1. Paslain long yu toktok long king bilong Persia, yu mas mekim wanem?

TINGIM olsem yu stap long Persia inap olsem 2,500 yia i go pinis. Yu laik toktok long king bilong Persia long wanpela samting, so yu go long taun Susan, em biktaun bilong king. Paslain long yu go lukim em, yu mas kisim tok orait long em. Sapos yu no kisim tok orait, ol inap kilim yu!—Esta 4:11.

2. Jehova i laik bai yumi pilim olsem wanem taim yumi laik toktok long em?

² Yumi tenkyu tru olsem Jehova i no olsem king bilong Persia! Jehova i gat bikpela strong na namba na em i winim tru ol king bilong graun, tasol em i orait long yumi ken i go long em long olgeta kain taim. Em i laik bai yumi pilim fri long go long em. Maski Jehova i holim ol biknem olsem Bikpela Man Bilong Wokim Olgeta Samting, God i Gat Olgeta Strong, na Nambawan Bikpela, em i laik bai yumi toktok long em na kolim em “Papa.” (Mat. 6:9) Yumi amamas olsem Jehova i laik bai yumi tingim em olsem Papa tru bilong yumi!

3. (a) Wai na yumi inap kolim Jehova olsem “Papa”? (b) Dispela atikol bai stori long wanem samting?

³ I stret long yumi kolim Jehova olsem “Papa”—em Man i givim laip long yumi. (Sng. 36:9) Em i Papa bilong yumi, olsem na yumi mas bihainim tok bilong em. Taim yumi mekim ol samting em i tokim yumi long mekim, yumi bai kisim ol gutpela blesing. (Hib. 12:9) Ol dispela blesing i makim tu laip oltaim long heven o long graun. Na tu, yumi kisim ol blesing long nau. Dispela atikol bai stori long hau Jehova i soim olsem em i gutpela Papa na wai yumi inap bilip olsem em i no inap tru long lusim yumi. Fes, yumi ken skelim wai na yumi  inap bilip tru olsem Papa bilong yumi long heven i gat pasin laikim na em i tingim tru yumi.

4. Bilong wanem sampela i pilim hatwok long tingim Jehova olsem Papa bilong ol?

⁴ Olsem wanem? Yu pilim hatwok long tingim God olsem Papa bilong yu? Sampela i tingim bikpela strong na namba bilong Jehova, olsem na ol inap pilim olsem ol i liklik tru na samting nating long ai bilong em. Ol i pilim olsem God i Gat Olgeta Strong i no inap tingim olgeta wan wan bilong ol. Tasol Papa bilong yumi i no laik bai yumi pilim olsem. Em i givim laip long yumi na em i laik bai yumi pas gut wantaim em. Aposel Pol i mekim dispela tok long ol manmeri long Atens, na em i kamapim klia olsem Jehova “i no stap longwe long yumi olgeta wan wan.” (Apo. 17:24-29) God i laik bai yumi olgeta wan wan i toktok long em wankain olsem pikinini i save go long papamama na toktok long ol.

5. Yumi kisim wanem skul long ekspiriens bilong wanpela sista?

⁵ Ating ol narapela i pilim hatwok long tingim Jehova olsem Papa bilong ol bikos papa bilong ol yet i no soim pasin laikim na gutpela pasin long ol. Skelim tok bilong wanpela sista. Em i tok: “Papa bilong mi i save mekim hatpela pasin tru. Taim mi kirap stadi long Baibel, mi kisim save olsem mi gat Papa long heven, tasol mi hatwok long tingim olsem mi inap pas gut wantaim em. Taim mi kisim save long Jehova, tingting bilong mi i senis.” Ating yu tu i holim wankain tingting. Sapos olsem, yu ken bilip tru olsem bihain yu tu inap tingim Jehova olsem nambawan gutpela Papa.

6. Olsem Matyu 11:27 i kamapim, olsem wanem Jehova i helpim yumi long tingim em olsem gutpela Papa?

⁶ Jehova i putim stori bilong ol tok na pasin bilong Jisas long Baibel na dispela i helpim yumi long tingim God olsem gutpela Papa. (Ritim Matyu 11:27.) Jisas i bihainim gut tru ol pasin bilong Papa, olsem na em inap tok: “Man i lukim mi, em i lukim Papa tu.” (Jon 14:9) Planti taim Jisas i stori long wok bilong Jehova olsem wanpela Papa. Long 4-pela Gutnius, planti taim Jisas i yusim dispela tok “Papa” taim em i stori long Jehova. Wai na Jisas i mekim olsem? Wanpela risen em long helpim ol manmeri long bilip olsem Jehova em gutpela Papa.—Jon 17:25, 26.

