1. Wai na aposel Pol i ken amamas taim em i tingim bek ol samting i kamap long laip bilong em?

 APOSEL POL i save olsem taim bai kamap na ol bai kilim em i dai, tasol i gat planti risen long em i amamas long laip bilong em. Taim em i tingim bek laip bilong em, i stret long em i tok: “Mi ran long dispela resis i go inap long pinis bilong en, na mi bin holimpas bilip.” (2 Tim. 4:​6-8) Pol i bin mekim ol gutpela disisen long mekim wok bilong Jehova, na em i save olsem Jehova i amamas long em. Yumi tu i laik mekim ol gutpela disisen na bai God i ken orait long yumi. Hau yumi ken mekim olsem?

2. Wanem insait bilong dispela tok olsem larim bilip i bosim wokabaut bilong yumi?

² Pol i tok long em yet na ol narapela wanbilip Kristen olsem: “Bilip i bosim wokabaut bilong yumi, na i no ol samting yumi lukim long ai.” (2 Kor. 5:7) Wanem mining bilong tok bilong Pol? Long Baibel, sampela taim dispela tok “wokabaut” i makim pasin man i bihainim long laip bilong em. Taim man i larim ol samting em i lukim long ai i bosim wokabaut bilong em, em i save mekim ol disisen long rot bilong ol samting em i lukim, harim, na pilim. Tasol taim man i larim bilip i bosim wokabaut bilong em, em i save larim pasin bilong em long trastim God Jehova i stiaim ol disisen em i mekim. Ol samting em i mekim i soim olsem em i bilip tru olsem God bai givim gutpela pe long em, em i bilip olsem em bai kisim helpim taim em i bihainim ol edvais bilong Jehova i stap long Baibel.—Sng. 119:66; Hib. 11:6.

3. Wanem gutpela samting i save kamap taim yumi larim bilip i bosim wokabaut bilong yumi? (2 Korin 4:18)

³ Em tru olsem yumi olgeta i save mekim sampela disisen we yumi larim ol samting yumi lukim, harim, na pilim i stiaim yumi. Sapos yumi larim tasol ol samting yumi lukim o harim i stiaim yumi taim yumi laik mekim ol bikpela disisen, dispela inap kamapim ol hevi. Bilong wanem? Long wanem, sampela taim ol samting yumi  lukim na harim inap giamanim yumi. Maski ol dispela samting i no giamanim yumi, sapos yumi larim tasol ol samting yumi lukim, harim, na pilim i bosim wokabaut bilong yumi, yumi inap sakim laik bilong God o tok kaunsel bilong em. (Ekl. 11:9; Mat. 24:​37-39) Tasol taim yumi larim bilip i bosim wokabaut bilong yumi, yumi bai mekim ol disisen we “Bikpela i orait long en.” (Efe. 5:10) Taim yumi bihainim tok bilong God, dispela bai mekim bel bilong yumi i stap isi na yumi bai stap amamas tru. (Sng. 16:​8, 9; Ais. 48:​17, 18) Na sapos yumi wok yet long larim bilip i bosim wokabaut bilong yumi, yumi bai stap laip oltaim long bihain.—Ritim 2 Korin 4:18.

4. Olsem wanem yumi ken save sapos yumi larim bilip o ol samting yumi lukim long ai i bosim wokabaut bilong yumi?

⁴ Olsem wanem yumi ken save sapos yumi larim bilip o ol samting yumi lukim long ai i bosim wokabaut bilong yumi? I gutpela yumi givim ol dispela askim long yumi yet olsem: Wanem ol samting i stiaim ol disisen bilong yumi? Yumi larim tasol ol samting yumi lukim long ai i stiaim ol disisen bilong yumi? O yumi larim pasin bilong yumi long trastim Jehova na ol edvais bilong em i stiaim ol disisen bilong yumi? Yumi ken stori long hau yumi ken larim bilip i bosim yet wokabaut bilong yumi long tripela bikpela samting: taim yumi laik makim wok mani, taim yumi laik makim poroman bilong maritim, na taim yumi kisim daireksen i kam long oganaisesen. Long olgeta wan wan bilong ol, yumi bai stori long ol samting yumi ken tingim na bai yumi ken mekim ol gutpela disisen.

