1. Pasin bilong tanim bel i makim wanem samting?

 TAIM yumi mekim wanpela bikpela rong, em i bikpela samting long yumi mas tanim bel. Long Baibel, taim wanpela man i tanim bel, dispela i makim olsem em i senisim tingting em i gat long wanpela pasin, em i stop long bihainim dispela pasin, na em i tingting strong olsem em i no inap mekim gen dispela pasin. Lukim “Tanim Bel” long Dikseneri Bilong Baibel.

2. Bilong wanem yumi olgeta i mas kisim save long pasin bilong tanim bel? (Nehemia 8:​9-11)

² Olgeta manmeri i mas kisim save long pasin bilong tanim bel. Bilong wanem? Long wanem, yumi save mekim sin long olgeta de. Yumi olgeta tumbuna pikinini bilong Adam na Iv, olsem na yumi kisim sin na dai long tupela. (Rom 3:23; 5:12) I no gat wanpela bilong yumi inap abrusim sin na dai. Ol man i gat strongpela bilip, olsem aposel Pol, ol tu i bin pait strong bilong daunim sin. (Rom 7:​21-24) Yu ting dispela i makim olsem laip bilong yumi bai nogut long olgeta taim bikos long ol sin bilong yumi? Nogat, Jehova i gat pasin marimari na em i laik yumi stap amamas. Skelim stori bilong ol Juda long taim bilong Nehemia. (Ritim Nehemia 8:​9-11.) Jehova i no laik bai ol i bel hevi oltaim long ol sin ol i bin mekim long bipo, nogat. Em i laik bai ol i stap amamas na lotuim em. Jehova i save olsem pasin bilong tanim bel i save mekim man i stap amamas. Olsem na em i skulim yumi long tanim bel. Sapos yumi tanim bel tru long ol sin yumi bin mekim, yumi ken save tru olsem Papa bilong yumi i gat pasin marimari bai fogivim yumi.

3. Bai yumi stori long wanem samting long dispela atikol?

³ Yumi ken kisim sampela save moa long pasin bilong tanim bel. Long dispela atikol, yumi bai stori long 3-pela samting long pasin bilong tanim bel. Namba 1, yumi bai kisim save long ol samting Jehova i skulim lain Israel long en long pasin bilong tanim bel.  Namba 2, yumi bai stori long ol samting Jehova i mekim bilong helpim ol sinman long tanim bel. Na namba 3, yumi bai stori long skul em ol disaipel bilong Jisas i kisim long pasin bilong tanim bel.

JEHOVA I SKULIM LAIN ISRAEL LONG PASIN BILONG TANIM BEL

4. Jehova i skulim lain Israel long wanem samting long pasin bilong tanim bel?

⁴ Taim Jehova i oganaisim lain Israel i kamap olsem wanpela lain stret, em i mekim kontrak wantaim ol. Sapos ol i wok yet long bihainim ol lo bilong em, em bai lukautim na blesim ol. Em i tokim ol olsem: “Dispela lo nau mi givim long yupela, em i no hatwok long yupela i kliagut long en, na i no hatwok long yupela i bihainim.” (Lo 30:​11, 16) Tasol sapos ol i no bihainim ol dispela lo bilong em, olsem, ol i go lotuim ol narapela god, orait em bai tekewe blesing bilong em na ol bai karim planti hevi. Maski i olsem, ol inap mekim samting bilong God i ken orait gen long ol. Ol inap “kam bek long Jehova, God bilong [ol], na harim tok bilong em.” (Lo 30:​1-3, 17-20) Dispela i makim olsem ol i ken tanim bel. Sapos ol i mekim olsem, orait Jehova bai go klostu long ol na em bai blesim ol gen.

5. Olsem wanem Jehova i soim olsem em i no givap long ol manmeri bilong em? (2 King 17:​13, 14)

⁵ Lain manmeri em Jehova yet i bin makim, planti taim ol i sakim tok bilong em. Ol i lotuim ol imis na ol i mekim ol narapela stingpela pasin. Dispela i mekim na ol i karim bikpela hevi. Tasol Jehova i no givap long ol manmeri bilong em, maski ol i sakim tok bilong em. Planti taim em i salim ol profet bilong em i go bilong helpim ol manmeri bilong em long tanim bel na kam bek long em.—Ritim 2 King 17:​13, 14.

