1-2. (a) Olsem Song 40:5 i kamapim, Jehova i givim wanem ol presen long yumi? (b) Wai na yumi bai stori long ol dispela presen?

JEHOVA em God bilong givim samting. Tingim sampela presen em i givim long yumi: naispela graun yumi stap long en; kru bilong yumi em disain bilong en i narakain tru; na ol tok bilong em long Baibel, em samting i dia tumas. Long rot bilong dispela 3-pela presen, yumi gat ples bilong i stap long en, yumi inap wokim tingting na toktok, na yumi inap kisim bekim bilong ol bikpela askim.—Ritim Buk Song 40:5.

² Long dispela atikol, yumi bai stori long dispela 3-pela presen. Taim yumi lusim bikpela haptaim moa long tingim tingim ol dispela presen, yumi bai kliagut moa long hau ol dispela presen i helpim yumi, na dispela bai strongim moa yet laik bilong yumi long amamasim Krieta bilong yumi, Jehova. (Rev. 4:11) Na tu, yumi bai redi gut moa long helpim ol manmeri em bilip giaman bilong evolusen i mekim na ol i no kisim stretpela save.

3. Wai na planet graun i narapela kain long ol narapela planet?

³ Yumi inap luksave long savetingting bilong God taim yumi skelim hau em i bin disainim graun, em planet yumi stap long en. (Rom 1:20; Hib. 3:4) Ol narapela planet i raunim san, tasol planet graun i narapela kain bikos graun i gat olgeta samting ol man i nidim bilong i stap laip.

4. Wai na yumi inap tok graun i winim tru bot em ol man i wokim?

⁴ Yumi inap tok graun i olsem wanpela bot i trip antap long skai na planti manmeri i stap long en. Tasol sampela bikpela samting i mekim na graun i no wankain long dispela bot. Tingim: Sapos ol manmeri i stap long bot na ol yet i mas wokim win  oksijen, kaikai, na wara na ol i no ken rausim ol pipia i go ausait long bot, yu ting ol bai stap laip inap longpela taim? Nogat, ol bai dai insait long sotpela haptaim. Graun i gat ol samting bilong sapotim laip bilong planti bilion manmeri na ol animal. Yumi gat win oksijen, kaikai, na wara, na yumi no save sot long ol dispela samting. Graun i no save rausim ol pipia i go long spes; maski i olsem, graun i luk nais yet na ol man na ol animal inap stap long en. Hau na i olsem? Jehova i disainim graun na bai graun inap yusim gen ol pipia long kamapim gutpela samting. Yumi bai skelim 2-pela samting: Wok bilong win oksijen, na wok bilong wara.

5. (a) Oksijen i save raun olsem wanem? (b) Raun bilong oksijen i truim wanem tok?

⁵ Oksijen em win ol manmeri na ol animal i save pulim na bai ol inap stap laip. Ol wok painimaut i soim olsem insait long wanpela yia, ol samting i gat laip i save pulim wan handret bilion kilogram bilong win oksijen. Na ol i save rausim win nogut—kabon daioksait. Maski i olsem, ol i no save pinisim olgeta win oksijen, na kabon daioksait i no save kamap planti moa na daunim win oksijen na bagarapim ples. Wai na i olsem? Jehova i wokim ol traipela diwai na ol gras i liklik na liklik tru, na ol dispela diwai na gras i save kisim kabon daioksait na givim oksijen. Raun bilong oksijen i truim tok bilong Aposel 17:24, 25: “God . . . i givim laip na win na olgeta samting long olgeta manmeri.”

6. (a) Wara i save raun olsem wanem? (b) Raun bilong wara i soim klia wanem samting? (Lukim tu blok “ Jehova i Givim Wara Olsem Presen.”)

⁶ Wara i no kamap ais bikos graun i sindaun long rait mak longwe long san. Sapos graun i stap klostu liklik moa long san, olgeta wara bai drai na graun bai hot tumas na ol samting i no inap i stap laip long en. Sapos graun i stap longwe liklik moa long san, olgeta wara bai kamap ais, na sno na ais bai karamapim graun olgeta. Jehova i putim graun long rait mak, olsem na raun bilong wara inap sapotim laip long graun. San i save mekim solwara, ol hanwara, na ol raunwara i kamap hot na i go antap olsem win, na ol dispela win i save bung na kamapim klaut. Long olgeta wan wan yia, san i save hatim skel bilong wara inap olsem planti milion lita na wara i save trip i go antap olsem win. Dispela wara i save trip i stap long ples antap inap olsem 10-pela de, na bihain em i save pundaun olsem ren o sno. Taim ren o sno i pundaun, wara i save ron i go bek long solwara na ol hanwara na ol raunwara, na wara i save mekim gen raun bilong en. Jehova i disainim dispela raun bilong wara, na dispela i soim klia olsem em i gat savetingting na bikpela strong.—Jop 36:27, 28; Ekl. 1:7.