TAIM YU LAIK MAKIM WOK MANI

5. Yumi mas tingim wanem samting taim yumi laik makim wok mani yumi bai mekim?

⁵ Yumi olgeta i laik mekim ol samting bilong lukautim yumi yet na lukautim famili bilong yumi long ol samting yumi nidim. (Ekl. 7:12; 1 Tim. 5:8) Sampela wok mani i gat gutpela pe. Pe em man i kisim long kain wok olsem inap helpim em long baim ol samting em i nidim long wan wan de, na tu, putim sampela mani i stap bilong yusim long bihain. Tasol ol narapela wok mani i save givim pe i liklik tru, na mani man i kisim inap helpim em long baim tasol ol samting famili i nidim. Taim yumi skelim wanpela wok mani yumi laik kisim, i stret long yumi skelim hamas mani yumi bai kisim long dispela wok. Tasol sapos yumi tingim tasol hamas mani yumi bai kisim long dispela wok, orait yumi larim ol samting yumi lukim long ai i stiaim disisen bilong yumi.

6. Olsem wanem yumi ken larim bilip i bosim wokabaut bilong yumi taim yumi laik makim wok mani? (Hibru 13:5)

⁶ Sapos yumi larim bilip i bosim wokabaut bilong yumi, yumi bai skelim tu hau dispela wok mani yumi laik kisim inap mekim sampela samting long pasin pren bilong yumi wantaim Jehova. Yumi inap askim yumi yet olsem: ‘Taim mi kisim dispela wok mani, mi bai insait long ol pasin em Jehova i nolaik tru long en?’ (Prov. 6:​16-19) ‘Em inap pasim mi long lotuim Jehova na mekim na mi stap longwe long famili bilong mi inap longpela haptaim?’ (Fili. 1:10) Sapos bekim bilong yu long ol dispela askim em yes, orait em i savetingting long yu no ken kisim dispela wok, maski em bai hatwok long yu painim narapela wok mani. Yumi larim bilip i bosim wokabaut bilong yumi, olsem na yumi mekim ol disisen we i soim olsem yumi bilip olsem Jehova bai lukautim yumi long ol samting yumi nidim.—Mat. 6:33; ritim Hibru 13:5.

7-8. Olsem wanem wanpela brata long Saut Amerika i larim bilip i bosim wokabaut bilong em? (Lukim tu piksa.)

⁷ Wanpela brata long Saut Amerika, em nem bilong em Javier, a em i luksave olsem em i bikpela samting long larim bilip i bosim wokabaut bilong em. Em i tok: “Mi aplai long wanpela gutpela wok na pe bilong en i antap moa winim pe bilong olpela wok bilong mi na mi bai kisim bikpela amamas tu long mekim dispela wok.” Tasol Javier i gat bikpela laik tru long mekim wok painia. Em i  tok moa: “Ol i tok bikpela bosman bai mekim intaviu long mi. Paslain long intaviu, mi beten askim Jehova long helpim mi, na mi bilip tru olsem Jehova i save pinis long wanem gutpela rot bilong helpim mi. Mi laik kisim wok mani we mi bai mekim planti wok na i gat bikpela pe, tasol mi no laik kisim dispela wok sapos em bai no inap helpim mi long winim ol mak bilong bilip mi putim.”

