1. Wanem wanpela samting i mekim na lain bilong Jehova i no wankain long ol manmeri bilong dispela graun?

 WANPELA samting i mekim na lain bilong Jehova i no wankain long ol lain em ol i tok ol i Kristen, em pasin bilong yumi long givim bel tru long autim tok. (Tai. 2:14) Tasol sampela taim, yu inap pilim olsem yu no amamas tumas long autim tok. Ating yu pilim wankain olsem wanpela brata husat i givim bel long mekim wok elda, em i tok: “Sampela taim, mi no gat laik long autim tok.”

2. Wanem samting inap mekim na sampela taim yumi no givim bel tumas long autim tok?

² Ating yumi amamas moa long insait long ol narapela wok lotu, tasol yumi no amamas long autim tok. Bilong wanem? Ating yumi lukim ol gutpela samting i kamap hariap na yumi amamas taim yumi insait long wok bilong sanapim na lukautim ol Haus Kingdom samting, helpim disasta rilif wok, o strongim ol bratasista bilong yumi. Yumi pilim bel isi na pasin laikim i stap namel long yumi taim yumi wok wantaim ol bratasista bilong yumi, na yumi save olsem ol i amamas long ol samting yumi mekim bilong helpim ol. Tasol ating inap planti yia yumi autim tok long seim teritori na i no gat gutpela samting i kamap. O yumi inap bungim ol manmeri em ol i no laik harim tok yumi autim. Na yumi save tu olsem taim bilong pinis i wok long i kam klostu tru, olsem na ol man bai birua moa yet long yumi. (Mat. 10:22) Wanem samting inap helpim yumi long wok yet long givim bel tru long autim tok?

3. Olsem wanem Luk 13:​6-9 i kamapim klia pasin bilong Jisas long givim bel tru long autim tok?

³ Yumi inap lainim sampela samting long pasin bilong givim bel tru long wok bilong autim tok taim yumi skelim eksampel bilong Jisas. Taim em i stap long graun, em i no lusim pasin bilong givim bel tru long autim tok. Bihain long sampela haptaim i lus, em i  mekim bikpela wok moa bilong autim tok. (Ritim Luk 13:​6-9.) Jisas i mekim tok piksa long wanpela man bilong lukautim diwai fik i lusim 3-pela yia long lukautim wanpela diwai fik i no karim kaikai. Olsem tasol, Jisas i lusim 3-pela yia samting long autim tok long ol Juda, em planti bilong ol i no putim yau long tok em i autim. Tasol wankain olsem man bilong lukautim diwai fik i no givap long lukautim dispela diwai fik, Jisas i no givap long ol manmeri em i autim tok long ol o lusim dispela wok, nogat. Em i givim bel tru long putim tok i go daun long bel bilong ol.

4. Wanem fopela skul yumi inap kisim long eksampel bilong Jisas?

⁴ Long dispela atikol, yumi bai stori long hau Jisas i givim bel tru long autim tok, moa yet long laspela 6-pela mun bilong wok autim tok bilong em. (Lukim “After these things” long stadi nout bilong Luk 10:​1, long Study Bible.) Taim yumi kisim skul long ol tok em i skulim ol man long en na bihainim pasin bilong em, dispela bai helpim yumi long givim bel tru long autim tok long nau. Yumi ken stori long eksampel bilong Jisas long 4-pela rot: (1) Em i putim tingting olgeta long laik bilong Jehova, (2) em i kliagut na bihainim ol tok profet bilong Baibel, (3) em i bilip olsem Jehova bai helpim em, na (4) em i bilip yet olsem sampela bai putim yau long em.

EM I PUTIM TINGTING OLGETA LONG LAIK BILONG JEHOVA

5. Olsem wanem Jisas i putim tingting olgeta long mekim laik bilong God?

⁵ Jisas i givim bel tru long autim “gutnius bilong Kingdom” bikos em i save olsem dispela em wok God i laik em i mas mekim. (Luk 4:43) Jisas i putim wok autim tok i stap nambawan samting long laip bilong em. Long ol laspela mun bilong em long mekim wok autim tok, em i go “long ol bikpela taun na ol liklik taun” na em i wok long skulim ol narapela. (Luk 13:22) Na tu, em i trenim sampela moa disaipel long mekim wok autim tok wantaim em.—Luk 10:1.

