1-2. Baibel i tok wanem long sampela king bilong Israel?

 BAIBEL i stori long winim 40 narapela narapela man em ol i bin mekim wok olsem ol king bilong Israel. a Na Baibel i tokaut klia long ol samting ol dispela man i bin mekim. Olsem, sampela gutpela king i bin mekim sampela pasin nogut. Tingim gutpela King Devit. Jehova i tok long em olsem: “Wokman bilong mi, Devit. Em i . . . givim bel olgeta long bihainim mi, na olgeta taim em i mekim ol pasin i stret long ai bilong mi.” (1 Kin. 14:8) Tasol dispela man i bin mekim pasin pamuk wantaim wanpela maritmeri na long pasin hait em i stretim rot bilong ol man i ken kilim i dai man bilong dispela meri long pait.—2 Sml. 11:​4, 14, 15.

² Tasol planti king em ol i no bin stap gut long God, ol i bin mekim sampela gutpela wok. Tingim Rehoboam. Long ai bilong Jehova, em i “mekim pasin nogut.” (2 Sto. 12:14) Maski i olsem, Rehoboam i bihainim tok bilong God na em i larim 10-pela traib bilong Israel i bruk na makim king bilong ol yet. Na tu, em i helpim kantri bilong em long rot bilong wokim ol strongpela banis bilong lukautim ol taun.—1 Kin. 12:​21-24; 2 Sto. 11:​5-12.

3. Wanem bikpela askim i kamap, na bai yumi stori long wanem samting long dispela atikol?

³ Wanpela bikpela askim i kamap. Sapos ol king bilong Israel i mekim ol gutpela pasin na ol pasin nogut, orait Jehova i skelim wanem samting bilong makim olsem ol i stap gut long em o nogat? Bekim bilong dispela askim bai helpim yumi long kliagut long samting  Jehova i save skelim long yumi. Yumi bai stori long 3-pela samting em Jehova i tingim taim em i skelim ol king bilong Israel: ol i laikim em long bel olgeta, ol i tanim bel tru, na ol i mekim lotu i tru long Jehova o nogat.

OL I LAIKIM JEHOVA LONG BEL OLGETA

4. Wanem samting i no wankain long ol king i stap gut long Jehova na ol king i no stap gut long em?

⁴ Ol king em ol i amamasim Jehova, ol i bin givim bel olgeta long lotuim em. b Gutpela King Jehosafat i bin “painim Jehova long bel olgeta bilong em.” (2 Sto. 22:9) Baibel i stori long Josaia olsem: “I no gat wanpela king i stap paslain long em i olsem em, husat i givim bel olgeta . . . long kam bek long Jehova.” (2 Kin. 23:25) Olsem wanem long Solomon husat i bin mekim ol pasin nogut long ai bilong Jehova taim em i kamap lapun? Baibel i tok: “Em i no givim bel olgeta long Jehova.” (1 Kin. 11:4) Na Baibel i stori long Abijam em narapela king husat i no bin stap gut long God olsem: “Em i no givim bel olgeta long Jehova.”—1 Kin. 15:3.

5. Wanem insait bilong dispela tok givim bel olgeta long lotuim Jehova?

⁵ Wanem insait bilong dispela tok givim bel olgeta long lotuim Jehova? Wanpela husat i givim bel olgeta long lotuim Jehova, em i no mekim nating dispela pasin bilong lotuim God, nogat. Em i lotuim God bikos em i laikim em na em i rispektim Em. Na em i wok yet long holimpas dispela pasin bilong laikim na rispektim God long laip olgeta bilong em.

6. Olsem wanem yumi ken wok yet long givim bel olgeta long lotuim God? (Provep 4:23; Matyu 5:​29, 30)

⁶ Olsem wanem yumi ken bihainim pasin bilong ol king i stap gut long God na wok yet long givim bel olgeta long lotuim Em? Yumi ken mekim olsem long rot bilong sakim ol samting nogut i laik pulim yumi. Olsem, yumi mas was gut long ol amamas nogut we inap mekim na tingting bilong yumi i bruk na yumi no givim bel olgeta long lotuim Jehova. Na tu, yumi mas was gut long ol poroman nogut na pasin bilong tingting tumas long bungim mani kago. Sapos yumi luksave olsem wanpela samting i wok long daunim pasin bilong yumi long laikim Jehova, orait kwiktaim yumi mas mekim samting bilong rausim.—Ritim Provep 4:23; Matyu 5:​29, 30.

