Oltaim Laikim Jehova Long Bel Olgeta
Oltaim Laikim Jehova Long Bel Olgeta
“Pikinini bilong mi, yu mas save long God bilong papa bilong yu na mekim wok bilong em long bel olgeta.” —1 STO. 28:9, NW.
PAINIM BEKIM BILONG OL DISPELA ASKIM:
Bel inap makim wanem samting?
Olsem wanem yumi ken skelim bel bilong yumi yet?
Olsem wanem yumi ken mekim wok bilong Jehova long bel olgeta?
1, 2. (a) Planti taim Baibel i kolim nem bilong wanem hap bilong bodi? (b) Bilong wanem em i bikpela samting long yumi mas kliagut long dispela tok “bel” i makim wanem samting?
SAMPELA taim Baibel i save kolim wanpela hap bilong bodi bilong stori long narapela samting. Olsem, Jehova i bin tok: “Jerusalem . . . Mi wokim pinis piksa bilong yu na raitim nem bilong yu insait long tupela han bilong mi.” Profet Jeremaia i bin tok: “Yupela i gat ai, tasol yupela i no save lukim ol samting.” Jisas i bin tokim sampela olsem: “Tasol sapos long strong bilong pinga bilong God mi rausim ol spirit nogut, orait Kingdom bilong God i kam pinis na yupela i no luksave long en.” Na sampela i tokim Pol: “Yu kamapim ol tok i narapela kain long yau bilong mipela.”—Ais. 49:16; Jer. 5:21; Luk 11:20; Apo. 17:20.
2 Baibel ol i raitim long pastaim tru i kolim nem bilong wanpela hap bilong bodi planti taim, winim olgeta narapela hap bilong bodi, em dispela tok yumi tanim olsem “bel.” Gutpela meri Hana i beten olsem: “Bikpela, yu mekim [“bel bilong,” NW] mi i amamas moa yet.” (1 Sml. 2:1) Ol man bilong raitim Baibel i kolim dispela tok yumi tanim olsem “bel” klostu 1,000 taim, na planti taim em i no makim bel tru tru, nogat, em i makim narapela samting. Em i bikpela samting tru long yumi kliagut long mining bilong dispela tok “bel,” long wanem, Baibel i tok bel i save tingting oltaim long mekim pasin giaman, na yumi mas lukautim.—Ritim Jeremaia 17:9.
BEL I MAKIM WANEM SAMTING?
3. Olsem wanem yumi inap save long mining bilong dispela tok “bel” em Baibel i stori long en? Stori long tok piksa.
3 Baibel i no kamapim mining bilong dispela tok “bel,” tasol yumi inap kliagut long em i makim wanem samting. Olsem wanem yumi ken save? Tingim wanpela pilai jikso pasel i gat planti hap bilong en. Dispela pasel em piksa bilong wanpela naispela gaden o pak. Tasol bilong lukim gut dispela piksa yu mas joinim ol wan wan hap bilong pasel. Na i wankain long save long mining bilong “bel” insait long Baibel. Yumi mas skelim ol narapela narapela hap bilong Baibel we dispela tok i stap long en. Olsem na yumi laik save, “bel” i makim wanem samting?
4. (a) Long Baibel, dispela tok “bel” i makim wanem samting? (b) Wanem mining bilong Matyu 22:37?
4 Ol man bilong raitim Baibel i yusim dispela tok “bel” bilong makim yumi wanem kain man tru long insait. Em i makim ol laik, tingting, pasin bilong yumi, ol samting yumi inap mekim, ol samting i kirapim yumi, na ol mak yumi laik winim. (Ritim Matyu 9:4; Mak 9:10; Aposel 2:26.) Tasol sampela taim dispela tok “bel” i no makim ol dispela samting. Olsem, Jisas i bin tok: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.” (Mat. 22:37) Long dispela ves “bel” i makim filings na laik tru bilong man. Jisas i kolim ol samting wan wan olsem bel, laip, na tingting, long wanem, em i laik strongim tok olsem filings bilong yumi na ol samting yumi mekim long laip bilong yumi na wei yumi yusim tingting bilong yumi i mas kamapim olsem yumi laikim God. (Jon 17:3; Efe. 6:6) Tasol taim Baibel i kolim dispela tok “bel” tasol, em i makim yumi wanem kain man tru long insait.
