem: God i no save amamas long pasin bilong kolim kolim gen ol beten man i holim pinis long tingting.—Ritim Matyu 6:7.

Na tu, Jehova i no laikim beten bilong ol man i save sakim lo bilong em. (Sindaun 28:9) Olsem: Long taim bilong ol man i bin raitim Baibel, God i no laik harim beten bilong ol Israel i gat asua long kilim man i dai. I klia tru olsem yumi mas mekim sampela samting na bai God i ken harim beten bilong yumi.—Ritim Aisaia 1:15.

Yumi no inap beten long God sapos yumi no gat bilip. (Jems 1:5, 6) Yumi mas bilip tru olsem em i stap na em i save tingim yumi. Yumi inap strongim bilip bilong yumi long rot bilong stadi long Baibel, bikos ol tok promis bilong Baibel i as bilong bilip tru na yumi save ol dispela promis bai i kamap tru.—Ritim Hibru 11:1, 6.

Yumi mas i gat gutpela bel na pasin daun taim yumi beten. Pikinini Bilong God, em Jisas, em tu i mekim pasin daun taim em i beten. (Luk 22:41, 42) Olsem na yumi no ken tokim God long ol samting em i mas mekim, nogat; yumi mas wok strong long ritim Baibel na kisim save long ol samting em i laik bai yumi mas mekim. Long dispela rot yumi ken mekim beten i stret wantaim laik bilong God.—Ritim 1 Jon 5:14.