1. Bilong wanem yumi ken bilip tru olsem Tok Bilong God i wok strong i stap? (Lukim piksa long kirap bilong stadi.)

OL MANMERI bilong Jehova i bilip tru olsem Tok Bilong God “i gat laip na i wok strong i stap.” (Hib. 4:12) Tok bilong Baibel i helpim planti bilong yumi long senisim laip bilong yumi. Long bipo, sampela i bin insait long pasin raskol, kisim drak, na mekim pasin pamuk, tasol ol i lusim ol dispela pasin na kirap lotuim God. Ol narapela i bin bungim planti mani kago, tasol ol i pilim olsem ol i sot yet long sampela samting. (Sav. 2:3-11) Planti taim, tok bilong Baibel i helpim ol lain husat i pilim olsem laip bilong ol i no gat as bilong en. Ating yu amamas tru long ritim ol ekspiriens i stap long Wastaua long atikol “Baibel i Save Senisim i Stap Bilong Man.” Na tu, ating yu luksave olsem maski ol manmeri i kisim save long tok i tru, ol i wok yet long kisim helpim long tok bilong Baibel na mekim ol senis.

2. Olsem wanem Tok Bilong God i wok strong i stap long taim bilong ol aposel?

² Planti manmeri i stadi long Tok Bilong God na dispela i helpim ol long mekim ol senis long laip bilong ol. Yumi ken tingim eksampel bilong ol Kristen long taim bilong ol aposel. (Ritim 1 Korin 6:9-11.) Pol i kolim sampela pasin em ol man i mekim  na ol i no inap i go insait long Kingdom Bilong God, na em i tok: “Sampela bilong yupela i bin i stap kain man olsem.” Tasol Tok Bilong God na holi spirit i helpim ol long lusim ol dispela pasin. Maski ol i kisim tok i tru, sampela i wok strong yet long sakim ol pasin nogut. Baibel i stori long wanpela Kristen long taim bilong ol aposel husat i bin raus long kongrigesen, na bihain kongrigesen i kisim em bek. (1 Kor. 5:1-5; 2 Kor. 2:5-8) Ol wanbilip bilong yumi i bungim planti hevi, tasol Tok Bilong God i helpim ol long sanap strong. Taim yumi kisim save long stori bilong ol, dispela bai strongim yumi.

3. Yumi bai skelim wanem ol samting long dispela stadi?

³ Tok Bilong God i gat bikpela strong, olsem na yumi inap yusim long helpim yumi yet na ol narapela. (2 Tim. 2:15) Long dispela stadi, yumi bai skelim olsem wanem yumi inap yusim Tok Bilong God (1) long senisim laip bilong yumi, (2) taim yumi mekim wok autim tok, na (3) taim yumi mekim tok long pletfom. Dispela bai kirapim yumi long soim pasin laikim na tenkyu long Papa bilong yumi long heven husat i save skulim yumi bambai yumi inap i stap gut.—Ais. 48:17.

4. (a) Yumi mas mekim wanem bambai Tok Bilong God inap helpim yumi? (b) Ol manmeri bilong God i ritim Baibel long wanem ol taim?

⁴ Sapos yumi laik bai Tok Bilong God i helpim yumi, orait yumi mas ritim long olgeta de. (Jos. 1:8) Planti bilong yumi i save bisi long mekim ol wok bilong wan wan de. Maski i olsem, yumi no ken larim ol wok yumi mekim i pasim yumi long ritim Baibel long olgeta de. (Ritim Efesus 5:15, 16.) Planti manmeri bilong Jehova i makim kain kain taim long ritim Baibel. Sampela i ritim Baibel long moning, sampela long apinun, na namel long de. Ol i pilim wankain olsem man bilong raitim song. Em i tok: “Mi laikim tru lo bilong yu. Mi save tingting long en long san na long nait.”—Sng. 119:97.

5, 6. (a) Bilong wanem yumi mas lusim haptaim long tingim tingim ol tok yumi ritim? (b) Taim yumi ritim Baibel, yumi ken mekim wanem ol askim? (c) Yu kisim wanem helpim taim yu ritim na tingim tingim Tok Bilong God?

