Felisa: Famili bilong mi em ol strongpela lotu lain, na 13-pela wanblut bilong mipela i mekim wok pris na ol narapela bikpela wok insait long lotu Katolik. Wanpela kasen brata bilong mama i mekim wok pris na em i skulim ol sumatin long wanpela skul bilong ol Katolik. Pop Jon Pol Namba 2 i blesim em na mekim em i kamap wanpela santuman. Famili bilong mipela i no gat planti mani kago. Papa bilong mi i save mekim ol samting long ain, na mama bilong mi i save mekim wok gaden. Mi fesbon na mi gat 7-pela bratasusa.

Taim mi gat 12-pela krismas, Pait Bilong Spen i kirap. Bihain long woa, ol i kalabusim papa bilong mi. Gavman dikteta i no amamas long tingting bilong Papa olsem ol man i mas i stap fri long mekim disisen. Mama i hatwok long lukautim mipela. Olsem na wanpela pren bilong mama i tokim em long salim Araceli, Lauri, na Ramoni, em ol liklik susa bilong mi, long i go i stap long haus bilong ol sister long biktaun Bilbao long Spen. Long dispela hap, ol bai i gat kaikai bilong olgeta wan wan de.

Araceli: Long dispela taim, mipela i gat 14, 12, na 10 krismas, na mipela i bel hevi tru long lusim famili bilong mipela. Taim mipela i stap long Bilbao, mipela i mekim wok bilong klinim ples. Tupela yia bihain, ol sister i salim mipela i go i stap long wanpela bikpela haus bilong ol we ol i save lukautim ol lapun long Zaragoza, em wanpela provins long Spen. Mipela i mekim wok bilong klinim kitsen, na dispela wok i hatwok tru long mipela ol tineja.

Felisa: Taim ol sista bilong mi i go long Zaragoza, mama na ankol bilong mi husat i stap pris long hap bilong mipela, i pasim tok olsem mi tu mas i go wok long haus bilong ol sister long Zaragoza. Ol i laik salim mi i go longwe bikos wanpela boi long hap bilong mipela i gat laik long mi. Mi meri bilong  tingim lotu, olsem na mi amamas long i go stap liklik long haus bilong ol sister. Olgeta de mi save go long lotu, na mi tingting long kamap misineri wankain olsem kasen bilong mi husat i mekim wok misineri long Afrika.

Ol sister i no strongim tingting bilong mi long mekim wok bilong God long narapela kantri, na mi pilim olsem mi stap kalabus long haus bilong ol. Olsem na 1-pela yia bihain, mi go bek long ples na lukautim ankol bilong mi husat i mekim wok pris. Mi mekim ol wok bilong haus, na tu, long olgeta apinun mitupela i save holim bis rosari na beten wantaim. Mi save amamas long stretim ol plaua long haus lotu na bilasim stetiu bilong Maria na ol santu.

Araceli: Mipela i stap long haus bilong ol sister na laip bilong mipela i senis. Bihain long mi mekim fes tok promis bilong mi, ol sister i seperetim mipela 3-pela. Ramoni i stap long Zaragoza, Lauri i go long Valencia, na ol i salim mi i go long Madrid, na mi mekim namba 2 tok promis. Haus bilong ol sister long Madrid i givim ples slip long ol sumatin, ol lapun, na ol visita, olsem na i gat planti wok tru long mekim. Mi wok long liklik haus sik bilong ol.

Mi ting olsem mi bai i stap amamas taim mi kamap sister. Mi laik tru long ritim Baibel na kliagut long ol tok bilong en. Tasol i no gat wanpela man i toktok long God o Jisas, na mipela i no save yusim Baibel. Mi lainim sampela tok Latin, na stadi long laip bilong santuman, na lotuim Maria. Tasol mi lusim bikpela haptaim moa long mekim wok olsem wanpela kalabusmeri.

Mi stat long bel hevi, olsem na mi tokim bikmeri bilong ol sister olsem i no stret long mi wok hat na ol narapela i pulimapim poket bilong ol, tasol famili bilong mi i nidim helpim bilong mi. Em i lokim mi long sel, na em i ting dispela bai senisim tingting bilong mi na mi no inap lusim haus bilong ol sister.