AS NA YUMI MAS LUKAUTIM BEL BILONG YUMI
5. Bilong wanem yumi laik traim bes bilong yumi long mekim wok bilong Jehova long bel olgeta?
5 King Devit i bin tokim Solomon: “Pikinini bilong mi, yu mas save long God bilong papa bilong yu na mekim wok bilong em long bel olgeta wantaim amamas. Long wanem, Jehova i skelim bel bilong yumi olgeta, na em i save long olgeta tingting na laik bilong yumi.” (1 Sto. 28:9, NW) Jehova i save skelim bel bilong olgeta man, na bilong yumi tu. (Snd. 17:3; 21:2) Sapos Jehova i amamas long samting em i lukim long bel bilong yumi, orait yumi ken stap pren bilong em na kisim gutpela sindaun long bihain. Olsem na yumi laik bihainim tok bilong Devit na traim bes bilong yumi long mekim wok bilong Jehova “long bel olgeta.”
6. Yumi laik mekim wok bilong Jehova, tasol yumi mas luksave long wanem samting?
6 Wok yumi mekim olsem ol Witnes Bilong Jehova i soim olsem yumi laik mekim wok bilong God long bel olgeta. Tasol yumi luksave olsem dispela graun bilong Satan na sin i stap long skin bilong yumi inap pulim yumi na daunim laik bilong yumi long mekim wok bilong Jehova long bel olgeta. (Jer. 17:9; Efe. 2:2) Bilong dispela samting i no ken painim yumi, oltaim yumi mas skelim gut bel bilong yumi. Yumi ken mekim olsem wanem?
7. Wanem samting i kamapim klia samting i stap long bel bilong yumi?
7 I no gat wanpela man bilong graun i ken luksave olsem yumi wanem kain man tru long insait, wankain olsem man i no inap lukim insait bilong wanpela diwai. Long Bikpela Tok Long Maunten, Jisas i bin stori olsem kaikai diwai i karim inap soim olsem diwai i gutpela o i nogut. Olsem tasol ol samting yumi mekim i kamapim klia wanem samting i stap long bel bilong yumi. (Mat. 7:17-20) Nau yumi ken skelim wanpela samting yumi mekim i save kamapim ples klia laik i stap long bel.
ROT BILONG SKELIM BEL BILONG YUMI
8. Olsem Matyu 6:33 i tok, olsem wanem yumi kamapim klia samting i stap long bel bilong yumi?
8 Long Bikpela Tok Long Maunten, Jisas i tokim ol man long samting ol i mas mekim bilong kamapim laik bilong ol long mekim wok bilong Jehova long bel olgeta. Em i tok: “Wok yet long painim Kingdom pastaim na stretpela pasin bilong God na em bai givim olgeta dispela samting long yupela.” (Mat. 6:33) Samting yumi putim i stap namba 1 long laip bilong yumi i soim ples klia samting i stap long bel bilong yumi, olsem laik, tingting, na samting yumi plen long mekim. So wanpela rot we yumi ken save olsem yu mekim wok bilong God long bel olgeta o nogat, em bilong skelim gut wanem samting i nambawan samting long laip bilong yumi.
