MI AMAMAS tru olsem papamama bilong mi, Fred na Edna Molohan, em ol Kristen. Ol i skulim mi long laikim tru God na ol i mekim wok olsem ol Sumatin Bilong Baibel (ol Witnes Bilong Jehova) inap 20 yia pinis paslain long mi bon long 1934. Famili bilong mipela i stap long Parsons, em wanpela liklik taun long saut-wes Kansas. Mipela i save go long kongrigesen bilong dispela hap, na planti bratasista insait long kongrigesen em ol Kristen God i bin makim. Famili bilong mipela i save amamas long go long ol miting na autim tok i tru bilong Baibel long ol narapela. Sarere apinun mipela i save tilim nius long ol rot, long nau yumi kolim olsem autim tok long pablik ples. Sampela taim mipela i taiet bihain long autim tok, tasol Papa i save baim aiskrim bilong mipela taim mipela i pinis long autim tok.

Kongrigesen bilong mipela i gat bikpela teritori na sampela liklik taun tu, na i gat planti fam long ol provins i stap klostu. Taim mipela autim tok long ol fama, mipela i save senisim litresa wantaim ol kaikai bilong gaden olsem ol prut, kiau bilong kakaruk (em nau tasol ol kakaruk i karim), o wanpela laip kakaruk. Mipela i no gat inap mani na Papa i bin givim pinis kontribiusen bilong ol litresa, olsem na kaikai mipela i kisim i inap tru long mipela.

Papamama i kisim wanpela masin pikap, na ol i yusim long autim tok. Mi liklik yet, olsem na mi no inap long pilaim dispela masin pikap, tasol mi save amamas long helpim Papa na Mama taim tupela i pilaim tok bilong Brata Rutherford long ol gobek na Baibel stadi.

Papa i senisim kar bilong mipela na mekim i kamap olsem saun kar, em kar i gat bikpela spika i stap antap long en. Dispela kar i helpim mipela long autim tok bilong Kingdom long planti manmeri moa. Pastaim mipela i save pilaim wanpela musik ol i rekodim bambai ol manmeri i ken harim, na bihain mipela i pilaim wanpela odio rekoding bilong tok bilong Baibel. Bihain mipela i save tilim  litresa long ol manmeri i laik kisim sampela save moa.

Long liklik taun Cherryvale, Kansas, polis i tokim Papa olsem i tambu long putim saun kar long pak long taun we planti manmeri i malolo long en long Sande. Tasol em i ken putim kar ausait long pak. Papa i harim tok na em i kisim kar i go long wanpela strit i feisim pak bambai ol manmeri i ken putim yau long ol tok i kamap long saun kar. Mi amamas long wok wantaim Papa na bikpela brata bilong mi, Jerry, long ol dispela taim.

Long 1938 samting, mipela i insait long kempein we mipela i traim bes long pinisim teritori hariap bikos ol man i wok long birua. Mipela save kirap long bikmoning taim san i no kamap yet (olsem mipela i bin mekim long Joplin, Missouri) na putim ol liklik nius aninit long ol dua bilong haus. Bihain mipela i go bung ausait long taun na sekim sapos ol polis i painim sampela bratasista na arestim ol.

Long dispela taim, wanpela gutpela rot bilong wok autim tok em long mekim infomesen mats. Mipela i laik tokaut long Kingdom, olsem na mipela i pasim ol bikpela sainbot na wokabaut long stret lain i go insait long siti. Mi tingim wanpela taim ol pren bilong mipela i mekim kain mats olsem na ol i pasim sainbot we i gat tok, “Ol Lotu i Olsem Trap Bilong Giamanim Yu.” Ol i wokabaut namel long taun inap 1.6 kilomita samting na bihain ol i go bek long haus bilong mipela. Tasol gutpela tru olsem ol man i no birua long ol, na ol i bungim planti lain husat i laik save long tok i tru.

Planti taim famili bilong mipela i save lusim Kansas na i go long ol kibung long Texas. Papa i wok long Missouri-Kansas-Texas Railroad. Olsem na mipela inap yusim wok-kat bilong em long kalap long tren. Dispela i opim rot long mipela olgeta inap i go visitim ol wanblut na go long ol kibung wantaim. Bikpela brata bilong Mama, Fred Wismar, na meri bilong em Eulalie i stap long Temple, Texas. Ankol Fred i lainim tok i tru sampela yia bihain long 1900 na em i kisim baptais. Em i lainim ol susa bilong em, wanpela bilong ol em mama bilong mi. Planti bratasista long sentral Texas i save long em bikos em i bin mekim wok olsem wasman son, nau ol i kolim wasman raun. Em i gat gutpela pasin na em i man bilong amamas, na mi save amamas long wok wantaim em. Em i laikim tru tok i tru, na em i strongim mi taim mi mangi yet.

