1. Wanem ol askim inap kamap taim yumi tingim ol samting Jehova i wokim?

TAIM yumi tingim bikpela yunives em Jehova i wokim, yumi inap pilim wankain olsem man bilong raitim song Devit i pilim, em i beten askim Jehova olsem: “Taim mi lukim skai, mi lukim ol samting yu bin wokim long han bilong yu, yu bin wokim mun na ol sta na putim i stap long ples bilong ol, na mi save ting olsem: Man em i wanem samting na yu save tingim em? Na pikinini bilong man em i wanem samting na yu save lukautim em?” (Sng. 8:3, 4) Olsem Devit, taim yumi skelim yumi yet wantaim ol samting Jehova i wokim long yunives, yumi bai pilim olsem yumi liklik samting tru tasol oltaim Jehova i save tingim yumi. Olsem bai yumi stori, Jehova i tingim namba wan man na meri, em Adam na Iv, na em i mekim ol i kamap hap bilong famili bilong em.

2. Jehova i laik bai ol fes pikinini bilong em long graun i mekim wanem?

² Adam na Iv em tupela fes pikinini bilong Jehova long graun, na em i stap olsem gutpela Papa bilong ol long heven. God i laik bai tupela i mekim wok bilong ol. Na em i tokim ol: “Kamapim ol pikinini na kamap planti na go sindaun long olgeta hap bilong graun na bosim olgeta samting i stap long en.” (Stt. 1:28) Ol i mas kamapim ol pikinini na lukautim gut graun God i givim long ol. Sapos ol i bihainim tok na mekim ol samting Jehova i tingting pinis long ol i mas mekim, Adam na Iv na ol pikinini bilong ol bai stap insait long famili bilong God inap oltaim oltaim.

3. Wai na yumi ken tok Adam na Iv i kisim gutpela ples insait long famili bilong Jehova?

³ Adam na Iv i kisim gutpela ples insait long famili bilong Jehova. Long Buk Song 8:5, Devit i tok long ol man Jehova i wokim olsem: “Yu bin mekim na strong bilong em i no bikpela olsem bilong ol ensel, na yu givim em glori na ona.” Tru God i wokim ol man, tasol em i no givim ol wankain strong na save  olsem bilong ol ensel. (Sng. 103:20) Maski i olsem, Jehova i givim ona na glori long ol manmeri na dispela i olsem kraun long het bilong ol. Tingim! Jehova i givim nambawan gutpela laip long Adam na Iv!

4. (a) Wanem samting i painim Adam na Iv taim tupela i sakim tok bilong Jehova? (b) Bai yumi stori long wanem samting long dispela atikol?

 ⁴ Sori tru, taim Adam na Iv i sakim tok bilong Jehova, tupela i no insait moa long famili bilong Jehova. Dispela i kamapim planti hevi long ol pikinini na ol tumbuna pikinini bilong ol i kamap bihain, olsem yumi bai stori long dispela atikol. Tasol ol samting Jehova i tingting pinis long mekim i no senis. Em i laik bai ol manmeri husat i bihainim tok bilong em ol i ken stap olsem ol pikinini bilong em inap oltaim oltaim. Pastaim, yumi ken skelim ol samting Jehova i mekim bilong soim olsem yumi dia tumas long em. Bihain yumi bai stori long samting yumi ken mekim bilong soim olsem yumi laik stap insait long famili bilong God. Na bai yumi skelim ol blesing em ol pikinini bilong Jehova long graun bai kisim inap oltaim oltaim.

5. Yumi ken mekim wanem bilong tenkyu long God olsem em i wokim yumi olsem em yet?

⁵ Jehova i onarim yumi taim em i wokim yumi olsem em yet. (Stt. 1:26, 27) God i wokim yumi olsem em yet, olsem na yumi inap kisim na kamapim ol gutpela pasin bilong em, olsem pasin laikim, pasin sori, stap gut long God, na stretpela pasin. (Sng. 86:15; 145:17) Taim yumi kamapim ol dispela pasin, yumi onarim Jehova na yumi soim olsem yumi tenkyu long em. (1 Pita 1:14-16) Taim yumi bihainim ol pasin we i amamasim Papa bilong yumi long heven, yumi amamas na belgut. God i wokim yumi olsem em yet, na em i givim rot long yumi long kamap kain ol manmeri we em i laikim long famili bilong em.