6. Olsem wanem ol narapela wok bilong Jehova yumi mekim i sapotim wok autim tok? (Lukim tu piksa.)

⁶ Long nau tu, wok bilong autim gutnius em i nambawan bikpela wok Jehova na Jisas i laik yumi mas mekim. (Mat. 24:14; 28:​19, 20) Ol narapela wok bilong Jehova yumi mekim i sapotim wok autim tok. Olsem, taim yumi wokim ol  Haus Kingdom o yumi mekim wok long Betel, dispela i sapotim wok autim tok bilong yumi. Yumi mekim disasta rilif wok bilong helpim ol bratasista bilong yumi long kisim ol samting ol i nidim na dispela bai helpim ol long kirap gen long go long ol miting na autim tok. Taim yumi luksave olsem em i bikpela samting long yumi mas autim tok na yumi tingim olsem em i nambawan wok Jehova i laik yumi mas mekim, dispela bai kirapim yumi long autim tok long olgeta taim. János, em wanpela elda long Hangari, em i tok: “Mi save tingim olsem i no gat narapela wok bilong Jehova em yumi save mekim we bai kisim ples bilong wok autim tok; em nambawan bikpela wok yumi mas mekim.”

7. Wai na Jehova i laik yumi wok yet long autim tok? (1 Timoti 2:​3, 4)

⁷ Yumi ken strongim pasin bilong givim bel tru long autim tok taim yumi tingim ol manmeri olsem Jehova i tingim ol. Em i laik bai planti manmeri moa i harim gutnius na bihainim dispela tok. (Ritim 1 Timoti 2:​3, 4.) Dispela gutnius inap seivim laip bilong ol manmeri, olsem na Jehova i trenim yumi long kamap gutpela moa long pasin bilong yumi long toktok wantaim ol man. Olsem, dispela buklet Laikim Ol Man—Kamapim Ol Disaipel i skulim yumi long hau yumi ken kirapim toktok wantaim ol manmeri na putim mak long kamapim ol disaipel. Maski sapos ol man i no laik putim yau long nau, bihain rot inap op long ol i kisim tok i tru paslain long traipela hevi tru i pinis. Ol tok yumi autim long ol long nau inap kirapim ol long i gat laik long lotuim Jehova long bihain. Tasol dispela inap kamap sapos yumi wok yet long autim tok.

EM I KLIAGUT NA BIHAINIM OL TOK PROFET BILONG BAIBEL

8. Jisas i save long ol tok profet bilong Baibel, na olsem wanem dispela i helpim em long yusim gut taim bilong em?

⁸ Jisas i kliagut long hau truim bilong ol tok profet bilong Baibel bai kamap. Em i save olsem em bai mekim wok autim tok insait long 3 na hap yia tasol. (Dan. 9:​26, 27) Na tu, em i save long tok profet i stori long wanem taim em bai dai na hau em bai dai. (Luk 18:​31-34) Jisas i save long ol tok profet bilong Baibel na dispela i helpim em long yusim gut taim bilong em. Olsem na em i givim bel tru long autim tok na bai em i ken pinisim wok God i givim em long mekim.

9. Wai na ol tok profet bilong Baibel i kirapim yumi long givim bel tru long autim tok?

⁹ Taim yumi kliagut long tok profet bilong Baibel, dispela inap kirapim yumi long givim bel tru long autim tok. Yumi save olsem haptaim yumi stap long en, pinis bilong en i klostu tru. Yumi luksave olsem ol samting i kamap long nau na pasin bilong ol man i kamapim klia olsem yumi stap long haptaim bilong las de em Baibel i tok profet long en. Yumi lukim olsem pasin birua i stap namel long Gavman Inglan-Amerika na Rasia na ol kantri i sapotim Rasia i truim tok profet bilong Baibel olsem king bilong saut na king bilong not bai pait long narapela narapela “long taim bilong pinis.” (Dan. 11:40) Na tu, yumi save olsem tupela fut long imis em Daniel 2:​43-45 i stori long en i makim strongpela Gavman Inglan-Amerika. Yumi bilip olsem klostu tru nau Kingdom Bilong God bai bagarapim na pinisim ol gavman bilong ol man, olsem tok profet i kamapim. Olgeta dispela tok profet i kamapim klia olsem yumi stap klostu tru long pinis bilong dispela haptaim, na dispela i kirapim yumi long givim bel olgeta long autim tok.

