1, 2. (a) Moses i mekim wanem disisen taim em i gat 40 krismas? (Lukim piksa long kirap bilong stadi.) (b) Bilong wanem Moses i redi long karim hevi wantaim lain bilong God?

 MOSES i save long ol gutpela samting bilong Isip. Ol maniman i gat traipela haus. Em i wanfamili bilong Fero. Em “i kisim skul long olgeta gutpela save bilong ol Isip,” olsem save bilong saiens na matematiks. (Apo. 7:22) Em inap kisim planti mani kago, bikpela namba na strong, na gutpela samting we ol man nating bilong Isip i no gat rot long kisim!

² Tasol, taim Moses i gat 40 krismas, em i mekim wanpela disisen na famili bilong Fero i kirap nogut—famili bilong Fero i bin adoptim em. Moses i no laik tu long stap olsem man nating bilong Isip, nogat, em i laik stap olsem sleiv! Em i mekim olsem, long wanem, em i gat bilip. (Ritim Hibru 11:24-26.) Moses i no tingting tasol long ol samting em inap lukim long ai, nogat. Em i bilip long Jehova, em “dispela Man em ol man i no inap lukim long ai,” na em i bilip olsem ol tok promis bilong God bai kamap tru.—Hib. 11:27.

3. Dispela stadi bai kamapim bekim bilong wanem 3-pela askim?

³ Yumi tu i no ken tingting tasol long ol samting yumi inap lukim long ai. Yumi mas stap olsem “man i gat bilip.” (Hib. 10:38, 39) Yumi ken skelim stori bilong Moses long Hibru 11:24-26, na dispela bai strongim bilip bilong yumi. Yumi mas tingim bekim bilong ol dispela askim: Olsem wanem bilip i kirapim Moses long sakim ol laik bilong  skin? Taim ol hevi i painim Moses, olsem wanem bilip i helpim em long amamas yet long gutpela wok em i mekim? Bilong wanem Moses i “tingting strong long gutpela pe em bai kisim”?

4. Moses i luksave olsem, wanem samting i save kamap taim man i “bihainim pasin bilong sin na kisim amamas”?

⁴ Moses i luksave olsem taim man i “bihainim pasin bilong sin na kisim amamas,” dispela em amamas bilong sotpela taim. Ol narapela inap ting olsem maski lain Isip i insait tru long lotuim ol imis na mekim wok bilong ol spirit nogut, Isip i kamap strongpela gavman, na lain bilong Jehova i karim hevi olsem ol sleiv! Tasol Moses i save olsem God inap senisim ol samting. Sindaun bilong ol man nogut i wok long kamap gutpela, tasol Moses i bilip olsem ol bai bagarap na pinis olgeta. Olsem na em i no “bihainim pasin bilong sin na kisim amamas bilong sotpela taim tasol.”

5. Wanem samting bai helpim yumi long sakim “pasin bilong sin na kisim amamas bilong sotpela taim tasol”?

⁵ Olsem wanem yu inap sakim “pasin bilong sin na kisim amamas bilong sotpela taim tasol”? No ken lusim tingting olsem amamas bilong sin i save pinis kwiktaim. Yu mas bilip na tingim olsem “ol manmeri i stap longwe long God, ol bai pinis na laik bilong ol tu bai pinis.” (1 Jon 2:15-17) Tingim hevi bai painim ol man i bihainim pasin bilong sin na ol i no tanim bel. Ol i “wokabaut long rot i wel moa yet” na ol bai “bagarap kwiktaim tumas”! (Sng. 73:18, 19) Sapos traim i painim yu, orait askim yu yet, ‘Mi laik kisim wanem kain laip long bihain?’

6. (a) Bilong wanem Moses “i no laik bai ol i kolim em olsem tumbuna pikinini bilong Fero”? (b) Bilong wanem yu ting olsem Moses i mekim stretpela disisen?

⁶ Bilip bilong Moses i stiaim tingting bilong em long wok em i laik mekim. “Moses i bilip, olsem na taim em i kamap bikpela pinis, em i no laik bai ol i kolim em olsem tumbuna pikinini bilong Fero.” (Hib. 11:24) Moses i no tingting long stap olsem wanfamili bilong Fero na mekim wok bilong God, na yusim mani kago na namba bilong em long helpim lain Israel. Moses i tingting strong long laikim Jehova long bel olgeta, tingting olgeta, na strong olgeta bilong em. (Lo 6:5) Disisen bilong Moses i helpim em long abrusim hevi. Moses i lusim ol gutpela samting bilong Isip, tasol i no longtaim na lain Israel i kisim ol dispela samting! (Kis. 12:35, 36) Fero i kisim bikpela sem stret na em i dai. (Sng. 136:15) Tasol Moses i abrusim bagarap, na God i yusim em long bringim lain Israel i go fri. Laip bilong em i gat as tru bilong en.

