1, 2. Long dispela stadi bai yumi kisim wanem save long ol kibung?

 INAP planti yia, ol Witnes Bilong Jehova i save bung long ol kibung intenesenel na ol kibung distrik. Planti bilong yumi i bin go long ol dispela kibung, na ating yumi bin go planti taim.

² Planti tausen yia i go pinis, ol manmeri bilong God i bin i gat ol kibung. Nau bai yumi kisim skul long ol kibung bilong ol manmeri bilong God em Baibel i stori long en, na olsem wanem ol i wankain long ol kibung bilong yumi long nau. Na tu, bai yumi kisim save long as na i gutpela long yumi go long ol dispela kibung.—Sng. 44:1; Rom 15:4.

3. (a) Wanem samting i bin kamap long namba 1 kibung bilong ol manmeri bilong Jehova em Baibel i stori long en? (b) Olsem wanem ol Israel i save em taim bilong bung wantaim?

³ Namba 1 bikpela kibung em Baibel i stori long en, i bin kamap taim ol Israel i bung long as bilong maunten Sainai bilong kisim tok i kam long Jehova. Dispela em wanpela spesel bung tru long histori bilong lotu i tru. Jehova i soim pawa bilong em long ol Israel na givim Lo bilong em long ol. Em wanpela de ol bai i no inap lusim tingting long en. (Kis. 19:2-9, 16-19; ritim Kisim Bek 20:18; Lo 4:9, 10.) Long dispela de, senis i kamap long pasin bilong ol Israel long pas gut wantaim God. Bihain liklik long dispela kibung long maunten Sainai, Jehova i tokim Moses long rot bilong singautim ol manmeri long kam bung wantaim. Em i tokim Moses long wokim 2-pela biugel long silva. Taim ol i winim 2-pela biugel, ol Israel i save olsem ol i mas go bung long “dua bilong haus sel.” (Nam. 10:1-4) Tingim amamas bilong ol manmeri i bin i stap long ol dispela bung!

4, 5. Bilong wanem na ol kibung em Moses na Josua i bin oganaisim ol i bikpela samting?

⁴ Taim ol Israel i stap pinis long ples drai nating inap 40  yia, Moses i oganaisim wanpela kibung bilong olgeta Israel. Dispela kibung i bin kamap long wanpela bikpela haptaim long histori bilong nupela lain Israel. I no longtaim na ol bai go insait long Graun Bilong Promis, olsem na em i gutpela taim long Moses i kirapim ol Israel long tingim ol gutpela samting Jehova i bin mekim long ol na ol samting em bai mekim yet bilong helpim ol.—Lo 29:1-15; 30:15-20; 31:30.

⁵ Ating em long dispela taim em Moses i bin tokim ol manmeri olsem ol bai i gat wanpela spesel kibung. Long olgeta 7-pela yia, long taim bilong Ol Bikpela De Bilong i Stap Long Haus Win, olgeta man, meri, pikinini, na ol man bilong ol arapela kantri husat i stap namel long ol, ol i mas kam bung long ples Jehova bai makim. Long dispela hap ol bai kisim save long Lo bilong Jehova, dispela bai helpim ol long pret long em na bihainim tok bilong em. (Ritim Lo 31:1, 10-12.) I klia tru olsem Jehova i laik bai ol manmeri bilong em i bung wantaim bilong kisim save long ol lo na laik bilong em. Bihain, taim ol Israel i kisim Graun Bilong Promis, Josua i tokim ol long bung wantaim. Long dispela taim, ol lain haiden i stap long olgeta hap, olsem na Jehova i save ol Israel i mas kisim ol gutpela tok bilong strongim ol long i stap gut long em. Long dispela de, ol manmeri i mekim strongpela tok promis olsem ol bai lotu long God tasol.—Jos. 23:1, 2; 24:1, 15, 21-24.

6, 7. Wanem sampela bikpela kibung i bin kamap klostu moa long taim bilong yumi?

