1. Wanem wanpela risen na Jisas i tok ol disaipel bilong em i olsem ol sipsip?

JISAS i tok pasin bilong em long pas gut wantaim ol disaipel bilong em i wankain long pasin i stap namel long wasman bilong sipsip na ol sipsip bilong em. (Jon 10:14) Dispela tok i stret tru. Ol sipsip i save long wasman bilong ol, na ol i save harim na bihainim nek bilong em. Wanpela turis i lukim dispela samting i kamap. Em i tok: “Mipela i laik kisim poto bilong sampela sipsip na mipela i traim long singautim ol long kam klostu long mipela. Tasol ol i no bihainim mipela bikos ol i no harim save nek bilong mipela. Bihain wanpela liklik mangi bilong lukautim ol sipsip i kam, na taim em i singaut, wantu ol i bihainim em.”

2-3. (a) Olsem wanem ol disaipel bilong Jisas i soim olsem ol i putim yau long nek bilong em? (b) Yumi bai stori long wanem samting long dispela atikol na neks atikol?

² Tok em dispela turis i mekim i kirapim yumi long tingim tok bilong Jisas long ol sipsip bilong em—em ol disaipel bilong em. Em i tok: “Ol bai putim yau long nek bilong mi.” (Jon 10:16) Tasol Jisas i stap long heven. So hau bai yumi inap putim yau long nek bilong em? Wanpela rot yumi soim olsem yumi putim yau long nek bilong Bosman bilong yumi em long bihainim ol tok bilong em long laip bilong yumi.—Mat. 7:24, 25.

³ Long dispela atikol na long neks atikol, yumi bai stori long sampela tok Jisas i bin mekim. Yumi bai lukim olsem Jisas i skulim yumi long sampela pasin em yumi mas lusim na sampela pasin yumi mas kisim. Pastaim yumi bai stori long 2-pela pasin em gutpela wasman bilong yumi i tokim yumi long lusim.

4. Olsem Luk 12:29 i kamapim, wanem samting inap mekim yumi “tingting planti”?

⁴ Ritim Luk 12:29. Jisas i tokim ol disaipel bilong em long “lusim pasin bilong tingting planti” long ol samting ol i nidim bilong  i stap laip. Yumi save olsem tok bilong Jisas i stret na em savetingting long bihainim dispela tok. Yumi laik bihainim dispela tok, tasol sampela taim yumi inap pilim hatwok long mekim olsem. Wai?

5. Wai na sampela inap tingting planti long ol samting ol i nidim?

 ⁵ Ating sampela i tingting planti long ol samting ol i nidim, olsem kaikai, klos, na haus. Ating ol i stap long kantri i gat hevi long sait bilong mani. Ating i hatwok long ol long kisim mani bilong lukautim famili bilong ol. O ating wanpela insait long famili husat i save wok mani na lukautim famili em i dai, na nau famili i no gat rot bilong kisim mani bilong baim ol samting em famili i nidim. Na tu, ating planti i lusim wok mani bilong ol bikos long COVID-19 pendemik. (Ekl. 9:11) Sapos yumi karim ol dispela hevi o ol narapela hevi, hau bai yumi inap bihainim tok bilong Jisas long lusim pasin bilong tingting planti?

6. Stori long samting i kamap long aposel Pita.

⁶ Wanpela taim, aposel Pita na ol narapela aposel i stap long bot long Raunwara Galili na traipela win i kirap, na ol i lukim Jisas i wokabaut antap long wara i kam long ol. Pita i tok: “Bikpela, sapos em yu tasol, orait tokim mi long wokabaut antap long wara na kam long yu.” Bihain long Jisas i tokim Pita long “kam” long em, Pita i lusim bot na i go daun na “wokabaut antap long wara na i go long Jisas.” Nau lukim wanem samting i kamap bihain. Baibel i tok: “Tasol traipela win i mekim na [Pita] i pret, na em i stat long sink na em i singaut: ‘Bikpela, seivim mi!’” So Jisas i putim han i go na seivim em. Em i bikpela samting long tingim dispela: Pita inap wokabaut antap long wara taim em i wok long lukluk long Jisas. Tasol taim Pita i lukluk long traipela win, dispela i mekim em i tingting planti na pret nogut tru, na em i stat long sink.—Mat. 14:24-31.

