1-2. Klostu long taim Jekop i laik dai, em i mekim wanem na bilong wanem? (Lukim tu piksa.)

 INAP olsem 17 yia i go pinis, Jekop em wanpela gutpela wokman bilong Jehova i lusim Kenan na em i go stap long Isip wantaim famili bilong em. (Stt. 47:28) Insait long ol dispela yia, em i amamas tru long lukim gen pikinini man bilong em Josep husat em i laikim tumas, na tu, em i lukim olgeta pikinini man bilong em i bung wantaim gen. Tasol Jekop i save olsem klostu taim em bai dai. Olsem na em i singautim olgeta pikinini man bilong em i kam long dispela bung bikos em i gat sampela bikpela tok long tokim ol.—Stt. 49:28.

² Long bipo, em pasin bilong ol papa long askim olgeta insait long famili long i kam bung na bai em i ken givim ol laspela tok bilong em long ol paslain long em i dai. (Ais. 38:1) Ating long dispela bung, em bai tokim ol tu long husat insait long famili bai kamap het bilong famili bihain long em i dai.

3. Olsem Stat 49:​1, 2 i kamapim, wai na ol tok Jekop i mekim i bikpela samting?

³ Ritim Stat 49:​1, 2. Dispela bung i no wankain long ol narapela bung bilong famili em ol i save mekim. Jekop em i wanpela profet. Long dispela bung, Jehova i yusim holi spirit bilong em long stiaim Jekop long tokaut long sampela bikpela samting bai kamap long ol tumbuna pikinini bilong em. So ol laspela tok Jekop i mekim long ol pikinini man bilong em paslain long em i dai em ol tok profet.

4. Yumi mas tingim wanem samting taim yumi skelim ol tok profet bilong Jekop? (Lukim tu blok “Famili Bilong Jekop.”)

⁴ Long dispela atikol, yumi bai skelim ol tok Jekop i mekim long fopela pikinini man bilong em: Ruben, Simeon, Livai, na Juda. Long neks atikol, yumi bai stori long ol tok Jekop i mekim  long 8-pela narapela pikinini man bilong em. Olsem yumi bai lukim, Jekop i tok profet long ol samting bai kamap long ol pikinini man bilong em na long ol tumbuna pikinini bilong ol tu, em ol bai kamap lain Israel. Taim yumi skelim ol samting i bin kamap long lain Israel bilong bipo, yumi bai luksave long hau ol tok profet bilong Jekop i kamap tru. Na taim yumi skelim ol tok bilong Jekop, yumi bai kisim ol gutpela skul we inap helpim yumi long mekim ol samting bilong amamasim Papa bilong yumi long heven, Jehova.

RUBEN

5. Ating Ruben i tingting long kisim wanem blesing long papa bilong em?

⁵ Pastaim Jekop i toktok long Ruben, na em i tok: “Yu fesbon bilong mi.” (Stt. 49:3) Olsem fesbon pikinini, ating Ruben i ting olsem Jekop bai blesim em na givim em 2-pela hap bilong olgeta samting bilong em. Na ating Ruben i ting olsem bihain long Jekop i dai, em bai kamap het bilong famili na oltaim wanpela long lain famili bilong em bai stap olsem lida bilong ol Israel.

6. Wai na Ruben i no kisim dispela rait olsem fesbon pikinini? (Stat 49:​3, 4)

 ⁶ Ruben i no kisim dispela rait olsem fesbon pikinini. (1 Sto. 5:1) Bilong wanem? Long wanem, sampela yia paslain, Ruben i bin slip wantaim Bilha em wanpela bilong ol nambatu meri bilong Jekop. Bilha em i wokmeri bilong Resel, na Resel em meri bilong Jekop em i bin laikim tumas na em i dai pinis. (Stt. 35:​19, 22) Mama bilong Ruben em Lea, em narapela meri bilong Jekop. Ating Ruben i aigris long Bilha na em i slip wantaim em. O ating Ruben i mekim olsem na bai Jekop i heitim Bilha na laikim moa mama bilong em Lea. Yumi no save long as tru na Ruben i mekim dispela pasin, tasol Jehova na papa bilong em Jekop i no amamas long samting em i mekim.—Ritim Stat 49:​3, 4.

