Moses i tok, sapos yumi bihainim ol lo bilong God, bai yumi kisim blesing bilong God. (Lo 10:13; 11:27) I no olsem yumi pret long panismen na yumi bihainim tok bilong God, nogat. Ol gutpela pasin bilong God i kirapim yumi long bihainim tok bikos yumi laikim em na yumi no laik mekim ol samting bilong mekim em i bel hevi. “Pasin bilong laikim God i olsem, yumi bihainim ol lo bilong em.”—1 Jon 5:3.

Tasol hau bai pasin bilong bihainim tok bilong God i mekim na em i blesim yumi? Skelim tupela rot.

“Mi Jehova, mi God bilong yupela, Mi tasol mi save skulim yupela long ol samting we inap helpim yupela, . . . stiaim yupela long rot yupela i mas wokabaut long en.” —AISAIA 48:17.

Jehova God, Krieta bilong yumi, i save long yumi na givim ol tok em yumi nidim bilong stiaim yumi. Sapos yumi laik bai ol tok bilong em i helpim yumi long mekim ol gutpela disisen, yumi mas kisim save long ol tok i stap long Ol Skripsa Holi long ol samting em God i laik yumi mas mekim na bihainim.

“Ol man i harim tok bilong God na bihainim, ol i ken amamas!”—LUK 11:28.

Long nau, planti milion manmeri i bihainim Tok Bilong God ol i stap amamas tru. Olsem, tingim wanpela man long Spen i gat pasin bilong belhat hariap na em i save mekim hatpela pasin long ol narapela—long meri bilong em tu. Wanpela taim em i ritim tok em Moses i raitim long pasin isi bilong Josep, pikinini bilong Jekop. Ol i salim Josep olsem sleiv na bihain ol i kalabusim em nating; tasol em i stap isi yet, bel isi, na fogivim ol. (Stat, sapta 37-45) Dispela man long Spen i tok: “Taim mi tingim eksampel bilong Josep, dispela i kirapim mi long kisim pasin isi, gutpela pasin, na bosim bel. So nau mi amamas long laip bilong mi.”

Ol Skripsa Holi i gat sampela tok moa long pasin yumi mas mekim long ol narapela. Bai yumi kisim sampela save moa long dispela long neks atikol.