7. Olsem wanem yumi inap soim tenkyu bilong yumi long presen em Song 115:16 i kolim?

⁷ God i givim yumi nambawan gutpela planet na ol samting bilong lukautim yumi, olsem na hau bai yumi inap kisim pasin bilong tenkim em? (Ritim Buk Song 115:16.) Wanpela rot em olsem, yumi mas tingim tingim ol samting Jehova i bin wokim. Dispela bai kirapim yumi long tenkim Jehova long olgeta wan wan de long ol gutpela presen em i givim long yumi. Yumi soim tu tenkyu bilong yumi taim yumi klinim gut ples yumi stap long en.

8. Wai na yumi inap tok kru bilong yumi em narapela kain tru?

⁸ Kru bilong yumi em narapela kain samting. Taim yu stap long bel bilong mama, kru bilong yu i bihainim disain i stap pinis, na planti tausen nupela sel bilong kru i kamap long olgeta wan wan minit! Ol saveman i tok kru bilong bikpela man i gat klostu olsem  100 bilion sel em ol i kolim nuron. Olgeta dispela sel i kamapim kru bilong yumi na hevi bilong kru em inap olsem 1.5 kilogram. Skelim sampela samting em kru i save helpim yumi long mekim.

9. Wai na yu bilip olsem pasin bilong toktok em presen i kam long God?

⁹ Yumi inap toktok, na dispela i olsem wanpela mirakel. Tingim ol samting i kamap taim yumi toktok. Long olgeta wan wan tok yu mekim, kru i save kontrolim klostu olsem 100 masol long tang, nek, lips, wasket, na bros bilong yu. Olgeta dispela masol i mas muv long rait taim na bai yu inap kolim klia ol tok. Long sait bilong mekim tokples, wanpela wok painimaut long 2019 i soim olsem taim ol bebi i bon nupela, ol inap harim na luksave long olgeta wan wan tok. Dispela wok painimaut i sapotim tingting bilong planti saveman—taim yumi bon, yumi inap harim na luksave long wanpela tokples na lainim. Yumi inap toktok—dispela em presen i kam long God.—Kis. 4:11.

10. Hau bai yumi inap soim tenkyu bilong yumi long presen bilong toktok?

¹⁰ Wanpela rot bilong soim tenkyu bilong yumi long presen bilong toktok em olsem, yumi mas eksplenim bilip bilong yumi long ol manmeri i bilip long evolusen—eksplenim risen na yumi bilip olsem God i wokim olgeta samting. (Sng. 9:1; 1 Pita 3:15) Ol i tok graun na olgeta samting i stap laip long en i kamap nating, na i no gat Man i bin disainim ol. Yumi inap yusim Baibel na sampela poin long dispela atikol long sambai long Papa bilong yumi long heven, na eksplenim bilip bilong yumi long ol lain i redi long putim yau—stori gut long risen na yumi bilip tru olsem Jehova em Krieta bilong heven na graun.—Sng. 102:25; Ais. 40:25, 26.

11. Wanem wanpela risen na kru bilong yumi i narapela kain tru?

¹¹ Memori bilong yumi inap tingim planti samting, na dispela em narapela kain tru. Long bipo, wanpela man bilong raitim ol buk i tok kru bilong yumi inap holim planti planti infomesen—yumi inap tingim olgeta infomesen i stap insait long 20 milion bikpela buk. Tasol sampela saveman i tok yumi inap tingim planti samting moa. Memori bilong yumi i helpim yumi long mekim wanem?

12. Wanem samting i mekim na yumi no wankain long ol animal?

¹² Ol man inap kisim skul long rot bilong tingim na skelim ol samting i bin kamap long pastaim—ol animal i no inap mekim olsem. Yumi inap kisim save long ol lo i gutpela moa na senisim wei bilong yumi long tingting na mekim ol samting. (1 Kor. 6:9-11; Kol. 3:9, 10) Yumi inap trenim maus bilong bel long kliagut long wanem samting i stret na wanem samting i no stret. (Hib. 5:14) Yumi inap lain long soim pasin laikim, pasin sori, na pasin marimari. Na tu, yumi inap lain long mekim fea pasin.

