1. Wanem wanpela risen na famili bilong Jehova i stap wanbel?

YUMI amamas long stap insait long famili bilong Jehova. Wai na yumi stap bel isi na wanbel? Wanpela risen em olsem, yumi olgeta i wok strong long rispektim wok bilong ol man olsem het em Jehova i putim. Tru tumas, taim yumi kliagut moa long wok bilong ol man long i stap olsem het, yumi bai stap wanbel moa yet.

2. Yumi bai bekim wanem ol askim long dispela atikol?

² Long dispela atikol, yumi bai stori long husat i gat namba olsem het insait long kongrigesen. Na tu, yumi bai bekim ol dispela askim: Wanem wok bilong ol sista? Yu ting em i tru olsem olgeta brata ol i het bilong olgeta sista? Yu ting wok bilong ol elda long lukautim ol bratasista i wankain olsem wok bilong ol het bilong famili long lukautim meri na ol pikinini bilong em? Pastaim, yumi ken skelim wanem tingting yumi mas i gat long ol sista.

3. Olsem wanem yumi ken tingim tru na amamas long ol wok ol sista i mekim?

³ Yumi tingim tru na amamas long ol sista bilong yumi em ol i wok hat long lukautim famili bilong ol, ol i save autim gutnius, na sapotim kongrigesen. Yumi ken tingim tru na amamas moa yet long ol taim yumi skelim tingting em Jehova na Jisas  i gat long ol. Yumi bai kisim skul tu long pasin yumi ken mekim long ol meri taim yumi skelim pasin aposel Pol i mekim long ol meri.

4. Olsem wanem Baibel i kamapim klia olsem Jehova i tingim tru ol meri wankain olsem em i tingim ol man?

⁴ Baibel i kamapim klia olsem Jehova i tingim tru ol meri wankain olsem em i tingim ol man. Olsem, long taim bilong ol aposel, Baibel i kamapim klia olsem Jehova i givim holi spirit long ol meri, na tu, long ol man long strongim ol long mekim ol mirakel, olsem mekim ol narapela tokples. (Apo. 2:1-4, 15-18) God i makim ol man na ol meri wantaim long holi spirit na bai ol i ken mekim wok king wantaim Krais. (Gal. 3:26-29) Ol meri na ol man wantaim bai kisim laip oltaim long graun. (Rev. 7:9, 10, 13-15) Na ol man na ol meri wantaim i gat wok long autim gutnius na skulim ol man. (Mat. 28:19, 20) Buk Aposel i stori long wok wanpela sista i mekim, nem bilong em Prisila, em na man bilong em, Akwila, i stori gut long tok i tru long wanpela man i gat bikpela save bilong graun, em Apolos.—Apo. 18:24-26.

5. Olsem wanem Luk 10:38, 39, 42 i soim olsem Jisas i rispektim ol meri?

⁵ Jisas i onarim na rispektim ol meri. Em i no bihainim kastam bilong ol Farisi, em ol i save luk daun long ol meri na ol i no save toktok long ol long ol pablik ples, o stori wantaim ol long Ol Rait Holi. Maski i olsem, Jisas i larim ol meri i stap tu taim em i stori wantaim ol disaipel bilong em long ol bikpela tok i tru. * (Ritim Luk 10:38, 39, 42.) Na tu, em i larim ol meri i raun wantaim em long ol hap em i go autim tok long en. (Luk 8:1-3) Na Jisas i onarim ol meri taim em i larim ol i tokaut long ol aposel olsem em i kirap bek pinis.—Jon 20:16-18.

6. Olsem wanem aposel Pol i soim olsem em i rispektim ol meri?

⁶ Aposel Pol i tokim Timoti long onarim ol meri. Pol i tokim Timoti long mekim pasin long “ol meri i gat bikpela krismas olsem yu save mekim long mama bilong yu,” na mekim pasin long “ol yangpela meri olsem yu save mekim long ol susa bilong yu.” (1 Tim. 5:1, 2) Pol i mekim planti samting bilong helpim Timoti long kamap strong long bilip, tasol em i tokaut olsem mama na bubu meri bilong Timoti i bin skulim em long “ol Rait Holi.” (2 Tim. 1:5; 3:14, 15) Long pas Pol i raitim i go long ol bratasista long Rom, em i kolim nem bilong ol sista na salim gude long ol. Em i luksave long ol wok ol sista i mekim, na tu, em i tok amamas long ol wok Kristen ol i mekim.—Rom 16:1-4, 6, 12; Fili. 4:3.

