1, 2. Yu save amamas long mekim ol disisen? Yu pilim olsem wanem long sampela disisen yu bin mekim?

 LONG olgeta de yumi mas mekim planti disisen. Yu save pilim olsem wanem taim yu laik mekim ol disisen? Sampela manmeri i laik bai ol yet i mekim disisen long olgeta samting. Ol i ting olsem ol i gat rait long mekim olgeta disisen bilong ol yet na ol i no laik bai ol narapela i mekim disisen bilong ol. Ol narapela i pret long mekim ol bikpela disisen. Sampela man i save ritim ol buk o askim ol saveman long givim sampela skultok long ol, na tu, ol i save lusim bikpela mani long kisim helpim ol i ting ol i nidim bilong mekim ol disisen.

² Planti bilong yumi i luksave olsem yumi no gat rait long mekim sampela disisen, tasol i gat planti disisen em yumi wan wan yet i mas mekim. (Gal. 6:5) Tasol ating yumi luksave olsem yumi no save bihainim gutpela tingting taim yumi mekim sampela disisen, na ol dispela disisen i no save helpim yumi.

3. Wanem ol tok inap helpim yumi long mekim ol disisen? Bilong wanem sampela taim i hatwok long save long disisen yumi mas mekim?

³ Yumi ol wokman bilong Jehova i ken amamas olsem em i skulim gut yumi long planti bikpela samting long laip bilong yumi. Yumi save olsem sapos yumi bihainim ol tok bilong Jehova, yumi inap mekim ol disisen we bai amamasim em na helpim yumi. Tasol kain kain hevi inap painim yumi, na Baibel i no kolim stret olgeta samting yumi mas mekim. Orait yumi mas mekim wanem long kain taim olsem? Olsem: Baibel i tok yumi no ken stil. (Efe. 4:28) Tasol sampela i tok i no gat rong sapos man i kisim wanpela samting bilong narapela man sapos em i liklik samting tasol, o sapos em i nidim tru. Olsem wanem yumi inap mekim disisen long ol samting we sampela man i tok Baibel i no kolim stret samting yumi mas mekim? Wanem samting inap helpim yumi?

4. Taim yumi laik mekim wanpela disisen, sampela taim ol narapela i save givim wanem skultok long yumi?

⁴ Taim yumi tokim wanpela wanbilip Kristen olsem yumi  mas mekim wanpela bikpela disisen, ating em bai tokim yumi olsem yumi mas bihainim gutpela tingting na mekim disisen. Dispela em gutpela skultok. Hevi inap kamap sapos man i hariap tumas long mekim disisen. Baibel i tok: “Sapos ol man i hariap tumas long mekim wok, bai wok bilong ol i no kamap gutpela na ol bai i sot long ol samting.” (Snd. 21:5) Tasol, olsem wanem man inap bihainim gutpela tingting na mekim disisen? Yu ting dispela i makim olsem yumi mas skelim gut ol samting, holim stretpela tingting, na traim long kliagut long olgeta samting paslain long yumi mekim disisen? Yumi mas mekim olgeta dispela samting, tasol i gat sampela samting moa yumi mas mekim.—Rom 12:3; 1 Pita 4:7.

5. Bilong wanem yumi no save bihainim gutpela tingting long olgeta samting?

⁵ I no gat wanpela man long graun i save bihainim gutpela tingting long olgeta samting. Yumi olgeta i gat sin kirap long taim mama i karim yumi, olsem na helt bilong yumi i no gutpela olgeta, na sampela taim yumi no save bihainim gutpela tingting. (Sng. 51:5; Rom 3:23) Na tu, Satan i bin “pasim tingting” bilong planti bilong yumi paslain long taim yumi kisim save long Jehova na ol lo bilong em. (2 Kor. 4:4; Tai. 3:3) Olsem na maski sapos wanpela man i lusim bikpela haptaim long wokim tingting paslain long em i mekim wanpela disisen, em inap yet long mekim rong disisen sapos em i bihainim tingting bilong em yet.—Snd. 14:12.

6. Wanem samting inap helpim yumi long bihainim gutpela tingting?

⁶ Maski yumi sinman, Jehova, Papa bilong yumi long heven i stretpela olgeta. (Lo 32:4) Em i givim yumi ol samting yumi nidim na bai yumi inap senisim tingting bilong yumi, na lain long bihainim gutpela tingting. (Ritim 2 Timoti 1:7.) Yumi ol Kristen i gat laik long wokim tingting, skelim gut ol samting, na bihainim stretpela tingting na mekim wok. Olsem na yumi mas lain long bosim gut ol samting yumi tingim na pilim long bel, na bihainim pasin bilong Jehova long olsem wanem em i save tingim na pilim ol samting long bel, na mekim ol wok.