7. Wanem samting i kamap long Ruben na ol tumbuna pikinini bilong em? (Lukim tu blok “ Ol Tok Profet Jekop i Mekim Klostu Long Taim Em i Laik Dai.”)

⁷ Jekop i tokim Ruben olsem: “Yu bai no inap i stap nambawan.” Na tru tumas, dispela samting i kamap. Baibel i no stori long wanpela tumbuna pikinini bilong Ruben i bin mekim wok king o mekim wok olsem wanpela pris o profet. Maski i olsem, Jekop i givim blesing long Ruben, na bihain famili bilong Ruben i kamap wanpela traib bilong lain Israel. (Jos. 12:6) Ruben i mekim ol gutpela pasin long ol narapela taim na Baibel i no stori olsem em i mekim gen pasin pamuk.—Stt. 37:​20-22; 42:37.

8. Yumi inap kisim wanem ol skul long eksampel bilong Ruben?

⁸ Yumi inap kisim wanem skul? Yumi mas wok strong long bosim gut laik bilong bodi na sakim pasin pamuk. Sapos traim i kamap long mekim sin, yumi mas stop na tingting long olsem wanem ol samting yumi mekim bai mekim Jehova, famili bilong yumi, na ol narapela i bel hevi. Na yumi mas tingim tu olsem “samting man i planim, dispela samting tasol em bai kamautim.” (Gal. 6:7) Tasol samting i kamap long Ruben i skulim yumi tu long pasin marimari bilong Jehova. Tru Jehova i no inap banisim yumi long ol hevi yumi karim long ol rong yumi bin mekim, tasol em bai blesim hatwok yumi mekim long tanim bel na bihainim gen stretpela pasin.

SIMEON NA LIVAI

9. Wai na Jekop i no amamas long Simeon na Livai? (Stat 49:​5-7)

⁹ Ritim Stat 49:​5-7. Bihain Jekop i toktok long Simeon na Livai, na ol tok em i mekim i soim olsem em i no amamas long tupela. Sampela yia paslain, wanpela man Kenan em nem bilong em Sekem i bin reipim Daina, em pikinini meri bilong Jekop. Olgeta pikinini man bilong Jekop i bel hevi tru long dispela na yumi kliagut long wai ol i pilim olsem, tasol Simeon na Livai i no bosim belhat bilong tupela. Tupela i giaman long mekim tok promis long Sekem na lain bilong em olsem sapos olgeta man bilong lain Kenan i katim skin, orait ol bai stap bel isi wantaim ol. So ol man Kenan i wanbel long dispela tok na ol i katim skin. Tasol taim ol i pilim pen i stap yet, Simeon na Livai “i kisim bainat na go insait long taun, na i no gat man i luksave long samting ol i laik mekim. Ol i go na kilim i dai olgeta man.”—Stt. 34:​25-29.

10. Olsem wanem ol tok profet Jekop i mekim long Simeon na Livai i kamap tru? (Lukim tu blok “ Ol Tok Profet Jekop i Mekim Klostu Long Taim Em i Laik Dai.”)

¹⁰ Jekop i bel hevi tru long samting tupela pikinini man bilong em i mekim. Em i tok profet olsem tupela bai i go sindaun long narapela narapela hap na ol bai go stap nabaut long Israel. Truim bilong dispela tok profet i kamap tru taim lain Israel i go insait long Graun Bilong Promis winim 200 yia bihain. Traib bilong Simeon i kisim ol hap graun i stap namel long graun bilong ol Juda. (Jos. 19:1) Na traib bilong Livai i kisim 48 taun i stap nabaut long kantri Israel.—Jos. 21:41.

