Long atikol i kamap paslain, yumi bin skelim sain em Jisas i kolim. Dispela sain i stap olsem evidens bilong makim olsem Kingdom Bilong God i kamap pinis long heven na Jisas Krais i stap olsem King.

Baibel i tok taim Jisas i kisim namba long Kingdom, em bai rausim Satan na ol ensel nogut long heven. Nau ol inap mekim sampela samting long graun, em wanpela risen na ol samting i go nogut kirap long yia 1914.—Revelesen 12:7, 9.

Maski hevi bilong graun i go nogut moa, Jisas, em King bilong Kingdom Bilong God, i mekim ol samting bilong helpim ol manmeri long olgeta hap bilong graun. Long rot bilong wok bilong skulim ol man long Baibel em Jisas i bin tok profet long en, planti man i kisim save na bihainim ol stiatok bilong Baibel long laip bilong ol. (Aisaia 2:2-4) Planti milion man i holim stretpela tingting long wok, mekim i stap bilong famili i kamap gutpela moa, na amamas long ol samting ol i gat na ol i no stap olsem wokboi bilong ol dispela samting. Save ol i kisim i helpim ol long stap gut long nau na kamap lain em God i laik bai ol i stap aninit long Kingdom bilong em.

Jisas i kirap mekim wok pinis long heven, tasol ol gavman bilong ol man i mekim yet wok bos long graun. Maski i olsem, God i tokim Jisas: “Yu go namel long ol birua bilong yu na bosim ol.” (Buk Song 110:2) Klostu nau Jisas bai pinisim tru olgeta man i birua long em na bringim bel isi long ol man i daun long God.

Long dispela taim Kingdom Bilong God bai

• Pinisim lotu giaman. Ol lotu i skulim ol man long ol stori giaman long God na i givim hatwok long ol man ol bai pinis olgeta. Baibel i tok piksa long lotu giaman olsem pamukmeri. Planti man bai kirap nogut long bagarap bai painim lotu giaman.—Revelesen 17:15, 16.

• Pinisim wok bos bilong ol man. Kingdom Bilong God bai pinisim olgeta wok bos bilong ol man.—Revelesen 19:15, 17, 18.

• Pinisim ol man nogut. Wanem samting bai painim ol man i strong long mekim pasin nogut na i no laik bihainim tok bilong God? “Ol man nogut bai no i stap moa long graun.”—Provep 2:22.

• Pinisim Satan na ol spirit nogut. Satan na ol spirit nogut bai “i no ken giamanim moa olgeta lain manmeri.”—Revelesen 20:3, 10.

Wanem samting bai kamap long lain i daun long Kingdom Bilong God?

Taim Jisas i stap King long heven, em bai mekim planti samting moa winim ol gavman bilong ol man. Lain 144,000 em God i kisim ol namel long ol manmeri, ol bai helpim Jisas long mekim wok bos. (Revelesen 5:9, 10; 14:1, 3) Em bai mekim ol samting na bai laik bilong God i kamap long graun. Kingdom Bilong God bai mekim wanem long ol manmeri long graun?

• Pinisim sik na dai. “No gat wanpela man i stap long dispela ples bai tok: ‘Mi sik.’” na “bai i no gat dai moa.”—Aisaia 33:24; Revelesen 21:4.

• Kamapim bel isi tru na ol man bai no pret. “Ol pikinini man bilong yu bai stap bel isi tru,” na “olgeta wan wan bai sindaun aninit long rop wain na diwai fik bilong em yet, na i no gat wanpela bai mekim ol i pret.”—Aisaia 54:13; Maika 4:4.

• Kamapim ol wok ol man i amamas long en. “Ol manmeri mi bin makim, ol bai amamas tru long ol wok em han bilong ol yet i mekim. Ol bai no inap wok hat nating.”—Aisaia 65:22, 23.

• Stretim graun. “Ples nating na ples em graun i drai, ol bai amamas, na ples drai nating bai amamas na ol plaua bai karamapim ples olsem plaua safron.”—Aisaia 35:1.

• Skulim ol man long ol samting ol i mas mekim na bai ol i stap oltaim oltaim. “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.”—Jon 17:3.

God i laik bai yu amamas long ol dispela blesing. (Aisaia 48:18) Neks atikol bai stori long samting yu ken mekim long nau na bai yu tu i ken kisim ol dispela blesing long bihain.