7. Bai yumi skelim wanem ol askim?

⁷ Olsem ol paragraf i kamap paslain i soim, i no gat wanpela tok bilong Baibel i kamapim olsem ol brata i winim ol sista. Ol gutpela sista bilong yumi i save helpim tru kongrigesen, na elda i amamas long helpim ol i givim bilong kamapim bel is na pasin wanbel insait long kongrigesen. Tasol i gat sampela askim em yumi mas kisim bekim bilong ol. Olsem: Wai na Jehova i tok sampela taim ol sista i mas karamapim het? Ol brata tasol i save kamap ol elda na ol kongrigesen sevan, olsem na yu ting dispela i makim olsem olgeta brata i het bilong olgeta sista insait long kongrigesen?

8. Olsem Efesus 5:23 i kamapim, yu ting olgeta brata i het bilong olgeta sista? Stori long dispela.

⁸ Sotpela bekim em, nogat! Wanpela brata em i no het bilong olgeta sista insait long kongrigesen; Krais em i het. (Ritim Efesus 5:23.) Insait long famili, man marit i gat  namba long bosim meri bilong em. Wanpela pikinini man i baptais pinis, em i no het bilong mama bilong em. (Efe. 6:1, 2) Na insait long kongrigesen, ol elda i gat sampela namba tasol long bosim ol bratasista. (1 Tes. 5:12; Hib. 13:17) Ol singel sista em ol i no stap moa wantaim papamama bilong ol, ol i ken wok yet long rispektim papamama bilong ol na ol elda. Tasol wankain olsem ol man insait long kongrigesen, ol i gat wanpela het tasol, em Jisas.

9. Wai na sampela taim ol sista i mas karamapim het?

⁹ Em i tru olsem Jehova i makim ol man long i go pas long skulim ol narapela na mekim wok lotu insait long kongrigesen, na em i no givim dispela wankain namba long ol meri. (1 Tim. 2:12) Wai? Em i mekim olsem long wankain risen olsem em i bin makim Jisas long i stap het bilong ol man—long helpim kongrigesen long wok gut. Sapos i gat sampela risen na sista i mas mekim ol wok em brata i save mekim, orait long dispela taim Jehova i tok long em i mas karamapim het. * (1 Kor. 11:4-7) Jehova i laik ol sista i mekim olsem, tasol dispela i no bilong daunim ol, nogat, ol i mekim olsem bilong soim rispek long wok bilong i stap olsem het Em i bin putim. Yumi ken tingim ol dispela tok, na nau yumi ken bekim dispela askim: Ol het bilong famili na ol elda i gat wanem namba?

10. Wai na wanpela elda inap tingting long kamapim ol lo insait long kongrigesen?

¹⁰ Ol elda i laikim Krais, na ol i laikim ol “sipsip” em Jehova na Jisas i putim aninit long lukaut bilong ol. (Jon 21:15-17) Long gutpela pasin, ating wanpela elda inap ting em i olsem  papa bilong ol bratasista insait long kongrigesen. Em inap ting olsem, sapos het bilong famili i gat rait long kamapim ol lo bilong lukautim famili bilong em, orait elda i ken kamapim ol lo we em i ting inap lukautim ol sipsip bilong God. Na sampela bratasista inap kirapim ol elda long stap olsem het bilong ol long sait bilong bilip long rot bilong askim ol long mekim ol disisen bilong ol. Tasol yu ting ol elda insait long kongrigesen na ol het bilong famili i gat wankain namba?

11. Olsem wanem wok bilong ol het bilong famili na wok bilong ol elda i wankain?

¹¹ Aposel Pol i kamapim klia olsem sampela samting i wankain long wok bilong het bilong famili na wok bilong ol elda. (1 Tim. 3:4, 5) Olsem, Jehova i laik bai meri na ol pikinini i mas bihainim tok bilong het bilong famili. (Kol. 3:20) Na em i laik bai ol lain insait long kongrigesen i bihainim tok bilong ol elda. Jehova i laik bai ol het bilong famili na ol elda i skulim ol lain i stap aninit long lukaut bilong ol long stap strong long bilip. Na tu, ol i mas mekim pasin laikim long ol lain i stap aninit long lukaut bilong ol. Na olsem ol gutpela het bilong famili i save mekim, ol elda i save helpim ol lain i stap aninit long lukaut bilong ol long taim bilong hevi. (Jems 2:15-17) Na tu,  Jehova i laik bai ol elda na ol het bilong famili i bihainim ol lo bilong em na ol i “no ken kalapim ol tok i stap” long Baibel.—1 Kor. 4:6.