⁵ Taim yumi ritim Baibel, yumi mas lusim sampela haptaim long tingim tingim ol tok bilong en. (Sng. 1:1-3) Dispela bai helpim yumi long bihainim ol tok yumi ritim. Maski yumi ritim tok bilong God long rot bilong Baibel, o long mobail fon o teblet samting, yumi laik pilim tru ol dispela tok na putim i go daun long bel.

⁶ Olsem wanem yumi inap tingim tingim ol tok yumi ritim long Baibel? Planti manmeri i kisim helpim taim ol i ritim Tok Bilong God na lusim haptaim long tingim  tingim ol tok ol i ritim, na mekim ol kain askim olsem: ‘Jehova i gat wanem ol pasin? Mi wok long bihainim ol stiatok bilong Baibel long laip bilong mi? Mi gat sampela pasin kranki em mi mas lusim?’ Taim yumi beten long God na tingim tingim ol tok bilong em, dispela bai kirapim yumi long bihainim ol skultok bilong Baibel. Long dispela rot, yumi larim Tok Bilong God i senisim laip bilong yumi.—2 Kor. 10:4, 5.

7. Olsem wanem yumi inap yusim gut Tok Bilong God taim yumi autim tok?

⁷ Wanem samting inap helpim yumi long yusim gut Tok Bilong God long wok autim tok? Yumi mas yusim Baibel taim yumi autim tok na skulim ol man. Wanpela brata i tok: “Sapos yu autim tok wantaim Jehova, yu wanpela bai toktok o yu bai larim em tu i toktok?” Tok bilong brata i makim olsem: Taim yumi ritim Tok Bilong God long taim yumi autim tok, i olsem yumi larim Jehova i toktok long man bilong haus. Sapos yumi ritim skripsa i stret long em, dispela tok bai strongim em winim tok yumi yet i mekim. (1 Tes. 2:13) Askim yu yet, ‘Mi save ritim Tok Bilong God taim mi autim gutnius long ol man?’

8. Taim yumi ritim Baibel long man, wanem sampela samting moa yumi mas mekim?

⁸ Taim yumi autim tok, yumi mas ritim Baibel long ol manmeri, tasol i gat sampela samting moa yumi mas mekim. Long taim bilong ol aposel, planti manmeri i no kliagut long Tok Bilong God, na dispela i wankain long nau tu. (Rom 10:2) Yumi no ken ting olsem taim yumi ritim skripsa long man bilong haus, em bai kliagut long tok bilong Baibel. Yumi mas lusim haptaim long kolim gen ol bikpela tok, na kamapim mining bilong en long man. Taim yumi mekim olsem, ol manmeri bai  pilim tru Tok Bilong God long bel.—Ritim Luk 24:32.

9. Olsem wanem yumi inap soim olsem yumi rispektim tok bilong Baibel?

⁹ Taim yumi toktok long man bilong haus, yumi laik mekim long pasin i soim olsem yumi rispektim tok bilong Baibel. Yumi ken mekim kain tok olsem, “Yumi ken skelim tingting bilong Krieta long dispela samting.” Taim yumi toktok wantaim man husat i no bilip long God, yumi ken tok, “Lukim tok em Rait Holi i mekim.” Sapos yumi toktok wantaim wanpela husat i tingim skul na wok mani olsem namba 1 samting, yumi ken askim em, “Yu bin harim dispela savetok bilong bipo?” Yumi laik skelim gut sindaun bilong ol man na mekim tok i stret long ol.—1 Kor. 9:22, 23.

10. (a) Stori long ekspiriens bilong wanpela brata. (b) Yu luksave long olsem wanem Tok Bilong God i gat strong long helpim ol manmeri em yu autim tok long ol?

¹⁰ Planti bratasista i luksave olsem taim ol i yusim Tok Bilong God long wok autim tok, ol inap helpim ol man i gat hevi. Wanpela brata i mekim gobek long wanpela lapun man husat i save ritim ol magasin bilong yumi inap planti yia. Taim brata i go visitim em, em i givim nupela Wastaua na ritim wanpela skripsa i stap long dispela magasin. Brata i ritim 2 Korin 1:3, 4, em i tok: “Em Papa bilong marimari na God bilong mekim isi bel bilong ol man long olgeta kain taim. Long olgeta pen na hevi i kamap long yumi, em i save mekim isi bel bilong yumi.” Dispela lapun man i pilim tru dispela tok na em i askim brata long ritim gen. Em i tokim brata olsem em na meri bilong em i nidim tru tok bilong mekim isi bel bilong ol. Dispela skripsa i kirapim laik bilong em long kisim sampela save moa long Baibel. Tru tumas, Tok Bilong God i gat strong long helpim ol man em yumi autim tok long ol.—Apo. 19:20.