⁸ Javier i tok: “Long taim bilong intaviu, bosman i tokim mi olsem planti taim mi bai wok ovataim. Long gutpela pasin, mi tokim em olsem mi no inap mekim olsem bikos long wok lotu bilong mi.” Javier i tok nogat long kisim dispela wok. Tupela wik bihain, em i kirap long mekim wok painia. Na bihain long dispela yia, em i painim wanpela pat-taim wok. Em i tok: “Jehova i harim ol beten bilong mi na em i opim rot long mi kisim wanpela wok we i stret wantaim painia sediul bilong mi. Mi amamas tru long kisim wok mani we i opim rot long mi ken lusim bikpela haptaim moa long mekim wok bilong Jehova na helpim ol bratasista bilong mi.”

9. Yu kisim wanem skul long stori bilong Trésor?

⁹ Olsem wanem sapos yumi luksave olsem wok mani yumi holim long nau i no helpim yumi long pas gut wantaim Jehova? Skelim stori bilong Trésor, em i bilong Kongo. Em i tok: “Nupela wok mani mi kisim em wanpela wok we mi laikim tru. Pe mi kisim long dispela wok i tripela taim moa winim pe mi bin kisim long olpela wok bilong mi, na ol narapela i save rispektim mi tru.” Tasol planti taim Trésor i no save go long ol miting bikos em i save wok ovataim. Na tu, ol narapela i save putim presa long em long haitim pasin giaman bilong kampani. Trésor i laik lusim dispela wok mani, tasol em i pret olsem nogut em i no kisim gen narapela wok. Wanem samting i helpim em? Em i tok: “Habakuk 3:​17-19 i helpim mi long kliagut olsem maski mi lusim wok mani bilong mi, Jehova bai lukautim mi. So mi risain long wok.” Em i tok moa olsem: “Planti bosman bilong kampani i ting olsem man i laik kisim wok i gat bikpela pe, em bai redi long lusim olgeta samting, olsem haptaim em i save lusim wantaim famili  na ol wok lotu samting bilong kisim dispela wok. Mi amamas olsem mi lukautim gut pasin pren bilong mi wantaim Jehova na famili bilong mi. Wanpela yia bihain, Jehova i helpim mi long painim wanpela gutpela wok mani we mi kisim inap pe bilong lukautim mi long ol samting mi nidim na mi gat bikpela taim moa bilong mekim ol wok Kristen. Taim yumi putim Jehova i stap nambawan long laip bilong yumi, ating pastaim yumi bai sot liklik long mani, tasol Jehova bai lukautim yumi.” Yes, sapos yumi trastim ol edvais na ol promis bilong Jehova, yumi bai wok yet long larim bilip i bosim wokabaut bilong yumi na em bai blesim yumi.

TAIM YU LAIK MAKIM POROMAN BILONG MARITIM

10. Wanem samting inap mekim na wanpela i larim ol samting em i lukim long ai i stiaim em taim em i laik makim poroman bilong maritim?

¹⁰ Marit em presen i kam long Jehova, na em nomol long ol singel i pilim olsem ol i laik marit. Taim wanpela sista i laik makim poroman bilong maritim, ating em inap tingim pasin bilong wanpela brata, lukluk bilong em, gutnem bilong em, em i gat wok mani o nogat, ol wok em i mekim insait long famili, na tu, em bai tingim hau em i save mekim em i amamas. b Ol dispela samting ol i bikpela samting. Tasol sapos em i skelim tasol ol dispela samting, em inap larim ol samting em i lukim long ai i stiaim em.

11. Olsem wanem wanpela inap larim bilip i bosim wokabaut bilong em taim em i laik makim poroman bilong maritim? (1 Korin 7:39)

