Long dispela atikol na ol atikol i kamap paslain, isi isi yumi kisim bekim bilong dispela askim, God em i husat? Long Baibel yumi kisim save olsem nem bilong em Jehova na pasin laikim em namba wan pasin bilong em. Na tu, yumi bin stori long wanem ol samting em i mekim pinis na ol samting em bai mekim bilong helpim olgeta manmeri. Tasol i gat planti samting moa long God em yumi mas kisim save long en, ating yu laik save hau dispela inap helpim yu.

Jehova i promis olsem “sapos yu wok long painim em, em bai kamapim em yet long yu.” (1 Stori 28:9) Tingim gutpela presen yu inap kisim taim yu wok long painim na kisim save long God—“Jehova em i pren tru”! (Buk Song 25:14) Olsem wanem dispela kain pasin pren inap helpim yu?

Amamas tru. Baibel i stori long Jehova olsem “God bilong amamas.” (1 Timoti 1:11) Taim yu wok long i go klostu long em na bihainim ol pasin bilong em, bai yu amamas tru, bel na tingting bai i stap isi, na bai yu gat gutpela helt. (Buk Song 33:12) Yu inap i stap amamas long nau—sakim ol tingting na pasin we inap bagarapim yu, kisim ol gutpela pasin, na stap gutpela pren bilong ol narapela. Bai yu wanbel long tok bilong man bilong raitim song, em i tok: “Mi bai go klostu long God, . . . dispela i gutpela long mi.”—Buk Song 73:28.

Tingim na lukautim yumi wan wan. Jehova i promis long ol wokman bilong em: “Bai mi givim edvais long yu na ai bilong mi bai stap long yu.” (Buk Song 32:8) Dispela i makim olsem Jehova i save tingim olgeta wan wan wokman bilong em na lukautim ol long ol samting ol i nidim. (Buk Song 139:1, 2) Taim yu gat gutpela pasin pren wantaim Jehova, yu bai luksave olsem oltaim em i stap bilong helpim yu.

Gutpela sindaun long bihain. Jehova God i helpim yu long kisim save long rot bilong i stap amamas na laip bilong yu bai i gat as bilong en long nau, na em i opim rot tu long yu bai kisim gutpela sindaun long bihain. (Aisaia 48:17, 18) Baibel i tok: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.” (Jon 17:3) Long dispela taim bilong hevi, hop God i givim i olsem wanpela anka i “stap strong na i no inap surik liklik.”—Hibru 6:19.

Dispela em sampela bilong ol bikpela risen long yumi mas save gut long God na i kisim gutpela pasin pren wantaim em. Yu inap toktok wantaim wanpela Witnes Bilong Jehova o go long jw.org/tpi bilong kisim sampela save moa.