7. (a) Olsem Matyu 6:19-21 i kamapim, bilong wanem yumi no ken tingting tasol long ol samting bilong nau? (b) Stori long ekspiriens i soim olsem pasin bilong kisim mani kago i narapela kain long pasin bilong mekim wok bilong God.

⁷ Sapos yu yangpela na yu lotuim Jehova, olsem wanem bilip inap helpim yu long makim wok yu laik mekim? Yu mas tingim laip yu laik kisim long bihain. Sapos yu bilip long ol tok promis bilong God, yu bai mekim wok bilong helpim yu inap sotpela taim tasol, o helpim yu inap oltaim oltaim? (Ritim Matyu 6:19-21.) Sophie i bin skelim dispela askim. Em i savemeri bilong wanpela kain danis (ballet). Ol kampani bilong dispela danis long Amerika i givim skolasip long em, na askim em long mekim bikpela wok long kampani. Sophie i tok: “Mi amamas tru olsem ol narapela i givim biknem long mi. Mi pilim olsem mi gat biknem winim ol wanlain bilong mi. Tasol mi no stap amamas.” Bihain Sophie i lukim vidio (Young People Ask—What Will I Do With My Life?) bilong ol yangpela. Em i tok: “Mi kisim gutpela sindaun na ol sapota i givim biknem long mi, tasol mi no givim bel olgeta long lotuim Jehova. Mi beten strong long God. Bihain, mi lusim wok bilong danis.” Sophie i pilim olsem wanem long disisen bilong em? Em i tok: “Mi no misim laip bilong mi long bipo. Long nau, mi stap amamas tru. Mi mekim wok painia wantaim man bilong mi. I no olgeta man i save long mipela, na mipela i no gat planti mani kago. Tasol mipela i stap pren bilong Jehova, mipela i gat ol Baibel stadi, na mipela i gat ol mak mipela i laik winim long wok bilong God. Mi no rigret long wanpela samting.”

8. Wanem skultok bilong Baibel bai helpim ol yangpela long mekim disisen long wok ol i laik mekim?

 ⁸ Jehova i save long rot bilong helpim yu. Moses i tok: “Harim gut wanem ol samting God, Bikpela bilong yumi, i tok yupela i mas mekim. Yupela i mas aninit long God, na bihainim olgeta tok bilong em. Yupela i mas laikim em tru, na amamas tru wantaim bel na tingting bilong yupela long mekim wok bilong em. Na yupela i mas bihainim olgeta lo bilong em, nau mi givim long yupela. Sapos yupela i bihainim, bai yupela i ken stap gut.” (Lo 10:12, 13) Taim yu yangpela yet, makim wok we bai opim rot long yu inap laikim Jehova na mekim wok bilong em “wantaim bel na tingting” olgeta. Taim yu mekim olsem, yu ken bilip tru olsem yu bai “stap gut.”

9. Wanem ol samting inap mekim na i hatwok long Moses i inapim asainmen bilong em?

⁹ Moses “i ting sem em i kisim olsem Man em God i Makim, dispela i gutpela samting moa, winim ol samting i dia tumas bilong Isip.” (Hib. 11:26) Em i kamap “Man em God i Makim,” long wanem, Jehova i makim em long bringim lain Israel i kamaut lusim Isip. Em i save olsem em bai kisim sem taim em i mekim dispela wok. Wanpela man Israel i sutim tok long Moses olsem: “Husat i makim yu na yu kamap hetman na jas bilong mipela?” (Kis. 2:13, 14) Bihain, Moses yet i askim Jehova: “Olsem wanem bai king inap harim tok?” (Kis. 6:12) Em i tokim Jehova long ol samting em i pret na tingting planti long en, na long dispela rot em i redim em yet long kisim sem long wok em i mekim. Olsem wanem Jehova i helpim Moses long inapim bikpela asainmen bilong em?

10. Olsem wanem Jehova i redim Moses long inapim wok bilong em?

¹⁰ Namba 1: Jehova i tokim Moses: “Bai mi stap wantaim yu.” (Kis. 3:12) Namba 2: Jehova i strongim Moses taim Em i stori long mining i stap long nem bilong em, olsem: “Mi Bai Kamap Wanem Wanem Kain Mi Laikim.” a (Kis. 3:14, NW) Namba 3: God i givim strong long Moses long wokim ol mirakel we i soim klia olsem God yet i bin salim Moses. (Kis. 4:2-5) Namba 4: Jehova i makim Aron long kamap poroman na mausman bilong Moses, na helpim Moses long mekim wok bilong em. (Kis. 4:14-16) Klostu long taim Moses i dai, em i bilip tru olsem God i save redim ol wokman bilong Em long inapim wok Em i givim long ol, olsem na em i tokim Josua, em man i kisim ples bilong em, olsem: “Bikpela i stap wantaim yu na bai i go paslain long yu. Em i no inap lusim yu na larim yu i bagarap. Olsem na yu no ken surik na yu no ken pret.”—Lo 31:8.