7. Wai na em i bikpela samting long sakim ol samting nogut i laik pulim yumi?

⁷ Yumi no ken larim tingting bilong yumi i bruk. Sapos yumi no was gut, yumi inap giamanim yumi yet na ting olsem yumi mekim bikpela wok moa bilong Jehova so i no gat wok long yumi sakim ol samting nogut i laik pulim yumi. Yumi ken tok piksa olsem, yu sanap ausait na san i strong na ples i hot nogut tru. Na yu go insait long haus na yu onim fen o eakon long kolim skin. Tasol wanem samting bai kamap sapos yu larim dua i op i stap? Kwiktaim hatpela win bai kam insait long haus bilong yu. Yumi kisim wanem skul? Yumi mas mekim sampela samting moa bilong strongim pasin pren bilong yumi wantaim Jehova, na yumi no ken kisim tasol ol tok bilong strongim bilip. Na tu, yumi mas sakim ol tingting na pasin bilong dispela graun we inap bagarapim tingting bilong yumi, wankain olsem yumi pasim dua long hatpela win long kam insait long haus.—Efe. 2:2.

OL I TANIM BEL TRU LONG OL SIN BILONG OL

8-9. King Devit na King Hesekia i mekim wanem taim ol i kisim ol tok bilong stretim ol? (Lukim piksa.)

⁸ Olsem yumi stori pinis, King Devit i bin mekim bikpela sin. Tasol taim profet Natan i go tokaut long ol sin bilong em, Devit i daunim em yet na em i tanim bel tru. (2 Sml. 12:13) Long ol tok bilong em i stap long Buk Song 51, yumi ken luksave olsem em i sori tru long ol rong bilong em na em i tanim bel tru. Devit i no giaman tasol  long pilim bel sori bilong trikim Natan o bilong abrusim panismen, nogat.—Sng. 51:​3, 4, 17, supaskripsen.

⁹ King Hesekia tu i bin mekim sin long Jehova. Baibel i tok: “Long bel Hesekia i kisim pasin antap. . . . Na dispela i mekim na God i belhat long em na long ol manmeri bilong Juda na Jerusalem.” (2 Sto. 32:25) Wai na Hesekia i kisim pasin antap? Ating em i pilim olsem em i winim ol narapela bikos long mani kago bilong em, o bikos em i winim pait long ol Asiria, o ating bikos God i wokim mirakel na oraitim em long sik bilong em. Ating pasin antap bilong em i kirapim em long soim mani kago bilong em long ol Babilon, dispela i mekim na profet Aisaia i givim em ol tok bilong stretim em. (2 Kin. 20:​12-18) Tasol olsem Devit, Hesekia i daunim em yet na tanim bel. (2 Sto. 32:26) Olsem na taim Jehova i skelim em, Em i tingim Hesekia olsem wanpela king i stap gut long em, na “em i wok long mekim ol pasin i stret.”—2 Kin. 18:3.

10. King Amasia i mekim wanem taim em i kisim tok bilong stretim em?

¹⁰ King Amasia bilong Juda i no mekim wankain pasin olsem Devit na Hesekia i bin mekim. Em i mekim ol pasin i stret, tasol “em i no givim bel olgeta” long mekim olsem. (2 Sto. 25:2) Em i mekim wanem rong? Bihain long Jehova i helpim Amasia long winim pait long ol Idom, Amasia i kirap long brukim skru na lotuim ol god bilong ol Idom. c Na taim profet bilong Jehova i kam tokim em long dispela rong bilong em, dispela strongpela het king i no laik harim tok bilong em na em i rausim em i go.—2 Sto. 25:​14-16.

11. Olsem 2 Korin 7:​9, 11 i kamapim, yumi mas mekim wanem na bai God i fogivim yumi? (Lukim tu ol piksa.)

¹¹ Yumi inap kisim wanem skul long ol dispela eksampel? Yumi mas tanim bel tru long ol sin bilong yumi na wok strong long no ken mekim gen ol dispela sin. Yumi mas mekim wanem taim ol elda long kongrigesen i givim ol tok bilong stretim yumi, maski em long ol liklik samting tu? Yumi no ken pilim olsem Jehova na ol elda i no laikim yumi, nogat. Ol gutpela king bilong Israel tu i kisim ol tok kaunsel na ol tok bilong stretim ol. (Hib. 12:6) Taim yumi kisim tok bilong stretim yumi, yumi mas (1) daunim yumi yet na bihainim tok, (2) mekim ol senis yumi mas mekim, na (3) givim bel yet long mekim ol wok bilong Jehova. Taim yumi tanim bel tru long ol sin bilong yumi, Jehova bai fogivim yumi.—Ritim 2 Korin 7:​9, 11.