10. Long wanem ol narapela rot ol tok profet bilong Baibel i kirapim yumi long givim bel tru long autim tok?

¹⁰ Ol tok profet bilong Baibel i kamapim tu ol tok promis bilong Jehova em yumi laik tru long autim. Carrie, em wanpela sista long Dominiken Ripablik, em i tok: “Ol tok promis bilong Jehova long ol gutpela samting bai painim yumi long bihain i kirapim mi long autim tok i tru long ol narapela.” Em i tok moa: “Taim mi lukim ol hevi ol man i karim long nau, mi luksave olsem ol dispela  tok promis inap helpim ol wankain olsem em i helpim mi.” Ol tok profet bilong Baibel i kirapim yumi long givim bel tru long autim tok bikos yumi save olsem Jehova i sapotim wok autim tok yumi mekim. Leila, em i stap long Hangari, em i tok: “Tok bilong Aisaia 11:​6-9 i save kirapim mi long autim gutnius long ol man em i luk olsem ol i no inap putim yau long ol tok mi autim. Mi save olsem Jehova inap helpim olgeta kain man long mekim senis.” Na Christopher, em wanpela brata long Sambia, em i tok: “Olsem Mak 13:10 i tok profet long en, gutnius i wok long go long olgeta hap bilong graun, na em blesing long mi inap insait long truim dispela tok profet.” Wanem ol tok profet bilong Baibel i kirapim yu long wok yet long autim tok?

EM I BILIP OLSEM JEHOVA BAI HELPIM EM

11. Wai na Jisas i bilip olsem Jehova bai helpim em long wok yet long givim bel tru long autim tok? (Luk 12:​49, 53)

¹¹ Jisas i bilip olsem Jehova bai helpim em long wok yet long givim bel tru long autim tok. Tru, Jisas i gat pasin bilong isi long ol man, tasol em i save olsem gutnius bilong Kingdom bai kirapim ol man long belhat na birua long em. (Ritim Luk 12:​49, 53.) Ol hetman bilong lotu i no laikim ol tok em Jisas i autim long ol man, olsem na planti taim ol i traim long kilim em i dai. (Jon 8:59; 10:​31, 39) Tasol Jisas i wok yet long autim tok bikos em i save olsem Jehova i stap wantaim em. Em i tok: “Mi no stap wanpis, Papa husat i salim mi i kam, em i stap wantaim mi. . . . Em i no lusim mi i stap wanpis, long wanem, oltaim mi save mekim ol samting em i laikim.”—Jon 8:​16, 29.

12. Olsem wanem Jisas i redim ol disaipel bilong em long wok yet long autim tok taim ol man i birua long ol?

¹² Jisas i kirapim ol disaipel bilong em long tingim olsem ol i ken bilip olsem Jehova bai helpim ol. Planti taim em i strongim ol olsem Jehova bai helpim ol, na em bai helpim ol tu long taim ol man i mekim nogut long ol. (Mat. 10:​18-20; Luk 12:​11, 12) Jisas i save olsem planti man bai birua long gutnius, olsem na em i kirapim ol long was gut. (Mat. 10:16; Luk 10:3) Em i tokim ol long no ken subim ol man long putim yau long ol tok ol i autim sapos ol i no laik harim tok. (Luk 10:​10, 11) Na em i tokim ol long ranawe sapos ol man i laik mekim nogut long ol. (Mat. 10:23) Jisas i givim bel tru long autim tok na em i trastim Jehova, tasol em i abrusim tu ol samting we inap givim hevi long em.—Jon 11:​53, 54.

13. Wai na yu ken save tru olsem Jehova bai helpim yu?

¹³ Yumi nidim helpim bilong Jehova long wok yet long givim bel tru long autim tok taim ol man i birua long yumi long nau. (Rev. 12:17) Wai na  yu ken save tru olsem Jehova bai helpim yu? Tingim beten bilong Jisas i stap long Jon sapta 17. Jisas i askim Jehova long lukautim ol aposel, na Jehova i bekim dispela beten. Buk Aposel i stori long hau Jehova i helpim ol aposel long givim bel tru long autim tok maski ol man i birua long ol. Long beten Jisas i mekim, em i askim Jehova long lukautim tu ol man i bilip long ol tok ol aposel i autim. Dispela i makim yu tu. Jehova i wok yet long bekim beten bilong Jisas; Em bai helpim yu wankain olsem em i bin helpim ol aposel.—Jon 17:​11, 15, 20.