7. Yumi kisim wanem save long Jehova taim yumi skelim pasin em i mekim long Pikinini bilong em?

⁷ Skelim save yumi kisim long Jehova taim yumi tingim pasin em i mekim long Pikinini bilong em, Jisas. Oltaim Jehova i harim ol beten bilong Jisas. Em i no harim tasol, nogat, em i mekim ol samting Jisas i askim long en. (Jon 11:41, 42) Maski wanem hevi i painim Jisas, oltaim em i pilim olsem Papa i laikim em na helpim em.—Luk 22:42, 43.

8. Jehova i mekim wanem ol samting bilong lukautim Jisas?

⁸ Jisas i tokaut klia olsem Papa em Man i givim laip long em na lukautim em: “Mi stap laip long strong bilong Papa.” (Jon 6:57) Jisas i trastim tru Papa, na Papa i givim em kaikai na ol narapela samting em i nidim bilong i stap laip. Bikpela samting moa, Jehova i strongim Jisas long holimpas bilip.—Mat. 4:4.

9. Olsem wanem Jehova i stap olsem Papa husat i laikim na tingim tru Jisas?

⁹ Olsem wanpela gutpela Papa, Jehova i helpim Jisas long save olsem Em i sambai long Jisas. (Mat. 26:53; Jon 8:16) Maski Jehova i no stopim olgeta hevi i painim Jisas, em i helpim Jisas long sanap strong na karim hevi. Jisas i save olsem ol hevi i painim em i bilong sotpela taim tasol. (Hib. 12:2) Jehova i tingim tru Jisas, olsem na em i putim yau long Jisas, givim ol samting em i nidim, trenim em,  na sambai long em. (Jon 5:20; 8:28) Nau yumi ken skelim ol samting em Papa bilong yumi i mekim bilong soim olsem em i tingim yumi.

10. Olsem Song 66:19, 20 i kamapim, olsem wanem Jehova i soim olsem em i laikim yumi?

¹⁰ Jehova i save putim yau long ol beten bilong yumi. (Ritim Buk Song 66:19, 20.) Em i no putim mak long ol beten bilong yumi; em i tokim yumi long beten oltaim. (1 Tes. 5:17) Yumi ken beten long God long olgeta kain taim, maski yumi stap we. I no gat wanpela samting i save pasim em long putim yau long yumi; oltaim em i redim long harim beten bilong yumi. Taim yumi luksave olsem Jehova i save putim yau long ol beten bilong yumi, dispela i save kirapim yumi long laikim em moa yet. Man bilong raitim song i tok: “Mi laikim Jehova, long wanem, em i save harim singaut bilong mi.”—Sng. 116:1.

11. Olsem wanem Jehova i save bekim ol beten bilong yumi?

¹¹ Papa i save putim yau long beten bilong yumi, na em i save mekim ol samting yumi askim long en. Aposel Jon i tok: “Maski wanem wanem samting yumi askim em long en na i stret wantaim laik bilong [God], em bai harim yumi.” (1 Jon 5:14, 15) Em tru olsem Jehova i no inap bekim beten bilong yumi long wei yumi laikim. Em i save long gutpela rot bilong helpim yumi, olsem na sampela taim yumi no inap kisim bekim bilong beten, na sampela taim em i laik bai yumi wet.—2 Kor. 12:7-9.

12-13. Olsem wanem Papa bilong yumi long heven i givim ol samting yumi nidim?

¹² Jehova i save lukautim yumi. Em i save mekim ol samting olsem ol papa i mas mekim. (1 Tim. 5:8) Em i givim ol samting ol pikinini i nidim bilong i stap laip. Em i no laik bai yumi tingting planti long kaikai, klos, o haus. (Mat. 6:32, 33; 7:11) Olsem wanpela gutpela papa, Jehova i stretim rot bilong inapim yumi long olgeta samting em yumi bai nidim long bihain.

¹³ Bikpela samting moa, Jehova i givim ol samting yumi nidim bilong pas gut moa wantaim em. Long Baibel, em i tokaut long em i husat, ol samting em i tingting pinis long kamapim, wai na em i wokim yumi, na ol samting bai kamap long bihain. Taim yumi kisim save long tok i tru, em i soim olsem em i tingim tru yumi olgeta wan wan, olsem na em i yusim papamama o narapela long helpim yumi long kisim save long em. Na yumi wok yet long kisim helpim long ol elda long kongrigesen na ol bratasista i stap strong long bilip. Na tu, Jehova i skulim yumi long rot bilong ol miting bilong kongrigesen. Long ol dispela rot na ol narapela rot tu, Jehova i soim olsem em i wanpela Papa i tingim tru yumi.—Sng. 32:8.

14. (a) Bilong wanem Jehova i save trenim yumi? (b) Olsem wanem em i trenim yumi?

