Husat i Man Bilong Harim Beten?

SAPOS i gat Man Bilong Harim beten, orait i stret long tok tu olsem em i Man Bilong Wokim olgeta samting. Man i bin wokim kru bilong yumi, em tasol inap save long tingting bilong yumi. Em tasol inap putim yau long beten bilong yumi na helpim yumi. Tasol ating yu laik save, ‘I stret yumi bilip long wanpela Man Bilong Wokim olgeta samting?’

Planti man i ting olsem sapos yu bilip long Krieta, orait yu no inap bilip long saiens. Ol man i ting pasin bilong bilip long God em i no stret wantaim save bilong saiens, tasol dispela tingting em i no tru. Skelim ol dispela samting.

◼ Ol i mekim wok painimaut long 1,646 profesa bilong saiens long 21 nambawan yunivesiti long Amerika, na ol i kisim save olsem 1-pela long olgeta 3-pela 3-pela profesa i tok, “Mi no bilip long God.”

Tasol tru tru sampela saientis i bilip olsem i gat God i stap.

Ol Samting i Soim Klia Olsem i Gat Krieta

Yu ting yumi mas bilip nating tasol olsem Man Bilong Harim beten i stap tru? Nogat. Sampela man i ting dispela tok bilip i makim pasin bilong bilip nating long wanpela samting we i no gat evidens bilong en, tasol dispela tingting i no stret. Baibel i tok bilip i makim olsem yu “kliagut tru olsem samting yu bilip long en em i samting tru, maski yu no lukim long ai bilong yu.” (Hibru 11:1) Narapela Baibel i tok, “maski ai bilong yumi i no lukim ol dispela samting, yumi save gut tru olsem, dispela olgeta samting i stap.” (Buk Baibel) Olsem, yu no inap lukim ol redio weiv, tasol taim yu toktok long mobail fon wantaim narapela, yu save olsem ol redio weiv i stap na i karim tok bilong yu i go long narapela. Olsem tasol, maski yumi no inap lukim Man Bilong Harim beten, yumi ken lukim ol samting i soim olsem em i stap tru.

Yumi inap painim we ol samting i soim klia olsem  God i stap tru? Yumi ken lukim ol samting i stap long hap bilong yumi. Baibel i tok: “Olgeta wan wan haus i gat man i bin wokim. Tasol man i bin wokim olgeta samting em God.” (Hibru 3:4) Olsem wanem? Yu wanbel long dispela tingting? Taim yu tingim ol samting long yunives i wok gut wantaim, laip i kirap olsem wanem, na gutpela wok em kru bilong man inap mekim, yu inap tru long tok olsem i gat wanpela man i stap na em i gat bikpela save moa. a

Tasol ol samting yumi lukim long ai, ol i no skulim yumi long olgeta samting long God. Taim yumi laik kisim save long God long rot bilong lukim ol samting em i wokim, i olsem yumi wok long harim step bilong wanpela man i wokabaut i kam long dua i pas. Yu save olsem i gat man i sanap long dua, tasol yu no save em i husat. Yu mas opim dua na bai yu save long em. Yumi mas mekim wankain samting bilong luksave long Man i bin wokim olgeta samting.

Baibel i olsem dua i opim rot bilong yumi inap kisim save long God. Taim yu opim dispela dua na skelim sampela bikpela tok profet na truim bilong ol, yu bai luksave olsem God i stap tru. b Na moa yet, stori bilong ol samting God i bin mekim long lain bilong em i soim pasin tru bilong dispela Man Bilong Harim beten.

Man Bilong Harim Beten i Gat Wanem Ol Pasin?