OL I MEKIM LOTU I TRU LONG JEHOVA

12. Wanem samting i mekim na ol king i stap gut long God i no wankain long ol king i no stap gut long em?

¹² Ol king em Jehova i tingim ol olsem ol i stap gut long em, ol i mekim lotu i tru long Em. Na ol i kirapim ol manmeri i stap aninit long ol long mekim olsem tu. Em tru olsem ol i save mekim ol popaia, olsem yumi stori pinis. Tasol ol i givim bel olgeta long lotuim Jehova wanpela tasol na ol i wok strong tru long rausim pasin bilong lotuim ol imis long kantri Israel olgeta. d

13. Wai na Jehova i skelim King Ahap na ting olsem em i no stap gut long Em?

¹³ Olsem wanem long ol king em Jehova i skelim ol na ting olsem ol i no stap gut long em? Em tru i no olgeta samting ol i mekim i nogut. Tingim King Ahap. Em i wanpela man nogut tru, tasol em i soim olsem em i gat pasin daun na em i sori olsem em i bin givim tok orait long ol i kilim i dai Nabot. (1 Kin. 21:​27-29) Na tu, em i wokim ol taun na em i pait na daunim ol birua bilong lain Israel. (1 Kin. 20:​21, 29; 22:39) Tasol Ahap i gat nem long larim meri bilong em i stiaim em na em  i strongim pasin bilong lotuim ol god giaman. Long dispela sin bilong em, em i no bin tanim bel.—1 Kin. 21:​25, 26.

14. (a) Wai na Jehova i tingim King Rehoboam olsem man i no stap gut long em? (b) Ol king em ol i no stap gut long God, ol i mekim wanem ol pasin?

¹⁴ Tingim narapela king husat i no stap gut long God, em Rehoboam. Olsem yumi stori pinis, inap sampela haptaim em i bin mekim ol gutpela wok taim em i mekim wok king. Tasol taim wok king bilong em i bin stap strong tru, em i sakim ol Lo bilong Jehova na em i kirap long lotuim ol god giaman. (2 Sto. 12:1) Bihain long dispela, em i wok long lotuim Jehova na long wankain taim em i lotuim ol god giaman. (1 Kin. 14:​21-24) Rehoboam na Ahap i bin lusim lotu i tru na ol narapela king tu i bin mekim olsem. Planti king em ol i no stap gut long God, ol i gat asua long lotuim ol god giaman na ol i kirapim ol narapela long mekim olsem tu. I klia tru olsem long ai bilong Jehova, pasin bilong mekim lotu i tru long Em, dispela em i bikpela samting bilong em i ken skelim olsem wanpela king em i gutpela man o man nogut.

15. Wai na em i bikpela samting long mekim lotu i tru long Jehova?

¹⁵ Wai na em i bikpela samting long Jehova olsem ol king i mas lotuim em wanpela tasol? Wanpela risen em bikos ol king i gat wok long stiaim ol manmeri long mekim lotu i tru long God. Na tu, pasin bilong lotuim ol god giaman i save kirapim ol manmeri long mekim ol bikpela sin na ol pasin i no stret. (Hos. 4:​1, 2) Na narapela samting moa, ol king na ol manmeri i stap aninit long ol, ol i insait long wanpela lain i dediket pinis long Jehova. Em as na Baibel i tok pasin bilong ol long lotuim ol god giaman i wankain olsem pasin adaltri. (Jer. 3:​8, 9) Taim wanpela man marit  o meri marit i mekim pasin adaltri, em i mekim sin long poroman marit bilong em, na long dispela rot em i brukim tru lewa bilong em. Olsem tasol, taim wanpela man o meri i dediket pinis long Jehova na em i kirap long lotuim ol god giaman, em i mekim sin long Jehova na em i mekim em i bel hevi tru. e—Lo 4:​23, 24.