Long 1941, mipela i ron long tren i go long St. Louis, Missouri, long wanpela bikpela kibung. Ol i askim olgeta yangpela long sindaun long wanpela hap ol i makim bambai ol i ken harim tok bilong Brata Rutherford, nem bilong en “Ol Pikinini Bilong King.” Long pinis bilong tok, mipela i kirap nogut taim Brata Rutherford na ol helpim bilong em i tilim nupela buk Children (Ol Pikinini) long mipela. Winim 15 tausen yangpela i amamas long kisim dispela gutpela presen.

Long Epril 1943, mipela i amamas long i go long kibung “Kirap Mekim Wok” i kamap long Coffeyville, Kansas. Ol i kamapim Skul Tiokratik Bilong Autim Tok, na olgeta kongrigesen bai insait long dispela skul, na tu, ol i tokaut long wanpela buklet i gat 52 lesen em ol bai yusim long dispela skul. Long dispela yia yet, mi mekim fes tok bilong mi long skul. Dispela kibung em spesel long mi bikos mi na narapela  2-pela brata i kisim baptais long liklik wara i stap long fam na i kol nogut tru.

Long 1951, mi pinis long skul na mi mas mekim sampela disisen long samting mi laik mekim. Mi laik tru long wok long Betel, em ples we Jerry i bin wok long en. Olsem na mi salim aplikesen fom bilong mi i go long brens ofis long Brooklyn. Dispela disisen mi mekim i lukautim mi long sait bilong bilip. I no longtaim, brens ofis i orait long aplikesen bilong mi na ol i singautim mi long i go wok long Betel long Mas 10, 1952.

Mi laik tru long wok long dipatmen bilong prinim ol magasin na ol litresa. Tasol mi kisim asainmen long wok olsem weita, na bihain mi wok long haus kuk. Mi amamas tru long lainim ol dispela wok. Olsem na mi no bin wok long hap bilong prinim ol litresa. Tasol sediul bilong mekim wok long haus kuk i save senis senis, olsem na mi gat taim namel long de long mekim pesenel stadi long bikpela laibreri bilong Betel. Olsem na save bilong mi long Baibel i go bikpela na mi kamap strong long bilip. Na tu, dispela i strongim laik bilong mi long wok long Betel inap longpela taim. Jerry i lusim Betel long 1949 na em i maritim Patricia. Tupela i stap long Brooklyn klostu long Betel, olsem na ol i helpim mi na strongim mi taim mi kam nupela long Betel.

Bihain tasol long mi kam long Betel, ol i makim sampela moa brata long Betel long mekim ol pablik tok long ol kongrigesen. Ol brata em nem bilong ol i stap long lista, ol i save go visitim ol kongrigesen i stap insait long Brooklyn inap olsem 322 kilomita longwe long Betel. Ol i save mekim pablik tok na autim tok wantaim ol. Mi amamas olsem ol i putim nem bilong mi tu long lista. Mi pret nogut tru taim mi givim fes pablik tok. Long dispela taim, brata i save mekim pablik tok inap 1-pela aua. Mi save kalap long tren na i go long ol kongrigesen. Mi tingim bek samting i kamap long 1954. Wanpela Sande apinun long taim bilong kol, mi kalap long tren bilong i go long New York, na mi ting mi bai kam bek long Betel long apinun. Tasol i gat strongpela win na sno i pundaun. Ensin bilong tren i wok long pawa i stop na nau tren i no ron. Olsem na tren i go kamap long tren stesin long New York long 5 klok samting long Mande moning. Mi go kisim narapela tren bilong i go long Brooklyn, na taim mi kamap long Betel, mi go stret long haus kuk. Mi kamap leit na mi taiet tru bikos mi bin sindaun long tren long nait olgeta. Tasol ol kain hevi olsem i no bikpela samting bikos mi amamas tru long helpim ol brata na bung wantaim ol nupela pren long wiken na autim tok wantaim ol.

