Helpim Ol Man Long Kamap Strong Long Tok i Tru

“Stat long nau na i go, yu bai i gat wok long kisim ol man.”​—⁠LUK 5:⁠10.

1, 2. (a) Planti man i mekim wanem taim ol i harim tok Jisas i autim? (b) Bai yumi kisim save long wanem samting long dispela stadi?

 BIHAIN long Jisas na ol disaipel bilong em i mekim bikpela wok autim tok long Galili, ol i kalap long bot na go long wanpela hap i no gat man. Tasol planti manmeri i wokabaut na bihainim ol, ol “inap olsem 5,000 man, na ol i no kaunim ol meri na ol pikinini.” (Mat. 14:21) Long narapela taim, bikpela lain i kam long Jisas, long wanem, ol i laik bai em i oraitim ol na ol i laik harim tok bilong em. Inap olsem “4,000 man, na ol i no kaunim ol meri na ol pikinini.” (Mat. 15:38) Planti man namel long ol manmeri i kam long Jisas na ol i laik kisim save moa long ol tok em i autim. Tasol Jisas i save olsem planti arapela bai kisim tok i tru, long wanem, bihain long em i wokim mirakel na pulapim pis long ol umben bilong ol disaipel, em i tokim disaipel bilong em, Saimon: “Stat long nau na i go, yu bai i gat wok long kisim ol man.” (Luk 5:10) Jisas i tok, wok autim tok bilong ol i olsem wok bilong kisim pis. Em bai helpim ol long painim planti manmeri husat i laik kisim tok i tru. Na planti man i insait long dispela lain.

² Long nau tu, i gat ol man em ol i laikim ol tok yumi autim na ol i amamas long yumi stadi wantaim ol long Baibel. (Mat. 5:⁠3) Sampela i kirap kisim save long God, tasol ol i no wok long kamap strong long tok i tru. Olsem wanem yumi inap helpim ol? Taim Jisas i mekim wok autim tok, em i no yusim narapela kain pasin bilong autim tok long ol man na ol meri. Tasol em i laik helpim ol man, long wanem, i gat sampela samting i save mekim ol i tingting planti. Long dispela stadi, bai yumi kisim save long olsem wanem Jisas i helpim ol man, na olsem wanem yumi ken bihainim pasin bilong em na helpim ol man i karim hevi bilong dispela 3-pela samting: (1) tingting planti long sait bilong mani, (2) pret long ol man bai i gat wanem tingting, na (3) pilim olsem ol i no inap mekim sampela samting.

Tingting Planti Long Sait Bilong Mani

3, 4. (a) Planti man i ting wanem samting i bikpela samting moa? (b) Bilong wanem sampela man i ting wok na mani i bikpela samting moa winim pasin bilong stadi long Baibel?

³ Wanpela saveman long Lo Bilong Moses i tokim Jisas: “Tisa, mi bai bihainim yu long wanem wanem hap yu go long en.” Tasol Jisas i tokim em, “Pikinini bilong man i no gat ples bilong slip.” Baibel i no tok dispela man i bin kamap disaipel bilong Jisas. Ating em i tingting planti long em bai stap we o kaikai wanem samting.​—⁠Mat. 8:​19, 20.

⁴ Planti man i ting wok na mani i bikpela samting moa winim pasin bilong stadi long Baibel na bihainim ol tok bilong en. Bikpela samting long ol em long kisim yunivesiti digri na wok mani i gat bikpela pe. Ol i ting ol i mas i gat gutpela wok na mani bilong helpim sindaun bilong ol long wan wan de, na dispela i winim pasin bilong stadi long Baibel na pas gut wantaim God. Ating ol i laikim ol tok bilong Baibel, tasol “ol wari bilong laip long dispela taim, na strong bilong mani long giamanim man,” i pasim ol long kisim save moa long God na bihainim tok bilong em. (Mak 4:​18, 19) Skelim olsem wanem Jisas i helpim ol disaipel bilong em long tingim wanem samting i bikpela samting moa.