16. Long ai bilong Jehova, wanem samting i mekim na stretpela man i no wankain long man nogut?

¹⁶ Yumi inap kisim wanem skul? Tru tumas, yumi mas tingting strong long sakim olgeta samting i insait long lotu giaman. Na tu, yumi mas mekim lotu i tru long Jehova na mekim yet wok bilong em. Profet Malakai i tokaut klia long samting i mekim na stretpela man i no wankain long man nogut long ai bilong Jehova. Em i tok: “Yupela bai lukim gen pasin bilong stretpela man i narapela kain long pasin bilong man nogut. Na pasin bilong man i mekim wok bilong God i narapela kain long pasin bilong man i no mekim wok bilong God.” (Mal. 3:18) Olsem na yumi no ken larim wanpela samting—dispela i makim tu ol pasin kranki na ol popaia bilong yumi—i mekim yumi bel hevi na yumi lusim wok bilong God. Sapos yumi lusim wok bilong Jehova, dispela em wanpela bikpela sin.

17. Olsem wanem poroman yumi makim bilong maritim inap mekim sampela samting long pasin bilong yumi long lotuim Jehova?

¹⁷ Sapos yu singel na yu tingting long marit, orait tok bilong Malakai inap helpim yu long makim gutpela poroman marit i stret long yu. Tingim dispela: Wanpela man o meri inap i gat ol gutpela pasin, tasol sapos em i no lotuim God tru, yu ting long ai bilong Jehova em i stap olsem stretpela man? (2 Kor. 6:14) Taim yu maritim em, yu ting em inap helpim yu long strongim pasin pren bilong yu wantaim Jehova? Tingim: Ol meri haiden em King Solomon i bin maritim,  ating ol i gat sampela gutpela pasin. Tasol ol i no bin lotuim Jehova, olsem na isi isi ol i pulim bel na tingting bilong Solomon na em i kirap long lotuim ol god giaman.—1 Kin. 11:​1, 4.

18. Ol papamama i mas skulim ol pikinini long wanem samting?

¹⁸ Ol papamama, yupela i ken yusim stori bilong ol king i stap long Baibel bilong skulim ol pikinini bilong yupela long givim bel olgeta long lotuim Jehova. Helpim ol long tingim olsem ol king em Jehova i orait long ol, em ol king husat i bin lotuim em na ol i kirapim tu ol manmeri long mekim olsem. Skulim ol pikinini long rot bilong ol tok na ol pasin yupela i mekim, olsem stadi long Baibel, go long ol miting, na mekim wok autim tok, na larim ol dispela samting i stap olsem nambawan samting winim ol narapela samting. (Mat. 6:33) Sapos nogat, orait ol pikinini bilong yupela inap kisim tingting olsem ol i stap wanpela Witnes Bilong Jehova bikos em lotu bilong famili. Dispela inap mekim na ol inap putim lotu i tru i stap olsem nambatu samting, o ol inap lusim olgeta.

19. Wanem gutpela samting inap painim ol manmeri em ol i lusim wok bilong Jehova? (Lukim tu blok “ Yu Ken Kam Bek Long Jehova!”)

¹⁹ Sapos wanpela i lusim wok bilong Jehova, yu ting i no gat rot moa long em inap kamap pren bilong Jehova gen? Nogat, rot i op yet long em inap tanim bel na kirap gen long lotu tru long Jehova. Bilong mekim olsem, em i mas daunim em yet na kisim helpim i kam long ol elda long kongrigesen. (Jems 5:14) Tru tumas, hatwok em i mekim bilong kam bek long Jehova bai i no inap lus nating!

20. Jehova bai i gat wanem tingting long yumi sapos yumi bihainim pasin bilong ol king i stap gut long em?

²⁰ Yumi kisim wanem ol skul long stori bilong ol king bilong Israel? Yumi ken bihainim pasin bilong ol king em ol i stap gut long God taim yumi wok yet long givim bel olgeta long lotuim Jehova. Yumi mas lain long ol popaia bilong yumi, tanim bel, na senisim ol pasin bilong yumi. Na yumi mas tingim olsem em i bikpela samting long yumi mas lotuim Jehova wanpela tasol, em i God tru. Sapos yu yet i mekim ol samting bilong pas gut wantaim Jehova, em bai tingim yu olsem wanpela man o meri husat i mekim ol pasin i stret long ai bilong em.