Samting i Stret na i No Stret: Rot Yu Mas Makim
Ol pasin i stret o i no stret yumi makim long bihainim bai mekim yumi stap amamas o i no stap amamas. Jehova God i save long dispela. Dispela i as na em i laik bai yumi bihainim ol lo bilong em long i stap bilong yumi.
Jehova i laik bai yumi stap bel isi na stap amamas.
“Mi Jehova, mi God bilong yupela, mi tasol mi save skulim yupela long ol samting we inap helpim yupela, mi tasol mi save stiaim yupela long rot yupela i mas wokabaut long en. Sapos yupela i putim gut yau long ol lo bilong mi, orait bel isi bilong yupela bai kamap olsem wara i save ron na stretpela pasin bilong yupela bai kamap olsem ol weiv bilong solwara.”—Aisaia 48:17, 18.
God em i Krieta bilong yumi, olsem na em i save long gutpela rot bilong yumi ken i stap gut. Em i laik bai yumi bihainim ol tok bilong em bikos dispela bai helpim yumi long i stap gut. Taim yumi bihainim ol tok bilong God, i no gat wok long yumi gat tupela tingting olsem samting yumi makim long mekim bai kamap gut o nogat. Oltaim yumi bai makim rot i stret long bihainim, em rot bai givim bel isi na amamas long yumi.
Jehova i no save askim yumi long mekim samting yumi no inap mekim.
“Dispela lo nau mi givim long yupela, em i no hatwok long yupela i kliagut long en, na i no hatwok long yupela i bihainim.”—Lo 30:11.
Bilong bihainim ol lo bilong God long stretpela pasin, yumi mas senisim tingting na pasin bilong yumi. Tasol Jehova i no askim yumi long mekim samting yumi no inap mekim. Em Krieta bilong yumi, so em i save long ol samting yumi inap long mekim. Taim yumi kisim save long Jehova, yumi bai luksave olsem “ol lo bilong em i no givim hevi long yumi.”—1 Jon 5:3.
Jehova i tok promis long helpim ol man i makim olsem ol i laik bihainim ol lo bilong em long i stap bilong ol.
“Mi, Jehova, God bilong yu, mi wok long holim rait han bilong yu, Mi tokim yu, ‘Yu no ken pret. Mi bai helpim yu.’”—Aisaia 41:13.
Yumi inap bihainim ol stretpela lo bilong God bikos em bai helpim yumi. Em bai helpim yumi long rot bilong Tok bilong em, em Baibel, dispela bai strongim yumi na yumi wetim gutpela samting bai kamap bihain.
Planti milion manmeri long olgeta hap bilong graun i lukim olsem taim ol i bihainim ol lo bilong Baibel, dispela i helpim sindaun bilong ol long kamap gutpela moa. I gutpela moa long kisim sampela save moa long ol gutpela tok i stap long Baibel. Yu ken kirap mekim olsem long rot bilong skelim dispela buklet Stap Amamas Oltaim! em Baibel i as bilong ol tok bilong en na em i stap long jw.org/tpi, i no gat pe. Em i gat ol dispela lesen:
-
Hau Baibel Inap Helpim Yu?
-
Baibel i Tok Promis Long Gutpela Sindaun
-
Yu Inap Trastim Ol Tok Bilong Baibel?
Taim yu skelim Tok Bilong God, em Baibel, bai yu luksave olsem ol tok bilong en i stret long nau tu; na yu “inap trastim ol tok bilong em, nau na i go inap oltaim bihain.” (Buk Song 111:8) Taim yumi bihainim ol stretpela lo bilong Baibel, dispela em i nambawan rot long bihainim long i stap bilong yumi. Tasol God i no fosim yumi long mekim olsem. (Lo 30:19, 20; Josua 24:15) Em samting yumi wan wan i mas makim long mekim.