⁶ Na i kam klostu moa long taim bilong yumi i bin i gat sampela bikpela kibung. Long ol dispela kibung ol i bin tokaut long sampela senis long wok bilong oganaisesen na long tingting yumi gat long sampela tok bilong Baibel. (Snd. 4:18) Long 1919, ol Sumatin Bilong Baibel i bin mekim namba 1 bikpela kibung bilong ol bihain long Wol Woa 1. Dispela i bin kamap long Cedar Point, Ohio, Amerika, na 7,000 i bin bung. Long dispela kibung, ol i toksave olsem ol manmeri bilong God bai wok strong long autim tok long olgeta hap. Long 1922, long seim hap, ol i wokim kibung inap 9-pela de. Na Joseph F. Rutherford i mekim wanpela gutpela tok i strongim odiens long autim tok yet long olgeta hap i go inap long Bikpela Babilon i bagarap. Em i tok: “Olgeta manmeri i mas save, Jehova em i God na Krais Jisas em i King bilong olgeta king, na em i Bikpela bilong olgeta bikman. Dispela taim em i bikpela taim tru, winim olgeta arapela taim. Lukim! King i kirap pinis long wok! Yupela i man bilong autim tok bilong dispela samting. Olsem na yupela i mas autim tok, autim tok, autim tok bilong King na kingdom bilong em.” Dispela i mekim na olgeta i stap long kibung, na olgeta manmeri bilong God long olgeta hap, ol i kirap long wok strong moa long autim tok.

⁷ Long 1931, long kibung i kamap long Columbus, Ohio, ol Sumatin Bilong Baibel i amamas tru long kisim nem olsem ol Witnes Bilong Jehova. Long 1935, long Washington, D.C., Brata Rutherford i stori long “bikpela lain manmeri” i husat, em buk Revelesen i tok “ol i sanap i stap long ai bilong sia king na long ai bilong Pikinini Sipsip.” (Rev. 7:9-17) Bihain, long 1942, long taim bilong Wol Woa 2, Nathan H. Knorr i mekim wanpela tok “Gutaim Bai Stap o Nogat?” Em i kamapim klia “retpela wel animal” bilong Revelesen sapta 17 em wanem samting, na em i tok bai i gat bikpela wok yet long autim tok bihain long woa.

8, 9. Bilong wanem sampela bratasista i bin krai na amamas long sampela kibung?

⁸ Long kibung “Ol Lain i Amamas” long 1946, Brata Knorr i mekim tok “Ol Hevi Bilong Wokim Gen Bilding na Surikim i Go Bikpela.” Wanpela brata husat i bin stap long stes taim dispela tok i kamap, i bin stori long samting odiens i mekim. Em i tok taim Brata Knorr i tok long surikim Haus Betel na faktori long Brooklyn i go bikpela, odiens i paitim han gen na gen. Na maski em i stap longwe long odiens, em i luksave olsem ol i amamas tru. Long 1950,  long wanpela kibung intenesenel long New York City, odiens i amamas long kisim Baibel New World Translation of the Christian Greek Scriptures. Dispela em namba 1 hap bilong wanpela Baibel olgeta ol i wokim long Inglis bilong nau, na i putim nem bilong God i go bek long hap stret em i mas i stap long en.—Jer. 16:21.

⁹ Na tu, i gat ol kibung i bin kamap long sampela kantri we bipo ol i bin mekim nogut long ol Witnes Bilong Jehova o ol i bin tambuim ol long mekim wok inap sampela haptaim. Ol man i bin stap long ol dispela kibung i bin amamas na krai wantaim. Olsem, Adolf Hitler i tok em bai pinisim olgeta Witnes Bilong Jehova long Jemani. Tasol long 1955 long Nuremberg, 107,000 Witnes i kibung long seim hap we bipo Hitler na ol sapota bilong em i bin bung. Planti bilong ol bratasista i bung long dispela hap ol i krai, long wanem, ol i amamas nogut tru! Long 1989, 166,518 bratasista i bin go long 3-pela “Givim Bel Long God” Kibung Distrik i bin kamap long Polan. Planti ol i kam long hap em bipo ol i kolim Soviet Yunion na Sekoslovakia, na ol arapela kantri bilong Isten Yurop. Em namba 1 taim bilong sampela long kam bung we i gat moa long 15 o 20 manmeri bilong God. Na tingim amamas bilong ol bratasista i bung long 1993 “God i Skulim Yumi” Intenesenel Kibung long Kiev, Yukren, we 7,402 i bin kisim baptais. I luk olsem i no gat narapela de we namba bilong ol Witnes Bilong Jehova i kisim baptais i bikpela moa winim dispela de.—Ais. 60:22; Hag. 2:7.