11. Ol traib bilong Simeon na Livai i bin mekim wanem ol gutpela samting?

 ¹¹ Ol tumbuna pikinini bilong Simeon na Livai i no mekim ol wankain rong em ol tumbuna papa bilong ol i bin mekim. Traib bilong Livai i stap gut long Jehova na ol i strongim lotu i tru. Taim Moses i kisim Lo long Jehova long Maunten Sainai, planti manmeri long lain Israel i kirap lotuim imis bilong wanpela pikinini bulmakau, tasol olgeta Livai i go sanap wantaim Moses na ol i helpim em long kilim i dai olgeta manmeri i lotuim dispela imis. (Kis. 32:​26-29) Jehova i makim traib bilong Livai long mekim wanpela spesel wok, olgeta man long dispela traib i mekim wok pris long Israel. (Kis. 40:​12-15; Nam. 3:​11, 12) Na bihain, traib bilong Simeon i helpim traib bilong Juda long pait long ol Kenan na bai ol i ken kisim hap graun bilong ol long Graun Bilong Promis, na dispela i stret wantaim samting Jehova i tingting pinis long mekim.—Het. 1:​3, 17.

12. Yumi inap kisim wanem ol skul long pasin bilong Simeon na Livai?

¹² Yumi inap kisim wanem skul? No ken larim pasin bilong belhat i stiaim ol disisen na ol samting yu mekim. Yumi olgeta i save bel hevi taim ol narapela i mekim pasin i no stret long yumi o long wanpela yumi laikim tumas. (Sng. 4:4) Tasol yumi mas tingim olsem, Jehova i no save amamas long ol man i mekim ol tok o pasin i soim olsem ol i kros na bel nogut long ol narapela. (Jems 1:20) Maski sapos wanpela wanbilip o wanpela i no Witnes i mekim pasin i no stret long yumi, yumi mas bihainim ol stiatok bilong Baibel. Long dispela rot, yumi inap abrusim ol hevi em pasin bilong belhat i save kamapim. (Rom 12:​17, 19; 1 Pita 3:9) Maski papamama bilong yu i mekim ol pasin em Jehova i no amamas long en, dispela i no makim olsem yu mas bihainim eksampel bilong ol. No ken kisim kain tingting olsem yu no inap mekim ol gutpela pasin na Jehova bai no inap blesim yu. Jehova bai givim gutpela pe long yu taim yu wok hat long mekim pasin i stret.

JUDA

13. Wai na Juda inap tingting planti taim papa bilong em i kirap toktok long em?

¹³ Juda em neks pikinini man Jekop i toktok long em. Juda i harim ol tok Jekop i mekim long ol bikpela brata bilong em na ating dispela i mekim em i tingting planti. Wai na yumi tok olsem? Bikos em tu i bin mekim sampela bikpela rong. Juda i bin go wantaim ol brata bilong em long taun Sekem na ol i kisim olgeta samting bilong ol manmeri long dispela taun. (Stt. 34:27) Na tu, em i bin stap wantaim ol brata bilong em taim ol i salim Josep olsem wanpela sleiv na ol i giamanim papa bilong ol olsem wanpela wel animal i kilim i dai Josep. (Stt. 37:​31-33) Na bihain, Juda i slip wantaim Tamar, em meri bilong pikinini man bilong em, bikos em i ting olsem Tamar em i wanpela pamukmeri.—Stt. 38:​15-18.

14. Juda i bin mekim wanem ol gutpela samting? (Stat 49:​8, 9)

¹⁴ Maski Juda i bin mekim sampela bikpela rong, Jekop i tok amamas long em na em i tok ol gutpela samting bai kamap long Juda na lain famili bilong em. (Ritim Stat 49:​8, 9.) Juda i bin soim olsem em i tingim tru lapun papa bilong em. Na tu, em i bin soim pasin sori long las bon brata bilong ol, Benjamin.—Stt. 44:​18, 30-34.