¹¹ Jehova i amamas tru long ol brata na sista em ol i bihainim edvais bilong em taim ol i laik makim poroman bilong maritim! Olsem, ol i bihainim tok Baibel i mekim olsem ol i mas wet inap long ol i abrusim dispela haptaim we ol i “yangpela tumas” paslain long ol i kirap prenim wanpela bilong maritim. (1 Kor. 7:36) Ol i tingim wanpela olsem em bai stap gutpela poroman marit bilong ol sapos dispela man o meri i bihainim ol pasin em Jehova i tok long gutpela maritman o gutpela maritmeri i mas bihainim. (Prov. 31:​10-13, 26-28; Efe. 5:33; 1 Tim. 5:8) Sapos wanpela husat i no Witnes i gat laik long ol, ol i no inap kirap long prenim em, nogat. Ol bai bihainim tok Baibel i mekim olsem ol i mas “maritim man [o meri] i bihainim Bikpela,” olsem i stap long 1 Korin 7:39. (Ritim.) Ol i wok yet long larim bilip i bosim wokabaut bilong ol, na ol i save tru olsem Jehova inap lukautim ol gut long ol samting bilong bel na tingting winim ol narapela.—Sng. 55:22.

12. Yu kisim wanem skul long stori bilong Rosa?

¹² Skelim ekspiriens bilong Rosa, em wanpela painia long Kolambia. Wok bilong em i mekim na planti taim em i save bung wantaim wanpela man husat i no Witnes na dispela man i gat laik long em. Rosa tu i laikim em. Rosa i tok: “I luk olsem em i gutpela man. Em i save volantia long helpim komiuniti bilong em na em i gat helti laip stail. Mi laikim hau em i save mekim mi amamas. Em i gat olgeta pasin em mi laik bai wanpela man i mas i gat bilong mi ken maritim em, tasol em i no wanpela Witnes.” Rosa i tok moa: “Mi hatwok tru long tok nogat long em bikos mi gat laik long em tu. Long dispela taim, mi pilim wanpis na mi laik marit, tasol mi no painim wanpela insait long tok i tru.” Maski i olsem, Rosa i no tingting tasol long ol samting em i lukim. Em i wok long tingim tingim hau dispela disisen bai bagarapim pasin pren bilong em wantaim Jehova. Olsem na em i stop olgeta long kontektim dispela man na em i bisi long mekim wok lotu bilong em. Bihain tasol long dispela, ol i singautim em long go long Skul Bilong Ol Kingdom Evanselis, na nau em i mekim wok olsem spesel painia. Rosa i tok: “Jehova i mekim mi stap amamas tru.” Maski em hatwok long larim bilip i bosim wokabaut bilong yumi long ol samting em yumi pilim tru long bel, planti taim gutpela samting i save kamap taim yumi mekim olsem.

 TAIM YUMI KISIM DAIREKSEN I KAM LONG OGANAISESEN

13. Olsem wanem yumi inap larim ol samting yumi lukim long ai i bosim wokabaut bilong yumi taim yumi kisim daireksen i kam long oganaisesen?

¹³ Planti taim yumi kisim daireksen i kam long oganaisesen—long rot bilong ol elda long kongrigesen, wasman sekit, brens ofis, o Gavening Bodi—bilong stiaim yumi long ol wok lotu bilong yumi. Tasol olsem wanem sapos sampela taim yumi no kliagut long risen na yumi kisim dispela daireksen? Ating yumi tingim tasol ol hatwok yumi inap bungim taim yumi bihainim dispela daireksen. Na yumi inap tingim tu ol pasin kranki bilong ol brata husat i givim dispela daireksen.

14. Wanem samting bai helpim yumi long larim bilip i bosim wokabaut bilong yumi taim yumi kisim daireksen i kam long oganaisesen? (Hibru 13:17)

¹⁴ Taim yumi larim bilip i bosim wokabaut bilong yumi, yumi bilip olsem Jehova i stiaim oganaisesen bilong em na em i save gut long i stap bilong yumi. Olsem na kwiktaim yumi bihainim daireksen yumi kisim, na yumi amamas long mekim olsem. (Ritim Hibru 13:17.) Yumi luksave olsem pasin bilong yumi long bihainim tok i helpim kongrigesen long stap wanbel. (Efe. 4:​2, 3) Yumi bilip olsem maski ol brata i go pas long yumi ol i no gutpela olgeta, Jehova bai blesim pasin bilong yumi long bihainim tok. (1 Sml. 15:22) Na long taim stret, em bai stretim wanem ol samting i gat wok long stretim.—Mai. 7:7.