5, 6. Wanem samting i helpim Andru, Pita, Jems, na Jon long makim wanem wok i bikpela samting long ol?

⁵ Saimon Pita na brata bilong em Andru, ol i man bilong painim pis. Ol i wok wantaim Jon na brata bilong em, Jems, na papa bilong tupela, Sebedi. Wok bisnis bilong kisim pis i kamap gut, na  ol inap haiarim ol narapela man. (Mak 1:​16-20) Namba wan taim Andru na Jon i kisim save long Jisas em long rot bilong Jon Bilong Baptais, na ol i bilip olsem Jisas em i dispela Mesaia. Andru i tokim brata bilong em Saimon Pita, na ating Jon i tokim brata bilong em Jems. (Jon 1:​29, 35-41) Sampela mun bihain, olgeta 4-pela i go wantaim Jisas taim em i autim tok long Galili, Judia, na Samaria. Na bihain ol i go bek gen long wok bisnis bilong ol. Ol i laikim ol tok Jisas i skulim ol man long en, tasol wok autim tok i no bin stap olsem nambawan wok long ol.

⁶ Bihain, Jisas i askim Pita na Andru long bihainim em na kamap olsem “ol man bilong kisim ol manmeri.” Tupela i mekim wanem? “Kwiktaim ol i lusim umben bilong ol na bihainim em.” Jems na Jon i mekim wankain. “Wantu tupela i lusim bot na papa bilong ol, na tupela i bihainim em.” (Mat. 4:​18-22) Wanem samting i helpim ol dispela man long wokim disisen long kirap autim tok fultaim? Ol i bin tingting gut long dispela disisen. Inap sampela mun ol i bin raun wantaim Jisas na ol i harim ol tok em i skulim ol man long en. Na ol i lukim ol mirakel em i wokim na pasin bilong em long givim bel long mekim stretpela pasin. Ol i lukim olsem ol manmeri i laikim tru ol tok em i skulim ol long en. Dispela i mekim na bilip bilong ol long Jehova i kamap strong moa.

7. Olsem wanem yumi inap helpim ol Baibel sumatin long bilip strong long Jehova?

⁷ Olsem wanem yumi ken bihainim pasin bilong Jisas na helpim ol Baibel sumatin long bilip strong long Jehova? (Snd. 3:​5, 6) Pasin bilong yumi long mekim wok tisa inap helpim ol. Taim yumi stadi wantaim ol, yumi ken helpim ol long save olsem Jehova i promis long blesim yumi sapos yumi putim Kingdom pastaim. (Ritim Malakai 3:10; Matyu 6:33.) Yumi ken yusim Baibel bilong soim olsem wanem Jehova i save lukautim lain bilong em. Na yumi ken stori long ol long olsem wanem Jehova i bin helpim yumi, na dispela inap helpim ol tu long bilip long em. Na tu, yumi ken kamapim ol gutpela ekspiriens yumi ritim long ol buk na nius a bilong yumi.

8. (a) Bilong wanem em i bikpela samting long Baibel sumatin long ‘traim na lukim olsem Bikpela i gutpela tru’? (b) Olsem wanem yumi inap helpim Baibel sumatin long luksave olsem Jehova i gutpela tru?