15. Long wanem ol rot Juda i kisim blesing em Jekop i bin tok profet long en?

¹⁵ Jekop i tok profet olsem Juda bai mekim wok olsem lida namel long ol brata bilong em. Tasol truim bilong dispela tok profet i no kamap hariap. Inap olsem 200 yia bihain, traib bilong Juda i lidim lain Israel long ples drai nating bilong i go insait long Graun Bilong Promis bihain long ol i lusim Isip. (Nam. 10:14)  Planti yia bihain, ol Juda i go pas long pait long ol Kenan na bai ol i ken kisim Graun Bilong Promis. (Het. 1:​1, 2) Na Devit em bilong traib bilong Juda, em i fes man long dispela traib long kamap king na bihain long em i gat planti man moa i kamap king. Tasol i gat ol narapela rot em tok profet long Juda i bin kamap tru.

16. Olsem wanem tok profet long Stat 49:10 i kamap tru? (Lukim tu blok “ Ol Tok Profet Jekop i Mekim Klostu Long Taim Em i Laik Dai.”)

¹⁶ Jekop i tokaut olsem King bilong ol manmeri husat bai mekim wok bos inap oltaim, em bai kamap long traib bilong Juda. (Ritim Stat 49:10 na futnot.) Dispela King em i Jisas Krais, em Jekop i kolim em Silo. Wanpela ensel i tok long Jisas olsem: “God Jehova bai givim em sia king bilong papa bilong em Devit.” (Luk 1:​32, 33) Baibel i tok tu olsem Jisas em i “dispela Laion i kamap long traib bilong Juda.”—Rev. 5:5.

17. Yumi inap kisim wanem skul long Jehova long tingting yumi mas i gat long ol narapela?

¹⁷ Yumi inap kisim wanem skul? Jehova i blesim Juda maski em i bin mekim sampela bikpela  rong. Tasol ating ol brata bilong Juda i tingting olsem, Jehova i lukim wanem samting long Juda na em i blesim em? Yumi no save long tingting tru bilong ol, tasol yumi save olsem Jehova i blesim Juda bikos em i lukim olsem Juda i gat gutpela bel. Hau yumi ken bihainim eksampel bilong Jehova? Taim wanpela brata o sista i kisim wanpela bikpela asainmen, ating pastaim yumi bai tingim tasol ol pasin kranki bilong em. Tasol mobeta yumi tingim olsem Jehova i amamas tru long ol gutpela pasin bilong em. Jehova i save lukluk long ol gutpela pasin bilong ol man i lotuim em. Yumi tu i mas mekim olsem.

18. Wai na yumi no ken les kwik?

¹⁸ Stori bilong Juda i skulim yumi tu olsem yumi no ken les kwik. Oltaim Jehova i save truim ol tok promis bilong em, tasol sampela taim em i mekim long rot na long taim yumi no ting em bai mekim. Fes lain i kamap ol lida bilong lain Israel i no kam long lain Juda, tasol longpela haptaim i lus na bihain ol man long dispela traib i lidim lain bilong God. Maski i olsem, ol i stap gut long ol man Jehova i makim long lidim ol na ol i sapotim ol dispela man, olsem Moses bilong lain Livai, Josua bilong lain Efraim, na King Sol bilong lain Benjamin. Yumi tu i mas sapotim ol man em Jehova i makim ol long go pas long yumi long nau.—Hib. 6:12.

19. Yumi inap kisim wanem ol skul long Jehova taim yumi skelim ol tok profet Jekop i mekim klostu long taim em i laik dai?

¹⁹ Yumi kisim wanem ol skul taim yumi skelim ol tok profet Jekop i mekim klostu long taim em i laik dai? I klia tru olsem God i “no save skelim ol man olsem ol man i save skelim.” (1 Sml. 16:7) Jehova i no save les kwik na em i save fogivim yumi. Tru em i no orait long ol man i mekim sin, tasol long wankain taim em i no ekspektim ol man i lotuim em long kamap gutpela olgeta. Jehova inap blesim ol manmeri em ol i bin mekim ol bikpela rong long bipo sapos ol i tanim bel tru na kirap gen long mekim pasin i stret. Long neks atikol, yumi bai stori long ol tok Jekop i mekim long 8-pela narapela pikinini man bilong em.