Sampela yia bihain long mi kam long Betel, mi kisim asainmen bilong insait long redio brodkas long WBBR. Ol studio i stap long namba 2 floa long bilding 124 Columbia Heights. Wok bilong mi em long ektim wanpela man long Baibel stadi program long wanpela wik. Brata A. H. Macmillan i wok long Betel longpela taim, na planti taim em i insait long dispela redio program. Planti i laikim em na ol i save kolim em Brata Mac bikos em i stap gutpela eksampel long pasin bilong sanap strong na mekim wok bilong Jehova. Em i stap olsem gutpela eksampel long mipela ol yangpela memba bilong Betel famili.

Long 1958, mi kisim invatesen long mekim wok bilong oganaisim ol samting bilong Skul Gileat. Wok bilong mi em long helpim ol sumatin long kisim visa bilong ol, na stretim rot bilong ol long i go long ol narapela kantri. Ol dispela sumatin i givim bel tru long mekim wok bilong God. Long dispela taim, pe bilong balus i go antap tru, olsem na i no olgeta sumatin i save kalap long balus na go long asainmen bilong ol. Planti sumatin i kalap long kago sip bilong i go long Afrika na ol kantri i stap long Esia. Bihain taim planti balus kampani i kamap, pe bilong baim balus i go daun na ol misineri inap i go long ol asainmen bilong ol long rot bilong balus.

Long 1960, mi kisim narapela wok moa. Mi helpim wok bilong satarim ol balus long Amerika i go long Yurop bambai ol bratasista i ken i go long ol kibung intenesenel long 1961. Mi kalap long balus  long New York na i go long kibung long Hamburg long Jemani. Bihain long kibung, mi na narapela 3-pela brata long Betel i haiarim kar na mipela i draiv i go long Itali, na visitim brens ofis long Rom. Bihain, mipela i ron i go long Frans, i go antap long ol ples maunten bilong Pyrenees, na mipela i go kamap long Spen, em hap we i gat tambu long wok autim tok bilong yumi. Mipela i pasim gut ol litresa olsem ol presen na bringim i go long ol bratasista long Barcelona. Mipela i amamas tru long bungim ol bratasista! Mipela ron i go long Amsterdam na kisim balus bilong i go bek long New York.

Wanpela yia bihain, mi kisim asainmen bilong stretim rot bilong ol bratasista husat bai go long ol kibung intenesenel i kamap long narapela narapela hap bilong graun. Tim bilong dispela kibung long 1963 em “Gutnius Bilong i Stap Oltaim.” Mipela i stretim rot bilong 583 bratasista long i go long ol kibung i kamap long Yurop, Esia, na Saut Pasifik, na ol bai pinisim raun bilong ol long Honolulu long Hawaii, na Pasadena long California. Long raun bilong ol, ol i visitim tu Lebanon na Jordan na ol i kisim skul long ol ples em Baibel i stori long en. Mipela i stretim sediul bilong kalap long balus na ol hotel mipela bai stap long en. Na tu, dipatmen bilong mipela i kisim olgeta visa bilong ol kantri mipela bai visitim.

Yia 1963 em wanpela spesel yia long mi. Long Jun 29, mi maritim Lila Rogers, em bilong Missouri na em i kam long Betel 3-pela yia paslain long mi. Wanpela wik bihain long weding bilong mitupela, mipela i go visitim ol narapela narapela kantri, olsem Grik, Isip, na Lebanon. Mipela i kisim balus long Beirut na go long wanpela liklik ples balus long Jordan. Gavman i tambuim wok bilong mipela long Jordan, na ol i tokim mipela olsem ol i no save givim visa long ol Witnes Bilong Jehova long i go long Jordan. Olsem na mipela i tingting planti long wanem samting bai kamap taim mipela i go long hap. Mipela i kirap nogut na amamas tru long lukim bikpela lain bratasista i sanap long ples balus na ol i holim wanpela sain i tok, “Welkam Ol Witnes Bilong Jehova”! Mitupela i amamas tru long lukim ol ples em Baibel i stori long en! Mipela i visitim ol ples em bipo ol bilipman i stap long en, ol ples em Jisas na ol aposel i autim tok long en, na ples we lotu Kristen i bin kirap na i go long olgeta hap bilong graun.—Apo. 13:47.