12-13. Olsem Rom 7:2 i kamapim, olsem wanem wok bilong ol het bilong famili na ol elda i no wankain?

¹² Tasol sampela samting i no wankain long wok bilong elda na wok bilong het bilong famili. Olsem, Jehova i makim ol elda long mekim wok olsem ol jas, na em i givim wok long ol long rausim ol man i mekim sin na i no laik tanim bel insait long kongrigesen.—1 Kor. 5:11-13.

¹³ Tasol Jehova i givim sampela namba long ol het bilong famili we em i no bin givim long ol elda. Olsem, em i givim namba long het bilong famili long kamapim ol lo na tokim famili bilong em long bihainim ol dispela lo. (Ritim Rom 7:2.) Olsem, het bilong famili i gat rait long makim wanem taim ol pikinini bilong em i mas kam bek long haus long nait. Na tu, em i gat namba long stretim ol pikinini bilong em sapos ol i no bihainim dispela lo. (Efe. 6:1) Gutpela man marit i save toktok gut wantaim meri bilong em paslain long em i kamapim ol lo bilong haus; bikos tupela i “wanpela bodi tasol.” *—Mat. 19:6.

14. (a) Olsem Mak 10:45 i kamapim, wai na i stret Jehova i makim Jisas olsem het bilong kongrigesen? (b) Wanem wok bilong Gavening Bodi? (Lukim blok “ Wok Bilong Gavening Bodi.”)

¹⁴ Long rot bilong pe bilong baim bek man, Jehova i baim bek laip bilong olgeta wan wan man insait long kongrigesen, na tu, olgeta manmeri em ol i bilip long Jisas. (Ritim Mak 10:45; Apo. 20:28; 1 Kor. 15:21, 22) So i stret  God i makim Jisas olsem het bilong kongrigesen, em man husat i bin givim laip bilong em olsem pe bilong baim bek ol man. Olsem het bilong yumi, Jisas i gat namba long kamapim ol lo na tokim yumi long bihainim ol dispela lo we i stiaim pasin bilong olgeta wan wan man, ol famili, na olgeta insait long kongrigesen. (Gal. 6:2) Jisas i kamapim ol lo yumi mas bihainim, na tu, em i mekim sampela samting moa. Em i save givim kaikai long yumi na tingim yumi olgeta wan wan olsem samting i dia tumas.—Efe. 5:29.

15-16. Yu inap lainim wanem samting long tok bilong Sista Marley na Brata Benjamin?

¹⁵ Ol sista i soim olsem ol i rispektim Krais taim ol i bihainim tok bilong ol man em i makim bilong lukautim ol. Wanpela sista nem bilong em Marley, em i save stap long Amerika, i kamapim tingting bilong planti sista. Em i tok: “Mi amamas tru long stap olsem meri marit na sista insait long kongrigesen. Olgeta taim mi wok strong long rispektim wok bilong i stap olsem het em Jehova i putim. Tasol man bilong mi na ol brata insait long kongrigesen i mekim na i isi moa long mi stap daun bikos ol i rispektim mi na tok amamas long ol wok mi mekim.”

¹⁶ Ol brata i soim olsem ol i kliagut long wok bilong i stap olsem het em God i putim taim ol i rispektim na onarim ol sista. Benjamin, wanpela brata i save stap long Inglan, em i tok: “Mi lainim planti samting long ol komen bilong ol sista long miting na hau long stadi na hau long mekim gut wok autim tok. Mi save olsem ol i mekim gutpela wok tru.”

17. Wai na yumi mas rispektim wok bilong i stap olsem het?

¹⁷ Taim olgeta insait long kongrigesen—ol man, ol meri, ol het bilong famili, na ol elda—i kliagut na rispektim wok bilong i stap olsem het, kongrigesen bai stap bel isi. Na bikpela samting moa, yumi preisim Papa bilong yumi long heven i gat pasin laikim, em Jehova.—Sng. 150:6.