⁸ Bilip bilong Baibel sumatin bai kamap strong sapos em i ritim na harim ol ekspiriens long olsem wanem Jehova i bin blesim ol narapela. Na tu, long laip bilong em yet, em i mas luksave olsem Jehova i mekim gut long em. Song 34:8 i tok: “Bikpela i save mekim gutpela pasin long yumi. Yupela yet i mas traim na lukim na bai yupela i save olsem Bikpela i gutpela tru. Man i save bilip tru long Bikpela, em i ken i stap belgut tru.” Olsem wanem yumi inap helpim Baibel sumatin long luksave olsem Jehova i gutpela tru? Ating wanpela Baibel sumatin i gat hevi long sait bilong mani, na tu, em i wok strong long lusim wanpela pasin i no stret, olsem smok, pilai laki, o dring planti. (Snd. 23:​20, 21; 2 Kor. 7:1; 1 Tim. 6:10) Yumi ken skulim em long beten askim God long helpim em long lusim dispela pasin. Taim laip bilong em i wok long kamap gutpela, em bai luksave olsem Jehova i gutpela tru. Na tu, yumi ken kirapim em long putim pasin bilong lotuim Jehova i stap nambawan long laip bilong em. Em i ken mekim olsem long rot bilong stadi long Baibel long olgeta wik, redim ol hap bilong miting, na go oltaim long ol miting. Taim sumatin i  lukim olsem Jehova i blesim ol hatwok bilong em, bilip bilong em bai kamap strong moa, na em bai i no wari tumas long ol arapela samting.

Pret Long Ol Man Bai i Gat Wanem Tingting

9, 10. (a) Bilong wanem Nikodemus na Josep bilong Arimatea i no tokaut olsem ol i disaipel bilong Jisas? (b) Bilong wanem sampela man long nau i surik long kamap disaipel bilong Jisas?

⁹ Sampela man i pret long ol man bai i gat wanem tingting long ol, olsem na ol i surik long kamap disaipel bilong Jisas. Olsem: Nikodemus na Josep bilong Arimatea i no bin tokaut olsem ol i disaipel bilong Jisas bikos ol i pret long ol narapela Juda bai tok wanem o mekim wanem long ol. (Jon 3:​1, 2; 19:38) I gat as na ol i pret. Ol bikman bilong lotu i heitim tru Jisas, olsem na sapos wanpela man i bilip long Jisas, ol bai rausim em long sinagog.​—⁠Jon 9:22.

¹⁰ Long sampela hap long nau, sapos wanpela man i soim olsem em i laik tru long kisim save long God, ol tok bilong Baibel, o long wanpela lotu, ating ol wanwok, pren na famili bilong em bai tok bilas na givim hevi long em. Long sampela hap, ating hevi inap painim wanpela husat i tokaut olsem em i laik senisim lotu bilong em. Na tu, sapos wanpela i insait long wok ami, politik, o i gat nem long komiuniti, em i kirap toktok long samting bilong lotu, ating ol narapela inap tok bilas long em. Olsem, wanpela man long Jemani i tok: “Ol tok bilong Baibel yupela ol Witnes i autim, em i tru. Tasol sapos nau mi kamap wanpela Witnes, long tumora olgeta man bai save long dispela. Ol wanwok, ol neiba, na ol lain husat i save long mi na famili bilong mi, ol bai kisim wanem tingting long mi? Mi no inap tru long karim kain hevi olsem.”

11. Olsem wanem Jisas i helpim ol disaipel bilong em long no ken pret long ol narapela bai gat wanem tingting long ol?

¹¹ Ol aposel bilong Jisas i gat strongpela bel. Tasol sampela taim ol i pret long ol man bai gat wanem tingting long ol. (Mak 14:​50, 66-72) Olsem wanem Jisas i helpim ol long kamap strong long tok i tru, maski ol man i bin birua long ol? Jisas i bin redim ol long ol hevi bai bungim ol. Em i tok: “Yupela i ken amamas taim ol man i heitim yupela, na givim baksait long yupela, na tok nogut long yupela na bagarapim nem bilong yupela olsem em i samting nogut. Sapos nem bilong mi i as na ol i mekim olsem, orait yupela i ken amamas.” (Luk 6:22) Em i tokim ol disaipel olsem ol bai bungim ol hevi, na as bilong dispela i olsem ‘nem bilong em’ i stap wantaim ol. Na oltaim God bai sapotim ol sapos ol i askim em long helpim na strongim ol. (Luk 12:​4-12) Na tu, Jisas i singautim ol narapela husat i bin kirap bihainim em long bung wantaim ol disaipel bilong em na kamap pren bilong ol.​—⁠Mak 10:​29, 30.