11. Bilong wanem Moses i pilim tru wok em i kisim?

¹¹ Jehova i helpim Moses, olsem na Moses i pilim tru bikpela wok em bai mekim, na em i tingim dispela wok olsem “gutpela samting moa, winim ol samting i dia tumas bilong Isip.” Moses bai kisim wanem gutpela samting sapos em i mekim wok bilong Fero na em i no mekim wok bilong God? Na tu, Moses bai kisim wanem gutpela samting sapos em i stap prins long Isip na em i no stap olsem “Man em God i Makim”? Moses i amamas long wok em i kisim, olsem na em i kisim gutpela pe. Em i pas gut wantaim Jehova, na Jehova i strongim em long “mekim ol bikpela samting” taim em i bringim ol Israel i go long Graun Bilong Promis.—Lo 34:10-12.

12. Yumi mas amamas long Jehova i givim wanem ol wok long yumi?

¹² Yumi tu i gat wok long mekim. Jehova i yusim Pikinini bilong em long makim yumi long mekim wanpela wok, wankain olsem em i bin mekim long aposel Pol na ol narapela. (Ritim 1 Timoti 1:12-14.) Yumi olgeta i kisim gutpela wok bilong autim gutnius. (Mat. 24:14; 28:19, 20) Sampela i mekim wok olsem ol fultaim sevan. Ol brata i baptais na stap strong long bilip, ol i  mekim wok olsem kongrigesen sevan na elda na helpim ol arapela insait long kongrigesen. Tasol, famili bilong yu na ol narapela i no stap long tok i tru, ating ol inap luk daun long wok yu mekim, na semim yu long pasin bilong yu long daunim laik bilong yu yet. (Mat. 10:34-37) Dispela inap mekim na yu kisim 2-pela tingting olsem i stret yu daunim ol laik bilong yu yet, na yu inap tru long mekim dispela wok, o nogat? Sapos dispela samting i kamap, olsem wanem bilip inap helpim yu long stap gut yet long wok bilong yu?

13. Olsem wanem Jehova i save redim yumi long inapim wok em i givim long yumi?

¹³ Yu mas bilip na beten askim Jehova long helpim yu. Tokim em long ol samting yu pret na tingting planti long en. Jehova yet i makim yu long mekim wok bilong em, na em bai helpim yu long wankain rot olsem em i bin helpim Moses. Namba 1: Jehova i tok: “Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.” (Ais. 41:10) Namba 2: Em i kirapim yu long tingim olsem ol tok promis bilong em bai kamap tru, em i tok: “Mi tok pinis long mekim dispela ol samting, na bai mi mekim ol i kamap olsem mi tok. Ol samting mi makim pinis bilong mekim, em bai mi mekim.” (Ais. 46:11) Namba 3: Jehova i givim “strong i winim strong bilong yumi ol man,” bilong helpim yu long inapim wok bilong yu. (2 Kor. 4:7) Namba 4: Papa bilong yumi i laik helpim yu long stap gut yet long asainmen bilong yu, olsem na em i givim yu bikpela lain brata em ol i bihainim lotu i tru na ol i stap long olgeta hap, na ol i save “mekim isi bel bilong narapela narapela na strongim narapela narapela.” (1 Tes. 5:11) Taim Jehova i redim yu long inapim asainmen yu kisim long wok bilong em, bilip bilong yu bai kamap strong moa, na yu bai pilim tru olsem gutpela wok yu mekim i dia tumas na i winim tru olgeta gutpela samting bilong dispela graun.

14. Bilong wanem Moses i bilip olsem em bai kisim gutpela pe?

¹⁴ Moses “i tingting strong long gutpela pe em bai kisim.” (Hib. 11:26) Em i gat liklik save tasol long ol samting bai kamap bihain, tasol em i larim dispela save i stiaim tingting bilong em. Olsem tumbuna papa bilong em Abraham, Moses i bilip olsem Jehova inap kirapim bek ol man i dai pinis. (Luk 20:37, 38; Hib. 11:17-19) Moses i tingim ol blesing em bai kisim, olsem na taim em i stap ranaweman inap 40 yia, na stap narapela 40 yia gen long ples drai nating, em i no larim dispela i daunim em. Maski em i no save gut long olsem  wanem ol tok promis bilong God bai kamap tru, em i bilip olsem em bai kisim gutpela pe.

15, 16. (a) Bilong wanem yumi mas tingim gutpela pe yumi bai kisim? (b) Yu amamas long kisim wanem blesing taim Kingdom i bosim graun?