¹⁴ Jehova i save trenim yumi. Yumi no gutpela olgeta olsem Jisas. Olsem na Papa bilong yumi i save trenim yumi taim em i stretim ol pasin kranki bilong yumi. Baibel i tok: “Ol man em Jehova i laikim, em i save stretim ol.” (Hib. 12:6, 7) Jehova i save stretim yumi long kain kain rot. Tok yumi ritim long Baibel o harim long miting inap stretim tingting o pasin bilong yumi. O ating ol elda i stretim yumi. Maski yumi kisim helpim long wanem kain rot, oltaim Jehova i save soim pasin laikim taim em i stretim yumi.—Jer. 30:11.

15. Jehova i save lukautim yumi long wanem ol rot?

¹⁵ Jehova i save sambai long yumi long taim bilong hevi. Wankain olsem gutpela papa i save sambai long ol pikinini long taim bilong hevi, Papa bilong yumi long heven i save  sambai long yumi. Em i yusim holi spirit long stiaim yumi long abrusim ol samting we inap bagarapim yumi long sait bilong bilip. (Luk 11:13) Na tu, em i save sambai long yumi taim yumi bel hevi o tingting planti. Em i givim yumi gutpela hop bilong ol samting bai kamap bihain. Dispela hop i helpim yumi long sanap strong taim hevi i painim yumi. Tingim dispela: Maski wanem hevi i painim yumi, gutpela Papa bilong yumi bai pinisim ol hevi yumi karim. Ol hevi i painim yumi em bilong sotpela taim, tasol ol blesing Jehova i givim bai i stap oltaim.—2 Kor. 4:16-18.

16. Wanem samting i kamap taim Adam i sakim tok bilong gutpela Papa bilong em?

¹⁶ Yumi lukim pasin laikim bilong Jehova taim yumi tingim ol samting em i mekim taim Adam i sakim tok bilong em. Pasin bikhet bilong Adam i mekim na em wantaim ol tumbuna pikinini bilong em i no insait moa long famili bilong Jehova. (Rom 5:12; 7:14) Tasol Jehova i mekim wanpela samting bilong helpim ol tumbuna pikinini bilong Adam.

17. Bihain long Adam i bikhet, kwiktaim Jehova i mekim wanem?

¹⁷ Jehova i givim panismen long Adam, tasol em i promis long helpim ol tumbuna pikinini bilong Adam. Kwiktaim em i tok promis olsem ol man i bihainim tok bilong em, ol bai kam insait gen long famili bilong em. (Stt. 3:15; Rom 8:20, 21) Olsem na Jehova i stretim rot na Pikinini bilong em, Jisas, i givim laip bilong em olsem ofa bilong baim bek ol man. Long dispela rot, Jehova i soim olsem em i laikim tru yumi.—Jon 3:16.

18. Maski yumi lusim Jehova, wai na yumi ken bilip tru olsem em i laik bai yumi stap olsem ol pikinini bilong em?

¹⁸ Maski yumi no gutpela olgeta, Jehova i laik bai yumi stap insait long famili bilong em, na em i no pilim hatwok long helpim yumi.  Ating yumi mekim em i bel hevi o yumi lusim em inap sampela haptaim, tasol em i no save givap long yumi. Long tok piksa bilong Jisas long pikinini i lusim papa, em i kamapim klia olsem Jehova i laikim tru ol pikinini bilong em. (Luk 15:11-32) Oltaim papa long dispela tok piksa i lukluk na hop olsem pikinini bai kam bek. Taim dispela pikinini i kam bek, papa i amamas tru na em i go kwiktaim na welkamim em. Sapos yumi bin lusim Jehova, tasol yumi tanim bel, yumi ken bilip tru olsem gutpela Papa bilong yumi i redi na em i laik tru long welkamim yumi.

19. Olsem wanem Jehova bai stretim ol hevi em Adam i bin kamapim?

¹⁹ Papa bilong yumi bai stretim olgeta hevi em Adam i bin kamapim. Bihain long Adam i bikhet, Jehova i stretim rot long adoptim 144,000 manmeri long graun bilong mekim wok king na pris long heven wantaim Pikinini bilong em. Long nupela taim, Jisas na ol wanwok bilong em bai helpim ol manmeri long kamap gutpela olgeta. Taim ol manmeri i winim laspela traim, God bai givim laip oltaim long ol. Papa bilong yumi bai amamas tru long lukim graun i pulap long ol pikinini man na ol pikinini meri em ol i gutpela olgeta. Em bai gutpela taim tru!

20. (a) Olsem wanem Jehova i soim olsem em i laikim tru yumi? (b) Neks atikol bai stori long wanem samting?

²⁰ Jehova i soim olsem em i laikim tru yumi. Em i nambawan gutpela Papa. Em i save harim ol beten bilong yumi na givim ol samting yumi nidim, em ol samting bilong skin na long sait bilong bilip. Em i save trenim yumi na sambai long yumi. Na tu, long bihain em bai givim planti gutpela blesing long yumi. Yumi amamas long save olsem Papa bilong yumi i laikim na tingim yumi! Neks atikol bai stori long ol samting yumi ken mekim bilong soim olsem yumi pilim tru pasin laikim bilong em.