Inap 3-pela taim ol sister i larim mi lusim sel bikos ol i laik painimaut olsem mi tingting yet long lusim ol o nogat. Mi tingting strong yet long lusim ol, olsem na ol i tokim mi long raitim dispela tok: “Mi lusim dispela ples bikos mi laik mekim wok bilong Satan, na mi no laik mekim wok bilong God.” Mi kirap nogut tru taim ol i mekim dispela tok. Mi laik tru long lusim haus bilong ol sister, tasol mi no inap tru long raitim ol tok em ol i tokim mi long raitim. Olsem na mi laik toktok long wanpela pris husat i save harim ol man i autim wari bilong ol, na mi tokim em long ol samting i kamap long mi. Em i stretim rot long ol i ken salim mi i go bek long haus bilong ol sister long Zaragoza. Mi stap inap sampela mun long Zaragoza, na bihain ol i larim mi i go fri. Bihain liklik, Lauri na Ramoni tu i lusim haus bilong ol sister.

Felisa: Bihain, mi marit na mi go stap long Cantabria, em narapela provins long Spen. Mi save go oltaim long lotu, na wanpela Sande mi harim narapela kain toksave i kamap long pletfom. Pris i belhat wantaim na singaut olsem, “Lukim dispela  buk!” na em i poinim pinga long buk Tok i Tru i Bringim Man Long Laip Oltaim. Em i tok moa olsem: “Sapos wanpela man i bin givim yu kopi bilong dispela buk, orait yu mas givim long mi o tromoi dispela buk!”

Mi no gat kopi bilong dispela buk, tasol mi laikim tru wanpela kopi bilong en. Sampela de bihain, 2-pela Witnes i nok long dua na i givim mi dispela buk i gat “tambu” long en. Long dispela nait yet mi ritim dispela buk, na taim ol i kam bek, mi wanbel long ol i stadi wantaim mi long Baibel.

Mi luksave long tok i tru. Mi laikim tru Jehova na mi givim bel tru long autim tok. Mi kisim baptais long 1973. Famili bilong mi i no laik bai mi stori wantaim ol long tok i tru, tasol mi givim bel tru long toktok wantaim ol taim rot i op. Olsem mi stori long kirap bilong dispela stori, famili i birua tru long lotu bilong mi, na moa yet em susa bilong mi Araceli.

Araceli: Ol hevi i painim mi taim mi stap long haus bilong ol sister i mekim na mi kamap meri bilong belhat. Tasol mi go yet long lotu long Sande, na long olgeta de mi save holim bis rosari na beten. Mi gat bikpela laik yet long kisim save long tok bilong Baibel, na mi askim God long helpim mi. Taim Felisa i stori long mi long nupela bilip bilong em, mi lukim olsem em i bilip tru long ol samting em i stori long en. Tasol mi no wanbel stret long em.

Sampela yia bihain, mi go bek long Madrid long mekim wok, na mi marit. Bihain, mi stat long kisim 2-pela tingting. Mi luksave olsem ol manmeri husat i go lotu long olgeta taim, ol i no save bihainim ol tok i stap long ol Gutnius. Olsem na mi stop long go long lotu. Mi no bilip moa long ol santuman, helpaia, na pasin bilong autim sin. Na tu, mi rausim olgeta imis. Mi no save sapos mi mekim stretpela pasin o nogat. Mi bel hevi tru, tasol mi wok yet long beten na tokim God olsem: “Mi laik kisim save long yu. Helpim mi!” Ol Witnes Bilong Jehova i save kam long haus bilong mi, tasol mi no save opim dua long ol. Mi no bilip moa long olgeta lotu.

 Long ol yia bihain tasol long 1980, Lauri na Ramoni i kirap long stadi long Baibel wantaim ol Witnes. Lauri i stap long Frans na Ramoni i stap long Spen. Mi pilim olsem tupela i bihainim bilip giaman, wankain olsem Felisa. Bihain, mi bungim Angelines, em wanpela neiba na em i kamap gutpela pren bilong mi. Em tu i wanpela Witnes Bilong Jehova. Planti taim liklik, Angelines na man bilong em i askim mi long stadi long Baibel. Ol i luksave olsem maski mi gat 2-pela tingting, mi laik tru long kisim save long Baibel. Bihain, mi tokim ol: “Orait. Mi bai stadi wantaim yupela sapos mi inap yusim Baibel bilong mi yet!” Mi toktok long Baibel bilong mi yet, em Baibel Nácar-Colunga.