9. Jisas i bin singautim sampela man long mekim wanem? Samting ol i mekim i kamapim klia wanem samting?
9 Bihain liklik long Jisas i tokim ol disaipel long “wok yet long painim Kingdom pastaim,” wanpela samting i bin kamap na i soim olsem samting man i putim i stap namba 1, dispela i kamapim klia laik i stap long bel bilong em. Luk i tokim yumi olsem Jisas i strong long go long Jerusalem, maski em i save olsem bihain em bai karim pen long dispela hap. Taim em na ol aposel i bihainim rot i go long Jerusalem, Jisas i bungim sampela man na singautim ol long kamap disaipel bilong em. Ol dispela man i amamas long bihainim dispela singaut, tasol ol i laik mekim sampela arapela samting pastaim. Wanpela man i tok: “Larim mi i go pastaim na planim papa bilong mi.” Narapela man i tok: “Bikpela, mi bai bihainim yu. Tasol pastaim larim mi tok gutbai long ol wanhaus bilong mi.” (Luk 9:51, 57-61) Yumi ken luksave klia olsem pasin bilong Jisas long strong long bihainim laik bilong God i narapela kain olgeta long pasin bilong ol man husat i no strong long bihainim singaut bilong Jisas. Ol i tingim laik bilong ol yet pastaim, na dispela i soim olsem ol i no gat laik long mekim wok bilong God long bel olgeta.
10. (a) Yumi bin mekim wanem long singaut Jisas i givim long kam bihainim em? (b) Jisas i kamapim wanem tok piksa?
10 Samting yumi bin mekim i no wankain olsem ol dispela man. Yumi bihainim singaut bilong Jisas long kam bihainim em na nau yumi mekim wok bilong Jehova long olgeta de. Long dispela rot, laik yumi gat long Jehova long bel bilong yumi i kamap ples klia. Tasol tingim, maski yumi bisi long mekim wok bilong Jehova, yumi gat wok yet long lukautim bel bilong yumi, nogut hevi i painim yumi. Wanem hevi? Tok Jisas i mekim long ol man husat em i bin singautim ol long kamap disaipel bilong em i bekim dispela askim. Em i tok lukaut long ol olsem: “Man i putim han long tul bilong brukim graun na lukluk i go long ol samting i stap baksait, dispela man i no fit long i go insait long Kingdom bilong God.” (Luk 9:62) Dispela tok piksa i givim wanem skul long yumi?
YUMI SAVE “PAS TRU LONG GUTPELA PASIN”?
11. Long tok piksa bilong Jisas, wanem samting i kamap long wok bilong man i brukim graun? Bilong wanem dispela samting i bin kamap?
11 Yumi ken stori moa long tok piksa bilong Jisas na bai yumi ken kliagut moa long skul yumi kisim. Wanpela wokman i wok strong long brukim graun. Tasol taim em i wok long brukim graun, em i salim tingting i go long ples. Sapos em stap long ples em inap bung wantaim famili na ol pren na amamas long kaikai, harim musik, lap, na malolo long haus win. Em i laikim tru ol dispela samting. Taim em i wok longpela taim liklik, laik bilong em long ol dispela gutpela samting i kamap strong na em i tanim na lukluk i go long “ol samting i stap baksait.” I gat planti wok yet long mekim paslain long em i planim kaikai, tasol tingting bilong em i wokabaut na em i no mekim gut wok bilong em. Na bosman i bel hevi, long wanem, wokman i no mekim wok i go inap long wok i pinis.
12. Olsem wanem wokman long tok piksa bilong Jisas inap makim wanpela Kristen long nau?
12 Nau yumi ken skelim olsem wanem wankain samting inap kamap long nau. Wokman inap makim Kristen husat i luk olsem em i mekim gutpela wok, tasol Kristen i no lukautim gut tingting i stap long bel bilong em. Olsem, i gat wanpela brata i save go long ol miting na em i save mekim wok autim tok. Tasol long seim taim em i wok long tingim tingim ol samting bilong dispela graun em i laikim. Long bel, em i laikim tru ol dispela samting. Bihain long em i mekim wok bilong God inap sampela yia, laik bilong em long ol samting bilong dispela graun i kamap strong tru na em i tanim na lukluk i go long “ol samting i stap baksait.” I gat planti wok yet long mekim long autim tok, tasol tingting bilong em i wokabaut na em i no mekim gut wok bilong God olsem em i bin mekim long bipo. (Fili. 2:16) Jehova, “Bosman bilong bungim kaikai,” i bel hevi taim wanpela wokman bilong en i no mekim wok i go inap long wok i pinis.—Luk 10:2.
