María Isabel em i wanpela yangpela pablisa long taun San Bernardo, long Sili, Saut Amerika. Em na famili bilong em i bilong lain Mapuche, em ol asples bilong dispela hap. Famili bilong em i bin helpim tru ol wok bilong kirapim nupela kongrigesen long tokples Mapuche, narapela nem bilong en em Mapudungun.

Taim ol i toksave olsem Memorial bilong tingim dai bilong Krais bai kamap tu long tokples Mapudungun na i gat 2,000 invatesen pepa bilong tilim long dispela tokples, dispela i kirapim tingting bilong María Isabel. Olsem wanem bai em i helpim dispela wok? Em i tingim ol gutpela ekspiriens bilong ol narapela yangpela Witnes em ol i bin autim tok long ol wanklas na ol tisa. Em i toktok wantaim papamama bilong em, na olgeta i wanbel olsem María Isabel i ken painim rot bilong tilim ol invatesen pepa long skul. Em bai mekim wanem?

Pastaim, María Isabel i kisim tok orait long ol hetman na hetmeri bilong skul long putim invatesen long bikpela geit bilong skul. Ol i givim tok orait long em na tok amamas long samting em i laik mekim. Long wanpela moning, long taim bilong kolim nem bilong ol sumatin, het tisa bilong skul i yusim laudspika long mekim toksave long dispela invatesen!

Bihain, María Isabel i askim long kisim tok orait bilong visitim olgeta klasrum. Taim em i kisim pinis tok orait na em i go visitim olgeta wan wan klas, em i askim sapos sampela bilong ol i bilong lain Mapuche. Em i tok: “Mi ting olsem bai i gat 10 o 15 sumatin tasol i bilong lain Mapuche, tasol i gat planti moa, olsem na mi tilim 150 invatesen pepa!”

Wanpela meri i lukim invatesen long geit bilong skul na em i laik toktok wantaim man husat i bin putim dispela toksave. Em i kirap nogut tru taim em i luksave olsem em bai toktok wantaim wanpela gel i gat 10-pela krismas! María Isabel i tok: “Em i ting em bai lukim man o meri i gat bikpela krismas.” Taim María Isabel i givim pinis invatesen pepa na stori liklik wantaim dispela meri, em i kisim atres bilong dispela meri bambai em na papamama i ken i go lukim dispela meri na stori moa wantaim em long Kingdom Bilong God. Bihain, 20 pablisa husat i mekim wok long teritori bilong tokples Mapudungun i amamas tru taim dispela meri wantaim 26 arapela manmeri bilong lain Mapuche i kam long bung bilong Memorial. Long nau, dispela grup i kamap kongrigesen!

Maski yu gat hamas krismas, yu ting yu inap bihainim wankain pasin olsem long invaitim ol wanskul o wanwok long kam long bung bilong Memorial, pablik tok, o kibung distrik? Yu ken skelim ol ekspiriens i stap long ol buk na nius bilong yumi na kisim sampela tingting long olsem wanem yu ken invaitim ol narapela. Na tu, beten askim Jehova long givim yu holi spirit bilong strongim yu long autim tok. (Luk 11:13) Sapos yu mekim olsem, yu bai kisim bikpela amamas long gutpela samting i kamap long wok yu mekim, na dispela bai strongim yu.