6. Hau Jehova i onarim ol manmeri taim em i wokim dispela graun?

⁶ Jehova i wokim dispela graun olsem wanpela spesel ples bilong yumi long stap long en. Paslain tru long Jehova i wokim namba wan man, em i redim graun bilong ol manmeri i ken stap long en. (Jop 38:4-6; Jer. 10:12) Jehova i tingim ol manmeri na em i laik ol i stap amamas, olsem na em i wokim planti gutpela samting bilong ol manmeri i ken enjoim. (Sng. 104:14, 15, 24) Em i lusim sampela haptaim long lukim ol wok bilong em na em i “lukim olsem ol samting em i wokim i gutpela.” (Stt. 1:10, 12, 31) Em i onarim ol manmeri taim em i tokim ol long stap “bos” bilong olgeta gutpela samting em i wokim long graun. (Sng. 8:6) God i tingting pinis olsem ol manmeri i gutpela olgeta bai amamas long lukautim ol dispela samting inap oltaim oltaim. Yu save tok tenkyu long Jehova long ol dispela gutpela promis?

7. Olsem wanem tok bilong Josua 24:15 i soim olsem ol man i stap fri long makim wanem samting ol i laik mekim?

⁷ Jehova i givim yumi presen bilong stap fri long makim wanem samting yumi laik mekim. Yumi ken makim wanem samting yumi laik mekim long laip bilong yumi. (Ritim Josua 24:15.) Dispela em pasin bilong i stap fri long makim samting yumi laik mekim. God i save amamas taim yumi makim olsem yumi laik mekim wok bilong em. (Sng. 84:11; Prov. 27:11) Yumi ken mekim gutpela wok long pasin bilong yumi long stap fri. Tingim eksampel bilong Jisas.

8. Olsem wanem Jisas i yusim pasin bilong em long stap fri long makim samting em i laik mekim?

⁸ Yumi ken bihainim eksampel bilong Jisas na putim laik bilong ol narapela i go pas long laik bilong yumi yet. Wanpela taim Jisas wantaim ol disaipel bilong em i pilim taiet tru, na ol i laik go long wanpela hap bilong kisim malolo. Tasol ol i no kisim malolo. Bikpela lain manmeri i kam painim ol, na ol i laik Jisas i skulim ol.  Tasol dispela i no sikirapim bel bilong Jisas. Em i sori tru long ol manmeri. So Jisas i mekim wanem? “Em i kirap skulim ol long planti samting.” (Mak 6:30-34) Taim yumi bihainim eksampel bilong Jisas na yumi yusim taim na strong bilong yumi long helpim ol narapela, yumi givim glori long Papa bilong yumi long heven. (Mat. 5:14-16) Na tu, yumi soim Jehova olsem yumi laik stap insait long famili bilong em.

9. Ol papamama i mas tingim wanem samting?

⁹ Jehova i givim presen long ol manmeri long kamapim ol pikinini, na tu, em i givim wok long ol long skulim ol long laikim na lotuim em. Sapos yu papa o mama, yu amamas long dispela spesel presen? Jehova i givim planti gutpela wok long ol ensel, tasol em i no givim wok long ol long kamapim ol pikinini. Sapos yu papa o mama, orait yu mas amamas long gutpela wok bilong yu long mekim bikpela long ol pikinini. God i givim bikpela wok long ol papamama long mekim bikpela long ol pikinini na “trenim ol olsem Jehova i makim, na putim tingting bilong em long bel bilong ol.” (Efe. 6:4; Lo 6:5-7; Sng. 127:3) Bilong helpim ol papamama, oganaisesen bilong Jehova i redim planti tul em ol tok bilong Baibel i as bilong en, olsem ol pablikesen, ol vidio, ol musik, na onlain risets. I klia tru olsem, Papa bilong yumi long heven na Pikinini bilong em i laikim tru ol yangpela. (Luk 18:15-17) Taim ol papamama i larim Jehova i helpim ol na ol i givim bes bilong ol long lukautim ol pikinini, Jehova i amamas long dispela. Kain ol papamama olsem i helpim ol pikinini bilong ol long ol tu inap insait long famili bilong Jehova inap oltaim oltaim!

10-11. Jehova i givim pe bilong baim bek man na em i opim wanem rot long yumi?