Felisa: Taim mi kisim baptais long 1973, i gat 70 Witnes long biktaun Santander, em biktaun bilong provins Cantabria long Spen. Mipela i gat bikpela teritori, olsem na mipela i go long ol bas, na bihain mipela i go long ol kar na raun autim tok long olgeta hap bilong provins. Mipela i raun long olgeta ples i go inap long mipela i visitim planti handret ples.

Inap planti yia, mi mekim Baibel stadi wantaim planti lain, na 11-pela bilong ol i kisim baptais. Planti bilong ol em ol Katolik. Bipo mi strongpela Katolik, olsem na mi save olsem mi no ken les kwik, na mi mas pilim tingting bilong ol Baibel sumatin bilong mi. Mi luksave olsem sampela haptaim i mas lus pastaim na bai tok bilong Baibel na holi spirit bilong Jehova inap opim bel na tingting bilong ol na bai ol i luksave long tok i tru na lusim ol bilip giaman. (Hib. 4:12) Man bilong mi, Bienvenido, em polisman i kisim baptais long 1979. Mama bilong mi i kirap stadi long Baibel paslain liklik long em i dai.

Araceli: Mi holim 2-pela tingting long ol Witnes taim mi kirap stadi long Baibel wantaim ol. Tasol sampela wik bihain, mi luksave olsem bel kros bilong mi i pinis. Samting mi laikim tru em olsem, ol Witnes i save bihainim tok ol i autim. Nau mi bilip na mi no holim 2-pela tingting moa, na mi amamas tru. Sampela neiba i tokim mi olsem: “Araceli, yu mas bihainim yet dispela rot em nau yu makim!”

Mi beten na tok: “Tenkyu Jehova long yu no bin les kwik long mi na yu opim planti rot long mi inap kisim samting mi wok long painim, em stretpela save bilong Baibel.” Mi askim susa bilong mi, Felisa, long lusim rong bilong mi long mekim ol tok i bagarapim bel bilong em. Mi no kros moa long em; nau mipela i amamas long stori long Baibel. Mi kisim baptais long 1989 taim mi gat 61 krismas.

Felisa: Nau mi gat 91 krismas, na mi kamap wido na mi no gat strong olsem long pastaim. Tasol mi save ritim Baibel long olgeta de, go long ol miting sapos helt bilong mi em orait, na mi givim bel yet long autim tok inap tru long skel bilong mi.

Araceli: Bipo, mi stap olsem wanpela sister, olsem na mi save laik tru long autim tok long olgeta pris na ol sister mi bungim. Mi bin tilim planti buk na nius long ol, na mi kisim sampela gutpela ekspiriens. Inap sampela haptaim, mi mekim gobek long wanpela pris na em i tok: “Araceli, mi wanbel tru long tok bilong yu, tasol mi lapun pinis, olsem na mi no inap mekim wanpela samting. Ol manmeri long sios bilong mi na famili bilong mi bai tok wanem long mi?” Mi tokim em: “God bai tok wanem long yu?” Em i wari wantaim na tromoi het, tasol long dispela taim em i no wok strong moa long kisim save long tok i tru.

Mi tingim yet wanpela spesel taim long laip bilong mi, em taim we man bilong mi i tokim mi olsem em i laik bihainim mi i go long miting. Long dispela taim em i winim pinis 80 krismas, tasol em i no save lusim wanpela miting. Em i stadi long Baibel na kamap pablisa i no baptais. Mi tingim yet ol taim we mitupela i save wok wantaim long autim tok. Em i dai 2-pela mun paslain long em i kisim baptais.

Felisa: Wanpela samting mi amamas tru long en em olsem, mi amamas long lukim 3-pela liklik susa bilong mi i kamap susa tru bilong mi long sait bilong bilip maski ol i birua long mi long pastaim. Mipela i amamas tru long i stap wantaim na stori long ol pasin bilong Jehova, em God bilong mipela, na stori tu long ol tok bilong em long Baibel! Nau mi na ol susa bilong mi i stap wanbel long sait bilong bilip. *