Lila i bin stap gutpela poroman bilong mi inap 55 yia long olgeta asainmen mitupela i mekim. Mipela i bin visitim Spen na Potugal taim i gat tambu long wok bilong yumi long ol dispela hap. Mipela i strongim ol bratasista na bringim ol litresa na ol narapela samting ol i nidim. Na tu, mipela i go visitim ol brata i stap long kalabus long olpela kem bilong ol ami long Cádiz, Spen. Mi amamas tru olsem mi inap yusim tok bilong Baibel long strongim ol.

Kirap long 1963 na i kam inap long nau, mi amamas tru olsem mi inap insait long wok bilong stretim rot bilong ol bratasista husat i go long ol kibung intenesenel long Afrika, Australia, Hawaii, Nu Silan, Pueto Riko, Sentral na Saut Amerika, Yurop, na sampela kantri i stap long Esia. Mitupela Lila i amamas tru long go long planti kibung, na  wanpela bilong ol em long Warsaw, Polan, long 1989. Planti bratasista long Rasia i bin i go long dispela bikpela kibung. Dispela em namba 1 kibung bilong ol! Mipela i bungim sampela bratasista em ol i bin holimpas bilip na ol i stap long kalabus bilong Soviet inap longpela taim.

Mi amamas tru long kisim blesing long visitim ol brens ofis long olgeta hap bilong graun, na strongim ol bratasista i wok long Betel na ol misineri. Mipela i mekim laspela brens visit bilong mipela long Saut Korea, na mipela i bungim 50 brata em ol i stap long kalabus long Suwon. Ol dispela brata i amamas na ol i holim stretpela tingting, na ol i luk fowed long insait gen long wok autim tok. Mipela i bungim ol na dispela i strongim tru mipela!—Rom 1:11, 12.

Mi luksave long olsem wanem Jehova i blesim lain bilong em long ol yia i go pinis. Taim mi kisim baptais long 1943, i gat klostu 1 handret tausen pablisa long dispela taim. Tasol nau, winim 8 milion manmeri i mekim wok bilong Jehova long 240 kantri. Wanpela bikpela risen na planti manmeri moa i kisim tok i tru em bikos ol lain i skul long Gileat i go pas long wok autim tok. Mi amamas tru long wok wantaim planti bilong ol dispela misineri long ol yia i go pinis, na helpim ol long i go long ol narapela narapela kantri na mekim ol asainmen bilong ol!

Mi amamas tru olsem taim mi yangpela yet, mi bin mekim disisen long wok long Betel bambai mi inap sapotim wok bilong autim tok. Jehova i blesim tru olgeta disisen bilong mi. Na tu, mitupela Lila i amamas long autim tok wantaim ol kongrigesen long Brooklyn inap planti yia, na mipela i gat planti gutpela pren em mipela i pas gut wantaim inap longpela taim.

Lila i helpim mi long olgeta de long mekim yet ol wok bilong mi long Betel. Maski nau mi winim pinis 84 krismas, mi amamas yet long mekim ol gutpela wok na helpim wok bilong stretim ol pas bilong brens ofis.

Mi amamas tru long stap insait long oganaisesen bilong Jehova na lukim olsem wanem ol lain i mekim wok bilong Jehova i stap narapela kain long ol lain i no mekim wok bilong Em. Dispela i helpim yumi long kliagut long tok i stap long Malakai 3:18 (NW ): “Yupela bai lukim gen pasin bilong stretpela man i narapela kain long pasin bilong man nogut. Na pasin bilong man i mekim wok long God i narapela kain long pasin bilong man i no mekim wok bilong God.” Long olgeta de, yumi lukim olsem pasin bilong ol man i stap aninit long wok bos bilong Satan i go nogut moa, na planti manmeri i no gat hop na amamas bilong ol i bilong sotpela taim. Tasol ol manmeri i laikim Jehova na mekim wok bilong em, ol i stap amamas maski i gat planti hevi, na ol i bilip na wet long gutpela samting bai kamap bihain. Yumi amamas tru long autim gutnius bilong Kingdom! (Mat. 24:14) Yumi olgeta i wet long lukim dispela taim we Kingdom Bilong God bai pinisim olgeta pasin nogut bilong graun. Dispela Kingdom bai kamapim nupela taim na yumi bai lukim truim bilong ol tok promis bilong God olsem ol man bai gat gutpela helt na ol bai i no inap dai. Ol gutpela wokman bilong Jehova long graun bai stap amamas oltaim oltaim.