7. Yumi kisim wanem skul long eksampel bilong Pita?

 ⁷ Yumi ken kisim skul long eksampel bilong Pita. Taim Pita i lusim bot na em i wokabaut antap long wara, em i no ting olsem dispela traipela win bai pulim tingting bilong em na em bai sink. Em i laik wokabaut antap long wara inap long em i kamap long Jisas. Tasol Pita i no putim tingting olgeta long dispela samting. Long nau, yumi no inap wokabaut antap long wara, tasol yumi save bungim ol bikpela hevi we i traim bilip bilong yumi. Sapos yumi no putim tingting olgeta i go long Jehova na ol tok promis bilong em, yumi bai slek long bilip—i olsem yumi sink. Maski yumi bungim wanem ol bikpela hevi long laip bilong yumi we i kain olsem ol traipela win, oltaim yumi mas putim tingting i go long Jehova na bilip tru olsem em bai helpim yumi. Hau bai yumi inap mekim olsem?

8. Wanem samting bai helpim yumi na bai yumi no tingting planti long ol samting yumi nidim?

⁸ Yumi mas trastim Jehova na lusim pasin bilong tingting planti long ol hevi i painim yumi. Tingim olsem gutpela Papa bilong yumi, Jehova, i tok promis long lukautim yumi long ol samting yumi nidim bilong i stap laip sapos yumi putim ol samting bilong bilip i stap namba 1. (Mat. 6:32, 33) Oltaim Jehova i save truim dispela tok promis bilong em. (Lo 8:4, 15, 16; Sng. 37:25) Jehova i save lukautim ol pisin na ol plaua, olsem na yumi ken save tru olsem em bai lukautim yumi long ol samting yumi nidim, olsem kaikai na klos samting! (Mat. 6:26-30; Fili. 4:6, 7) Pasin laikim i kirapim ol papamama long lukautim ol pikinini bilong ol long ol samting ol i nidim, na olsem tasol, pasin laikim i kirapim Papa bilong yumi long heven long lukautim ol manmeri bilong em long ol samting ol i nidim. Yes, yumi ken bilip tru olsem Jehova bai lukautim yumi!

9. Yu kisim wanem skul long ekspiriens bilong 2-pela marit?

⁹ Tingim dispela ekspiriens we i soim klia hau Jehova i save lukautim yumi long ol samting yumi nidim. Tupela marit em ol i mekim wok painia, ol i draiv winim 1-pela aua long olpela kar bilong ol i go long pikim sampela sista long wanpela refiuji senta, na ol i bringim ol i go long wanpela miting Kristen. Dispela brata i tok: “Bihain long miting, mipela invaitim ol dispela sista i kam long haus bilong mipela long kaikai, tasol mipela i luksave olsem mipela i no gat kaikai long haus.” Dispela 2-pela marit bai mekim wanem? Brata i tok moa olsem: “Taim mipela i kam kamap long haus, long fran bilong haus i gat 2-pela beg kaikai i stap. Mipela i no save husat i bringim i kam. Jehova i lukautim mipela long samting mipela i nidim.” Bihain liklik, kar bilong dispela 2-pela marit i bagarap. Ol i save yusim dispela kar long mekim wok autim tok, tasol ol i no gat mani long fiksim kar. Ol i kisim kar i go long wanpela woksop bilong lukim hamas mani ol bai tromoi long fiksim kar, na wanpela man i kam na em i askim ol: “Em kar bilong husat?” Na brata i tok em kar bilong em, tasol kar i bagarap so ol i mas fiksim. Dispela man i tok: “Em no bikpela samting. Meri bilong mi i laikim dispela kain kar na long dispela kala stret. Yu laik mi baim long hamas?” Dispela brata i salim kar bilong em long dispela man na em i kisim mani inap long baim narapela kar. Em i tok: “Mipela i pilim bikpela amamas tru long pinis bilong dispela de. Mipela save olsem dispela samting i no kamap nating. Jehova i bin helpim mipela.”