7, 8. Kamapim wanpela ekspiriens we i soim olsem yumi inap mekim gutpela disisen maski ol narapela i putim presa long yumi o yumi gat hevi?

⁷ Tingim wanpela eksampel. Taim ol manmeri i go sindaun long narapela kantri, ol i save salim ol nupela pikinini bilong ol i go bek long ol wanblut long asples bilong ol. Long dispela rot, ol papamama inap stap yet long narapela kantri na mekim wok mani. a Wanpela meri i go sindaun long narapela kantri na em i karim naispela bebi boi. Dispela meri i kirap stadi long Baibel na em i bihainim ol tok em i lainim. Ol poroman na ol wanblut i tokim em na man bilong em long ol i mas bihainim kastam na salim bebi i go bek long ples na bai ol bubu i ken lukautim. Tasol meri i stadi long Baibel na em i kisim save olsem Jehova i givim wok long em wantaim man bilong em long lukautim pikinini. (Sng. 127:3; Efe. 6:4) Olsem wanem? Meri i mas bihainim dispela kastam, long wanem, olgeta i ting i stret long em i mekim olsem? O em bai bihainim save em i kisim long Baibel, maski liklik mani em i kisim bai i no inap long helpim em na ol arapela inap tok bilas long em? Bai yu mekim wanem sapos wankain samting i painim yu?

⁸ Dispela yangpela meri i tingting planti, long wanem, ol narapela i wok long putim presa long em. Olsem na em i beten na tokim Jehova long samting em i pilim long bel na em i askim Jehova long soim rot long em. Taim em i toktok wantaim Baibel tisa bilong em na ol narapela insait long kongrigesen, rot i op long em inap kliagut moa long tingting bilong Jehova long hevi bilong em. Na tu, em i luksave olsem pikinini bilong em bai bel hevi tru sapos em i stap longwe long papamama taim em i wok long kamap bikpela. Bihain long em i skelim gut tok Baibel i mekim long hevi bilong em, em i mekim disisen olsem i no stret long salim bebi i go long ples. Taim man bilong em i lukim olsem ol arapela insait long kongrigesen i kirap kwik long helpim ol, na bebi i stap gut na i gat gutpela helt, dispela i mekim na em i orait  long wanpela i ken stadi wantaim em long Baibel na em i kirap long go long ol miting wantaim meri bilong em.

9, 10. Olsem wanem man inap bihainim gutpela tingting? Olsem wanem yumi inap bihainim gutpela tingting?

⁹ Dispela eksampel i soim olsem sapos yumi bihainim gutpela tingting, orait yumi no inap bihainim nating tingting bilong yumi yet o tingting bilong ol narapela long wanem samting i stret. Yumi no gutpela olgeta, olsem na tingting na bel bilong yumi i mekim wankain wok olsem klok o hanwas, taim inap ron hariap tumas o ron isi tumas. Sapos yumi trastim dispela hanwas maski em i no wok gut, dispela inap kamapim bikpela hevi. (Jer. 17:9) Bilong abrusim ol hevi, yumi mas larim ol lo bilong God i stiaim ol samting yumi tingim na pilim long bel.—Ritim Aisaia 55:8, 9.

¹⁰ Baibel i kamapim gutpela skultok olsem: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Snd. 3:5, 6) Tingim, Baibel i tok “yu no ken ting save bilong yu yet inap helpim yu.” Na em i tok moa olsem, “yu mas tingting strong” long Jehova. Em wanpela tasol i save bihainim gutpela tingting long olgeta samting. Olsem na taim yumi laik mekim wanpela disisen, yumi mas skelim Baibel long painimaut tingting bilong God long dispela samting, na dispela bai helpim yumi long mekim disisen long wankain pasin olsem em bai mekim. Sapos yumi laik bihainim gutpela tingting, orait yumi mas bihainim tingting bilong Jehova.