11. Ol brata husat i mekim tok long pletfom i mas mekim wanem?

¹¹ Yumi save amamas tru long ol tok i kamap long ol miting na ol kibung. Namba 1 risen na yumi go long ol dispela bung em long lotuim Jehova. Na tu, yumi kisim bikpela helpim long ol tok bilong Baibel em yumi harim long ol dispela bung. Ol brata husat i mekim tok long pletfom i amamas long kamapim ol tok bilong Baibel. Ol i luksave olsem ol i mas mekim gut dispela wok. (Jems 3:1) Oltaim ol i mas yusim Tok Bilong God taim ol i mekim tok long pletfom. Sapos yu wanpela brata na yu bai mekim tok long pletfom, olsem wanem yu inap yusim Tok Bilong God long skulim ol narapela?

12. Olsem wanem ol brata inap yusim ol skripsa long strongim tok bilong ol?

¹² Taim ol brata i mekim tok long pletfom, ol i mas yusim ol skripsa long strongim tok bilong ol. (Jon 7:16) Sapos ol brata i kamapim ol ekspiriens, ol tok piksa, o ol i bihainim wanpela kain pasin bilong mekim tok, ol i mas was gut bambai ol dispela samting i no pulim tingting bilong odiens i go longwe long tok bilong Baibel. Pasin bilong ritim tasol ol skripsa i no makim olsem yu skulim ol man long Baibel. Sapos ol brata i yusim planti skripsa, odiens i no inap kisimgut mining bilong tok ol i mekim. Olsem na taim ol brata i laik mekim tok long pletfom, ol i mas skelim gut ol skripsa em bai yusim, ritim gut skripsa na kamapim mining bilong en, na stori long skul yumi inap kisim. (Neh. 8:8) Taim ol brata i yusim autlain long mekim tok, ol i mas lusim haptaim long skelim gut autlain na ol skripsa ol bai yusim. Kliagut long olsem wanem ol tok long autlain i stret wantaim ol  skripsa. Na tu, ol i ken makim sampela skripsa ol bai ritim bilong kamapim gut ol bikpela tok i stap long autlain. (Yu inap kisim helpim long stadi 21 i go stadi 23 long buk Skul Tiokratik Bilong Autim Tok.) Bikpela samting em ol brata i mas beten askim Jehova long helpim ol long kamapim gut mining bilong ol skripsa.—Ritim Esra 7:10; Sindaun 3:13, 14.

13. (a) Olsem wanem wanpela sista i pilim tru ol skripsa em i harim long miting? (b) Olsem wanem ol skripsa yu harim long ol miting i bin helpim yu?

¹³ Wanpela sista long Australia i pilim tru ol skripsa em i harim long miting. Em i bin bungim sampela hevi taim em i wok long kamap bikpela, tasol em i bihainim tok bilong Baibel na dediketim laip bilong em long Jehova. Maski i olsem, i hatwok long em i pilim olsem Jehova i laikim em. Tasol isi isi em i luksave olsem God i laikim em. Em i tingim tingim wanpela skripsa em i bin harim long miting, na em i skelim olsem wanem dispela skripsa i stret wantaim ol narapela skripsa. * Olsem wanem? Yu pilim tru wanpela skripsa yu harim long ol miting na kibung bilong yumi?—Neh. 8:12.

14. Olsem wanem yumi inap soim olsem yumi laikim Tok Bilong Jehova?

¹⁴ Yumi amamas tru long tok bilong Jehova i stap long Baibel. God i laikim yumi na em i givim yumi Baibel, na dispela i inapim promis bilong em olsem tok bilong em bai stap oltaim. (1 Pita 1:24, 25) Olsem na yumi laik ritim Tok Bilong God long olgeta de, bihainim long laip bilong yumi, na helpim ol narapela. Long dispela rot, yumi soim olsem yumi laikim tru tok i stap long Baibel, na moa yet, yumi soim olsem yumi laikim Man husat i kamapim ol tok bilong Baibel, em God Jehova.