12. Olsem wanem yumi inap helpim Baibel sumatin long no ken pret long ol man bai i gat wanem tingting long em?

¹² Yumi tu i mas helpim ol Baibel sumatin long no ken pret long ol man bai i gat wanem tingting long ol. Wanpela rot yumi inap mekim olsem, em long helpim sumatin long save long samting em inap mekim taim ol man i birua long em. (Jon 15:19) Olsem: Ating ol wanwok na ol narapela i no wanbel long nupela bilip bilong em o ating ol i gat askim long dispela samting. Yumi ken helpim em long redim sampela sotpela bekim  long Baibel. Yumi ken kamap pren bilong em, na tu, helpim em long kisim save long ol narapela insait long kongrigesen, na moa yet ol bratasista husat i gat wankain laik na sindaun olsem em. Na em i bikpela samting long lainim em long beten oltaim na mekim ol beten em i pilim long bel. Dispela bai helpim em long go klostu long Jehova na Em bai stap olsem man bilong lukautim em.​—⁠Ritim Song 94:​21-23; Jems 4:⁠8.

Pilim Olsem Ol i No Inap Mekim Sampela Samting

13. Sapos wanpela brata i pilim olsem em i no inap mekim ol samting em ol arapela inap mekim, olsem wanem dispela inap pasim em long autim tok i tru?

¹³ Ating sampela man i pilim olsem ol i no inap mekim ol samting em ol arapela long kongrigesen inap mekim. Ating ol no inap rit gut, o ol i pilim olsem ol i no inap kamapim gut tingting bilong ol, o ol i man bilong sem. I hatwok long sampela man i autim laik na tingting bilong ol long ai bilong ol narapela. Olsem na i hatwok tru long ol i stadi, bekim tok long ol miting o autim tok long ol narapela. Wanpela brata i tok: “Taim mi yangpela, mi save go long dua bilong ol haus na giaman long paitim dua, na bihain wokabaut isi tasol i go na tingting strong olsem nogat man i lukim o harim mi. . . . Dispela tingting bilong i go long ol haus na autim tok i save mekim mi pilim sik nating.”

14. Bilong wanem ol disaipel bilong Jisas i no inap rausim spirit nogut long wanpela mangi?

¹⁴ Tingim samting ol disaipel bilong Jisas i mas pilim taim ol i no inap rausim spirit nogut long wanpela mangi. Ating ol i ting, ol i no inap tru long mekim samting em Jisas i laik bai ol i mekim. Papa bilong dispela mangi i kam long Jisas na tok: “Pikinini man bilong mi . . . i gat sik epilepsi na em i stap nogut tru. Planti taim em i save pundaun i go insait long paia na planti taim em i save pundaun i go insait long wara. Mi bringim em i kam long ol disaipel bilong yu, tasol ol i no inap oraitim em.” Jisas i rausim spirit nogut, na dispela mangi i kamap orait. Bihain, ol disaipel i kam long Jisas na askim em: “Bilong wanem mipela i no inap rausim dispela spirit nogut?” Jisas i bekim tok olsem: “Bilip bilong yupela i liklik, olsem na yupela i no inap. Mi tok tru long yupela: Sapos bilip bilong yupela i kain olsem sais bilong sid mastet, orait bai yupela i tokim dispela maunten, ‘Kirap na go long hap,’ na bai em i kirap na i go. Na bai yupela inap mekim olgeta samting.” (Mat. 17:​14-20) Sapos man i bilip long Jehova, orait em inap mekim samting we em i ting em i no inap mekim. Tasol sapos em i bilip long save bilong em yet, orait ol samting em i mekim i no inap kamap gut, na ating em bai pilim olsem em i no gutpela inap long mekim wok bilong Jehova.