11. Man i mas mekim wanem bilong kisim pasin bilong bihainim gutpela tingting na mekim disisen?

¹¹ I hatwok long lain long kisim pasin bilong bihainim gutpela tingting na mekim disisen na inapim samting yumi mekim disisen pinis long en. Na i hatwok moa yet long ol lain husat i baptais nupela o nau tasol ol i wok long kamap strong long tok i tru. Tasol i gat rot long ol inap kamap strong long tok i tru, na Baibel i kolim ol olsem ol “liklik pikinini,” long wanem, ol i olsem ol liklik pikinini husat i lain long wokabaut. Liklik pikinini i save kisim wan wan step na long dispela rot em i save lain long wokabaut. Na i wankain tu long ol man husat i lain long kisim pasin bilong bihainim gutpela tingting na mekim disisen. Aposel Pol i tok ol man i bikpela pinis em ol man husat i bin “yusim save bilong ol planti taim long skelim ol samting na long dispela rot ol i lainim  gut tingting bilong ol long kliagut long wanem samting i stret na wanem samting i no stret.” Ol dispela hap tok, “yusim save bilong ol planti taim” na “lainim gut,” i makim olsem oltaim yumi mas wok strong. Olsem na ol man husat i nupela long tok i tru, oltaim ol i mas wok strong long lain long kisim pasin bilong bihainim gutpela tingting na mekim disisen.—Ritim Hibru 5:13, 14.

12. Olsem wanem yumi inap lain long kisim pasin bilong bihainim gutpela tingting na mekim disisen?

¹² Yumi save mekim planti disisen long olgeta wan wan de. Yumi mekim disisen long ol bikpela samting na ol liklik samting. Sampela man i mekim wanpela wok painimaut na ol i tok taim yumi mekim ol disisen, planti taim yumi save bihainim pasin bilong yumi yet na yumi no save skelim gut ol samting. Olsem: Long olgeta moning yu mas mekim disisen long yu bai werim wanem klos. Ating yu bai ting em liklik disisen na yu no tingting planti. Tasol em i bikpela samting long yu mas skelim olsem klos yu werim i stret long wokman bilong Jehova i ken werim, o nogat. (2 Kor. 6:3, 4) Taim yu laik baim ol klos, ating yu tingting long baim klos i gat stail we planti man long nau i save laikim. Tasol olsem wanem? Yu ting dispela klos i soim olsem yu gat pasin daun na yu gat mani inap long baim? Pasin bilong mekim gutpela disisen long ol liklik samting inap helpim yumi long lainim gut tingting bilong yumi. Taim yumi mekim olsem, dispela bai helpim yumi long mekim ol stretpela disisen long ol bikpela samting.—Luk 16:10; 1 Kor. 10:31.

13. Wanem samting inap helpim yumi long mekim ol samting yumi pasim tok pinis long mekim?

¹³ Maski sapos yumi mekim stretpela disisen, sampela taim i hatwok long mekim ol samting yumi pasim tok pinis long mekim. Olsem: Sampela man i laik lusim smok, tasol laik bilong ol long lusim smok i no strong tumas long helpim ol long lusim dispela pasin. Yumi mas i gat strongpela laik long mekim ol samting yumi pasim tok pinis long mekim. Sampela i tok yumi inap strongim dispela laik long wankain pasin olsem yumi save strongim masol bilong bodi. Taim yumi yusim masol o mekim eksasais planti taim, masol bai kamap strong moa. Tasol sapos yumi no yusim planti taim, masol bai i no strong moa. Wanem samting inap helpim yumi long strongim laik bilong yumi long mekim samting yumi pasim tok pinis long mekim? Yumi mas askim Jehova long helpim yumi.—Ritim Filipai 2:13.

14. Olsem wanem Pol i kisim strong long mekim samting em i save olsem em i mas mekim?

¹⁴ Pol i tingim ekspiriens bilong em yet na em i save olsem i hatwok long mekim stretpela pasin. Em i bin tok em i laik mekim “ol gutpela pasin,” tasol sampela taim i hatwok long mekim olsem. Em i save long samting em i laik mekim na ol samting em i mas mekim, tasol sampela taim em i no inap long mekim ol dispela samting. Em i tokaut olsem: “Long bel bilong mi, mi laikim tumas lo bilong God. Tasol mi lukim olsem narapela lo i stap insait long bodi bilong mi. Na dispela lo i save pait wantaim lo i stap long tingting bilong mi. Na dispela lo bilong sin i wok long kalabusim mi.” Tasol em i gat rot bilong kisim helpim. Em i tok: “Mi tenkyu long God long rot bilong Jisas Krais, Bikpela bilong yumi!” (Rom 7:18, 22-25) Na em i tok moa olsem: “God i givim pawa long mi, na long dispela rot mi gat strong long mekim olgeta samting.”—Fili. 4:13.