6. Hau Jehova i yusim ol profet long skulim lain bilong em olsem pasin bilong tanim bel em i bikpela samting? (Lukim tu piksa.)

⁶ Planti taim Jehova i salim ol profet bilong em i go bilong givim tok lukaut na stretim ol manmeri bilong em. Olsem, long rot bilong Jeremaia, Jehova i tokim lain Israel olsem: “Bikhet Israel, yu mas kam bek. . . . mi no ken belhat moa long yu, long wanem, mi save stap gut long narapela, . . . belhat bilong mi i no inap stap oltaim. Yu mas tokaut olsem yu gat asua, long wanem, yu bin bikhet long Jehova.” (Jer. 3:​12, 13) Long  rot bilong Joel, Jehova i tok: “Yupela i mas tanim bel tru na kam bek long mi.” (Jol. 2:​12, 13) Na long rot bilong Aisaia em i tokaut olsem: “Mekim yupela yet i kamap klin; rausim ol pasin nogut bilong yupela long ai bilong mi; stop long mekim pasin nogut.” (Ais. 1:​16-19) Na long rot bilong Esekiel, Jehova i askim olsem: “Yupela i ting mi save amamas taim wanpela man nogut i dai? Nogat tru, mi laik bai em i lusim pasin nogut bilong em na stap laip yet. Mi no save amamas taim wanpela man i dai, . . . olsem na tanim i kam bek na stap laip.” (Ese. 18:​23, 32) Jehova i save amamas long lukim ol manmeri i tanim bel, bikos em i laik bai ol i stap laip—yes stap laip oltaim! So Jehova i save go pas long helpim ol man i mekim sin, na em i no save wet tasol inap long ol yet i mekim ol senis paslain long em i helpim ol, nogat. Yumi ken skelim sampela eksampel.

7. Jehova i yusim stori bilong profet Hosea na meri bilong em long givim wanem skul long lain Israel?

⁷ Lukim hau Jehova i yusim stori bilong Gomer, em meri bilong profet Hosea, long givim skul long ol manmeri bilong em. Bihain long Gomer i mekim pasin adaltri, em i lusim Hosea na go stap wantaim ol narapela man. Yu ting i no gat rot moa bilong helpim em? Jehova em Man i ken lukim bel na tingting bilong ol manmeri, em i tokim Hosea: “Yu go na laikim gen dispela meri bilong yu em nau narapela man i laikim em na i mekim pasin adaltri wantaim em. Yu mas laikim em wankain olsem Jehova i laikim ol manmeri bilong Israel, maski ol i lusim em na go lotuim ol arapela god.” (Hos. 3:1; Prov. 16:2) Yumi ken lukim olsem meri bilong Hosea i insait yet long mekim bikpela sin. Maski i olsem, Jehova i tokim Hosea long kisim em bek na fogivim em na kamap wanbel gen wantaim em. a Long wankain pasin, Jehova i no givap long ol manmeri bilong em husat i gat strongpela het. Ol i insait tru long mekim ol bikpela sin, tasol em i laikim ol yet na em i wok yet long helpim ol long senisim pasin bilong ol, tanim bel, na kam bek long em. Yu ting dispela i makim olsem Jehova, em “man bilong skelim bel bilong ol man” bai mekim ol samting bilong helpim wanpela man husat i wok yet long mekim bikpela sin long tanim bel na kam bek long em? (Prov. 17:3) Bai yumi skelim dispela samting.

HAU JEHOVA I HELPIM OL SINMAN LONG TANIM BEL

8. Jehova i mekim wanem bilong helpim Kein long tanim bel? (Stat 4:​3-7) (Lukim tu piksa.)

⁸ Kein em fes pikinini man bilong Adam na Iv. Em i kisim laik bilong mekim ol pasin nogut long rot bilong papamama bilong em. Na Baibel i mekim dispela tok long em olsem: “Ol samting em i kamapim i nogut.” (1 Jon 3:12) Ating em as na taim Kein i bin mekim ofa long Jehova, “em i no amamas long Kein na ofa bilong em.” Tasol Kein i no senisim pasin bilong em, nogat, em i “belhat nogut tru na pes bilong em i senis olgeta.” Jehova i mekim wanem samting bihain? Em i toktok long Kein. (Ritim Stat 4:​3-7.) Tingim, long gutpela pasin Jehova i toktok wantaim Kein na givim rot long em long senis na bai em i ken kisim blesing, na tu, givim tok lukaut long em long ol samting nogut sin i save kamapim. Tasol sori tru, Kein i no laik bihainim tok. Em i no larim Jehova i helpim em long tanim bel. Maski Kein i no laik kisim helpim i kam long Jehova, yu ting Jehova i stop long helpim ol narapela sinman long tanim bel? Nogat, em i wok yet long helpim ol!