10. Hau na tok bilong Buk Song 37:5 i kirapim yumi long lusim pasin bilong tingting planti long ol samting yumi nidim?

¹⁰ Taim yumi putim yau long nek bilong gutpela wasman bilong yumi na yumi lusim pasin bilong tingting planti long ol samting yumi nidim, yumi ken bilip tru olsem Jehova bai givim yumi ol samting bilong lukautim yumi. (Ritim Buk Song 37:5; 1 Pita 5:7) Tingim ol hevi em yumi bin stori long en long  paragraf 5. I kam inap long nau, ating Jehova i yusim het  bilong famili o bos bilong kampani yumi wok long en bilong helpim yumi long lukautim yumi long ol samting yumi nidim. Sapos het bilong famili i no inap long mekim olsem moa o sapos yumi lusim wok mani bilong yumi, orait Jehova bai lukautim yumi long narapela rot. Yumi ken bilip tru olsem Em bai lukautim yumi. Orait nau, yumi ken stori long narapela pasin em gutpela wasman bilong yumi i tok long yumi mas lusim.

11. (a) Olsem Matyu 7:1, 2 i kamapim, Jisas i tok yumi mas lusim wanem pasin? (b) Wai na i hatwok long mekim olsem?

¹¹ Ritim Matyu 7:1, 2. Jisas i save olsem yumi no gutpela olgeta, na planti taim yumi save lukluk long popaia bilong ol narapela. Olsem na em i tok: “Lusim pasin bilong skelim ol arapela olsem jas.” Ating yumi wok hat long abrusim pasin bilong skelim ol wanbilip bilong yumi. Tasol yumi olgeta i gat sin. So sampela taim yumi inap skelim ol narapela. Long kain taim olsem, yumi mas mekim wanem? Yumi mas putim yau long nek bilong Jisas, na wok strong long lusim pasin bilong skelim ol narapela olsem jas.

12-13. Taim yumi tingim pasin Jehova i mekim long King Devit, hau dispela bai helpim yumi long lusim pasin bilong skelim ol narapela?

¹² Yumi ken kisim gutpela helpim taim yumi tingim tingim eksampel bilong Jehova. Em i save lukluk long ol gutpela pasin bilong ol man. Yumi luksave long dispela long pasin em i mekim long King Devit, em man husat i mekim ol bikpela rong. Olsem, em i mekim pasin adaltri wantaim Batseba, na tu, em i givim oda na ol i kilim i dai man bilong Batseba. (2 Sml. 11:2-4, 14, 15, 24) Long dispela rot, Devit i bringim hevi long em yet na long famili bilong em, na tu, long ol meri bilong em. (2 Sml. 12:10, 11) Long narapela taim, Devit i no trastim Jehova taim em i tokim ol man long rejistaim namba bilong ol soldia bilong lain ami bilong Israel, em samting Jehova i no bin tokim em long mekim. Ating Devit i mekim olsem bikos em i gat pasin antap na em i trastim strong bilong lain ami bilong em. Wanem samting i kamap? Inap olsem 70,000 manmeri bilong lain Israel i kisim bikpela sik na ol i dai!—2 Sml. 24:1-4, 10-15.

¹³ Sapos yu stap long kantri Israel long dispela taim bipo, yu bai holim wanem tingting long Devit? Yu bai ting olsem Jehova i no ken fogivim em? Jehova i no holim dispela kain tingting. Em i tingim pasin bilong Devit long stap gut long Em long laip olgeta bilong em, na em i save olsem Devit i bin tanim bel tru. Em risen na Jehova i fogivim Devit long ol bikpela rong em i mekim. Jehova i save olsem Devit i laikim em tru na em i laik bihainim stretpela pasin. Yumi amamas tru long save olsem Jehova i save lukluk long ol gutpela pasin bilong yumi!—1 Kin. 9:4; 1 Sto. 29:10, 17.

14. Wanem samting i helpim ol Kristen long lusim pasin bilong skelim ol narapela?

¹⁴ Jehova i save olsem yumi ol man i save mekim ol popaia, olsem na yumi tu i ken tingim olsem ol narapela bai mekim ol popaia, na mobeta yumi lukluk long ol gutpela pasin bilong ol. Em isi tru long yumi lukim popaia bilong ol narapela na toktok planti long dispela samting. Tasol man i bikpela pinis long sait bilong bilip, ating em bai lukim ol dispela popaia bilong ol narapela, tasol em bai amamas yet long wok wantaim ol. Tingim dispela: Daimon em ol man i no katim na polisim bai i no luk nais tumas. Tasol man i gat gutpela tingting, em i save olsem bihain long ol i katim na polisim dispela daimon, em bai luk nais tru na i gat bikpela pe bilong en. Olsem Jehova na Jisas, yumi no laik lukluk long ol popaia bilong ol narapela; yumi laik lukluk long ol gutpela pasin bilong ol.