¹⁵ Yu “tingting strong long gutpela pe” yu bai kisim? Olsem Moses, yumi no save gut yet long olsem wanem ol tok promis bilong God bai kamap tru. Olsem: Yumi “no save long dispela taim God i makim” long traipela hevi tru bai kamap. (Mak 13:32, 33) Tasol, save bilong yumi i winim save bilong Moses long Paradais bai kamap long bihain. Maski i olsem, yumi save long planti tok promis long laip yumi bai kisim taim Kingdom Bilong God i bosim yumi, olsem na yumi mas “tingting strong” long en. Taim yumi piksaim laip long nupela taim, dispela bai kirapim yumi long painim Kingdom pastaim. Tingim: Yu ting yu bai baim wanpela haus sapos yu no save gut long dispela haus i wanem kain? Ating nogat, a? Olsem tasol, yumi no inap westim nating laip bilong yumi long kisim ol samting we i no inap helpim yumi. Yumi mas bilip, na piksaim long tingting laip bai wanem kain taim Kingdom i bosim graun.

¹⁶ Bilong kliagut long ol wok em Kingdom bai mekim, yu mas “tingting strong” long laip bilong yu long Paradais. Piksaim ol samting long tingting. Taim yu stadi long laip bilong ol bilipman em Baibel i stori long ol na ol i stap paslain long taim bilong ol Kristen, tingim ol askim yu bai givim long ol taim ol i kirap bek. Tingim ol askim ol bai givim long ol wok yu mekim long haptaim bilong las de. Tingim amamas yu bai kisim taim yu bungim ol lain tumbuna bilong yu, na yu skulim ol long ol samting God i bin mekim bilong helpim ol. Tingim amamas yu bai kisim taim yu lukim ol wel animal long naispela ples na yu kisim save long ol. Taim yu wok long kamap gutpela olgeta, yu bai pas gut moa wantaim Jehova.

17. Taim yumi tingim gutpela pe yumi bai kisim, olsem wanem dispela inap helpim yumi long nau?

¹⁷ Taim yumi tingim gutpela pe yumi bai kisim, dispela bai helpim yumi long stap strong yet long bilip, stap amamas, na mekim ol disisen we bai helpim yumi long kisim laip oltaim. Pol i tokim ol Kristen God i bin makim, olsem: “Yumi no lukim yet samting yumi bilip na wet long en, olsem na yumi mas wok yet long sanap strong na wetim dispela samting i kamap.” (Rom 8:25) Dispela stiatok inap helpim olgeta Kristen husat i bilip na wet long kisim laip oltaim. Bilip bilong yumi i strong moa, olsem na yumi no les kwik long wetim taim bai kamap na yumi kisim “gutpela pe.” Olsem Moses, maski yumi lusim hamas yia long mekim wok bilong Jehova, yumi no holim tingting olsem yumi westim taim, nogat. Yumi bilip olsem “ol samting yumi inap lukim long ai, em bilong sotpela taim tasol. Tasol ol samting yumi no inap lukim long ai, em bilong oltaim oltaim.”—Ritim 2 Korin 4:16-18.

18, 19. (a) Bilong wanem yumi mas wok strong long holimpas bilip? (b) Bai yumi stori long wanem samting long neks stadi?

¹⁸ Pasin bilong bilip i olsem, yumi “kliagut tru olsem samting [yumi] bilip long en em i samting tru, maski [yumi] no lukim long ai.” (Hib. 11:1) Sapos man i tingim mani kago, em i no inap luksave long gutpela samting em inap kisim taim em i mekim wok bilong Jehova. Em i tingim ol gutpela samting bilong lotu “olsem longlong samting.” (1 Kor. 2:14) Tasol yumi bilip na wet long kisim laip oltaim na lukim ol man i kirap bek—ol manmeri bilong graun i no luksave long ol dispela samting. Ol saveman i kolim Pol olsem “man bilong toktok nabaut,” na long nau, planti man i ting bilip yumi autim em longlong toktok.—Apo. 17:18.

¹⁹ Yumi stap namel long ol man i no gat bilip, olsem na yumi mas wok strong long holimpas bilip. Beten strong na askim Jehova long helpim yu na “bilip bilong yu i no ken pundaun.” (Luk 22:32) Tingim ol hevi em sin i kamapim, na ol gutpela blesing yu kisim taim yu mekim wok bilong Jehova, na laip oltaim em yu bilip na wet long en. Bilip bilong Moses i helpim em long luksave long samting we i gutpela moa. Long neks stadi, yumi bai stori long olsem wanem bilip bilong Moses i helpim em long lukim “dispela Man em ol man i no inap lukim long ai.”—Hib. 11:27.