13. Pasin bilong mekim wok bilong Jehova long bel olgeta i makim wanem samting?
13 Skul yumi kisim em i klia tru. Bilong mekim wok bilong Jehova long bel olgeta, yumi mas go oltaim long ol miting na mekim wok autim tok, na i gat sampela samting moa long mekim. (2 Sto. 25:1, 2, 27) Sapos wanpela Kristen i wok long laikim yet “ol samting i stap baksait,” olsem ol samting bilong dispela graun, orait pasin pren bilong em wantaim Jehova inap bagarap. (Luk 17:32) Olsem na bilong mekim wok bilong God long bel olgeta, yumi mas “heitim tru pasin nogut” na “pas tru long gutpela pasin.” (Rom 12:9; Luk 9:62) Maski i luk olsem sampela samting bilong dispela graun bilong Satan i gutpela long mekim wok long en o i givim amamas, yumi no ken larim wanpela samting i pasim yumi long givim bel olgeta long wok bilong God.—2 Kor. 11:14; ritim Filipai 3:13, 14.
WAS I STAP!
14, 15. (a) Satan i mekim wanem bilong daunim pasin bilong yumi long givim bel long wok bilong Jehova? (b) Kamapim tok piksa i soim olsem wanem Satan i traim long giamanim yumi.
14 Pasin bilong laikim tumas Jehova i bin kirapim yumi long dediket long em. Inap longpela taim planti bilong yumi i bin kamapim ples klia olsem yumi strong long mekim wok bilong Jehova long bel olgeta. Tasol Satan i traim yet long pulim tingting bilong yumi. Na em i wok yet long traim bosim laik i stap long bel bilong yumi. (Efe. 6:12) Em i save olsem yumi no inap lusim Jehova wantu tasol. So em i traim yusim ol samting bilong “dispela taim” bilong nau long giamanim yumi na bai pasin bilong yumi long givim bel long wok i go daun isi isi. (Ritim Mak 4:18, 19.) Bilong wanem pasin giaman bilong em i wok gut?
15 Wanpela tok piksa inap helpim yumi long bekim dispela askim. Tingim olsem yu onim wanpela strongpela lait na yu ritim buk i stap na nau lait i go aut. Rum i tudak olgeta. Yu save lait i bagarap, olsem na yu senisim olpela lait na putim nupela lait i gat wankain strong na rum i lait gen. Long neks nait yu onim dispela lait gen. Tasol samting yu no save long en, em olsem, wanpela i bin kam senisim dispela lait na putim lait i no lait strong olsem yu bin putim. Ating yu no luksave olsem lait i no strong olsem bipo. Na long neks nait wanpela i kam gen na senisim dispela lait na putim narapela lait em strong bilong en i go daun liklik moa. Na ating yu no luksave yet olsem lait i no strong olsem bipo. Bilong wanem yu no luksave? Bikos isi isi lait i no strong olsem bipo. Long wankain pasin, ol samting bilong dispela graun bilong Satan inap mekim, na isi isi yumi no givim bel olgeta long mekim wok bilong Jehova olsem yumi bin mekim long bipo. Sapos Kristen i no was gut, em i no inap luksave long senis i wok long kamap long em, na Satan bai win.—Mat. 24:42; 1 Pita 5:8.
YUMI MAS BETEN
16. Olsem wanem yumi ken sakim Satan?
16 Olsem wanem yumi ken sakim Satan na mekim yet wok bilong Jehova long bel olgeta? (2 Kor. 2:11) Yumi mas beten. Bihain long Pol i strongim ol Kristen long “sanap strong na sakim ol pasin trik bilong Satan,” em i tokim ol long beten “oltaim” na “mekim olgeta kain beten na ol prea we [ol] i beten strong.”—Efe. 6:11, 18; 1 Pita 4:7.