9. Hau Jehova i helpim Devit long tanim bel?

⁹ Jehova i laikim tru King Devit. Em i tok long Devit olsem: “Man i save mekim ol samting i stret wantaim ol tingting i stap long bel bilong mi.” (Apo. 13:22) Tasol Devit i bin mekim ol  bikpela sin tru, olsem em i mekim pasin adaltri na kilim man i dai. Olsem Lo Bilong Moses i makim, i stret long ol man i kilim Devit i dai. (Wkp. 20:10; Nam. 35:31) Tasol long gutpela pasin Jehova i helpim em. b Em i salim profet Natan i go lukim Devit, maski long dispela taim Devit yet i no mekim wanpela samting bilong soim olsem em i tanim bel. Natan i stori long wanpela tok piksa we Devit inap pilim tru long bel. Devit i sori tru long rong em i mekim na em i tanim bel. (2 Sml. 12:​1-14) Em i raitim wanpela song we i kamapim klia olsem em i sori tru na em i tanim bel. (Sng. 51, supaskripsen) Dispela song i bin mekim gut bel bilong planti sinman na i helpim ol long tanim bel. Yumi amamas long save olsem long pasin laikim Jehova i helpim gutpela wokman bilong em Devit long tanim bel!

10. Yu pilim olsem wanem long pasin bilong Jehova long i no les kwik na fogivim ol sinman?

¹⁰ Jehova i heitim sin na em i no orait liklik long olgeta kain pasin bilong mekim sin. (Sng. 5:​4, 5) Tasol em i save olsem yumi olgeta sinman, na pasin bilong em long laikim yumi i kirapim em long helpim yumi long pait long daunim sin. Oltaim em i save helpim ol man i mekim ol bikpela sin long tanim bel na go klostu long em. Dispela save i ken mekim gut bel bilong yumi! Taim yumi tingim pasin bilong Jehova long i no les kwik na fogivim yumi, yumi bai tingting strong long stap gut long em na hariap long tanim bel taim yumi mekim sin. Nau yumi ken stori long hau kongrigesen Kristen bilong pastaim i kisim sampela skul moa long pasin bilong tanim bel.

OL DISAIPEL BILONG JISAS I KISIM SKUL LONG PASIN BILONG TANIM BEL

11-12. Jisas i yusim wanem tok piksa bilong skulim ol manmeri long pasin bilong Papa bilong em long fogivim man? (Lukim piksa.)

¹¹ Long yia 29 C.E., taim i kamap pinis long Mesaia bai kamap. Olsem yumi stori long atikol i go pinis, Jehova i yusim Jon Bilong Baptais na Jisas Krais long skulim ol manmeri olsem em i bikpela samting long ol i mas tanim bel.—Mat. 3:​1, 2; 4:17.

¹² Long wok autim tok bilong Jisas, em i skulim ol manmeri long pasin bilong Papa bilong em long fogivim yumi taim yumi mekim sin. Jisas i  mekim olsem long rot bilong wanpela naispela stori long pikinini man i lusim papa na i kam bek. Dispela yangpela man i makim olsem em i laik bihainim rot bilong sin inap sampela haptaim. Tasol bihain “em i kisim stretpela tingting” na em i kam bek long haus bilong em. Papa i mekim wanem taim pikinini i kam bek? Jisas i tok: “Taim [pikinini] i stap longwe yet, papa i lukim em na i sori tru long em, na em i ran i go na holimpasim em na givim kis long em.” Pikinini man i tingting long askim papa sapos em inap kamap wokman long haus bilong papa, tasol papa i kolim em olsem “dispela pikinini bilong mi” na em i kisim em i kam bek insait long famili. Papa i tok: “Em i bin lus, tasol yumi painim em pinis.” (Luk 15:​11-32) Taim Jisas i bin stap long heven paslain long em i kam long graun, em i bin lukim Papa bilong em i mekim pasin sori long planti sinman em ol i tanim bel. Dispela naispela tok piksa bilong Jisas i mekim gut bel bilong yumi na i soim klia olsem Papa bilong yumi Jehova i gat pasin marimari!