¹⁰ Jehova i givim Pikinini bilong em i dia tumas na bai yumi ken insait gen long famili bilong Em. Olsem yumi stori pinis long  paragraf 4, Adam na Iv i no insait moa long famili bilong Jehova, na ol pikinini bilong ol tu i no gat rot long stap insait long famili bilong Jehova. (Rom 5:12) Adam na Iv i sakim tok bilong God long laik bilong ol yet, so i stret God i rausim ol long famili bilong em. Tasol olsem wanem long ol pikinini bilong ol? Jehova i laikim ol manmeri olsem na em i opim rot long ol pikinini bilong ol husat i bihainim tok bilong Em i ken stap insait long famili bilong em. Em i mekim olsem long rot bilong ofa bilong Pikinini tru bilong em, Jisas Krais. (Jon 3:16; Rom 5:19) Long rot bilong ofa bilong Jisas, Jehova inap adoptim 144,000 manmeri olsem pikinini bilong em.​—Rom 8:15-17; Rev. 14:1.

¹¹ Na tu, planti milion manmeri i stap gut long God na mekim laik bilong em. Ol i laik insait long famili bilong God bihain long laspela traim long pinis bilong 1, 000 yia. (Sng. 25:14; Rom 8:20, 21) Bikos ol i gat dispela hop, ol i kolim Jehova, em Krieta bilong ol, olsem “Papa.” (Mat. 6:9) Na tu, ol lain i kirap bek bai i gat rot long lain long ol samting Jehova i laik ol i mas mekim. Ol manmeri husat i redi long bihainim tok bilong God, ol tu bai insait long famili bilong em.

12. Nau bai yumi kisim bekim bilong wanem askim?

¹² Olsem yumi stori pinis, Jehova i mekim planti samting bilong helpim ol manmeri. Em i adoptim pinis ol lain em i anointim olsem ol pikinini bilong em, na em i opim rot long “bikpela lain manmeri” long ol i ken stap olsem ol pikinini bilong em long nupela taim. (Rev. 7:9) Long nau, yumi ken mekim wanem bilong soim Jehova olsem yumi laik stap insait long famili bilong em inap oltaim oltaim?

13. Yumi ken mekim wanem bilong insait long famili bilong God? (Mak 12:30)

¹³ Soim Jehova olsem yu laikim em long rot bilong givim bel olgeta long mekim wok bilong em.  (Ritim Mak 12:30.) God i givim yumi planti gutpela presen, na wanpela bilong ol dispela presen em long lotuim em. Yumi soim olsem yumi laikim Jehova long rot bilong “bihainim ol lo bilong em.” (1 Jon 5:3) Jisas i kolim wanpela lo Jehova i givim yumi, em i tok long yumi mas kamapim disaipel na baptaisim ol. (Mat. 28:19) Na tu, em i tokim yumi long laikim narapela narapela. (Jon 13:35) Jehova bai welkamim ol lain i bihainim tok bilong em long insait long famili bilong em—em ol manmeri i lotuim em na ol i stap long olgeta hap bilong graun.​—Sng. 15:1, 2.

14. Olsem wanem yumi ken soim pasin laikim long ol narapela? (Matyu 9:36-38; Rom 12:10)

¹⁴ Soim pasin laikim long ol narapela. Pasin laikim em nambawan bikpela pasin bilong Jehova. (1 Jon 4:8) Jehova i soim pasin laikim long yumi paslain long yumi save long em. (1 Jon 4:9, 10) Yumi bihainim pasin bilong em taim yumi soim pasin laikim long ol narapela. (Efe. 5:1) Wanpela rot yumi inap soim pasin laikim long ol manmeri em long helpim ol long kisim save long Jehova long haptaim i stap yet. (Ritim Matyu 9:36-38.) Taim yumi mekim olsem, yumi helpim ol long insait long famili bilong God. Bihain long man i kisim baptais, yumi mas wok yet long laikim na rispektim em. (1 Jon 4:20, 21) Hau yumi ken mekim olsem? Wanpela samting yumi ken mekim em, yumi ken bilip olsem em i gat gutpela bel. Eksampel, sapos yumi no kliagut long as na em i mekim wanpela samting, yumi no inap kisim tingting kranki long dispela, nogat. Yumi bai onarim brata bilong yumi, na tingim olsem em i winim yumi.​—Ritim Rom 12:10; Fili. 2:3.