15, 16. Olsem wanem yumi inap helpim Baibel sumatin husat i pilim olsem em i no inap mekim gut wok bilong Jehova?

¹⁵ Sapos Baibel sumatin i pilim olsem em i no inap mekim gut wok bilong Jehova olsem ol narapela, orait yumi ken strongim em long bilip olsem Jehova bai helpim em, na em i no ken tingting tumas long ol samting em i no inap mekim. Pita i tok: “Yupela i mas daunim yupela yet na stap aninit long strongpela han bilong God. Na long taim em yet i makim, em bai litimapim yupela. . . . Yupela i mas putim olgeta hevi bilong yupela long han bilong em.” (1 Pita 5:​6, 7) Yumi gat wok long helpim sumatin long kisim pasin bilong laikim tru Jehova. Dispela i makim olsem em i mas laikim ol samting em i lainim long Baibel na em i mas kamapim ‘ol pasin bilong holi spirit’ long laip bilong em. (Gal. 5:​22, 23) Pasin bilong beten i mas stap olsem bikpela samting long em. (Fili. 4:​6, 7) Na em i mas kliagut olsem God tasol bai strongim bel bilong em long mekim gut ol wok em God i laik bai em i mekim.​—⁠Ritim 2 Timoti 1:​7, 8.

 ¹⁶ Ating sampela sumatin i mas kisim helpim long pasin bilong rit gut na mekim gut ol tok. Ating sampela bai pilim olsem ol i no gutpela inap long mekim wok bilong Jehova bikos ol i bin mekim sampela pasin nogut paslain long ol i kisim save long God. Long kain sumatin olsem, yumi mas soim pasin laikim na no ken les kwik. Jisas i tok: “Ol man i no gat sik ol i no save go lukim dokta, tasol ol sikman ol i save go lukim dokta.”​—⁠Mat. 9:⁠12.

Helpim Planti Man Long Save Long Jehova

17, 18. (a) Olsem wanem yumi inap painim planti man moa taim yumi autim tok? (b) Bai yumi lainim wanem samting long stadi bihain?

¹⁷ Tok bilong Baibel tasol inap mekim ol manmeri i stap amamas tru, na yumi gat bikpela laik long helpim planti man moa long kisim save long Baibel. (2 Tim. 3:​16, 17) Olsem wanem yumi inap painim planti man moa taim yumi autim tok? Yumi ken mekim olsem taim yumi autim tok long ol apinun, o long holide taim planti man moa i stap long haus. Na sapos i stret, yumi ken askim sapos yumi ken toktok wantaim papa bilong haus, o yumi ken autim tok long man wanwok. Man bilong sampela sista insait long kongrigesen, ol i no Witnes, olsem na yumi ken traim long helpim ol dispela man na bai ol i gat laik long kisim save long tok i tru.

¹⁸ Yumi laik helpim planti manmeri long kisim save long tok i tru. Ol man husat i wok long painim tok i tru bai putim yau long tok yumi autim. Yumi mas i gat pasin bilong i no les kwik long helpim olgeta manmeri husat i laik save long tok i tru. Tasol wanem samting inap helpim ol baptais brata long i gat laik long lukautim sampela wok bilong kongrigesen? Stadi bihain bai bekim dispela askim.

[Futnot]

Bai Yu Bekim Olsem Wanem?

• Olsem wanem yumi inap helpim ol man long putim ol wok bilong Jehova i stap nambawan samting?

• Olsem wanem yumi inap helpim ol Baibel sumatin long no ken pret long ol man bai gat wanem tingting long ol?

• Olsem wanem yumi inap helpim man husat i pilim olsem em i no inap mekim gut wok bilong Jehova?

[Askim Bilong Stadi]

[Piksa long pes 25]

Yu save painim ol rot bilong autim gutnius long ol man?

[Piksa long pes 26]

Olsem wanem yu inap helpim Baibel sumatin long redi long karim ol hevi?