13. Olsem Song 77:11, 12 i kamapim, yumi mas yusim memori bilong yumi long mekim wanem?

¹³ Memori bilong yumi em presen i kam long Jehova. Wanpela rot bilong soim tenkyu em  olsem, yumi ken tingim olgeta samting Jehova i bin mekim bilong helpim na mekim isi bel bilong yumi. Dispela bai strongim bilip bilong yumi, olsem em bai helpim yumi long bihain. (Ritim Buk Song 77:11, 12; 78:4, 7) Narapela rot bilong soim tenkyu bilong yumi em olsem, yumi ken tingim na pilim tru ol gutpela samting ol narapela i bin mekim bilong helpim yumi. Ol saveman i luksave olsem ol manmeri husat i gat pasin bilong tok tenkyu, ol i stap amamas. Na tu, yumi ken bihainim pasin bilong Jehova na lusim tingting long sampela samting. Jehova i gat memori i gutpela olgeta, tasol taim yumi tanim bel, em i save fogivim yumi na lusim tingting long ol rong yumi bin mekim. (Sng. 25:7; 130:3, 4) Na em i laik bai yumi mekim wankain pasin long ol narapela taim ol i tok sori long ol rong ol i bin mekim long yumi.—Mat. 6:14; Luk 17:3, 4.

14. Yumi ken mekim wanem bilong tenkim God long kru bilong yumi?

¹⁴ Wanpela rot bilong tenkim God long kru bilong yumi em olsem, yumi ken yusim kru long givim biknem long God. Sampela man i yusim kru bilong ol long inapim laik bilong ol yet—ol yet i makim wanem samting i stret na wanem samting i no stret. Jehova i bin wokim yumi, olsem na ol lo bilong em i nambawan tru winim olgeta narapela lo ol man i kamapim. (Rom 12:1, 2) Taim yumi bihainim ol lo bilong em, yumi bai stap bel isi. (Ais. 48:17, 18) Na yumi kliagut olsem yumi stap laip bambai yumi inap givim ona long Krieta, em Papa bilong yumi, na mekim em i belgut long yumi.—Prov. 27:11.

15. Olsem wanem Baibel i soim klia olsem Jehova i laikim tru ol manmeri?

¹⁵ Baibel em naispela presen i kam long God. Papa bilong yumi long heven i kirapim ol man long raitim ol tok bilong Baibel bikos em i laikim tru ol pikinini bilong em long graun. Long rot bilong Baibel, Jehova i bekim ol bikpela askim, olsem: Yumi kamap olsem wanem? Wanem as tru bilong laip? Wanem samting bai  painim yumi long bihain? Jehova i laik bai olgeta pikinini bilong em i save long bekim bilong ol dispela askim, olsem na insait long planti handret yia i go pinis, em i kirapim ol man long trensletim Baibel long planti tokples. Long nau ol man i trensletim Baibel o sampela hap bilong en long winim 3 tausen tokples! Ol man i bin trensletim na prinim Baibel long planti planti tokples winim olgeta narapela buk. Maski ol man i stap long wanem ples na ol i mekim wanem kain tokples, planti bilong ol i gat rot long kisim save long tok bilong Baibel long tokples stret bilong ol.—Lukim blok “ Kamapim Baibel Long Ol Tokples Bilong Afrika.”

16. Olsem Matyu 28:19, 20 i kamapim, hau bai yumi inap soim olsem yumi laikim tru Baibel?

¹⁶ Yumi inap soim tenkyu bilong yumi long God taim yumi ritim Baibel long olgeta de, tingim tingim ol tok bilong en, na traim bes long bihainim ol dispela tok. Na tu, yumi soim tenkyu bilong yumi taim yumi autim tok bilong Baibel long ol manmeri.—Sng. 1:1-3; Mat. 24:14; ritim Matyu 28:19, 20.

17. (a) Long dispela atikol, yumi stori long wanem ol presen? (b) Long neks atikol, yumi bai stori long wanem samting?

¹⁷ Long dispela atikol, yumi stori long sampela presen God i givim long yumi: graun yumi stap long en; narapela kain kru bilong yumi; na Tok Bilong God long Baibel. Na i gat ol narapela presen em Jehova i givim long yumi, tasol yumi no inap lukim long ai. Long neks atikol, yumi bai stori long ol dispela presen.