13-14. Aposel Pita i kisim wanem skul long pasin bilong tanim bel, na em i skulim ol narapela long wanem samting? (Lukim tu piksa.)

¹³ Aposel Pita i kisim sampela bikpela skul long Jisas long pasin bilong tanim bel na fogivim rong. Planti taim Pita i mekim rong, na oltaim Jisas i redi long fogivim em. Olsem, bihain long Pita i tok 3-pela taim olsem em i no save long Bikpela bilong em, em i bel hevi tru long dispela rong bilong em. (Mat. 26:​34, 35, 69-75) Tasol bihain long Jisas i kirap bek em i kamap long Pita, ating long taim Pita i stap em yet. (Luk 24:​33, 34; 1 Kor. 15:​3-5) Long dispela taim, Jisas i fogivim Pita na em i mekim gut bel bilong dispela aposel i tanim bel tru.—Lukim Mak 16:7 na stadi nout “and Peter” long Inglis Baibel.

¹⁴ Pita yet i lukim Jisas i fogivim ol rong bilong em, olsem na nau em inap tru long skulim ol narapela long pasin bilong tanim bel na fogivim ol rong. Sampela haptaim bihain long bung bilong Pentikos, Pita i mekim wanpela tok long bikpela lain Juda em ol i no bilip, na em i eksplenim long  ol olsem ol i bin kilim Mesaia i dai. Maski i olsem, long gutpela pasin laikim em i tokim ol: “Yupela i mas tanim bel na senisim pasin bilong yupela na bai ol sin bilong yupela i tekewe, na Jehova yet bai givim nupela strong long yupela.” (Apo. 3:​14, 15, 17, 19) Long dispela rot, Pita i soim olsem pasin bilong tanim bel i save kirapim wanpela sinman long baut olsem senisim ol tingting na pasin bilong em i no stret, na bihainim nupela pasin we i amamasim God. Aposel Pita i soim tu olsem taim Jehova i rausim sin bilong ol sinman, sin bilong ol i no stap moa, ol i pinis olgeta. Na inap planti yia bihain, Pita i strongim ol Kristen olsem: “Jehova . . . i wetim yupela na i no les kwik, long wanem, em i no laik bai wanpela i kisim bagarap. Em i laik bai olgeta i tanim bel.” (2 Pita 3:9) Taim ol Kristen i mekim sin, ol i ken belgut long save olsem Jehova i redi long fogivim ol, maski ol i mekim ol bikpela sin!

15-16. (a) Long wanem rot aposel Pol i lain long pasin bilong fogivim rong? (1 Timoti 1:​12-15) (b) Bai yumi stori long wanem samting long atikol i kamap bihain?

¹⁵ Sol bilong Tarsus i bin mekim planti bikpela rong, olsem na em i mas tanim bel na bai God i fogivim em. Em i bin mekim nogut tru long ol disaipel bilong Krais. Planti Kristen i tingim em olsem wanpela man nogut tru na i no gat rot long em bai tanim bel. Tasol Jisas husat i kirap bek pinis, em i no gat wankain tingting olsem bilong ol man. Em na Papa bilong em i lukim ol gutpela pasin bilong Sol. Jisas i tok: “Dispela man i olsem wanpela sospen mi makim.” (Apo. 9:15) Jisas i wokim mirakel bilong helpim Sol long tanim bel. (Apo. 7:58–8:3; 9:​1-9, 17-20) Bihain long Sol em yumi save long em olsem aposel Pol i kamap wanpela Kristen, planti taim em i soim tenkyu bilong em long Jehova na Jisas long tupela i mekim gutpela pasin na pasin marimari long em. (Ritim 1 Timoti 1:​12-15.) Aposel Pol i pilim tru dispela samting na em i tokim ol bratasista bilong em olsem: “God i mekim pasin helpim long yu bilong kirapim yu long tanim bel.”—Rom 2:4.

¹⁶ Bihain Pol i harim nius nogut olsem kongrigesen long Korin i larim wanpela man i mekim pasin pamuk i stap namel long ol, so hau em i stretim dispela hevi? Pasin em i bihainim long stretim dispela hevi i givim bikpela skul long yumi long pasin laikim Jehova i soim long wanpela taim em i stretim em na as na em i bikpela samting long mekim pasin marimari. Yumi bai stori moa long samting i kamap long kongrigesen long Korin long atikol i kamap bihain.