15. Taim yumi tingim sindaun bilong ol narapela, hau bai dispela i helpim yumi long no ken skelim ol?

¹⁵ Taim yumi lukluk long ol gutpela pasin bilong ol narapela, dispela bai helpim yumi long  no ken skelim ol. Tasol yumi ken mekim wanem samting moa? Yumi ken traim long tingim sindaun bilong ol. Tingim dispela stori. Wanpela taim Jisas i stap long tempel, na em i lukim wanpela wido meri husat i sot long ol samting i putim 2-pela liklik koin i gat liklik pe tru long boks. Jisas i no tok: “Wai na em i no putim bikpela mani?” Jisas i no skelim hamas mani dispela wido meri i givim, nogat. Em i tingim risen na wido meri i putim 2-pela liklik koin long boks, na tu, em i tingim sindaun bilong em, olsem na Jisas i tok amamas long em i givim bes bilong em.—Luk 21:1-4.

16. Yu kisim wanem skul long ekspiriens bilong Veronica?

¹⁶ Ekspiriens bilong Veronica i soim klia risen na em i bikpela samting long yumi mas tingim sindaun bilong ol narapela. Long kongrigesen em i stap long en, i gat wanpela wanpis mama na pikinini man bilong em. Veronica i tok: “Mi lukim olsem tupela i no save kam oltaim long ol miting na insait long wok autim tok. Dispela i mekim na mi holim tingting kranki long ol. Tasol wanpela taim mi autim tok wantaim dispela sista. Na em i tokim mi olsem pikinini man bilong em i gat sik otisim. Na em i givim bes bilong em long lukautim em yet na pikinini man bilong em long ol samting bilong skin na bilong bilip. Bikos long sik bilong pikinini bilong em, sampela taim em i save go long miting bilong ol narapela kongrigesen. Mi no bin save olsem em i karim dispela hevi. Nau mi laikim tru na rispektim dispela sista bikos em i mekim olgeta samting em inap mekim bilong lotuim Jehova.”

17. (a) Olsem Jems 2:8 i kamapim, yumi mas mekim wanem? (b) Hau yumi inap mekim olsem?

 ¹⁷ Yumi mas mekim wanem sapos yumi luksave olsem yumi skelim wanpela wanbilip bilong yumi? Yumi mas tingim olsem yumi gat wok long laikim ol bratasista bilong yumi. (Ritim Jems 2:8.) Yumi tu i mas beten strong long Jehova na askim em long helpim yumi long lusim pasin bilong skelim ol narapela. Yumi ken mekim ol samting i stret wantaim ol beten bilong yumi, long rot bilong go pas na toktok wantaim dispela wanbilip em yumi gat tingting kranki long em. Dispela inap opim rot na yumi save gut moa long em. Ating yumi ken tokim em long wok wantaim yumi long taim bilong autim tok, o singautim em i kam long haus bilong yumi long kaikai wantaim. Taim yumi save gut moa long dispela wanbilip, yumi ken bihainim eksampel bilong Jehova na Jisas na lukluk long ol gutpela pasin bilong em. Taim yumi mekim olsem, yumi soim olsem yumi putim yau long nek bilong gutpela wasman bilong yumi long lusim pasin bilong skelim ol narapela.

18. Hau bai yumi ken soim olsem yumi putim yau long nek bilong gutpela wasman bilong yumi?

¹⁸ Wankain olsem ol sipsip i save putim yau long nek bilong wasman bilong ol, ol disaipel bilong Jisas i save putim yau long nek bilong em. Sapos yumi wok strong long lusim pasin bilong tingting planti long ol samting yumi nidim na lusim pasin bilong skelim ol narapela, Jehova na Jisas bai blesim hatwok bilong yumi. Maski yumi bilong “liklik lain sipsip” o yumi bilong “ol arapela sipsip,” yumi ken wok yet long putim yau na bihainim nek bilong gutpela wasman bilong yumi. (Luk 12:32; Jon 10:11, 14, 16) Long neks atikol, yumi bai stori long 2-pela samting em Jisas i tokim ol disaipel bilong em long ol i mas mekim.