15. Bilong wanem yumi mas i gat strongpela tingting long mekim pasin i stret?

¹⁵ Bilong amamasim God, yumi mas pasim tok long mekim stretpela pasin na yumi mas i gat strongpela tingting long mekim. Tingim tok Elaija i bin mekim long maunten Karmel long ol man husat i lotuim god Bal na ol Israel husat i lusim lotu i tru, em i tok: “Yupela manmeri bilong tupela tingting, wanem taim bai yupela i gat wanpela tingting tasol? Sapos Bikpela em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol.” (1 Kin. 18:21) Lain Israel i save olsem ol i mas lotuim Jehova wanpela tasol. Tasol ol i gat “tupela tingting,” long wanem, ol i traim  long lotuim Jehova na Bal wantaim. Josua i no bihainim pasin bilong ol. Planti yia paslain em i bin tokim lain Israel olsem: “Sapos yupela i no laik lotu long Bikpela, orait yupela i tingting gut nau. Bai yupela i lotu long husat? . . . Tasol mi wantaim famili bilong mi, mipela bai i lotu long Bikpela tasol.” (Jos. 24:15) Josua na lain i stap wantaim em i kisim wanem blesing? God i larim ol i go insait long Graun Bilong Promis, em “gutpela graun tru.”—Jos. 5:6.

16, 17. Yumi inap kisim wanem ol blesing taim yumi mekim disisen long mekim samting em Jehova i laik yumi mas mekim?

¹⁶ Wanpela brata husat i baptais nupela, em wantaim meri bilong em i gat 3-pela liklik pikinini. Em i mekim wok mani i gat liklik pe tru, tasol em i mekim dispela wok bambai em i stap fri long wiken na em inap go long ol miting na autim tok wantaim famili bilong em. Wanpela taim, wanpela wanwok i tokim em long ol i ken i go wok long narapela kampani na ol inap kisim bikpela pe na ol narapela gutpela samting. Brata bilong yumi i skelim gut dispela samting na em i beten askim God long helpim em long mekim disisen. Em i luksave olsem em i no inap stap fri long ol wiken sapos em i kisim dispela nupela wok. Yu bai mekim wanem sapos dispela samting i bin painim yu?

¹⁷ Brata i skelim pinis ol samting em disisen bilong em bai mekim long pasin bilong em long pas gut wantaim Jehova, olsem na em i no kisim dispela wok mani i gat bikpela pe. Yu ting bihain em i bel hevi long disisen em i bin mekim? Nogat. Em i no tingting tasol long kisim planti mani. Em i pilim olsem em i bikpela samting moa long em na famili bilong em inap i go klostu moa long Jehova. Dispela brata na meri bilong em i amamas tru taim pikinini meri bilong ol husat i gat 10-pela krismas, em i tok, em i laikim papamama bilong em, ol bratasista, na em i laikim tru Jehova. Dispela pikinini meri i tok em i laik dediket long Jehova na kisim baptais. Em i bihainim gutpela pasin bilong papa bilong em long putim pasin bilong lotuim Jehova i stap namba 1 samting long laip bilong em.

18. Bilong wanem em i bikpela samting long bihainim gutpela tingting na mekim ol disisen long olgeta de?

¹⁸ Moses i bin stiaim lain Israel taim ol i wokabaut long ples drai nating, na olsem tasol, inap planti yia nau Jisas Krais i stiaim lain bilong God long dispela haptaim em Satan i bosim. Klostu nau dispela haptaim bai pinis. Josua i bin kisim lain Israel i go insait long Graun Bilong Promis, na olsem tasol, Jisas bai kisim lain bilong em i go insait long nupela taim em God i bin tok promis long en na stretpela pasin tasol bai stap long en. (2 Pita 3:13) Dispela de i kam klostu nau, olsem na yumi no ken kirap gen long bihainim ol tingting, ol laik, na ol pasin yumi lusim pinis. Yumi mas kliagut moa long ol pasin em God i laik yumi mas bihainim. (Rom 12:2; 2 Kor. 13:5) Yu mas bihainim gutpela tingting na mekim ol disisen, na bihainim pasin we bai mekim na Jehova bai blesim yu inap oltaim oltaim.—Ritim Hibru 10:38, 39.