10. Wanem ol kibung em bikpela samting long yu? Bilong wanem i olsem?

¹⁰ Ating i gat sampela kibung distrik o kibung intenesenel we em bikpela samting long laip bilong yu. Yu save tingim namba 1 kibung yu bin go long en o kibung we yu bin kisim baptais? Em ol bikpela samting insait long lotu yu mekim long Jehova, na yu no ken lusim tingting long ol. Em ol gutpela samting yu inap tingting bek long en!—Sng. 42:4.

11. God i tok ol Israel i mas go long wanem ol bikpela bung long olgeta yia?

¹¹ Jehova i tok olsem inap 3-pela taim long olgeta yia ol Israel i mas go long Jerusalem bilong mekim ol bikpela bung bilong lotu. Dispela ol bikpela bung em, Ol Bikpela De Bilong Bret i No Gat Yis, Bikpela De Bilong Amamas Long Kisim Kaikai Long Gaden (bihain ol i kolim Pentikos), na Ol Bikpela De Bilong i Stap Long Haus Win. God i tokim ol Israel: “Mi God, Bikpela bilong yupela, na mi makim dispela tripela bikpela lotu long wanpela wanpela yia na bai olgeta man bilong yupela i mas kam na lotu long mi.” (Kis. 23:14-17) Planti man i save olsem ol dispela bung em bikpela samting insait long lotu ol i mekim long Jehova, olsem na ol i kisim famili olgeta i go wantaim ol.—1 Sml. 1:1-7; Luk 2:41, 42.

12, 13. Planti ol Israel i mas mekim wanem bilong i go long ol bikpela bung long olgeta yia?

¹² Tingim ol samting wanpela famili Israel i mas mekim bilong i go long ol dispela bung. Olsem, Josep na Maria i mas lusim Nasaret na wokabaut i go 100 kilomita bilong kamap long Jerusalem. Sapos ol liklik pikinini i go wantaim  yu, orait yu ting bai yu lusim hamas de long kain wokabaut olsem? Taim yumi ritim stori long Jisas i go long Jerusalem taim em i stap mangi, yumi kisim save olsem sampela taim ol wanblut na ol pren i bin wokabaut wantaim. Piksaim long tingting raun bilong ol na wok ol i mekim bilong redim kaikai na painim hap we olgeta i ken slip long en. Yumi save rot ol i wokabaut long en i seif bikos papamama bilong Jisas i bin larim em long raun em yet, maski em i gat 12-pela krismas tasol. Ol manmeri, na moa yet ol yangpela, ol i no inap tru long lusim tingting long ol samting i bin kamap long ol dispela bung!—Luk 2:44-46.

¹³ Bihain long ol Israel i bin go nabaut long ol narapela narapela hap, ol manmeri husat i go long ol dispela bikpela bung i bin kam long ol narapela narapela kantri. Long Pentikos 33 C.E., ol Juda na ol arapela man i lotuim Jehova i bin lusim ol kantri olsem, Itali, Libia, Krit, Esia Maina, na Mesopotemia long i kam long Jerusalem. Dispela i soim olsem ol i tingim tru ol dispela bung.—Apo. 2:5-11; 20:16.

14. Ol Israel i bin pilim olsem wanem taim ol i go long ol bikpela bung long olgeta yia?

¹⁴ Long tingting bilong ol Israel husat i stap gut long God, nambawan bikpela samting bilong ol dispela bung em bilong bung wantaim planti tausen manmeri em ol tu i laikim tumas Jehova na lotuim em. Ol man i stap long dispela bung i pilim olsem wanem? Taim Jehova i toktok long ol manmeri bilong en long bung bilong Ol Bikpela De Bilong i Stap Long Haus Win, em i tok: “Yupela olgeta i mas amamas. Yupela yet wantaim ol pikinini na ol wokboi na wokmeri, na ol Livai, na ol man bilong narapela kantri i stap wantaim yupela, na ol pikinini, papa bilong ol i dai pinis, na ol meri, man bilong ol i dai pinis, yupela olgeta i stap long ol taun, yupela i mas i go long dispela wanpela ples bilong lotu God bai i makim. Na yupela i mas mekim lotu na litimapim nem bilong God, Bikpela bilong yumi. Yupela i mas tingting long Bikpela bai i mekim gaden na wok bilong yupela i kamap gutpela, na yupela i mas amamas tru.”—Lo 16:14, 15; ritim Matyu 5:3.

15, 16. Yu bin lusim wanem samting bilong yu yet bilong i go long ol kibung? Bilong wanem yu amamas long yu bin mekim olsem?