14. Hau yumi save olsem yumi bai wok yet long givim bel tru long autim tok? (Lukim tu piksa.)

¹⁴ Pinis i wok long i kam klostu tru, olsem na yumi inap pilim hatwok moa long givim bel olgeta long autim tok. Tasol Jisas i strongim yumi olsem yumi bai kisim helpim yumi nidim long givim bel yet long mekim dispela wok. (Luk 21:​12-15) Olsem Jisas na ol aposel bilong em i bin mekim, yumi larim ol man yet i makim olsem ol bai harim tok yumi autim o nogat, na yumi abrusim pasin bilong tok pait. Maski i gat tambu long wok bilong yumi, ol bratasista bilong yumi i wok yet long autim gutnius bikos ol i bilip olsem Jehova bai helpim ol, na ol i no bilip long strong bilong ol yet. Jehova i bin givim strong long ol wokman bilong em long taim bilong ol aposel, olsem tasol long nau em i givim strong long yumi na bai yumi ken “mekim gut tru wok bilong autim tok” i go inap long mak em i laikim. (2 Tim. 4:17) Yu ken save tru olsem sapos yu bilip olsem Jehova bai helpim yu, yu bai wok yet long givim bel tru long autim tok.

EM I BILIP YET OLSEM GUTPELA SAMTING BAI KAMAP

15. Wanem samting i soim olsem Jisas i bilip olsem gutpela samting bai kamap long wok autim tok bilong em?

¹⁵ Jisas i bilip olsem gutpela samting bai kamap long wok autim tok bilong em. Dispela i helpim em long amamas yet long mekim dispela wok. Olsem, klostu long pinis bilong yia 30 C.E., Jisas i lukim olsem planti man i redi long putim yau long tok em i autim, na em i tok ol i olsem kaikai i redi pinis long gaden. (Jon 4:35) Inap 1-pela yia bihain, em i tokim ol disaipel bilong em olsem: “Planti kaikai i mau pinis long gaden.” (Mat. 9:​37, 38) Na bihain em i kamapim klia gen dispela tok olsem: “Planti kaikai i mau pinis . . . Askim Bosman bilong bungim kaikai long salim ol wokman i go bilong bungim kaikai bilong em.”  (Luk 10:2) Jisas i bilip tru olsem ol manmeri bai putim yau long gutnius em i autim, na em i amamas taim ol i mekim olsem.—Luk 10:21.

16. Olsem wanem ol tok piksa bilong Jisas i kamapim klia olsem gutpela samting bai kamap long wok bilong autim tok? (Luk 13:​18-21) (Lukim tu piksa.)

¹⁶ Jisas i skulim ol disaipel bilong em long bilip olsem gutpela samting bai kamap long wok autim tok bilong ol, na dispela bai strongim ol long givim bel yet long autim tok. Olsem, skelim 2-pela tok piksa bilong em. (Ritim Luk 13:​18-21.) Jisas i yusim sit mastet bilong skulim ol olsem tok bilong Kingdom bai i go long olgeta hap bilong graun na i no gat wanpela samting bai pasim dispela samting long kamap. Na em i yusim yis bilong skulim ol olsem tok bilong Kingdom bai i go long olgeta hap bilong graun na kamapim ol senis em planti man i no inap luksave hariap long en. Long ol dispela rot, Jisas i helpim ol disaipel bilong em long luksave olsem ol tok ol i autim bai kamapim gutpela samting.

17. I gat wanem ol risen na yumi ken bilip yet olsem gutpela samting bai kamap long wok autim tok bilong yumi?

¹⁷ Taim yumi lukim ol gutpela wok i kamap long olgeta hap bilong graun, dispela i kirapim yumi long wok yet long givim bel tru long autim tok. Long olgeta wan wan yia, planti milion man em ol i gat laik long kisim save long tok i tru, ol i save kam long Memorial na stadi long Baibel wantaim yumi. Planti handret tausen manmeri i save kisim baptais na joinim yumi long autim tok. Yumi no save hamas manmeri moa bai putim yau long ol tok yumi autim, tasol yumi save olsem Jehova i wok yet long bungim bikpela lain manmeri em ol bai abrusim bagarap long taim bilong traipela hevi tru em klostu nau bai kamap. (Rev. 7:​9, 14) Bosman bilong bungim kaikai i lukim olsem kaikai i wok yet long redi long gaden, olsem na i gat gutpela risen long yumi mas wok yet long autim tok.

18. Yumi laik bai ol narapela i luksave long wanem samting long yumi?

¹⁸ Long bipo na i kam inap long nau, ol man i luksave olsem yumi ol disaipel bilong Jisas bikos yumi givim bel tru long autim tok. Taim ol manmeri i lukim pasin bilong ol aposel long autim tok na i no pret, “ol i save, bipo [ol] i bin stap wantaim Jisas.” (Apo. 4:13) Taim ol man i lukim yumi autim tok, yumi laik bai ol i luksave olsem yumi tu i bihainim pasin bilong Jisas long givim bel tru long autim tok.