Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Yumi mas mekim wanem bilong tingim dai bilong Jisas?

Jisas i tokim ol disaipel bilong em long mekim wanpela bung bilong tingim indai bilong em, na ol i mas yusim bret na wain bilong mekim olsem. Bret i makim bodi bilong Jisas na wain i makim blut bilong em.—Ritim Luk 22:19, 20.

Jisas i bin yusim bret i no gat yis long en. Long Baibel, planti taim yis i makim sin. Olsem na dispela bret i makim stret bodi bilong Jisas i gutpela olgeta. Em i ofaim bodi bilong em olsem sakrifais, na dispela i pinisim pasin bilong ofaim ol animal olsem Lo Bilong Moses i tok long en. (Hibru 10:5, 9, 10) Wain i makim blut bilong Jisas em i bin kapsaitim olsem sakrifais bilong baim bek yumi long sin.—Ritim 1 Pita 1:19; 2:24; 3:18.

2. Wanem taim yumi mas mekim bung bilong tingim dai bilong Jisas?

Jisas i bin dai long Pasova long Nisan 14. Long Juda, nupela de i save kirap taim san i go daun. Long apinun paslain long Jisas i dai, em i mekim kaikai bilong Pasova wantaim ol aposel bilong em, na bihain em i kamapim nupela bung bilong tingim dai bilong em.—Ritim Luk 22:14, 15.

Long nau, ol manmeri bilong God i mekim bung bilong tingim samting God i bin mekim long rot bilong Jisas bilong helpim olgeta man long lusim kalabus bilong sin na dai. (Kisim Bek 12:5-7, 13, 17) Long bipo ol i save mekim Pasova wanpela taim long yia, na olsem tasol, Memorial bilong tingim indai bilong Jisas i save kamap wanpela taim tasol long yia long taim san i go daun pinis long Nisan 14 long kalenda bilong ol Juda.—Ritim Jon 1:29.

 3. Husat i mas kisim bret na wain?

Taim Jisas i givim wain long ol disaipel bilong em, em i tok: “Dispela kap i makim nupela kontrak.” (1 Korin 11:25) Dispela nupela kontrak i senisim kontrak bilong Lo Bilong Moses we God i bin promis long lain Israel olsem sapos ol i bihainim gut tok bilong em, ol bai kamap lain manmeri tru bilong em. (Kisim Bek 19:5, 6) Tasol lain Israel i no bihainim tok bilong God. Olsem na Jehova i kamapim nupela kontrak.—Ritim Jeremaia 31:31.

Long nupela kontrak, Jehova i opim rot bilong planti man moa inap kisim ol blesing long rot bilong wanpela liklik lain. Namba bilong dispela liklik lain em inap 144,000. Long rot bilong ol, planti milion manmeri bilong olgeta kantri bai kisim laip oltaim long Paradais long graun. Sampela insait long dispela nupela kontrak, ol i mekim wok bilong Jehova long graun long nau. I stret ol tasol i kisim bret na wain, long wanem, kap i makim “nupela kontrak.”—Ritim Luk 12:32; Revelesen 14:1, 3.

4. Memorial i helpim yumi olsem wanem?

Taim yumi mekim Memorial bilong tingim indai bilong Jisas long olgeta yia, dispela i helpim yumi long pilim tru bikpela pasin laikim bilong Jehova. Em i salim Pikinini bilong em i kam i dai bilong baim bek yumi long sin. Olsem na taim yumi go long bung bilong Memorial, yumi mas tingim tingim olsem wanem dai bilong Jisas i helpim yumi. Yumi mas tingim olsem wanem yumi ken soim olsem yumi pilim tru samting em Jehova na Jisas i bin mekim long yumi.—Ritim Jon 3:16; 2 Korin 5:14, 15.

Bilong kisim sampela save moa, lukim pes 206-208 bilong dispela buk em ol Witnes Bilong Jehova i wokim. Tru Tru Baibel i Tok Wanem?