¹⁵ Ol bikpela bung ol i bin mekim long Jerusalem i stap olsem gutpela eksampel long ol manmeri bilong God long nau. Planti samting bilong ol kibung bilong yumi i wankain long ol bikpela bung ol i bin mekim long bipo. Olsem ol manmeri bilong God long taim ol i raitim Baibel, planti bilong yumi i mas lusim taim, strong, na mani samting bilong i go long ol kibung. Tasol yumi amamas long mekim, long wanem, yumi save ol kibung i save helpim yumi. Ol kibung i bikpela samting yet long wok lotu bilong yumi. Ol gutpela tok na save yumi kisim long ol kibung i strongim pasin bilong yumi long pas gut wantaim God. Ol kibung i save kirapim yumi long bihainim save yumi kisim long Baibel na i helpim yumi long abrusim ol hevi. Ol kibung i kirapim yumi long abrusim ol samting i mekim yumi tingting planti, na i kirapim yumi long putim tingting i go long ol samting em bai givim nupela strong long yumi na i no putim hevi long yumi.—Sng. 122:1-4.

¹⁶ Ol kibung i save givim amamas long ol man husat i go long ol. Wanpela ripot i stori long wanpela bikpela kibung long 1946 na i tok i gutpela tru long lukim planti tausen Witnes i amamas i stap na ol i bung long wanpela hap tasol. Na i gutpela moa yet long harim wanpela bikpela lain i pilaim ol instramen bilong mekim musik na odiens i singim ol song bilong preisim Jehova. Ripot i tok moa olsem i gat planti volantia i mekim wok long ol narapela narapela dipatmen. Ol i amamas long helpim ol bratasista bilong ol. Olsem wanem? Yu tu i bin pilim  dispela kain amamas long wanpela kibung distrik o kibung intenesenel?—Sng. 110:3; Ais. 42:10-12.

17. Wanem sampela senis i kamap long wei bilong oganaisim ol kibung?

¹⁷ I gat sampela senis i bin kamap long wei ol i oganaisim ol kibung. Olsem, sampela inap tingim taim ol i mekim kibung inap 8-pela de! Ol i gat program long moning, apinun, na nait. Na tu, ol i save wok autim tok long taim bilong kibung. Sampela taim program i kirap long 9 klok long moning na i pinis long 9 klok long nait. Ol volantia i wok hat inap planti aua bilong redim kaikai bilong olgeta, na ol i mekim long moning, belo, na apinun. Nau ol kibung i no longpela olsem bipo. Na klostu olgeta bratasista inap putim gut yau long program, long wanem, olgeta i redim kaikai bilong ol yet na bringim i kam long kibung.

18, 19. Wanem hap bilong ol kibung em yu save laikim moa yet? Bilong wanem?

¹⁸ I gat sampela hap bilong program yumi amamas tru long en na ol i bin stap hap bilong program inap longpela taim. Olsem, yumi kisim ‘kaikai long taim stret’ long rot bilong ol tok na ol nupela buk samting i helpim yumi long kliagut moa long ol tok profet na ol skul i kam long Baibel. (Mat. 24:45) Planti bilong ol dispela buk samting yumi inap yusim bilong helpim ol man long kisimgut ol tok i tru bilong Baibel. Ol Baibel drama i save helpim yumi olgeta, ol yangpela na ol lapun, long tingim gut as na yumi lotuim Jehova na long sakim tingting bilong dispela graun. Tok bilong baptais i helpim yumi olgeta long tingim nambawan bikpela samting long laip bilong yumi. Na yumi amamas long lukim ol arapela i kisim baptais bilong soim olsem ol i dediket long Jehova.

¹⁹ Inap planti tausen yia ol kibung i hap bilong lotu i tru. Ol i helpim yumi long i stap amamas, na stap gut long Jehova long taim bilong hevi na ol i strongim yumi long mekim moa yet wok bilong em. Ol kibung i opim rot long yumi long bungim ol nupela pren na i helpim yumi long save long pasin bilong i stap insait long wanpela famili i stap long olgeta hap bilong graun. Ol kibung i wanpela rot we Jehova i save blesim na lukautim ol manmeri bilong en. Yumi olgeta wan wan i laik strong tru olsem yumi no ken lusim wanpela hap bilong ol program bilong olgeta wan wan kibung.—Snd. 10:22.