15-16. Wanem samting i helpim wanpela brata long larim bilip i bosim wokabaut bilong em maski em i gat tupela tingting long daireksen em i kisim? (Lukim tu piksa.)

¹⁵ Skelim wanpela ekspiriens i soim gutpela samting i save kamap long pasin bilong larim bilip i bosim wokabaut bilong yumi. Long Peru, klostu olgeta manmeri i save mekim tokples Spen, tasol planti asples manmeri i save mekim yet ol tokples bilong ol. Wanpela bilong ol dispela tokples em Kesua. Inap planti yia, ol bratasista i  mekim tokples Kesua i painim ol manmeri i mekim dispela tokples long teritori bilong ol. Tasol bilong bihainim ol lo gavman i putim, ol i mekim ol senis long pasin ol i bihainim long autim tok. (Rom 13:1) Dispela i mekim na sampela bratasista i tingting planti olsem dispela inap pasim wok ol i mekim long teritori. Maski i olsem, ol i bihainim ol nupela senis, na Jehova i blesim hatwok bilong ol long painim planti manmeri i mekim tokples Kesua.

¹⁶ Kevin, em wanpela elda long kongrigesen i save mekim tokples Kesua, em i wanpela bilong ol bratasista em ol i tingting planti long dispela nupela senis. Em i tok: “Mi tingting olsem, ‘Hau bai mipela painim ol manmeri em ol i save mekim tokples Kesua?’” Kevin i mekim wanem? Em i tok: “Mi tingim tok bilong Provep 3:5. Na mi tingim Moses. Em i mas kisim lain Israel i kam ausait long Isip na bringim ol i go long wanpela hap we i luk olsem ol i no gat rot moa, na em isi long ol Isip i kilim ol i dai. Maski i olsem, Moses i bihainim tok na Jehova i blesim em long wanpela narakain rot.” (Kis. 14:​1, 2, 9-11, 21, 22) Kevin i redi long mekim senis na bihainim nupela rot long wok autim tok bilong em. Wanem samting i kamap long dispela? Em i tok: “Mi kirap nogut long hau Jehova i blesim mipela. Pastaim, mipela i save wokabaut planti long wok autim tok na sampela taim mipela i painim wanpela o tupela manmeri tasol em ol i save mekim tokples Kesua. Tasol nau mipela i autim tok long ol teritori we i gat planti manmeri em ol i save mekim tokples Kesua. Dispela i mekim na mipela i save toktok wantaim planti man, mipela i gat ol gobek, na ol Baibel stadi. Planti manmeri moa i kam long ol miting.” Tru tumas, taim yumi larim bilip i bosim wokabaut bilong yumi, oltaim Jehova i save blesim yumi.

17. Yu lainim wanem samting long dispela atikol?

¹⁷ Yumi bin stori long hau yumi ken larim bilip i bosim wokabaut bilong yumi long tripela bikpela samting. Tasol yumi mas wok yet long larim bilip i bosim wokabaut bilong yumi long ol narapela samting tu long laip bilong yumi, olsem taim yumi laik makim ol amamas na taim yumi laik mekim ol disisen long sait bilong ediukesen o pasin bilong mekim bikpela long ol pikinini. Maski wanem disisen yumi laik mekim, yumi no ken larim tasol ol samting yumi lukim long ai i stiaim yumi, nogat. Yumi mas larim tu pasin pren bilong yumi wantaim Jehova, ol edvais bilong em, na tok promis bilong em long lukautim yumi i stiaim yumi. Sapos yumi mekim olsem, yumi bai “wokabaut long nem bilong Jehova, God bilong [yumi], inap oltaim oltaim.”—Mai. 4:5.