17. Yumi kisim wanem skul long pasin bilong Jisas long beten?
17 Bilong stap gut long God, yumi mas bihainim pasin na laik bilong Jisas long mekim wok bilong Jehova long bel olgeta. Luk i bin stori long pasin bilong Jisas long beten long nait paslain long em i dai, em i tok: “[Jisas] i pilim hevi tru na em i kirap beten strong moa.” (Luk 22:44) Jisas i bin beten strong tru. Dispela i no namba 1 taim Jisas i bin beten strong, tasol nau bikpela traim tru bai kamap long em, winim ol arapela traim i bin kamap long em hia long graun. Olsem na em i beten “strong moa,” na Jehova i harim beten bilong en. Eksampel bilong Jisas i soim olsem sampela taim man i save beten strong moa. Olsem na taim ol traim i bikpela moa na Satan i strong moa long pulim yumi, orait yumi mas beten strong moa na askim Jehova long lukautim yumi.
18. (a) Yumi mas mekim wanem ol askim long yumi yet long pasin bilong yumi long beten? Bilong wanem? (b) Wanem samting inap helpim yumi long i stap strong? Long wanem ol rot? (Lukim boks long pes 16.)
18 Wanem samting bai kamap sapos yumi beten strong? Pol i tok: “Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God. Na dispela bel isi bilong God i winim tru tingting bilong man, em bai lukautim bel bilong yupela.” (Fili. 4:6, 7) Sapos yumi laik mekim wok bilong Jehova long bel olgeta, orait yumi mas beten strong na beten planti taim. (Luk 6:12) Askim yu yet: ‘Mi save beten strong? Mi save beten planti taim?’ (Mat. 7:7; Rom 12:12) Bekim bilong yu long ol dispela askim i soim olsem yu gat strongpela laik long mekim wok bilong God o nogat.
19. Bai yu mekim wanem bilong mekim yet wok bilong Jehova long bel olgeta?
19 Olsem yumi skelim pinis, ol samting yumi putim i stap namba 1 long laip bilong yumi, i kamapim klia laik i stap long bel. Yumi laik was gut bambai ol samting yumi lusim pinis na ol trik bilong Satan i no ken daunim laik bilong yumi long mekim wok bilong Jehova long bel olgeta. (Ritim Luk 21:19, 34-36.) Olsem Devit, yumi wok yet long beten strong long Jehova olsem: ‘Skulim mi na bai mi givim bel olgeta long yu.’—Sng. 86:11, NW.
[Askim Bilong Stadi]
[Blok long pes 16]
TRIPELA SAMTING I HELPIM YUMI LONG STAP STRONG
Yumi inap mekim ol samting bilong lukautim skin bilong yumi. Olsem tasol yumi inap mekim tu ol samting bilong lukautim tingting i stap long bel bilong yumi. Tingim dispela 3-pela bikpela samting:
1 Gutpela kaikai: Bodi bilong yumi i mas kisim ol gutpela kaikai bilong i stap strong. Long wankain pasin yumi save mekim stadi bilong yumi yet, tingim tingim long bel ol tok, na go long ol miting, ol dispela samting i olsem kaikai yumi mas kisim bilong strongim yumi long pas gut wantaim God.—Sng. 1:1, 2; Snd. 15:28; Hib. 10:24, 25.
2 Eksasais: Sapos yumi laik bai bodi i stap strong, orait sampela taim yumi mas mekim sampela strongpela eksasais. Olsem tasol, pasin bilong givim bel long autim tok—na sampela taim mekim bikpela wok moa—inap helpim laik bilong yumi long mekim wok bilong Jehova i stap strong.—Luk 13:24; Fili. 3:12.
3 Lain Yumi Stap Namel Long Ol: Yumi mas wok na stap namel long ol man nogut, na dispela inap putim planti presa tru long yumi na givim hevi long helt bilong yumi. Tasol yumi ken daunim sampela presa long rot bilong bung planti taim wantaim ol wanbilip. Ol wanbilip i save laikim yumi tru na ol i laikim God long bel olgeta.—Sng. 119:63; Snd. 13:20.