15. Yumi ken soim pasin marimari na gutpela pasin long husat?

¹⁵ Soim pasin marimari na gutpela pasin long olgeta manmeri. Sapos yumi laik insait long famili bilong Jehova inap oltaim, yumi mas bihainim Tok Bilong God long i stap bilong yumi. Olsem, Jisas i skulim yumi long soim pasin marimari na gutpela pasin long olgeta kain man, na long ol birua bilong yumi tu. (Luk 6:32-36) Sampela taim yumi inap pilim hatwok long mekim olsem. Sapos olsem, yumi mas lain long tingting na bihainim ol pasin olsem Jisas. Taim yumi givim bes long bihainim tok bilong Jehova na bihainim pasin bilong Jisas, yumi soim Papa bilong yumi long heven olsem yumi laik stap insait long famili bilong em inap oltaim oltaim.

16. Olsem wanem yumi ken lukautim gutnem bilong famili bilong Jehova?

¹⁶ Lukautim gutnem bilong famili bilong Jehova. Long wanpela famili, liklik boi i save bihainim pasin bilong bikpela brata bilong em. Sapos bikpela brata i bihainim ol stiatok bilong Baibel long laip bilong em, em bai stap gutpela eksampel long liklik brata bilong em. Sapos bikpela brata i kirap long mekim ol pasin nogut, liklik brata bai bihainim eksampel nogut bilong em. Em wankain long famili bilong Jehova. Sapos wanpela strongpela Kristen i bihainim tingting bilong ol apostet o mekim pasin pamuk, o mekim ol narapela pasin nogut long laip bilong em, dispela inap kirapim ol narapela long bihainim ol pasin nogut bilong em. Ol lain husat i mekim olsem, ol i bagarapim gutnem bilong famili bilong Jehova. (1 Tes. 4:3-8) Yumi mas abrusim ol dispela eksampel nogut na no ken larim ol i pulim yumi i go longwe long Papa bilong yumi long heven.

17. Yumi mas abrusim wanem kain tingting na bilong wanem?

¹⁷ Trastim Jehova na no ken trastim ol mani kago samting. Jehova i promis long givim yumi kaikai, klos, na haus samting sapos yumi putim Kingdom bilong em i stap fes na bihainim ol stretpela lo bilong em. (Sng. 55:22; Mat. 6:33) Em as na yumi mas sakim dispela tingting olsem mani kago bilong dispela graun inap mekim yumi stap bel isi na amamas. Yumi save  olsem wanpela rot tasol bilong i stap bel isi tru em long mekim laik bilong Jehova. (Fili. 4:6, 7) Maski yumi gat mani inap long baim planti samting, yumi mas skelim sapos yumi gat taim na strong long yusim na lukautim gut ol dispela samting, o nogat. Olsem wanem? Yumi laikim tumas ol dispela samting? Yumi mas tingim olsem God i givim wok long yumi wan wan insait long famili bilong em. So dispela i makim olsem yumi no ken larim wanpela samting i pulim nabaut tingting bilong yumi. Yumi no laik kamap wankain olsem dispela yangpela man husat i no laik mekim wok bilong Jehova. Na tu, em i no laik stap olsem pikinini em God i adoptim bikos em i laikim tumas ol mani kago bilong em!​—Mak 10:17-22.

18. Ol manmeri i bihainim tok bilong God ol bai kisim wanem blesing inap oltaim oltaim?

¹⁸ Ol manmeri i bihainim tok bilong God ol bai kisim nambawan gutpela blesing em long laikim na lotuim Jehova inap oltaim oltaim! Ol lain i bilip long kisim laip long graun ol bai amamas long lukautim dispela graun Jehova i wokim bilong ol i ken stap long en. Klostu nau Kingdom Bilong God bai stretim bek graun na olgeta samting i gat laip i stap long en. Jisas bai pinisim olgeta pen na hevi i kamap long rot bilong Adam na Iv taim ol i bin sakim tok bilong God na lusim famili bilong em. Jehova bai kirapim bek planti milion manmeri na em bai givim gutpela helt long ol na ol bai stap laip oltaim long dispela graun i kamap Paradais. (Luk 23:42, 43) Taim ol famili bilong Jehova long graun i kamap gutpela olgeta, ol bai kisim “glori na ona” em Devit i stori long en.​—Sng. 8:5.

19. Yumi mas tingim wanem samting?

¹⁹ Sapos yu bilong “bikpela lain manmeri,” i gat gutpela samting yu ken bilip na wet long en bai kamap bihain. God i laikim yu; em i laik yu stap insait long famili bilong em. So mekim olgeta samting bilong amamasim em. Long olgeta wan wan de, yu ken tingim tingim long bel ol tok promis bilong God. Amamas olsem yu inap lotuim Papa bilong yumi long heven, na lukluk i go long dispela taim we yu inap preisim em inap oltaim oltaim!