Baibel i soim olsem Man Bilong Harim beten em i wanpela man i stap tru na yu inap save long em. Ol man tasol inap pilim tru tok ol i harim.  Dispela tok bilong Baibel i strongim yumi, em i tok: “Yu save harim beten bilong mipela. Olsem na mipela olgeta manmeri i mas i go long yu.” (Song 65:2) Dispela Man i save harim beten bilong ol manmeri i bilip na i beten long em. Na em i gat nem. Baibel i tok: “[“Jehova,” NW] i save stap longwe long ol man i save mekim pasin nogut. Tasol em i putim yau long beten bilong ol stretpela man.”—Sindaun 15:29.

Jehova i gat laik na tingting bilong em. Em i “God bilong pasin laikim” na “God bilong amamas.” (2 Korin 13:11; 1 Timoti 1:11) Wanpela taim pasin bilong ol manmeri i go nogut tru, na Baibel i tokim yumi long God i bin pilim olsem wanem, na i tok: “Em i bel hevi tru.” (Stat 6:5, 6) Ol man i tok God i save givim pen na hevi long ol manmeri bilong traim ol, tasol dispela tok i no tru. Baibel i tok: “God I Gat Olgeta Strong i no inap mekim pasin nogut. Nogat tru.” (Jop 34:10) Tasol ating yu laik save, ‘Sapos God em Man Bilong Wokim yumi na em i gat olgeta strong, orait wai na em i larim pen na hevi i stap yet?’

Jehova i bin wokim yumi ol man na i larim yumi i stap fri long makim ol samting yumi laik mekim, na dispela i skulim yumi long pasin bilong God. Yumi amamas olsem yumi stap fri bilong mekim olsem, a? Tasol sori tru, planti man i no yusim gut fridom bilong ol na ol i kamapim pen na hevi long ol yet na long ol narapela manmeri. Orait nau yumi ken lusim sampela haptaim long skelim gut dispela askim: Olsem wanem God inap pinisim pen na hevi na larim ol man i stap fri yet? Yumi bai skelim dispela askim long atikol i kamap bihain long dispela.

[Ol Futnot]

[Blok long pes 5]

Lotu i Mekim na Yu Gat Tupela Tingting?

Lotu yet i mekim na planti manmeri i gat tupela tingting olsem i gat Man Bilong Harim beten o nogat. Ol lotu i insait long woa, pasin teroris, na orait long pasin ol man i mekim long nogutim ol pikinini, na dispela i mekim na ol lotuman tu i tok, “Mi no bilip olsem i gat God i stap.”

Bilong wanem planti taim ol lotu i save stiaim ol man long mekim ol pasin nogut? Sotpela bekim em olsem: Ol man nogut i bin mekim ol pasin nogut long nem bilong lotu. Baibel i bin tok profet olsem sampela kain strong bai kontrolim na yusim lotu long mekim ol samting i no stret wantaim laik bilong God. Aposel Pol i tokim ol wasman Kristen olsem: “Sampela man long lain bilong yupela yet bai kirap na mekim ol tok kranki bilong pulim ol disaipel i go bihainim ol.”—Aposel 20:29, 30.

God i heitim tru ol lotu giaman. Baibel i tok ol lotu giaman i gat asua long “blut . . . bilong olgeta manmeri em ol birua i bin kilim ol i dai long graun.” (Revelesen 18:24) Lotu giaman i no bin skulim ol man long God tru, em pasin laikim i stap olsem pasin tru bilong em, olsem na long ai bilong God ol dispela lotu i gat asua long blut.—1 Jon 4:8.

Man Bilong Harim beten i sori tru long ol manmeri em ol lotu i mekim nogut tru long ol. God i laikim tru yumi ol man bilong graun, olsem na klostu nau long rot bilong Jisas em bai kotim olgeta bikman bilong lotu em ol i gat tupela maus. Jisas i tok: “Long dispela de planti bai tokim mi: ‘Bikpela, Bikpela, mipela i bin mekim tok profet long nem bilong yu.’ . . . Tasol mi bai tokim ol: Mi no save liklik long yupela! Yupela klia long mi, yupela ol man nogut!”—Matyu 7:22, 23.