Vahan i bon long Amenia long Epril 1983. Long 1996, em na ol narapela long famili bilong em i kirap stadi long Baibel wantaim ol Witnes Bilong Jehova, na taim em i gat 16 krismas, em i kisim baptais. Long rot bilong stadi long Baibel, Vahan i kirap pilim tru ol tok bilong Jisas Krais, olsem tok Jisas i mekim long ol disaipel long ol i no ken yusim bainat bilong mekim pait. (Matyu 26:52) Olsem na bihain liklik long Vahan i kisim baptais, em i mas wokim wanpela bikpela disisen.

Lo bilong Amenia i tok olgeta yangpela man i gat 18 krismas ol i mas insait long ami. Sapos ol i sakim dispela, ol inap kalabus inap 3-pela yia. Vahan i laik mekim wok i helpim ol wankantri bilong em. Tasol tu, em i no laik mekim samting i no stret wantaim maus bilong bel bilong em, em Baibel i skulim pinis. Olsem na em i mekim wanem?

Long 2001, taim ol i laik singautim Vahan long insait long ami, em i kirap raitim ol pas i go long ol bikman bilong gavman bilong Amenia. Long ol pas bilong em, em i tok maus bilong bel na ol bilip bilong em i no orait long em i insait long ami. Na tu, em i tok em i redi long mekim sampela wok sivilien, olsem sampela wok bilong helpim ples.

Inap 1-pela yia, Vahan i wok long toktok wantaim ol bikman bilong gavman bambai ol i ken luksave long as na em i no laik insait  long ami. Tasol long Septemba 2002, ol i arestim Vahan, na bihain ol i sasim em long em i sakim oda bilong insait long ami. Kot i tok em i mas kalabus inap 18 mun. Tasol prosekiuta i no amamas long dispela disisen. Bihain long 1-pela mun, prosekiuta i apil long kot na tok Vahan i mas kalabus longpela taim moa. Vahan i laik bihainim maus bilong bel na i no insait long ami, tasol prosekiuta i tok dispela samting i “no gat as bilong en na inap kamapim hevi.” Kot bilong apil i wanbel wantaim prosekiuta, na makim Vahan long kalabus inap 30 mun.

Vahan i apil long nambawan kot bilong Amenia. Long Janueri 2003, Suprim Kot i no senisim disisen em kot bilong apil i bin mekim. Wantu ol i kalabusim Vahan long wanpela haus kalabus i gat ol kilman, ol man bilong salim drak, na ol man bilong reipim meri.

Kirap long 2001, Amenia em wanpela memba bilong Kaunsel Bilong Yurop. Olsem na ol sitisen bilong Amenia i gat rait long apil long Yuropian Kot ov Human Raits, taim ol i no kisim helpim long ol kot bilong kantri. Vahan i laik mekim olsem. Taim em i apil, em i tok olsem kot i makim em long kalabus bikos em i tok nogat long insait long ami, na dispela i brukim Atikol 9 bilong European Convention on Human Rights. Em i askim kot long sambai long raits bilong em long bihainim maus bilong bel na i no insait long ami, olsem Atikol 9 i tok ol man i ken mekim—i no gat wanpela man i bin winim kain kot olsem bipo.

Long Oktoba 27, 2009, Yuropian Kot ov Human Raits i tokaut long disisen bilong ol. Kot i tok olsem fridom long bihainim maus bilong bel, olsem Atikol 9 bilong European Convention i kamapim, i no sambai long raits bilong ol man em maus bilong bel i no orait long ol i insait long ami.

Taim ol dispela samting i kamap, Vahan i bin lusim kalabus pinis, em i marit, na em i gat pikinini man. Vahan i no amamas long tok kot i pasim. Em i mas wokim disisen nau olsem em bai lusim tasol dispela kot keis o apil long Kot Grand Chamber bilong Yuropian Kot ov Human Raits. Em i laik apil. Kot Grand Chamber i save skelim ol spesol keis tasol, olsem na Vahan i amamas taim dispela kot i redi long skelim keis bilong em.

Long Julai 7, 2011, long Strasbourg, Frans, Kot Grand Chamber bilong Yuropian Kot ov Human Raits i kirap mekim kot. Inap 16 jas bilong dispela kot i tok olsem Amenia i bin kalapim raits bilong Vahan Bayatyan long bihainim maus bilong bel bilong em, taim ol i tok em i gat asua na i kalabusim em bikos em  i no laik insait long ami. Wanpela jas tasol i no wanbel long dispela disisen em jas i kam long Amenia.

Bilong wanem disisen bilong dispela kot i bikpela samting? Long wanem, em i namba 1 taim long histori bilong Yuropian Kot ov Human Raits long tok olsem Atikol 9 bilong Convention i lukautim olgeta raits bilong man i laik bihainim maus bilong bel na i no insait long ami. Dispela i mekim na kot i ting pasin bilong kalabusim man husat i bihainim maus bilong bel bilong em, dispela i kalapim raits bilong man husat i stap aninit long gavman demokratik.

Kot i stori long pasin bilong ol Witnes Bilong Jehova long bihainim maus bilong bel, na i tok: “I no gat as na Kot i gat tupela tingting olsem bilip bilong dispela man i as na em i no laik insait long ami. Dispela man i givim bel tru long lotu bilong em, na laik bilong em olsem em i no laik insait long ami, dispela i bikpela samting tru long em na em i no inap sakim dispela.”

Insait long 20 yia i go pinis, gavman bilong Amenia i bin kalabusim 450 Witnes Bilong Jehova, bikos ol i bihainim maus bilong bel na ol i no insait long ami. Taim ol i redim dispela stori bilong raitim, inap 58 yangpela man long Amenia i kalabus bikos ol i no laik insait long ami. Ol i bin kalabusim 5-pela bilong ol dispela man bihain long Yuropian Kot ov Human Raits i mekim bikpela disisen long kot keis namel long Bayatyan na Amenia. a Wanpela bilong ol dispela yangpela man i raitim pas na askim prosekiuta long no ken kotim em bikos em i bihainim maus bilong bel na i no laik insait long ami, tasol prosekiuta i sakim dispela. Long pas prosekiuta i raitim, em i tok: “Disisen bilong Yuropian Kot long keis namel long Bayatyan na Amenia, long Julai 7, 2011, i no stret long dispela keis, long wanem, ol samting bilong dispela 2-pela keis i no wankain liklik.”

Bilong wanem prosekiuta i gat dispela kain tingting? Taim ol i sasim Vahan Bayatyan, i no gat wok sivilien ol man inap mekim. Gavman bilong Amenia i tok, nau i gat nupela lo i tok ol man i ken mekim wok sivilien, olsem na ol man i no laik insait long ami ol i ken mekim dispela wok. Tasol long Amenia wok sivilien i stap aninit long wok bos bilong ami, olsem na planti man husat i bihainim maus bilong bel na i no insait long ami, ol i no inap mekim dispela wok sivilien.

Vahan Bayatyan i amamas long bikpela disisen kot i mekim bilong helpim em. Dispela disisen i mekim na nau Amenia i mas lusim pasin bilong kotim na kalabusim ol man husat i bihainim bilip bilong ol na i no insait long ami.

Ol Witnes Bilong Jehova i no laik senisim lo bilong ol kantri, nogat. Tasol olsem yangpela Vahan Bayatyan i bin mekim, ol i laik lukautim raits bilong ol olsem i stret wantaim ol lo bilong gavman em ol i stap aninit long en. Bilong wanem? Ol i laik mekim olsem bambai ol i ken stap wanbel wantaim ol man na stap fri long bihainim tok bilong Lida bilong ol, Jisas Krais.